Read Kpelle Samia Veerɛi 2 Bible Online

Samia Veerɛi 2 - Kpelle bible

Samia Veerɛi 2

¹Nyíŋi pôlu ma Deeƃé è Yâwɛɛ marê kɛ̀ ǹyɛɛ m̀ai, “Ŋa pɔri liî Zuda taa-leei-ŋai da su?” Yâwɛɛ ǹyɛɛ m̀ai, “Lí.” Deeƃé ǹyɛɛ m̀ai, “Mí pere ƃé ŋá lí lai?” Ǹyɛɛ m̀ai, “Lí Iburɔŋ pere.”

²Deeƃé è lì da ŋɔnɛyâa feerɛi. Dɔnɔ láa ƃé kɛ̀ a Ainɔaŋ, nyíi kɛ̀ a Zariɛɛ nuui, dɔnɔ láa kɛ́ ƃò a Aƃigee nyíi kɛ̀ a Neeba, Kamɛɛ nuui ŋɔnɛnî pɔlɔi.

³Deeƃé è ŋɔkpakolo-ŋai kélee sìɣe da díyee mu-ƃelai dí lí dí see Iburɔŋ taa-ŋai su.

⁴Nya ƃe Zuda-ƃelai dí pà Iburɔŋ dí wúlɔ pú naa Deeƃé ŋûa a gɛ́ɛ é kɛ́ a díkâloŋ Zuda lɔii mɛi. Gɛ́ɛ da mò Deeƃé ma a gɛ́ɛ Zabɛsi-gilia-ƃelai ƃé Sɔ̂ɔ looi,

⁵è Zabɛsi-gilia-ƃelai worɛ̂ tɛ̀ɛ ǹyɛɛ dîai, “Yâwɛɛ é lûwa láa kâa, kpɛ́ni fêi, ká tɔ̃yâ-laa lɛ̀ Sɔ̂ɔ ma a ǹóɔɔ kâa.

⁶Yâwɛɛ é káwɛli a ŋ̀ánaa é gɛ́ kili kɛ-zu é kɛ́ káyêei. Ŋa pâi kɛ̂i a káwɛli kɛ́ maa nuu m̀ɛnii ŋí ká gɛ̀ ḿîi m̀ɛni ma.

⁷M̀ɛni ma, ka tɔɔ gbanaŋɔɔ, lii-kpele kɛ́ ƃò káyêei. Sɔ̂ɔ, kánuu-namui a saa, ǹyaŋ Zuda-ƃelai daâ wúlɔ pú ŋûa da ŋ́gɛ a kâloŋ.”

⁸Nɛ̂ɛ ǹóŋ Anɛ kɛ̀ a Sɔ̂ɔ ŋɔkɔ kuluƃa-ŋai láa túɛ-nuui è Sɔ̂ɔ ǹóŋ Isibosɛ sìɣe é lí la Maanaiŋ taa-leei su.

⁹È gɛ̀ naa a kâloŋ Gilia, Asura, Zariɛɛ, Ifiraŋ, Bɛŋsima da Eezuɛ lɔii mɛi.

¹⁰Sɔ̂ɔ ǹóŋ Isibosɛ è kɛ̀ a kóraŋ buu náaŋ díkɛ gɛ̀ a kâloŋ Eezuɛ lɔii mɛi. È kâloŋ laa kɛ̀ naa a kóraŋ feerɛ. Kɛ́lɛ Zuda-ƃelai dí díyee sèe Deeƃé mù a díkâloŋ.

¹¹Deeƃé è kɛ̀ a kâloŋ Iburɔŋ da Zuda-ƃelai mɛi a kóraŋ lɔ́ɔlu mɛi feerɛ ɣáloŋ lɔ́ɔlu mɛi da.

¹²Nɛ̂ɛ ǹóŋ Anɛ da Sɔ̂ɔ ǹóŋ Isibosɛ yée mu-ƃelai dí kùla Maanaiŋ dí lí Gibiɔŋ.

¹³Zeruai ǹóŋ Zôa da Deeƃé yée mu-ƃelai dí lí dí díla kòyaŋ Gibiɔŋ Poai lá. Ǹúu kpului dɔnɔ è kɛ̀ boai-ƃela tɔnɔ ma gbéli kɛ́ ƃò m̀éla kpéli ma.

¹⁴Anɛ ǹyɛɛ Zôa mai, “Tɔɔ ǹyaŋkpa-ŋai dí dímu siɣe dí pêle kɛ́ kú naa káa.” Zôa ǹyɛɛ m̀ai, “Dí dímu siɣe.”

¹⁵Nya ƃe dí dímu siɣe díkpulu ma tɛi-tɛi. Isibosɛ, Sɔ̂ɔ ǹóŋ ŋɔnûai nyíi-ŋai kùla Bɛŋsima suui sui dí kɛ̀ a núu puu káo feerɛ, Deeƃé yée mu-ƃelai dí kɛ́ ƃò a núu puu káo feerɛ.

¹⁶Dí díkîe-ni sɔ̀ɔ a díƃoa-sɔkpɔ-ŋai dípɛlɛ ma-ŋa dí too ǹɔii ma a gîe dí sáa. Dí gwaai ŋí ma láa sèe a Ɛka-azuriŋ. Ŋ̀óoi ŋí su-kulâi ƃa ƃóa-sɔ̂kpɔ kwaa ma. Naa káa Gibiɔŋ lɔii ma.

¹⁷Gɔ́i è kpɔ̀lu kpɔ́ a maa ɣelei tí. Dí Anɛ lòkwa da Eezuɛ-ƃelai Deeƃé yée mu-ƃelai ŋɛ́i.

¹⁸Zeruai ǹônii-sinaai saaƃai: Zoa, Abisai da Asaɛ-ni dí kɛ̀ naa. Asaɛ è kɛ̀ kîrɛ siɣêi yɛ̂ɛ pîlaŋ sua,

¹⁹gɛ́ Anɛ kpɛ̀. È kɛ̀ kpɔ́ gbɛ̂i va vii-tɔɔ.

²⁰Anɛ è bôlu kàa é Asaɛ káa ǹyɛɛ m̀ai, “Yá ƃe tí Asaɛ?” Asaɛ ǹyɛɛ mai, “Ńyãa ƃe.”

²¹Anɛ ǹyɛɛ m̀ai, “Tínaŋ ílaa mii-yee mɛi pere kpaa máŋ íkɔɔ-yee mɛi pere í ǹyaŋkpai dɔnɔ soŋ í gɔ̃liŋ kula ǹyêei.” Kɛ́lɛ Asaɛ è kɛ̀ nɔ́ gbɛ̂i.

²²Anɛ è ŋɔ́nɔ mò ma ǹyɛɛi, “Tínaŋ í kpéra ŋ́gbɛ̂i. Ya lɛɛ ŋ́gbɛ̂i ŋa pâi ípaâi. Ŋà gɛ̀ tí ŋa pâi ílîa Zôa ŋɛ́i káa pere kɛ̂i léŋ?”

²³Kɛ́lɛ è kɛ̀ nɔ́ gbɛ̂i. Nya ƃe Anɛ è zɔ̀ɔ goi a ŋɔkpálai gbálai é kúla bôlu-pere é tóo é sáa ŋáa ma. Diai kélee Asaɛ kàa lâani dí tɔ̀ɔ tɔ̀ŋ.

²⁴Kɛ́lɛ Zôa da Abisai dí lɛ̀ɛ Anɛ pôlu. Ɣele-wulii kɛ́ɛ kɛ̂i dí sèri Ama Yeei ma Gia lɔii ŋɛ́i tuɛ Gibiɔŋ fɛ̃ɛ-kpalaŋ su perei ma.

²⁵Bɛŋsima suui su-ƃelai dí dí kpɔ̀ŋ díkîe ma dí kpɔŋ mâa tɛɛ Anɛ pɔ́ Ama yeei tôŋ su.

²⁶Anɛ ǹyɛɛ Zôa mai, “M̀óa-sɔkpɔi a pâi kɛ̂i nɔ́ ǹáa miî wɔ́lɔ-wɔlɔ da wɔ́lɔ-wɔlɔ? Ífe gɔ́lɔŋ gbɛɛ ŋái a pâi kɛ̂i a mɛni kpɔ̂lu? Ɣele ɣɛɛlu ƃé ya pâi ziɣêi a gɛ́ɛ í kpera ínûai kpɛ̂i?”

²⁷Zôa ǹyɛɛ m̀ai, “Tɔ̃yâ ma îi wàla lóno ḿbɔ, tãi nɔ́ Ɣâla káa niî la ɣele mai, ǹûai ŋí dí fêi kpèra díkpɛ̂i é lɛ́ɛ la zu ɣele é ƃɔ́.”

²⁸Nya ƃe Zôa è dúrii fɛ̀ɛ gbakolo-ŋai dí kpèra. Dí kpèra Eezuɛ-ŋai kpɛ̂i. Dífe ŋɔ́nɔ namu kɔ́ ní.

²⁹Anɛ da ŋɔnûai dí lì a gbínii dí tɛ́ɛ Araba. Dí Zɔdiŋ Ya-leei tìyeŋ dí tɛ́ Maanaiŋ vólo-nɛnɛŋ ma.

³⁰Zôa-ni dí kùla Anɛ pôlu da ŋɔnûai. Gɛ́ɛ a ŋɔnûai ŋáa tɛ̀ gîe mai, è gàa a gɛ́ɛ Deeƃé yee-mu-ƃelai buu káo lɔ́ɔlu mɛi náaŋ dí làŋ é pɛ́lɛ Asaɛ ma.

³¹Kɛ́lɛ Deeƃé yée-mu-ƃelai dí Anɛ ŋɔnûai ŋuŋ saaƃa pôlu buu lɔ́ɔlu mɛi da pàa nyíi-ŋai kɛ̀ a Bɛŋsima ŋɔsuui su-ƃelai.

³²Dí Asaɛ poma sìɣe dí ǹoo ǹâŋ ƃolôŋ kɔlɛ Bɛpeleɣɛ̃ɛ. Zôa da ŋɔnûai dí tɛ̀ɛ a kpíni dí seri Iburɔŋ a ɣele-wala.