Read Kpelle Samia Veerɛi 18 Bible Online

Samia Veerɛi 18 - Kpelle bible

Samia Veerɛi 18

¹Deeƃé è ŋɔkɔ́ kɔ́-ƃelai pù díkîe ma, é dílaa túɛ-ƃela tɔ̀ɔ dímɛi. È núu láa túɛ-nuu kɛ̀ kpakolo wála tɔnɔ mɛi, é dɔnɔ kɛ́ kpakolo ŋuŋ tɔnɔ mɛi tɛi-tɛi.

²È díŋaa kɔ̀lɛ díkpulu ma saaƃa. Gbulu tɔnɔ è kɛ̀ Zôa yée mu, dɔnɔ kɛ́ ƃò Zeruai ǹóŋ Abisai, Zôa ǹeɣê yée mu, gbélii kɛ́ ƃò Gita naloŋ Ita yée mu. Deeƃé ǹyɛɛ dîai, “Kwa káa-ni ƃé líî.”

³Kɛ́lɛ dí mò ma dîyɛɛi, “Ífe lì, kpɛ́ni fêi, kwa pù dífe pâi kpáani kúmɛni ma. Kúta a tela sàa dífe pâi kpáani m̀ɛni ma. Kɛ́lɛ ímaa mɛni kpanaŋɔɔ̂i é tɛ́ɛ kpakolo wála puu (10,000) ma. Mɛni ma, kɛ́ nɔ́ ƃɛ́ íkɛ kpɔŋ ḿâa tɛ̀ɛ kúpɔ.”

⁴Gâloŋ ǹyɛɛ dîai, “A kɛ̀ gáa a mɛni kpɛtɛɛ lɛ́lɛɛ gɛ̀ ní ḿvâai ma.” Nya ƃe Deeƃé è tɔ̀ɔ ziaŋ lá kɔlɛ ma gɛ́ gɔ-kuluƃa-ŋai kàa dí kɛ́ lì díkpulu ma.

⁵Gâloŋ è mò Zôa, Abisai da Itai ni dîa ǹyɛɛi, “Káfe mɛni da kɛ̀ a Asalɔŋ ḿɛni ma.” Gɔ-kuluƃa-ŋai kélee dí m̀ɛnii ŋí mɛ̀ni gâloŋ è mò dímɛi-ƃelai dîai é pîlaŋ Asalɔŋ mai.

⁶Gɔ-kuluƃa-ŋai dí lì dí kɔ́ pɛ́lɛ Eezuɛ-ŋai dîa. Dí pɛ̀lɛ dîa Ifiraŋ wolai su.

⁷Deeƃé ŋɔkɔ kuluƃa-ŋai dí Eezuɛ-ŋai yée mɛi ɣàle. Dí núu wála-wala buu feerɛ (20,000) pàa a ŋ̀elei tí.

⁸Ǹamui ŋí è taa-taa ǹɔii tí su gwaa kélee. Diai sàa ŋ̀olâi sui dí kɛ̀ a dɛ́ɛ dîai ma dí dípàa a ƃóa-sɔkpɔi.

⁹Asalɔŋ è pà é kúla Deeƃé ŋɔkɔ kuluƃa-ŋai dîa. È kɛ̀ ŋɔwɛlɛ-sôoi mɛi zooi è lɔ̀ la wúru woŋo kpaya-kpaya-ŋa loai ŋ̀uŋ é kánaŋ ŋ̀úru-woŋoi su é sɛ̂lɛŋ ŋwɛlɛ-sôoi é ǹɛɛ naa é lí.

¹⁰Ǹalôŋ tɔnɔ è gàa é m̀ó Zôa ma ǹyɛɛi, “Ŋá Asalɔŋ kàa sɛ̂lɛni wúru su.”

¹¹Zôa ǹyɛɛ m̀ai, “Yɛ̂ lé, í gàa? Lé ƃé gɛ̀ ífe bàa níi? Iî gɛ̀ tí ŋâi pâi káne kpua-kpua puu tɛɛ̂i ípɔ da kɔ-kuluƃa ŋɔseɣe mu ɣiri-ɣɛli.”

¹²Kɛ́lɛ ǹalôŋ è mò ma ǹyɛɛi, “À kɛ̀ kpîŋ é kɛ́ yɛ̂ɛ káne wála tɔnɔ (1,000) nyíi ya pɔri dɛɛ̂i ḿbɔ fa pɔri ńyee pɛlɛ̂i gâloŋ ǹóŋ ma, kpɛ́ni fêi, kú mɛ̀ni gɛ́ mò yâ, Abisai da Ita ma a gɛ́ɛ káta fé ǹyée pɛ̀lɛ Asalɔŋ ma ǹyaa gâloŋ mɛni ma.”

¹³È kula nyíŋi pôlu, ŋái mɛni da kɛ̂i la, ŋáfulu-laai eêi pâi kɛ̂i mɛni-kpɔ̂lu su. Mɛni da fa lôo gâloŋ ma. Yá máŋ kpîŋ iî pâi tɔɔ̂i ḿâ.

¹⁴Zôa è mò ǹyɛɛi, “Fé pâi tãi nina siɣêi nyíŋi ma.” Asalɔŋ è kɛ̀ niî a vúlu. Nya ƃe Zôa è kpála saaƃa sìɣe é Asalɔŋ sɔɔ la ǹíi-gbɛ̃ ma.

¹⁵Ǹyaŋkpa puui kɛ̀ a Zôa ŋɔkɔ́ kɔ́-sãai siɣe-ƃelai dí pà dí kɛ́ Asalɔŋ Sɔ̂ɔ a kpála-ŋa é lɛ́ɛ la zu é sáa

¹⁶Zôa è dúrii fɛ̀ɛ gɔ-kuluƃa-ŋai kélee dí kúla Eezuɛ-ŋai pôlu dí pá.

¹⁷Dí Asalɔŋ poma sìɣe dí bili lóa kpóŋ kóya tɔnɔ su ŋ̀olâi su, dí mɛi pɛ́lɛ dí kɔni-ŋa tɔ̀ɔ m̀ɛi. Gɛɛ tíi, Eezuɛ kɔ-kuluƃa-ŋai dí lì dípɔ-taai tɛi-tɛi.

¹⁸Asalɔŋ kɛ́ɛ ɣele mai è kɔni-kɔlɔŋ tɔ̀ɔ gâloŋ ŋɔpotoloi su ǹyɛɛi, “Lóŋ-surɔŋ fé ńyêei a gɛ́ɛ ŋa sàa ńaa é lɛ́ɛ ɣele ma.” È ǹáa sèe gwaai kpîŋ ma. Ǹáai ŋí è lɛ̀ɛ gwaai ŋí ma mà é lɛ́ɛ la zu dí gɔlɔi ŋí pɔ̃yɛ.

¹⁹Nya ƃe Zadɔ ǹóŋ Aimazi è mò ǹyɛɛi, “Tɔɔ ŋá lí a kîrɛ ŋá duŋ ƃó gâloŋ ma a gɛ́ɛ Yâwɛɛ aâ ŋ̀uŋ ma ƃó ŋɔkpɔara-ƃelai yêei.”

²⁰Zôa ǹyɛɛ m̀ai, “Ífa pɔri liî sâa a duŋ. Ya pâi liî a duŋ a ɣele da kpɛ́ni kɛ́lɛ sâa fêi, kpɛ́ni fêi, vé pâi kɛ̂i a tuŋ lɛ́lɛɛ gâloŋ mɛni ma, zukulâi ƃa gâloŋ ǹóŋ aâ sàa.”

²¹Zôa è mò Kusa naloŋ ma ǹyɛɛi, “Zɛŋ í gàai lí mɛni ƃó gâloŋ ma.” È pìlaŋ ŋ̀ume ŋá Zôa ŋɛ́i-tuɛ, é mu siɣe é lí a kîrɛ.

²²Zadɔ ǹóŋ Aimazi è mò ŋɔ́nɔ Zôa ma ǹyɛɛi, “A n nɛ̃ɛ ma mɛni kélee é kɛ́ nɛ̀ɛ naa ŋá láaŋ Kusa naloŋ ma.” Zôa ǹyɛɛ m̀ai, “Ńoŋ, ya pâi kîrɛ siɣêi lé mɛni ma? Ífe pâi fela-fei sɔlɔ ƃôi zu.”

²³È mò ma ǹyɛɛi, “Ńɛɛ naa ŋá lí. Ŋa pâi kîrɛ siɣêi.” Zôa ǹyɛɛ m̀ai, “Lí.” Aimazi è kîrɛ sìɣe é tɛ́ɛ a bere maa tiyeŋ perei é pîlaŋ Kusa naloŋ túɛ pere.

²⁴Deeƃé è kɛ̀ seêni galai feerɛi loai. Ǹúui kɛ̀ ǹaa mɛi kâai, è tɛ̀ m̀ɛi-pere. Gɛ́ɛ ŋ̀ɛ́i lâai è ǹalôŋ tɔnɔ kàa gɛ́ kîrɛ sìɣe gɛ́ pà dípɔ naa pere.

²⁵È gâloŋ tòli é m̀ó ma. Gâloŋ ǹyɛɛ m̀ai, “À kɛ̀ ǹyaa tɔ̂nɔ ƃé pâi, gɛ̀ ní a pâi a worɛ̂-woo lɛ́lɛɛ.” Ǹalôŋ è kɛ̀ lɛɣɛ̂i a dia.

²⁶Ǹalôŋ è ŋɔ́nɔ ǹúui dɔnɔ kàa gɛ́ pà a kîrɛ. È gâloŋ tòli é m̀ó ma. Gâloŋ ǹyɛɛ m̀ai, “Ǹyaa máŋ a pâi a tuŋ lɛ́lɛɛ.”

²⁷Ǹalôŋ ǹyɛɛ m̀ai, “Tuɛ-pere nuui káa yɛ̂ɛ Zado ǹóŋ Aimazi.” Gâloŋ ǹyɛɛ m̀ai, “Núu lɛ́lɛɛ ká tí. A pâi a tuŋ lɛ́lɛɛ.”

²⁸Aimazi pà ǹyɛɛ m̀ai, “M̀ɛnii kélee ŋ̀aa-see aâ kɛ́ a ǹɛ́lɛɛ.” È pìlaŋ ŋ̀ume ŋá é ŋ̀uŋ maa pîlaŋ ǹɔii ma ǹyɛɛ, “Lûwa é kɛ́ Íɣâlai Yâwɛɛ ma nyíi aâ íkula íkpɔara-ƃelai yêei.”

²⁹Gâloŋ ǹyɛɛ m̀ai, “Asalɔŋ kɔlɔ ponoɔɔ̂i?” Aimazi è ŋ̀óo su tòo ǹyɛɛ m̀ai, “Tãi ŋá kɛ̀ pâi lai laa-saa kɛ́tɛ è tèe ḿbôlu pere. Kɛ́lɛ fé gɔ́lɔŋ lé ƃé kɛ̀ naa pôlu ma.”

³⁰Gâloŋ ǹyɛɛ m̀ai, “Tínaŋ í tɔ́ɔ ƃɛ́.” Nya ƃe è tìnaŋ é tɔ́ɔ tɔŋ.

³¹Naa kɛ́ɛ tí Kusa naloŋ è pà ǹyɛɛ gâloŋ mai, “Tuŋ lɛ́lɛɛ káa ńyêei ímɛni ma. Ǹyaa ƃa Yâwɛɛ aâ íŋuŋ ma ƃó íkpɔara-nuui yêei nyíi-ŋai da tɔɔ yâi.”

³²Gâloŋ ǹyɛɛ m̀ai, “Asalɔŋ káa naa a vúlu?” È ŋ̀óo su tòo ǹyɛɛ m̀ai, “Tɔɔ m̀ɛnii kɛ̀ a Asalɔŋ é kɛ́ a íkpɔara-ƃelai kélee nyíi-ŋai dítɔɔi yâi.”

³³Nya ƃe gâloŋ líi è tòo pôlu a ŋ̀ánaa é lí a kîrɛ ŋɔtoŋ-poi su nyíi kɛ̀ ziaŋ mɛi-perei gɛ́ wɔ́lɔ. Gɛ́ɛ liî è kɛ̀ wɔ̂lɔi ǹyɛɛi, “Ńoŋ Asalɔŋ, Asalɔŋ, maa n ɛɛ̂i kɛ̀ ŋá sáa ípɔɔ ŋá ńoŋ Asalɔŋ.”