Read Kpelle Samia Veerɛi 17 Bible Online

Samia Veerɛi 17 - Kpelle bible

Samia Veerɛi 17

¹Aitofɛ è mò Asalɔŋ ma ǹyɛɛi, “Tɔɔ ŋá gbakolo-ŋai wála puu káo feerɛ (12,000) ɣɛ́ɛ zu kú sâa lɛɛ Deeƃé pôlu a gbínii.

²Ŋa pâi gâai tãi víi a kpɛ̀ɛ la gíli ŋá púɔɔi, ŋá màa yao é tóo. À kɛ̀ tí dîai kélee bôlui da pâi pûi. Ǹyaa tɔnɔ nɔ́ ƃé ŋa pâi baâi.

³Ŋá pá a ǹyée mu-ƃelai yɛ̂ɛ nɛnî-kpela a pà pôlu ŋɔsurɔ̂ŋ pɔ́-naa. Núu tɔnɔ nɔ́ ƃé ya pâi ŋuŋ lá pilîi, ǹúui gbéli-ŋai kélee dí lí lii-see su.”

⁴Ǹîa-wooi ŋí è Asalɔŋ líi làa da Eezuɛ nuu-pɔlɔ-ŋai kélee.

⁵Nya ƃe Asalɔŋ è mò ǹyɛɛi, “Ka Usai tóli ǹyaa máŋ é mɛnii mɛ́ni Aitofɛ a môi.”

⁶Usai è pà Asalɔŋ ǹyɛɛ m̀ai, “M̀ɛnii ká ŋí Aitofɛ a môi. Kú ŋɔlia-wooi síɣe? À wàla kɛ́ tí m̀ó.”

⁷Usai ǹyɛɛ m̀ai, “Ǹia-wooi nyíŋi Aitofɛ a gɛ̂i vé lɛ́lɛ ní.”

⁸Usai è mò ŋɔ́nɔ ma ǹyɛɛi, “Í gɔ́lɔŋ ínâŋ da ŋɔkɔ-kuluƃa-ŋai díwala-walai, dílii ŋŋwánaa yɛ̂ɛ dítala ƃé da ǹônii kùla ǹyêei. É kúla nyíŋi pôlu ínâŋ táreɛɛi kɔ́ kɔ́-mɛni su. Vé pâi fâai ma da ŋɔkɔ-kuluƃa-ŋai dí nyíi kwa tɔnɔ ma.

⁹Lônii ma ǹoɔɔ̂i ǹóa-ŋai da su kpaa máŋ kwa da ma. Tãi nɔ́ da pâi pɛlɛ̂i la íkɔ-kuluƃa-ŋai dîai da pâi mɛnii da pâi môi a gɛ́ɛ daâ ínûai yée mɛi ɣâle.

¹⁰Ǹyaŋ a kɛ̀ tí diai dílii kpeleɛi yɛ̂ɛ yala-sului, dífii a pâi kpɛɛ̂i kpɛ́ni fêi, Eezuɛ-ŋai kélee dí gɔ́lɔŋ a gɛ́ɛ ínâŋ wála-walai, ǹyée mu-ƃelai dí kɛ́ ƃò a ŋwàna lɔ̂ɔ-ƃela.

¹¹Kɛ́lɛ Ŋ̀âla-wooi ƃa a gɛ́ɛ Eezuɛ-ŋai kélee dí pá dí kpɔŋ díkîe ma ípɔ naa yɛ̂ɛ yúo su ŋãya a kpɔ́ŋ gîe ma, é kúla Daŋ é lí Bɛɛsiba, kwa dîa-ni kú lí gɔ́ ma.

¹²Kwa gáa da ŋɔkɔ-kuluƃa-ŋai, kwa pâi pûi dîa yɛ̂ɛ lúu a pù lɔii ma. Dítɔnɔ da kpîŋ fé pâi lɛɛ̂i a vúlu.

¹³À kɛ̀ da pù da lì daa-leei da su, Eezuɛ-ŋai kélee da pâi pâi a ɣɛli kú gbulɔ̂ŋ daa-leei kpîŋ ŋɔsiɣãŋ ma kú ŋ̀ála é lɛ́ɛ la zu kú lí la díŋ-tiŋ su. Ǹyaŋ kɔni-káo tɔnɔ kpîŋ fé pâi lɛɛ̂i naa.”

¹⁴Asalɔŋ da Eezuɛ-ƃelai kélee dí mò díkîɛ-ni laoi dîyɛɛi, “Aki naloŋ Usai ŋɔlia-wooi lɛ̂lɛɛi é tɛ́ɛ Aitofɛ ŋ̀ɔi ma.” Yâwɛɛ è ǹûai kíli-ŋa pù a gɛ́ɛ dí fé tàre Aitofɛ ŋɔlia-wooi su, kpɛ́ni fêi, è kɛ̀ pâi mɛni-kpɔ̂lu pûi Asalɔŋ ma.

¹⁵Nya ƃe Usai è lì a maa félaa zâla-láa soŋ-nuui láa soŋ-ƃelai Zadɔ da Abiata pɔ́-naa é ǹîa-wooi ƃó dîa Aitofɛ è gɛ̀i da ŋ̀ɔi.

¹⁶Ǹyɛɛ dîai, “M̀ɛni ma, ka núu tɛ́ɛ Deeƃé nɔ́ naa a maa félaa kâa mai, ‘Ífe sâa ǹyii vɛ̃ɛ-kpâlaŋ su ǹyái tîyenii. Kɔ́ í tɛ́ɛ naa a n nɛ̃ɛ ma mɛni kélee é kɛ́. À wàla kɛ́ tí da pâi ísu karâi ka ínûai kélee.’ ”

¹⁷Zonetaŋ da Aimazi dí lì Ɛŋ-rogɛɛ dí kɛ́ maa kpɛ̂ŋ kɛ̀. Nya ƃe luɛ nɛni-loo tɔnɔ è pà é m̀ó dîa dí lí dí m̀ó Deeƃé ma, kpɛ́ni fêi, dífe kɛ́ ní ŋ̀wɛ̂lii a gɛ́ɛ núu da é díkaa díkɛ tɛ̀ Zerusâlɛŋ.

¹⁸Kɛ́lɛ nyáŋkpa tɔnɔ è díkàa é lí é m̀ó Asalɔŋ ma. Nya ƃe dífeerɛ dí kùla naa kîrɛ dí lí nalôŋ tɔnɔ da pɔ́ Bauriŋ. Dí lì dí lɔ́ ǹalôŋ ŋí ŋɔya-loai su.

¹⁹Ǹalôŋ ŋɔnɛnîi è ǹyá-loai lá pɛ̀lɛ é sí-sɛŋ-káo pú mɛi a gɛ́ɛ é kpála núu da fa lâa díkaa la.

²⁰Asalɔŋ ŋɔnûai páa naai, dí ǹɛnîi marê kɛ̀ dîyɛɛ mai, “Aimazi da Zonetaŋ kɔɔ?” Ǹɛnîi ǹyɛɛ dîai, “Daâ ǹyá-loŋ tí tíyeŋ.” Tãi dí díkɔ̀ri la dífe díkaa niî, dí lì pôlu Zerusâlɛŋ.

²¹Dí liɛɛ pôlui, ǹûai dí kùla ǹya-loai su dí lí dí m̀ó gâloŋ ma dîyɛ mai, “Ímu siɣe í ǹyái tíyeŋ. Aitofɛ a mɛni nyɔ́mɔɔ kpɛ̀tɛ a pîlaŋ yâ.” Nya ƃe dí Aitofɛ ŋɔmɛni kpɛtɛɛ nyɔ́mɔɔi su kùla gâloŋ mì.

²²Nya ƃe Deeƃé è mù sìɣe da ŋɔkɔ-kuluƃa-ŋai kélee dí Zɔdiŋ Ya-leei tíyeŋ. Da fé lɛ̀ɛ ní Zɔdiŋ Ya-leei pôlu é lɛ́ɛ la zu ɣele é ƃɔ́.

²³Aitofɛ kɛ́ɛ a gɔ́lɔŋ a gɛ́ɛ ǹûai dífe ŋɔlia-wooi mɛni níi, ŋumɛ è gɛ̀. È zee-sɛŋ pɛ̀lɛ ŋɔwɛlɛ-sôoi mɛi é tɛ́ m̀ɛi é lí bɔ́-taâi. È ŋɔpɛ́rɛi mu mɛnii kélee kpɛ̀tɛ é lí é gbîŋ sɛ̂lɛŋ é sáa. Dí ǹoo ǹâŋ ŋɔkɔni ƃolôŋ su.

²⁴Nya ƃe Deeƃé è pà Maanaŋ. Asalɔŋ è Zɔdiŋ Ya-leei tìyeŋ da Eezuɛ kɔ-kuluƃa-ŋai kélee.

²⁵Asalɔŋ è Zôa kùla gɔ-kuluƃa-ŋai láa túɛ é Amasa pú naa. Amasa è wɔ́lɔ kɛ̀ a Eezuɛ-nuu. È Nãa ǹóŋ-nɛnii Aƃigee kùla a nɛnî. Aƃigee è kɛ̀ a Zôa ǹee Zeruia neɣê-nɛni.

²⁶Asalɔŋ da Eezuɛ-ŋai dí lì dí kɛ́ ƃò ƃûu su Gilia lɔii su.

²⁷Deeƃé páa Maanaiŋ, Amɔŋ naloŋ Sobi, Nãa ǹóŋ-surɔŋ nyíi kùla Laba taa-leei sui, Amiɛɛ ǹóŋ-surɔŋ Maka nyíi kùla Lodeba da Gilia naloŋ Bazilain nyíi kùla Logeliŋ dí pà dílaa tí Deeƃé ma.

²⁸Dí pà a zãâi ŋí: láa-sãa, sɛŋ-folo-ŋa, wîi, balee, felaƃa, mii-sãa ŋɔŋ da tɔɔŋ.

²⁹Dí ŋɔ́nɔ pà a kɔ̃iŋ kpaŋ da mii-sãa da kpɛ́ni-ŋa nyíi da gbɛ̀tɛ a ŋíni-ya da ƃála-ŋa. Dí mò dîyɛɛi, puru da kpele wɛ̂li díkaa ǹûai dîa dífii kɛ́ kpɛ̀ɛ vɛ̃ɛ-kpâlaŋ su.