Read Kpelle Samia Veerɛi 20 Bible Online

Samia Veerɛi 20 - Kpelle bible

Samia Veerɛi 20

¹Ŋaa-ƃaraŋ-maa naloŋ tɔnɔ è kɛ̀ Geegaa, ǹáa ƃé kɛ̀ a Seƃa. Ǹâŋ láa ƃé kɛ̀ a Bikiri. È kɛ̀ a Bɛŋsima suui su nuui dɔnɔ. È lì é dúrii fɛ́ɛ ǹyɛɛi, “Gâloŋ Deeƃé fé a kúta. Kúlaa fé Zɛse ǹóŋ mɛnii. Óo Eezuɛ-ƃela kwaa lí kûɛ kúpɛrɛ-ŋai lá.”

²Gɛ́ɛ tíi, Eezuɛ-ƃelai kélee dí kùla Deeƃé pôlu dí lɛ́ɛ bôlu. Kɛ́lɛ Zuda-ŋai dí tɔ̀ɔ Deeƃé pôlu. Da dîa-ni dí kúla Zɔdiŋ Ya-leei ma dí seri Zerusâlɛŋ.

³Deeƃé è sèri ŋɔpɛ́rɛi lá Zerusâlɛŋ. Ŋɔnɛyaa pɛlɛ-pɛlɛ puui è dílɛ̀ɛ naa a gɛ́ɛ dí bɛ́rɛi mɛi káai, è díkùla naa é dípu pɛ́rɛ da kpɛ́ni mu é kɔkuluƃa-ŋa pú naa mɛi. Naa ƃé dí kɛ̀ naa gɛ́ m̀ɛnii kélee kɛ̀ dîɛ nyíi da ŋ̀wɛ̂lii kɛ́lɛ vé wɔ́lɔ ŋɔ́nɔ nyíi ní a da. Dílɛ̀ɛ naa yɛ̂ɛ pɔɔ-nɛyaa é lɛ́ɛ la zu dísàa tãi é seri.

⁴Gâloŋ è mò Amasa ma ǹyɛɛ, “Zuda-ŋai ŋáa tɛ́ gîe ma ɣele kûu saaƃa yée mu. Yá máŋ kɛ́ dísama.”

⁵Amasa è lì a gɛ́ɛ é díŋaa tɛ́ díkîe ma. Kɛ́lɛ è lɛ̀ɛ gɛ̂i tãi é tɛ́ɛ.

⁶Deeƃé è mò Abisai ma ǹyɛɛi, “M̀ɛnii Bikiri ǹóŋ Seƃa a pâi gɛ̂i a kûai a pâi tɛɛ̂i Asalɔŋ ŋ̀ɔi ma. Gɔ-kuluƃa-ŋai síɣe a maa félaa í lɛ́ɛ la bôlu. A wàla kɛ́ tí a pâi liî é sée daa lêe-ŋai da-ŋa su nyíi-ŋai dímaa tinaŋɔɔ̂i a siɣãŋ é kúpili mɛni kpɔ̂lu su.”

⁷Zôa, Sereta-ŋai, peleta-ŋai da gbakolo wála-wala-ŋai dí dímu sìɣe da Abisai ni dí lɛ́ɛ Seƃa pôlu. Díkelee dí kùla Zerusâlɛŋ díkɛ gbɛ̀.

⁸Dí lɛɣɛɛ́ gɔni kɛ́tɛi ma Gibiɔŋ, Amasa è pà a gɛ́ɛ é díla koyâŋ. Kɔ́ kɔ́-seɣe ƃé kɛ̀ Zôa kɔŋ ma ŋɔseɣei mu ɣiriɛ́ɛ a seɣe mu ɣiri-ɣɛli ƃóa-sɔ̂kpɔ kɛ́ ƃò mu. È gɔ́ɔ mu sìɣe, é m̀óai kúla daâi Amasa tɛ̂i pere.

⁹Zôa è mò Amasa ma ǹyɛɛi, “Íkɔlɔi ponoɔɔ̂i, ńeɣê?” È Amasa lá leɣa sòŋ a ǹáa mii-yee a gɛ́ɛ é ǹá-gbɔ see ma.

¹⁰Kɛ́lɛ Amasa fé m̀óa-sɔkpɔi káa ní kɛ̀ Zôa kɔɔ-yee ŋái. Zôa è M̀óa-sɔkpɔi ɣàla é zɔ̀ɔ la buru é kúla é pú, é sáa. Zôa da ǹeɣê Abisai dí tɛ̀ɛ naa dí láaŋ Seƃa ma.

¹¹Zôa yée mu kɔ-kuluƃai dɔnɔ kɛ̀ tɔ̂ɔni Amasa kɔlɛ è mò Amasa pôlu-ƃelai dîa ǹyɛɛi, “Ǹúui gáa Zôa pôlu da Deeƃéi tɔɔ maa nuui é lɛ́ɛ Zôa pôlu.”

¹²Amasa è kɛ̀ tɔ̂ɔni ŋ̀ãai su bere lêei ma. Diai kélee gàa gɛ́ ƃò tiŋ-táŋ è dísòŋ. Ǹalôŋ kɛ̀ lônoi ǹûai pɔ́ kɛ́ɛ a gáa a gɛ́ɛ gáa tiŋ-táŋ a ǹûai sóŋ dífe kɛ́ ní tɛɛ̂i, è bomai kùla berei ma é ǹáa berei kɔlɛ kpâlaŋ da ŋá é seɣe pɛ́lɛ m̀ɛi.

¹³Bomai kuláa dîɛ bere lêei mai gbakolo-ŋai kélee dí lɛ̀ɛ Zôa pôlu díkɛ Seƃa kpɛ̀.

¹⁴Seƃa è lì é tɛ́ɛ zîi-ŋai kélee dîa Eezuɛ é seri Ebɛɛ Bɛ Maaka daai. Ŋɔkɔ-kûluƃ-ŋai kélee dí díŋaa tɛ̀ ma dí lɛ́ɛ bôlu.

¹⁵Zôa ŋɔkuluƃa-ŋai kélee dí pà dí tínaŋ daai ma a kɔ́. Dí pɔ̂rɔ tɔ̀ɔ ziɣãŋ ma yɛ̂ɛ ya-gãaŋ dí tɛ́ mɛi a gɛ́ɛ dí ŋ̀ólo.

¹⁶Táre nɛni tɔnɔ è naa kàa é láɣi ǹyɛɛi, “Ka káwoli tɔ́ɔ, ka káwoli tɔ́ɔ, ŋa wɛ̂lii ŋá lóno Zôa pɔ́. Ka m̀ó mà é pá.”

¹⁷Zôa è pà ǹɛnîi pɔ́-naa ǹɛnîi ǹyɛɛ m̀ai, “Yá ƃa Zôa?” Ǹyɛɛ mai, “Owoei.” Ǹɛnîi ǹyɛɛ m̀ai, “Íwoli tɔ́ɔ ŋ̀óo-ŋai dîa ŋa pâi m̀ôi yâi.” Zôa ǹyɛɛ m̀ai, “M̀ó ŋa ŋ́oli tɔɔ̂i.”

¹⁸Ǹɛnîi ǹyɛɛ m̀ai, “Da kâa mò wɔ́lɔ-wɔlɔi tí su dîyɛɛi, ‘Lí Ebɛɛ taa-leei su a kɛ̀ mɛni da káa yâ, da pâi kpɔŋ mâa tɛɛ̂i ípɔ.’

¹⁹Ŋ́gaa a ǹíi-see mɛni kpɛtɛ nuui dɔnɔ ŋ́gɛ ƃò Gâloŋ pôlu Eezuɛ lɔii su. Ya wɛ̂lii í daa-leei su kara nyíi Eezuɛ taa lêe-ŋai kélee dí kùla gbonôi? Ya wɛ̂lii í Yâwɛɛ kɔ̃liŋ su-kara lé mɛni ma?”

²⁰Zôa ǹyɛɛ m̀ai, “É folôŋ ḿâ a gɛ́ɛ a ŋá gɛ́ tí. Ḿve pâi gɛ̂i tí a dɔnɔ kpîŋ.

²¹Tɔ̃yâ fa nyíti. Kɛ́lɛ Bikiri ǹóŋ Seƃa nyíi kùla Ifiraŋ ǹyaa ƃé dɔɔ̂i Gâloŋ Deeƃé ma. Yà dɛ̀ɛ ḿbɔ, gɛ̀ ní ŋa pâi kulâi daa-leei su.” Ǹɛnîi ǹyɛɛ Zôa mai, “Ǹɛ́lɛɛ ká tí, tɔɔ nɔ́. Ya pâi ŋ̀uŋ kâai é naɣîŋ ziɣãŋ mɛi é tóo kápɔ-naa pere.”

²²È lì é ŋ̀uŋ pîlaŋ a m̀arâŋ tare-ƃelai. Dí Seƃa sòŋ dí ŋuŋ tée dí bili Zôa ni dîa ziɣãŋ pôlu. Nya ƃe Zôa è dúrii fɛ̀ɛ, ŋɔkuluƃa-ŋai kélee dí kúla daai su dí lí pôlu dípɔ-taai tɛi-tɛi. Kɛ́lɛ Zôa è lì pôlu gâloŋ pɔ́-naa Zerusâlɛŋ.

²³Zôa ƃé kɛ̀ gɔ-kûluƃa-ŋai kélee mɛi Eezuɛ. Zeoada ǹóŋ Benaia ƃé kɛ̀ Sireta da Peleta-ŋai mɛi. Ǹûai ŋí ƃé kɛ̀ Deeƃé mɛi kâai.

²⁴Adoraŋ ƃé kɛ̀ díi-kɛ-ƃelai mɛi, Ailu ǹóŋ Zeosafa kɛ́ ƃò a mɛni-pɔlɔ kɔlɔ-ŋai mɛi káa-nuui.

²⁵Seva ƃé kɛ̀ a gɔlɔ pɔ̃yɛ-nuui, Zadɔ da Abiata ƃédí díkɛ ƃò a zâla-laa soŋ-ƃelai,

²⁶Zariɛɛ naloŋ Ira è kɛ̀ máŋ a Deeƃé ŋɔsâla láa soŋ-ƃelai dɔnɔ.