Read Kpelle Samia Veerɛi 19 Bible Online

Samia Veerɛi 19 - Kpelle bible

Samia Veerɛi 19

¹Dí mò Zôa ma dîyɛɛi, “Malôŋ toɔɔ̂i gâloŋ ma gɛ́ wɔ̀lɔ ǹóŋ mɛni ma.”

²Ŋ̀elei tí è kɛ̀ a maloŋ-too maa ɣele ǹûai mɛni ma nyíi-ŋai mɛni a gɛ́ɛ gâloŋ líi toɔɔ̂i pôlu ǹóŋ mɛni mai.

³Dí tɛ̀ daa-leei su dí m̀ɛi saa yɛ̂ɛ kɔ-kuluƃa-ŋa ƃé da díyee mɛi ɣále kɔ́ su màa ŋumɛ kɛ́ ƃò dîa.

⁴Gâloŋ è seɣe-ƃela pɛ̀lɛ ŋ̀ɛ́i gɛ́ wɔ̀lɔ a ŋ̀óo su kɛ́tɛ ǹyɛɛi, “Óo ńoŋ Asalɔŋ, oo ńoŋ Asalɔŋ, oo ńoŋ!”

⁵Zôa è lì gâloŋ pɔ́-naa bɛ́rɛi mu ǹyɛɛ m̀ai, “Yaâ íkɔkuluƃa-ŋai ŋ̀umɛ sâa. Yá tɔnɔ nɔ́ fé dí íŋuŋ ma ƃò, kɛ́lɛ ílônii da íyee mu nɛyãai kélee,

⁶kpɛni fêi, í íkpɔara-ƃelai wɛ́li ní é tɛ́ɛ dîai dîa dí íwɛli nii. Yaâ sâa ǹɛ́ kûa a gɛ́ɛ ílɔii maa kpɛ́-ƃelai da dílaa túɛ-ƃelai dímɛni fé kpanaŋ ní yâ. Ŋa gâai a gɛ́ɛ eêi kɛ̀ Asalɔŋ eêi lɛ̀ɛ ɣele ma kú sáa, eêi lâai ílii ma.

⁷M̀ɛni ma, ímu siɣe lônii ma í lóno íkɔkuluƃa-ŋai pɔ́ a ǹɛ́lɛɛ. Ya wàla lí, Yâwɛɛ fé ɣéniɛ nɛ̃ɛ mî dítɔnɔ da fé pâi lɛɛ̂i íkɔlɛ tínaa. M̀ɛni kpɔ̂lui yâ pâi tɛɛ̂i zui a pâi tɛɛ̂i nyíi-ŋai dîa ya wɔ́lɔ tɛ̀ɛ zui.”

⁸Nya ƃe gâloŋ è mu sìɣe é lí ziɣãŋ lá é sée naa. Gɔ-kuluƃa-ŋai dí mɛ̀ni dí lí naa bɔ́-naa.

⁹Dí kɛ̀ m̀ôi dîyɛɛi, “Gâloŋ è kúŋuŋ ma ƃò Felesia-ŋai yêei da kúkpɔara-ƃelai da kpɛ́ni-ŋai, ǹyaa ká a pú ǹóŋ Asalɔŋ yêei a kùla ǹɔii ma.

¹⁰Kɛ́lɛ Asalɔŋ nyíi kú kúyee lɛ̀ mà dí wúlɔ pú ŋ̀ûai a saa kɔ́ su. Lé ƃé kúfa pere kɔ̂ri kú pá a gâloŋ pôlui?”

¹¹Deeƃé è zâla-láa soŋ-ƃelai Zadɔ da Abiata worɛ̂ tɛ̀ɛ ǹyɛɛ dîai, “Ka m̀ó Zuda-ŋai dîa kâai, ‘Kákaa a ǹûa gbɛɛ ŋái a gɛ́ɛ ká pá a ńyãa pôlu ḿbɔ-taai lé mɛni ma? Ka gâai Eezuɛ-ŋai kélee da pá ḿbɔ-naa.

¹²Kákaa a ŋásuui su-ƃelai da, ká kɛ́ ƃò a ŋ́gao da núu da. Gɛ̀ ní kákaa a ǹûai gbɛɛ ŋái ká pá a ńyãa ḿbɔ-taai lé mɛni ma?’ ”

¹³Ka m̀ó Amasa ma máŋ kâa mai, “Ífe a ŋ́gao da núu da? Ɣâla é ŋ́gula maa kɛ́ à kɛ̀ fé pâi íkɛ̂i ŋákuluƃa-ŋai láa túɛ Zôa pɔ́ɔ ŋá.”

¹⁴Zuda-ƃelai kélee dí díwoo kɛ̀ zu tɔnɔ dí worɛ̂ tɛ̀ɛ gâloŋ pɔ́-naa dîyɛɛ m̀ai, “Ka íyee mu-ƃelai kélee ka pá.”

¹⁵Gâloŋ kɛ́ɛ pâi bɔ́-taai, è sèri Zɔdiŋ Ya-leei lá. Zuda-ƃelai dia-ni máŋ dí lì dí kɛ́ maa kpɛ̂ŋ Geega a gɛ́ɛ dí ǹyái tíyeŋ la.

¹⁶Bɛŋsima suui su naloŋ Gera ǹóŋ-surɔŋ Simɛɛ nyíi kùla Bauriŋ è kɛ̀ Zuda-ŋai sáma nyíi-ŋai lì a gɛ́ɛ dí Deeƃé lá koyaŋ.

¹⁷Ǹyaa máŋ è pà a kpakolo wála tɔnɔ (1,000) nyíi-ŋai kùla Bɛŋsima ŋɔsuui sui. Sɔ̂ɔ yée mu-nuui Ziba è ǹônii-sinaa puu káo lɔ́ɔlui sìɣe da ǹyée mu-ƃela buu feerɛ dí pá Deeƃé lá koyânii Zɔdiŋ Ya-leei lá.

¹⁸Dí gâloŋ tìyeŋ da ŋɔnûai é pɛ́lɛ ǹyée ŋá sãa kélee ma dí tela m̀ɛnii kélee kɛ́ nyíi kɛ̀ a ǹáa ǹíi mai. Deeƃé kɛ́ɛ pâi ǹyái tîyenii, Simɛɛ è tòo gɔ́ɔ mu

¹⁹ǹyɛɛ m̀ai, “Ńzu mɛni-lɛɛ. Nia zɔnyɔ̂ŋ ma ŋá gɛ̀ a yá a ŋ̀elei í kùla la Zerusâlɛŋ. Ífe zìɣe ílii su.

²⁰Ŋa m̀ôi yâ a gɛ́ɛ ŋá sɔnyɔ̂ŋ kɛ̀ a yá. M̀ɛni ma, ŋaâ sâa pá ípɔ. Ńyãa ƃa ǹúui m̀aa ŋuŋ ŋá kùla yá-ŋûa pere sii-ŋai sáma ŋá pá ŋá íla koyâŋ sâa, Gâloŋ.”

²¹Zeruia ǹóŋ Abisai è lì ŋɔ́nɔ tuɛ pere a ŋ̀óo ǹyɛɛ m̀aii, “Fɛ̂ɛ Simɛɛ é sáa, kpɛ́ni fêi, è Yâwɛɛ ŋɔnúu maa waai làraŋ.”

²²Kɛ́lɛ Deeƃé ǹyɛɛ m̀ai, “Zeruai ǹônii, lé ƃé ŋa pâi gɛ̂i a káai. Káfe mɛni-ŋai kâai kɛ̂i? Da pɔri núu da paâi sâa Eezuɛ lɔii su? Fé gɔ́lɔŋ a gɛ́ɛ ńyãa ƃa Eezuɛ-ŋai díkâloŋ sâa?”

²³Gâloŋ è vòo Simɛɛ yêei ǹyɛɛ m̀ai, “Ífe pâi saâi.”

²⁴Sɔ̂ɔ ǹóŋ Mɛfebosɛ è pà gâloŋ lá koyânii. È kɛ̀ a ǹiƃiɛɛ, ǹá-leɣa kpíriɛɛ, ŋɔseɣei liƃiɛɛ. È gbîŋ maa liƃi é síɣe ŋ̀elei ma Deeƃé è kùla la Zerusâlɛŋ é tóo tãi ma è pà la pôlui.

²⁵Bàa Zerusâlɛŋ a gɛ́ɛ é gâloŋ lá koyaŋ, gâloŋ è marê kɛ̀ ǹyɛɛ mai, “Lé ƃé gɛ̀ kwa yá kúfe lì nii?”

²⁶È ŋ̀óo su tòo ǹyɛɛ m̀ai, “Ńyee mu-nuui è ḿbɛ̀lɛ. Ŋá mò ma a gɛɛ é ŋásee-sɛŋ pɛ́lɛ ŋ̀wɛlɛ-sôoi mɛi a gɛ́ɛ ŋá see mɛi kwa yá kú lí, kpɛ́ni fêi, fé pɔrîi siâi.

²⁷Kɛ́lɛ è ńɛɛ é lí é lɛ́ɛ kɛ́ a ńaa. Kɛ́lɛ ŋánuu-namui, íkaa yɛ̂ɛ Ɣâla-taa kela. M̀ɛnii kɛ́ nyíi ǹâai ílii mai.

²⁸Iî pâi ḿbaâi kwa ŋápɛrɛi mu-ƃelai kélee. Kɛ́lɛ yâ fâai ma a gɛ́ɛ ŋ́gɛ ńaa mii íteƃelei ma. É kúla nyíŋi pôlu lé da kpɛ́ni ƃé ŋa pɔri ímarê kɛ̂i mɛni mai?”

²⁹Gâloŋ ǹyɛɛ m̀ai, “Ífe ŋɔ́nɔ lòno yɛ̂. Ŋa pâi ínâŋ kɔ̃liŋ ŋáa kɔlɛ̂i ka Ziba káloai.”

³⁰Mɛfebosɛ ǹyɛɛ m̀ai, “Tɔɔ gélee é lɛ́ɛ ǹyêei tãi nɔ́ yaâ pá la pôlu lii-see sui.”

³¹Gilia naloŋ Bazilai ǹyaa máŋ è kùla Logeliŋ é pá gâloŋ lá koyânii.

³²È kɛ̀ kpɔ́ a bɔlɔɔ. Ŋɔkóraŋ è kɛ̀ a buu lɔ́ɔlu mɛi saaƃa. È kɛ̀ a tɔɔ nuu. A kâa mii-sãa tɛ̀ɛ gâloŋ pɔ́ gɛ́ɛ kɛ̀ Maanaiŋ. È kɛ̀ a dɔɔ a zu kɛ́tɛ.

³³Gâloŋ è mò mà ǹyɛɛi, “Pá kwa yá kú lí Zerusâlɛŋ. Ŋa pâi mɛ̀nii kélee kɛ̂i yɛ̂ ípɔlɔ-laai su.”

³⁴Kɛ́lɛ è mò Deeƃé ma ǹyɛɛi, “Ŋáfulu-laai su fé ŋɔ́nɔ koyâa ní. Ŋa liî Zerusâlɛŋ lé mɛni ma, Gâloŋ?

³⁵Ŋaâ kɛ́ a kóraŋ buu lɔ́ɔlu mɛi saaƃa. Ŋa pɔri ŋɔ́nɔ mɛni lɛ́lɛɛ da nyɔ́mɔɔ loai kɔ̂lɔniî? Ŋa ŋɔ́nɔ mii-sɛŋ da kpele-sɛŋ nɛ̃ɛ kɔ́lɔŋ? Ŋa pɔri ŋɔ́nɔ wule da ŋàa-nɛ̃ɛ kulâi? Ŋa pâi ímɛni kɔ̂lui da pûi ma lé mɛni ma?

³⁶Ya mɛni su too mɛni lɛ́lɛɛi ŋí kɛ̂i mî lé mɛni ma? Ŋa pâi nɔ́ ǹyái tíyenîi a yá.

³⁷Ǹɛɛ naa ŋá lí ŋá sáa ḿbɔ-taai dí ńoo ńâŋ da ńee ni kɔlɛ. Kɛ́lɛ íyee mu-nuui Siɣaŋ ká ŋí. Ka ǹyaa ka lí. Zoŋ yɛ̂ɛ berei ya ŋ̀wɛ̂lii í gɛ́ lai.”

³⁸Gâloŋ ǹyɛɛ m̀ai, “Kwa ǹyaa kwa pâi liî. Ŋa pâi m̀ɛnii kélee kɛ̂i mì nyíi ǹɛ̂lɛɛi m̀ɛni mai, ŋá nyíi kɛ́ yɛ̂ ǹɛ̂lɛɛi ímɛni mai.”

³⁹Nya ƃe gâloŋ da ǹyée mu-ƃelai kélee dí ǹyái tìyeŋ. Gâloŋ è kpùlɔŋ Bazilai ma. Bazilai é lí pôlu bɔ́-taai.

⁴⁰Gâloŋ da Siŋɣaŋ dí lì Geega. Zuda-ƃelai dítɔɔ̂i perei Eezuɛ-ƃelai gbulu tɔnɔ.

⁴¹Eezuɛ-ƃelai da dîa-ni dí lìi dí m̀ó gâloŋ ma dîyɛɛi, “Zuda-ƃelai dí kúŋumɛ, kpɛ́ni fêi, dífe fáa ní mà kûa máŋ kú ǹyái tíyeŋ a káa.”

⁴²Zuda-ŋai dí díwoo su tòo dîyɛɛ dîai, “Kú gɛ̀ tí, kpɛn fêi, gáa a kúkaa-yɔɔ. Ka kálii ŋwânai kûa lé mɛni ma? Mii-sãai kwa miî ǹyaa fé a ǹya kûɛ kpaa máŋ è sama-sɛŋ da tɛ̀ɛ kúpɔ”

⁴³Eezuɛ-ŋai dí mò dîa dîyɛɛi, “Deeƃé mɛni kpanaŋɔɔ̂i kûa é tɛ́ɛ kâa, kpɛ́ni fêi, kúkaa a núu-suu puu. Ká káŋɛi ǹaɣiŋ kúmɛi lé mɛni ma? Kûa fa ǹûai maa-ŋuŋ m̀ɛni kpɛ̀tɛ a gɛ́ɛ kú pá la pôlui?” Zuda-ŋai dí lóno kpanaŋ kɛ̀ Eezuɛ-ŋai pɔ́.