Read Kpelle Samia Veerɛi 22 Bible Online

Samia Veerɛi 22 - Kpelle bible

Samia Veerɛi 22

¹Yâwɛɛ kɛ́ɛ a Deeƃé ŋuŋ mâ ƃó é gula Gâloŋ Sɔ̂ɔ yêei da ŋɔkpɔara-ƃela kpéli-ŋai kéleei, è Yâwɛɛ láa maa tɛ̀ wule-wôo su.

²Yâwɛɛ káa a ḿaa kpɛ́-nuu da ḿaa kɔ̃ɔ-nuu kpanaŋɔɔ.

³Ŋáɣâlai káa a ḿaa kpɛ́-nuu. A ḿaa kɔ̃ɔ yɛ̂ɛ berei kpála ŋá-ɣale kɔli-kalaŋ a kɔ-kuluƃa maa kɔ̃ɔ lai. Ǹyaa ƃé ŋa ŋuŋ ma ƃô sɔlɔ ǹyêei. Ǹyaa ƃa ŋ́uŋ ma ƃó nuui. A ŋ́uŋ ma ƃó sɔnyɔ̂ŋ-ƃela yêei.

⁴Ŋa Yâwɛɛ tòli a ŋ́gula ŋ́gbɔara-ƃelai yêei. Ǹyaa ƃe laa-maa-tɛ káa a bɔ́ɔ.

⁵Saa ninîŋ è kɛ̀ a dínaŋɔɔ ḿâ yɛ̂ɛ yúo ƃé ɣilînii gɛ́ pà ŋgbelêi yɛ̂ɛ ya-fɛ̂ɛ a sɛŋ a sɛŋ mɛi pɛ̀lɛ.

⁶Saa è kɛ̀ a dínaŋɔɔ ḿâ ƃolôŋ ŋɔƃárei ŋá tɛ́ɛ ḿberêi.

⁷Ŋà kɛ̀ mɛni kpɔ̂lu sui, ŋá Yâwɛɛ tòli. Ŋá Ŋáɣâlai tôli a gɛ́ɛ é kpɔ́ŋ ḿâ. È lɛ̀ɛ ŋɔpɛ́rɛi mu é ŋ́oo mɛni. È ŋ̀óli tɔ̀ɔ ŋ́wɔlɔ-woo mà é kpɔ́ŋ ma.

⁸Nya ƃe ǹɔii è tùmo é kpɛ̃lîŋ, ŋ̀ele-kɔlɔŋ é kpɛ̃lîŋ máŋ, kpɛ́ni fêi, ǹíi è kɛ̀ a ŋ̀wánaa.

⁹Luri è kɛ̀ kulâi zũai ŋɔŋ sôŋ kɛ́ kùla ǹá, ŋɔŋ têɣa kɛ́ kùla ǹá.

¹⁰È ŋ̀ele-kɔlɔŋ ƃèla é pîlaŋ ɣele-kɔlɔŋ tɛi kɛ́ ƃò gɔ́ɔ mu.

¹¹È sèe ɣâla-taa kooŋ-sɛŋ mɛi. Ŋ̀âla-taa kooŋ-sɛŋ é kòoŋ la yɛ̂ɛ fãa.

¹²È gbîŋ mɛi pɛ̀lɛ a kpíni, ɣele-kɔlɔŋ kpi-kpitiliɛɛ lá fɛ́ɛ a yá tínaŋɔɔ mà.

¹³Tiɣi ŋɔŋ leŋ è kùla gwaa ponoɔɔi su ŋɛ́i-tuɛ.

¹⁴È ŋ̀ele-gbâna tòo, ǹyaŋ Ŋ̀wála-wâla kélee Ɣalai è làɣi a ŋ̀óo su kɛ́tɛ.

¹⁵È sɔ̀la-ŋa pìli ŋɔkpɔara-ƃelai dí táa-taa. È ŋ̀ele-gbâna ŋɔŋ tòo dísama dí pú.

¹⁶Yâwɛɛ lɛ̂wo è kùla zũâi é Yúo káo ma lɛ́, ǹɔii é lɛ́ɛ lâani a vólo.

¹⁷È ǹyée tɛ̀ ɣelêi é ńziɣe é ŋ́gula bârii su.

¹⁸É ŋ́gùla ŋ́gbɔara-ƃela wála-walaai yêei. É ŋ́gula dîai yêei dí tɔɔ̂i ḿâi, kpɛ́ni fêi, díwala-walai tɛɛ̂i ŋ́ɔ̂i ma.

¹⁹Ŋa kɛ̂ mɛni kpɔ̂lu ƃé da pɛ̀lɛ la ḿâ, kɛ́lɛ Yâwɛɛ a ḿaa kɔ̃ɔ.

²⁰A ŋ́uŋ ma ƃò é pá a ńyãa kwaa pónoɔɔ ma. A ŋ́uŋ ma ƃò, kpɛ́ni fêi, ǹíi lâai ńyêei.

²¹Yâwɛɛ è ḿvela fè ŋátɔ̃yâ-laai da ŋámaa wâa-laai mɛni ma.

²²Ŋá sìa a Yâwɛɛ ŋɔtɔ̂ŋ wóo, fé ta kùla ní Ŋáɣâlai pôlu.

²³Ŋa ŋɔtɔ̂ŋ-ŋai kélee mɛi kàa, fé ḿbôlu tɔ̀ɔ ní da ma.

²⁴Sɔnyɔ̂ŋ fé ḿâ ŋ̀ɛ́i, ǹyaŋ ŋa ńyee kúla kula sɔnyɔ̂ŋ kɛ́ɛ su.

²⁵M̀ɛni ma, Yâwɛɛ a ḿvela fé ŋátɔ̃yâ-laai da ŋámaa waa-laai mɛni ma.

²⁶Yâwɛɛ, dîai da tɔ̂ɔ ípôlui, ya tɔ̂ɔ dípôlu, íkɛ tɔ̃yâ-laa mɛni kɛ̀ a dîai da tɔ̃yâ-laa kɛ̀ a yái.

²⁷Ílii su waâi dîai mɛni ma dílii su waâi, Ítɔɔ dîai dîa da sɔnyɔ̂ kɛi.

²⁸Ya dîai ŋuŋ ma ƃò da tûa a maa yêŋ perei, íkɛ zu-mɛni kɛ̂tɛ-ƃelai maa yêŋ.

²⁹Óo Yâwɛɛ, Ŋáɣâlai, yá ƃa ŋákwaa ponoɔɔi íkɛ ŋákpinii père a kwaa ponoɔɔ.

³⁰Ya wála-wala-laa tɛ̀ɛ ḿbɔ a gɛ́ɛ ŋá pɛ́lɛ ŋákpɔara-ƃelai dîa, íkɛ wála-wala-laa tɛ̀ɛ ḿbɔ a gɛ́ɛ ŋá díyee mɛi ɣále ŋá dítaa lêe-ŋai síɣe.

³¹Ɣâla, ŋí tûa-pere sã̂ai. Ŋɔwóoi maa waâi. A diai kélee maa kɔ̃̂ɔ da pâ bɔ́ kpɔŋ mâa mɛni mai.

³²Yâwɛɛ ǹyaa tɔnɔ nɔ́ ƃa Ɣâla. Kúɣâlai ƃé gáa a gɔnii.

³³Ɣâla ŋí ƃé gáa a ḿaa kɔ̃ɔ nuu kpanaŋɔɔi. A ńzia pêre maa kpɛ̂.

³⁴A ŋ́gɔɔ su kpânaŋ a gɛ́ɛ fé tòo. A ŋ́gɛ ŋa tɔɔ ǹyéei tôŋ su.

³⁵A ŋáa kɔ́ŋ a kɔ́ kɔ́ mɛni ma. A gɛ́ ŋa pɔri ƃara keraŋ pilîi.

³⁶Yaâ íŋuŋ ma ƃô kɔli-kalaŋ tɛɛ ḿbɔ. Ya ŋ́gɛ a núu kɛ́tɛ.

³⁷Yaâ ńzia perei su pòno. Ya gɛ́ fa ŋɔ́nɔ kàreŋ.

³⁸Ya gɛ́ ŋa ŋ́gbɔara-ƃelai kpɛ́ ŋa dísoŋ ŋa dísu-kara. Fé kpera ní díkpɛ̂i é lɛ́ɛ la zu ŋa dísu-kara.

³⁹Ŋá díyee mɛi ɣàle dí tóo ŋ́gɔɔ mu, ǹyaŋ dífe pâi dímu siɣêi pôlu ŋɔ́nɔ.

⁴⁰Ya wála-wala tɛ̀ɛ ḿbɔ kɔ́ kɔ́ mɛni ma. Ya ŋ́gɛ ŋa ŋákpɔara-ƃelai pú ŋ́gɔɔ mu.

⁴¹Ya gɛ́ ŋ́gbɔara-ƃelai da pú, ǹyaŋ dîai da ŋ́gbɔarai, ŋa dísu-kàra.

⁴²Dí díŋɛi làa, kɛ́lɛ núu da fé kɛ́ ní naa é díŋuŋ ma ƃó. Dí wɔ̀lɔ Yâwɛɛ ma, kɛ́lɛ vé díwoo su tòo ní.

⁴³Ŋá dífũa yɛ̂ɛ muluŋ, ŋá dítaŋ yɛ̂ɛ pere-lee ma para.

⁴⁴Í ḿaa kɔ̃ɔ dîai yêei dítɔɔ̂i ḿâi, í ŋ́gɛ lɔii-ŋuŋ-ŋa láa túɛ, dîai fé kɛ́ ní a díkɔlɔŋɔɔ̂i, dí tíi kɛ̀ mî.

⁴⁵Ǹɔii-ŋuŋ da kpɛ́ni su-ƃelai dí kɛ̀ tɔarâi dí kɛ́ pà, gɛ́ɛ da ŋ́oo mɛ́nii, dí ƃa-kɛ́-maa tɛ̀ɛ ḿbɔ.

⁴⁶Díkili ŋá è pù dímaa kɛ́ kpɛ̃liŋ dí kɛ̀ kùla dítaa-lee wála-wala-ŋai su.

⁴⁷Yá ƃa gɛ-ɣele ma Yâwɛɛi, ǹyaŋ ŋa pâi ílaa maa tɛ̂i. Yái íkaa a maa kɔ̃ɔ Ɣalai ŋa pâi lûwa toôi ya.

⁴⁸Yá ƃé ya ŋákpai kûla íkɛ ŋ́gbɔara-ƃelai pù ŋ́gɔɔ mu.

⁴⁹Ya ŋ́gula ŋ́gbɔara-ƃelai yêei, óo Ǹuu-namui, ya ŋ́gɛ ńyee a tɛ̀ɛ ŋ́gbɔara-ƃelai dîa, ya ḿaa kɔ̃ɔ zɔnyɔ̂ŋ-ƃelai yêei.

⁵⁰M̀ɛni ma, Yâwɛɛ, ŋa pâi ílaa maa tɛ̂i ǹɔii ŋuŋ-ŋai su. Ŋa pâi laa maa tɛ̂ wule-ŋa toôi a ílaa.

⁵¹Ya gɛ́ íkâloŋ a ŋɔkpɔara-ƃelai yée mɛi ɣále. Íwɔlɔ-wɔlɔ wɛli-kɛ maai káa naa ǹúui mɛni ma í zìɣe zui, gɛ́ ƃò naa máŋ Deeƃé mɛni ma da ŋɔsuui wɔ́lɔ-wɔlɔ da wɔlɔ-wɔlɔ