Read Kpelle Samia Veerɛi 14 Bible Online

Samia Veerɛi 14 - Kpelle bible

Samia Veerɛi 14

¹Zeruai ǹóŋ Zôa è nâa gɔ̀lɔŋ a gɛ́ɛ Deeƃé è kɛ̀ ŋ̀wɛ̂lii é Asalɔŋ káa a ŋ̀ánaa.

²Nya ƃe è worɛ̂ tɛ̀ɛ Tekoa a gɛ́ɛ dí táre nɛni da kɔ́ri naa mì. Ǹɛnîi páai, è mò mà ǹyɛɛi, “Maloŋ-too-maa seɣe tòo yâ í gɛ́ yɛ̂ɛ saa a tòo yâ. Ífe wúlɔ sìa yâ, kɛ́lɛ gɛ́ nɔ́ yɛ̂ɛ ǹya ƃe ya kɛ̀ saa wɔ̂lɔ kɛ̂i a tãi su koyâa.

³Lí gâloŋ pɔ́-naa í m̀ɛnii ŋí ƃó mà.” Zôa è m̀ɛnii kpîŋ pù ǹɛnîi lá a gɛ́ɛ é lí é m̀ó gâloŋ ma.

⁴Ǹɛnîi è lì é tóo gâloŋ kɔ́ɔ mu a ŋumɛ maa-pere ǹyɛɛ m̀ai, “Óo Gâloŋ, kpɔŋ maa tɛɛ ḿbɔ.”

⁵Gâloŋ ǹyɛɛ m̀ai, “Lé ƃé kɛ̀?” È ŋ̀óo su tòo ǹyɛɛ, “Gâloŋ, ŋ́gaa a pɔɔ-nɛ̂ni. Ŋásurɔ̂ŋ a saa.

⁶Ńônii-sinaai dí kɛ̀ feerɛ. Dí lɛ̀ɛ fîi ŋá laa-sâa é tóo díloai. Núu da fé kɛ́ ní náa é díŋaa kɔ́lɛ. Dɔnɔ è m̀arâŋ pàa.

⁷Kúkáa-laai su-ƃela kélee da dílii ŋwána dîyɛ ŋá ǹolôŋ tɛ́ɛ dípɔ nyíi m̀arâŋ paai a gɛ́ɛ dí bàa m̀arâŋ paa mɛni ma. Ǹyaŋ nyíŋi a kɛ̀, gɛ̀ ní kúsuui su a pâi lânii. Ŋásurɔ̂ŋ láa kpaa máŋ zuu da fé pâi lɛɛ̂i ɣele ma.”

⁸Nya ƃe gâloŋ è mò ǹɛnîi ma ǹyɛɛi, “Lí pôlu ípɛrɛi lá. Ŋa pâi lônoi é pîlaŋ yâ.”

⁹Tekoa nɛnii ǹyɛɛ gâloŋ mai, “M̀ɛnii yâ pâi m̀ôi maa mɛni a pâi kɛ̂i a ŋ̀ûa mɛni da kúkáa-laai su-ƃelai. Kɛ́lɛ ísɔ̂ŋ fé pâi kɛ̂i zu.”

¹⁰Gâloŋ ǹyɛɛ m̀ai, “Núu da a mɛni da ƃò yâ, pá a maa nuui ḿbɔ. Vé pâi ŋɔ́nɔ wɔ́lɔ lɛɛ̂i yâ.”

¹¹Ǹyɛɛ gâloŋ mai, “Ífoo a gɛ́ɛ ŋãa mɛnii ŋí gba fé kùla ńoŋ su fa lâa kara la.” Nya ƃe Gâloŋ è vòo ǹyɛɛi, “Ŋuŋ leɣa tɔnɔ kpîŋ fé pâi toôi ǹɔii ma. A kɛ̀ a kɛ̀ tí, gɛ̀ ní Yâwɛɛ fé ɣele ɣéniɛ.”

¹²Nya ƃe ǹɛnîi è mò ǹyɛɛi, “Tɔɔ íyee mu nuui é lóno ípɔ.” Gâloŋ ǹyɛɛ m̀ai, “Lóno.”

¹³Ǹɛnîii ǹyɛɛ m̀ai, “Lé mɛni nyɔ́mɔɔ ƃé ŋí yâ gɛ́ a Ɣâla ŋɔnûai? Kpɛni fêi, m̀ɛnii ŋí ŋáa téɛɛ yɛ̂ káa yɛ̂ɛ ísɔ̂ŋ a kɛ̀ zu, tãi nɔ́ ífe niî fáa ní la ma íloŋ é pá pôlui.

¹⁴Kúkelee kwa pâi saâi. Kúkaa nɔ́ yɛ̂ɛ yá a pù lɔii ma nyíi núu fa pɔri ŋɔ́nɔ ŋáa tɛ̂i gîe mai. Kɛ́lɛ Ɣâla fé pâi fúlu-laa kulâi kú yêei. A pâi mɛni kpɛtɛɛ kɛ̂i é pá a dîai da mɛni nyɔ́mɔɔ kɛ́ da pú da lí lɔii ŋuŋ da kpɛ́ni ŋa su pôlu. Dífaa kɛ̀ la ŋɛi pôlu.

¹⁵M̀ɛni ma, ŋá pà a gɛ́ɛ ŋá m̀ó yâ, kpɛ́ni fêi, ǹûai da gbɛtɛ̂i a gɛ́ɛ dí mɛni nyɔ́mɔɔ kɛ́ a ńyãa. Ŋa môi yâ. Tãi da ya pâi m̀ɛnii kɛ̂i ŋa wɛ̂lii í gɛ́ ḿîi.

¹⁶Ńâai la ya pâi ŋ́oo mɛnîi, í ŋ́gula yêei kɛ́ dîai yêei da wɛ̂lii dí ŋ́uŋ lá píli kwa ńoŋ, kúkɔ̃liŋ su é láŋ.

¹⁷Ŋá mò yɛɛi, ‘Ŋánuu-namui wóo a pâi gɛ̂i ŋá kɛ́ lii-see su, kpɛni fêi, gáa yɛ̂ɛ ɣâla-taa kela nyíi a pɔri mɛni nyɔ́mɔɔ da ǹɛ́lɛɛ loai kɔ̂lɔnii. Íɣâlai Yâwɛɛ é kɛ́ íkɔlɛ!’ ”

¹⁸Gâloŋ ǹyɛɛ ǹɛnîi mai, “M̀ɛnii kélee ŋa ímarê kɛ̀ mɛni mai, ífe da lòo ḿâ.” Ǹɛnîi ǹyɛɛ m̀ai, “Lóno ŋánuu-namui.”

¹⁹Gâloŋ ǹyɛɛ m̀ai, “Mɛni-ŋai ŋí kélee ya môi Zôa fé ípôlu?” Ǹɛnîi ǹyɛɛ mai, “Tãi nɔ́ íkaa la ɣele mai, fa pɔri kulâi íwoo mu, ŋánuu-namui. Zôa ƃé gɛ̀ ŋ́gɛ mɛni-ŋai kélee ƃò. Ǹyaa ƃé gélee pù ńa.

²⁰È gɛ̀ tí a gɛ́ɛ é wála-wala-laa pú mɛnii ŋí su. Kɛ́lɛ yá, ŋánuu-namui, í táreɛɛ̂i yɛ̂ɛ Ɣâla-taa kela, nyíi m̀ɛnii kélee kɔ́lɔŋ a kɛ̂ ǹɔii ma ƃɛ́i.”

²¹Nya ƃe gâloŋ è mò Zôa ma ǹyɛɛi, “Gáa, ŋa ŋuŋ ma ƃô tɛ̀ɛ ípɔ, lí í pá a Asalɔŋ.”

²²Zôa è ŋ̀uŋ ma pìlaŋ gâloŋ ŋɛ́i túɛ a ƃaa kɛ́ maa pere é lûwa tòo mà ǹyɛɛ, “Íyee mu-nuui aâ sâa ítûa-pere lɛ́lɛɛi kɔ́lɔŋ, gâloŋ, ŋánuu-namui, a ŋ́oo su-too.”

²³Nya ƃe Zôa è mù sìɣe é lí Gesɔ, é pá a Asalɔŋ Zerusâlɛŋ.

²⁴Gâloŋ ǹyɛɛ dîai, “Tɔɔ é kɛ́ ŋɔpɛ́rɛi mu. Vé pà ŋ́ɛi túɛ. Nya ƃe Asalɔŋ è kɛ̀ ŋɔpɛ́rɛi mu. Va kâa pà gâloŋ ŋɛ́i túɛ.”

²⁵Núu da fé kɛ́ ní Eezuɛ lɔii su é lɛ́lɛ yɛ̂ɛ Asalɔŋ. Pɔ́ɔ da kélee fé kɛ́ ní gbono ma.

²⁶A kâa ŋ̀uŋ ƃò a kóraŋ kpɛɛ ŋá tãi kélee. Ŋ̀uŋ lêɣa ŋɔwuyɛ a kâa kɛ̀ yɛ̂ɛ pãŋ lɔ́ɔlu ŋɔwuyɛ gâloŋ sɛŋ kɔɔ̂ŋ sɛŋ ŋá.

²⁷Asalɔŋ ǹônii sinaa dí kɛ̀ saaƃa nɛni-loo tɔnɔ. Ǹɛnî-looi láa ƃé kɛ̀ a Tâma. È kɛ̀ a nɛnî lɛ́lɛɛ.

²⁸Asalɔŋ è kɛ̀ Zerusâlɛŋ a kóraŋ feerɛ va lì ǹâŋ ŋɔpɛ́rei lá.

²⁹Nya ƃe Asalɔŋ è Zôa worɛ̂ tɛ̀ɛ a ɣele tɔnɔ da a gɛ́ɛ é dɛ́ɛ ǹâŋ pɔ́ naa, kɛ́lɛ Zôa fé pá ní. È ŋɔ́nɔ ŋ̀orɛ̂ tɛ̀ɛ a tãi veerɛ ɣelei, kɛ́lɛ vé gɛ́ ní.

³⁰Asalɔŋ è mò ǹyéɛ mu-ƃelai dîa ǹyɛɛi, “Zôa ŋɔkpâlaŋ káa nɔ́ ŋ́ɔi kɔlɛ ma. Bâlee támaa káa ǹyêei. Ka lí ká naa kéreŋ.”

³¹Nya ƃe Zôa è pà Asalɔŋ ŋɔpɛ́rɛi lá ǹyɛɛ m̀ai, “Íyee mu-ƃelai dí ŋɔŋ tòo ŋákpâlaŋ ma lé mɛni ma?”

³²Asalɔŋ è ŋ̀óo su tòo ǹyɛɛ m̀ai, “Gáa, ŋá íworɛ̂ tɛ̀ɛ a gɛ́ɛ í pá ŋá ítɛɛ ńâŋ pɔ́-naa. Lé ƃé gɛ̀ ŋ́gɛ kùla Gesɔ ŋ́gɛ pâi. Maa N ɛɛ̂i kɛ̀ ŋá lɛ́ɛ naa niî. Mɛni ma tɔɔ ŋá lí ńâŋ pɔ́-naa. À kɛ̀ ńzɔ̂ŋ káa mɛnii su é ḿbaa.”

³³Nya ƃe Zôa è lì é m̀ó gâloŋ ma. Gâloŋ è Asalɔŋ tòli é pá é ŋ̀uŋ maa pîlaŋ ŋ̀ɛ́i túɛ ǹɔii ma. È kpulɔŋ Asalɔŋ ma.