Read Kpelle Samia Veerɛi 15 Bible Online

Samia Veerɛi 15 - Kpelle bible

Samia Veerɛi 15

¹Nyíŋi pôlu ma Asalɔŋ è soo sia keleŋ-ŋa sìɣe soo-ŋa da kpakolo buu lɔ́ɔlu é dítɔɔ dúɛ díkɛ kîrɛ sìɣe dúɛ pere, ƃɛ́i kélee a kâa lì naai.

²A kâa mù sìɣe a ɣele ƃɔ̂i é tɔ́ɔ ziaŋ lá a núu da kàa pâi kɔlɔ-siɣe kɛ̂i gâloŋ ma, a m̀arê kɛ̀ ǹyɛɛ m̀ai, “Ǹúu suui nenɛ̂ ƃé í kùla zui?” A ǹúu-suui lɛ̀ mà è kùla zui.

³A pâi mòi ma ǹyɛɛi, “Ímɛni-sâai lɛ̂lɛɛi, gɛ́ ƃò a tɔ̃yâ kɛ́lɛ núu da fé gâloŋ kɔlɛ nyíi a pɔri ímɛni-sâai su kâai.”

⁴Ǹyɛɛ mai, “É kúla nyíŋi pôlu, eêi kɛ̀ ŋái kɛ̀ a kâloŋ ǹɔii ŋí ma núu da kélee eêi pà nɔ́ a ŋɔmɛni-saa-ŋai m̀ó ŋá ŋ̀áa tée ŋá m̀ó ma a gɛ́ɛ ímɛnii lɛ̂lɛɛi.”

⁵Núu da a kâa pà ƃɔ̀ naa a gɛ́ɛ é tóo gɔ́ɔ mu, a ǹyée tɛ̀ɛ maa nuui pôlu é kpulɔŋ ma.

⁶Asalɔŋ è mɛ̀nii ŋí kɛ̀ a dîai kélee pà a mɛni-saa gâloŋ pɔ́-naai. Mɛnii ŋí è gɛ̀ Eezuɛ-ŋai dámaa ɣele líi é pene Asalɔŋ pɔ́-naa pere.

⁷Kóraŋ náaŋ tɛ̀ɛ pôlu ma Asalɔŋ è mò ǹâŋ ma ǹyɛɛi, “Tɔɔ ŋá lí pôlu Iburɔŋ ŋá ŋákono-teei ŋ̀aa-see kɛ́ nyíi ŋá gɛ̀ Yâwɛɛ yêei.

⁸Tãi ŋá kɛ̀ la Gesɔ, Araŋ lɔii sui, ŋá mò Yâwɛɛ ma ńyɛɛi, ‘À kɛ̀ yà fàa ma ŋá lí pôlu Zerusâlɛŋ, ŋa pâi ífɛlîi Ibɔrɔŋ.’ ”

⁹Gâloŋ ǹyɛɛ m̀ai, “Lí lii-see su.” Nya ƃe è mù sìɣe é lí Iburɔŋ.

¹⁰Kɛ́lɛ Asalɔŋ è mɛni maa kpɛɛ-ƃela tɛ̀ɛ Eezuɛ lɔi su gwaa kélee ǹyɛɛ dîai, “Ka dúrii wóo mɛ̀ni ka m̀ó kâai, ‘Asalɔŋ a kɛ́ a kâloŋ Iburɔŋ lɔii mɛi.’ ”

¹¹Asalɔŋ è ƃɛlɛ-toli ƃò a Zerusâlɛŋ kpakolo ŋuŋ feerɛ. Ǹûai ŋí dífe kɛ́ ní a mɛni da kɔ́lɔŋɔɔ é pîlaŋ m̀ɛnii ŋí ma.

¹²Tãi è kɛ̀ zâla-láa soŋ-nuuii kulâi lai è Aitofɛ, nyíi kɛ̀ a Gilo-nuui worɛ̂ tɛ̀ɛ. È kɛ̀ a Deeƃé lia-woo ƃó-nuu. È kɛ̀ a Gilo taa-leei su nuu. Dɔɔ maai ŋí su è kɛ̀ kpananii núu támaa dí kɛ́ pà Asalɔŋ pɔ́-naa pere.

¹³Núu tɔnɔ da è pà Deeƃé pɔ́-naa ǹyɛɛ m̀ai, “Eezuɛ kpakolo-ŋai kélee líi a pene Asalɔŋ pɔ́-naa pêre.”

¹⁴Nya ƃe Deeƃé è mò ǹyée mu-ƃelai kélee dîa Zerusâlɛŋ ǹyɛɛ, “Ka kámu siɣe kú pú. À wàla kɛ́ tí kúfe pâi pɔrîi kulâi Asalɔŋ yêei. A pâi kúsu karâi é daai kéreŋ.”

¹⁵Dîyɛ mai, “Gâloŋ, kwa pâi mɛnii kélee kɛ̂i nyíi ya mò kûai.”

¹⁶Nya ƃe gâloŋ è tɔ̀ɔ dítuɛ-pere da ǹyée mu-ƃelai kélee. È ŋɔnɛyâa pɛlɛɛi buu lɛ̀ɛ naa a gɛ́ɛ dí bɛ́rɛi mɛi káa.

¹⁷Gâloŋ da ǹûai kélee dí lì dí kpéra daai-teei kpɛɛ-ŋa pɛrɛi lá.

¹⁸Ǹyée mu-ƃelai kélee dí tɔ̀ɔ gɔlɛ ma. Sereta-ƃelai, Peleta-ƃelai da Gita-ƃela ŋuŋ lɔ́ɔlu mɛi da (600) da dîa-ni dí kùla Gâai díkelee dí tɔ́ɔ dúɛ-pere.

¹⁹Nya ƃe è mò Ita ma nyíi da ŋɔnûai dí kùla Gitai ǹyɛɛi, “Kákaa kúpôlu lé mɛni ma? Ka lí pôlu. Ka lɛɛ gâloŋ Asalɔŋ kɔlɛ, kpɛ́ni fêi, kákaa a ŋɔ̃ya-ŋa. Ka pù ká kúla kálɔii su.

²⁰Wɛ́ɛ nɔ́ ƃé ká pà la. Ŋa pɔ̂ri gɛ̂i ká kɛ́ ƃò kúpôlu, ǹyaŋ ká kɛ́ gàa ńyãa kpîŋ fé ƃɛ́i kɔ́lɔŋ ŋa liî naai? Ka kánîa-pɛlɛɛi síɣe ka dîa-ni ká lí pôlu. Yâwɛɛ é ŋɔwɔ́lɔ-wɔlɔ wɛli kɛ́-maai da ŋɔkili-kɛ-zui lɛ́ kâa.”

²¹Kɛ́lɛ Ita è mò gâloŋ ma ǹyɛɛi, “Ƃɛ́i kélee ya pâi liî naai kwa pâi liî naa. A n nɛ̃ɛ ma kpîŋ í kɛ́ ɣele ma kpaa máŋ í sáa kwa pâi kɛ̂i íkɔlɛ. Kwa wàla gɛ́ tí gɛ̀ ni Yâwɛɛ fé ɣéniɛ n nɛ̃ɛ mî, kpaa máŋ ǹûwai gâloŋ a doôi mai vé sîŋ soŋ.”

²²Deeƃé ǹyɛɛ dîai, “Gɛ̀ ní ka tɛɛ kwaa lí.” Nya ƃe da dîa-ni dí lì é pɛ́lɛ dínîa-pɛlɛɛi kélee dîa.

²³Ǹûai kélee dí wɔ̀lɔ ɣelei-pere dí kɛ́ lì. Gâloŋ è Kidurɔŋ ya-loŋ tìyeŋ a dîa é lí a dia-ni v ɛɛ-kpalaŋ su pere.

²⁴Abiata da Zadɔ díkɛ̀ naa da Liva-ŋai kélee Gbanaŋ-woo-kɛɛ maa gãlai kɛ́ ƃò díyêei. Dí zèe é lɛ́ɛ la zu ǹûai kélee dí kùla daa-leei su.

²⁵Nya ƃe gâloŋ è mò Zadɔ ma ǹyɛɛi, “Tɛ́ a Ɣâla Gbanaŋ-woo-kɛɛ maa gãlai daa-leei su. À kɛ̀ Yâwɛɛ líi lâai ǹyêei a pâi pâi a ńyãa pôlu ƃɛ́ a gɛ́ɛ ŋá Gãlai ŋí da Yâwɛɛ ŋɔsua-kɔlɔ-pɛrɛi káa.

²⁶Kɛ́lɛ a mò ǹyɛɛ ǹíi fé láa ní ńyêei, gɛ̀ ní a pâi mɛnii kɛ̂i nyíi ǹɛ̂lɛɛi ŋ̀ɛ́i.”

²⁷Gâloŋ è mò máŋ zâla-láa soŋ-nuui láa soŋ-nuui Zadɔ ma ǹyɛɛi, “Gáa, ka íloŋ-surɔŋ Aimazi, Abiata da ǹóŋ-surɔŋ Zonetaŋ-ni ka lí pôlu daa-leei su lii-see su.

²⁸Ŋa pâi kámaa kpɛnîi ǹyái tîyenii v ɛɛ-kpalaŋ su lá é lɛ́ɛ la zu ŋá wóo mɛ́ni é kúla íla nyíi pâi ńii lâai.”

²⁹Nya ƃe Zadɔ da Abiata dí lì a Ɣâla Kpanaŋ-woo-kɛɛ maa gãlai pôlu Zerusâlɛŋ dí lɛ́ɛ naa.

³⁰Kɛ́lɛ Deeƃé è kɛ̀ Ɔle Yeei tɛ̂i gɛ́ wɔ̀lɔ, gɛ́ ƃò a gɔ́ɔ ŋá fòlo seɣe pɛlɛɛ ŋuŋ mɛi. Diai da dîa-ni dí kɛ̀ liî seɣe è kɛ̀ díŋuŋ mɛi dia-ni máŋ dí kɛ́ wɔ̀lɔ.

³¹Dí mò Deeƃé ma dîyeɛi, “Aitofɛ káa a Asalɔŋ ŋɔnûai dɔnɔ nyíi-ŋai dítɔɔ̂i yâi.” Deeƃé ǹyɛɛi, “Yâwɛɛ, tɔɔ Aitofɛ ŋɔmɛni kpɛtɛɛi da ǹia-wooi nyíi kélee a pâi gɛ̂i Asalɔŋ mì é kɛ́ a ƃoo mɛni.”

³²Deeƃé seriɛ́ɛ ǹyêei tôŋ su Ŋ̀âla fɛli kwaai mai, Aki naloŋ Usai è pà a gɛ́ɛ é ǹá koyâŋ ŋɔseɣei fála-falaa pɔ̂rɔ siaa ŋ̀uŋ ma.

³³Deeƃé ǹyɛɛ m̀ai, “À kɛ̀ kwa yá kwa lì a pâi kɛ̂i a kpîri ḿɛni ma.

³⁴Kɛ́lɛ à kɛ̀ yà lene pôlu daa-lêei su, m̀ó Asalɔŋ ma yɛ̂ɛi, ‘Óo gâloŋ, ŋa pâi kɛ̂i a íyee mu-nuu yɛ̂ɛ berei ŋá kɛ̀ la ínâŋ yée mui. Yà gɛ̀ tí, gɛ̀ ní ya pâi Aitofɛ ŋɔmɛni kpɛtɛɛi su karâi.

³⁵Ka zâla-láa soŋ-nuui láa soŋ-ƃelai Zadɔ da Abiata-ni ká kɛ́ kwaa tɔnɔ ma. Mɛni ma, mɛnii kélee ya mɛni é kúla gâloŋ ŋɔpɛ́rɛi mui, m̀ó dîa.’ ”

³⁶Da dílônii díkaa naa: Zadɔ ǹóŋ-surɔŋ Aimazi da Aiata ŋ̀ɔi Zonetaŋ. Mɛnii kélee ya mɛ̀nii m̀ó dîa dí pá dí m̀ó ḿâ.

³⁷Deeƃé ŋɔwɛli kɛ́-maa nuui Usai da Asalɔŋ dí tɛ̀ nɔ́ Zerusâlɛŋ a gîa.