Read Kpelle Samia Veerɛi 16 Bible Online

Samia Veerɛi 16 - Kpelle bible

Samia Veerɛi 16

¹Deeƃé kɛ́ɛ a ǹyéei yéŋ a da loŋ, da Mɛfebosɛ yée mu-nuui Zîba dí kòyaŋ. Zîba è kɛ̀ pâi a wɛlɛ-sôo feerɛ nyíi-ŋai kɛ̀ liî a zãâi ŋíi: kpólo kpua ŋuŋ feerɛ, kpɔmɔ-ƃa kane ŋuŋ tɔ̂nɔ (100), Fîi-wuru-ƃa kane ŋuŋ tɔ̂nɔ (100), é pɛ́lɛ sua-kɔlɔ gònoŋ tɔnɔ láa fɛ́ɛ a ŋwã̂ai.

²Gâloŋ è m̀arê kɛ̀ ǹyɛɛ m̀ai, “Í pà a zãai ŋí lé mɛni ma?” Zîba ǹyɛɛ m̀ai, “Ŋ̀wɛlɛ-sôo-ŋai díkaa gâloŋ ŋɔpɛ́rɛi mu-ƃelai mɛni ma a gɛ́ɛ dísee mɛi, gbóloi da Fîi-wuru-ƃa kanei kɛ́ ƃò ǹyaŋkpa-ŋai mɛni ma, ŋwã̂ai kɛ́ ƃò dîai mɛni ma pâi fôai vɛ̃ɛ-kpâlaŋ sui.”

³Gâloŋ ǹyɛɛ m̀ai, “Ínuu-namui ǹóŋ-surɔŋ kɔɔ?” Ziba ǹyɛɛ m̀ai, “È lɛ̀ɛ Zerusâlɛŋ. Kpɛni fêi, è mò ǹyɛɛi, ‘Eezuɛ-ŋai da pâi sâa ńâŋ ŋɔkâloŋ-laai tɛɛ̂i ḿbɔ pôlu.’ ”

⁴Gâloŋ è mò Ziba ma ǹyɛɛi, “Gáa, Mɛfebosɛ kɔ̃liŋ kélee káa nâa a ípɔɔ.” Ziba ǹyɛɛ m̀ai, “Íyee mu-nuui ƃa ńyãa. Mɛni kélee ya mòi ńii lâai mɛni ma.”

⁵Tãi Gâloŋ Deeƃé è pà la Bauriŋ, Sɔ̂ɔ ŋɔsuui su naloŋ tɔnɔ è pà bɔ́ naa. Ǹáa ƃé kɛ̀ a Simɛɛ, Gera ǹóŋ-surɔŋ. Gɛ́ɛ pâi, è kɛ̀ oôno Deeƃé ma,

⁶gɛ́ Deeƃé sɔ̀ɔ a kɔni da ǹyée mu-ƃelai é pɛ́lɛ ŋɔnamu kɔ́-ƃelai dîa nyíi-ŋai kɛ̀ siai ǹyée veerɛ mɛi-perei.

⁷Gɛɛ lônoi mai, è kɛ̀ môi ǹyɛɛi, “Lí, ínuu kpɛ́nii tíi, ŋãa káa íyee ma!

⁸Ŋãai í bù Sɔ̂ɔ ŋɔpɛ́rɛi mu í ŋɔkâloŋ-laai kúla ǹyêei, Yâwɛɛ káa naa íkula maa kɛ̂i. Aâ íkâloŋ-laai kúla íyêei a gɛ́ɛ é dɛ́ɛ íloŋ Asalɔŋ pɔ́. Gáa, ŋãa káa íyee ma, ísu a pâi karâi.”

⁹Nya ƃe Zeruia ǹóŋ Abisai è mò Gâloŋ ma ǹyɛɛi, “Ɣîla kpɔlu kɛ́ɛ ŋí a lônoi ŋánuu-namui ma lé mɛni ma? Tɔɔ ŋá lí ŋá ŋ̀uŋ tée.”

¹⁰Kɛ́lɛ gâloŋ è mò ma ǹyɛɛi, “Zeruai ǹônii, lé ƃé ŋá gɛ̀ a káa? À kɛ̀ Yâwɛɛ ƃé mò mà a gɛ́ɛ é lóno ḿâ, gbɛ̂ɛ ƃé naa é m̀arê kɛ́ ǹyɛɛ ma, ‘Ya gɛ̂i tí lé mɛni ma?’ ”

¹¹Deeƃé è mò ǹyée mu-nuui Abisai ma da m̀arâai ǹyɛɛi, “Gáa, ŋ́gbîŋ loŋ a wɛ̂lii é ŋuŋ lâ píli. Bɛŋsima ŋɔsuui su naloŋ ŋí ŋ̀ɔi káa a lé? Ka tée ma é ǹîa lono kɛ́, kpɛ́ni fêi, a gɛ̂i a Yâwɛɛ ŋɔwála-walai.

¹²Ɣele da Yâwɛɛ a pâi ŋámɛnii kpɔ̂lui kâai é mɛni lɛ́lɛɛ kɛ́ mî ǹónoi a gɛ̂i ḿâi m̀ɛni ma.”

¹³Nya ƃe Deeƃé da ŋɔnûai dí kùla naa dí lí. Kɛ́lɛ Simɛɛ è kɛ̀ nɔ́ dípôlu gɛ́ lòno mà, gɛ́ dísɔɔ a kɔni da pɔ̂rɔ kane.

¹⁴Deeƃé da ŋɔnûai dí sèriɛ́ɛ kɛ̀ Zɔdiŋ Ya-leei mai, dífii è kpɛ̀ɛ kpɔ́ a ŋ̀ánaa dí sée naa dí dífii tɔ́ɔ.

¹⁵Gɛ́ɛ tí Asalɔŋ da ŋɔkpakolo-ŋai kélee dí Zerusâlɛŋ da Aitofɛ-ni.

¹⁶Ǹyaŋ tãi Aki naloŋ Usai nyíi kɛ̀ a Deeƃé ŋɔwɛli kɛ́-maa nuui è pà la Asalɔŋ pɔ́-naa è mò ǹyɛɛi, “Gâloŋ lɛwo lâai é kôya! Gâloŋ lɛwo lâai é kôya!”

¹⁷Asalɔŋ ǹyɛɛ m̀ai, “Bere ƃé ya ítɔ̃yâ-laai lɛ̀ la íwɛli kɛ́ maa nuui Deeƃé mai? Lé ƃé gɛ̀ ka ǹyaa káfe lì nii?”

¹⁸Usai ǹyɛɛ m̀ai, “Kpao. Ǹúui kélee Yâwɛɛ da ŋɔnûai da díyee lɛ̀ mai, maa nuui ƃé kwa ǹyaa kwa kɛ̀ naa ŋ́gɛ ƃò bôlu.

¹⁹Naa pôlu ma ŋɔ́nɔ, gbɛ̂ɛ ƃé ŋa pâi tíi kɛ̂i mìi? Vé pâi kɛ̂i a ǹóŋ? Yɛ̂ɛ berei nɔ́ ŋá tíi kɛ̀ la ínâŋ mui, bere nɔ́ ƃé ŋa pâi tíi kɛ̂i la íyee mu.”

²⁰Nya ƃe Asalɔŋ è mò Aitofɛ ma ǹyɛɛi, “Lé ƃé kwa pɔri naa gɛ̂i? Íkili ŋa sía ma.”

²¹Aitofɛ ǹyɛɛ m̀ai, “Ínâŋ yée mu nɛyãai è dílɛ̀ɛ ŋɔpɛ́rɛi lá a gɛ́ɛ dí naa mɛi káai, díkɛ a ínɛyâa. Yà gɛ̀ tí, gɛ̀ ní íƃɛlɛ a pâi kpɛɛi ínâŋ koi. Gɛ̀ ní ǹyaŋ dîai kélee ípôlu díkponôi a pâi kpananiî.”

²²Nya ƃe è ƃûu tɔ̀ɔ Asalɔŋ mì ǹâŋ ŋɔpɛ́rɛi ŋ̀elei. Naa ƃé è nyìi naa a ǹâŋ ŋɔnɛyâai pɛlɛɛi kélee Eezuɛ-ŋai ŋɛ́i.

²³M̀ɛni-ŋai kélee Aitofɛ a kâa mòi a kâa kɛ̀ yɛ̂ɛ a ŋ̀uŋ maa pìlaŋ a Ɣâla. Ŋumɛ ḿâa è kɛ̀ mà ŋɔlia-woo ƃô-ŋai kélee mɛni ma è gɛ̀ Deeƃé ma da Asalɔŋ.