Read Kpelle Samia Veerɛi 23 Bible Online

Samia Veerɛi 23 - Kpelle bible

Samia Veerɛi 23

¹Zɛse ǹóŋ Deeƃé ŋɔwóoi gbɛɛ-ŋai ŋái ká ŋí. Ɣâla è Deeƃé ŋí kɛ́ a núu kɛ́tɛ. Zeeka Ŋɔɣâlai è Deeƃé sìɣe é gɛ́ a kâloŋ kɛ́tɛ. Deeƃé è kɛ̀ a wule too-nuu kɛ́tɛ. Gɛ́ɛ Ɣâla è wála-wala tɛ̀ɛ bɔ́ a gɛ́ɛ é lónoi, è mò ǹyɛɛi,

²“Yâwɛɛ ŋɔmɔlêŋ káa ḿbôlu, a ńɛŋ fúloŋ a gɛ́ɛ ŋá lóno.

³Eezuɛ ŋɔwála-wala Ɣalai è mò ḿâ ǹyɛɛi, ‘Ǹúui a ŋɔnûai mɛi kâa a tɔ̃yâ-laa pere Ɣâla ŋɔyao maai sui,

⁴gáa yɛ̂ɛ ɣele ƃɔ̂i kwaa ponoɔɔ, gɛ́ ƃò yɛ̂ɛ fólo ǹɛnɛŋ a pìlaŋ ɣele-kɔlɔŋ kole ma, da tuna nyíi a gala-ŋai kɛ̀ dí pɔmûŋ.’

⁵“Bere ƃé Ɣâla a pâi lûwa lâai la ńônii díwɔ̂ lonii dîa. A wɔ́lɔ kpanaŋ-woo kɛ́ ńyêei nyíi pâi kɛ̂i naa wɔ́lɔ-wɔlɔ da wɔ́lɔ-wɔlɔ. Gbanaŋ-wooi ŋí maa fa wɔ́lɔ fâleŋ. A pâi wɔ́lɔ kɛ̂i nɔ́ ḿɛi kâai ǹyaŋ ŋa pâi ƃûu ƃôi.

⁶Kɛ́lɛ zɔnyɔ̂ŋ-ƃelai díkaa yɛ̂ɛ ɣalêŋ nyíi-ŋai da pâi dípilîi. Núu fa pɔri díkulâi a ǹyêei.

⁷Ǹúui a díkùla a ǹyêei, fɛ̂ɛ maa nuui yée maa é kɛ́ a gbiniŋɔɔ a kɔli nyíi ŋ̀á káa yɛ̂ɛ kpálai. Ǹyaŋ da pâi dísu-karâi a ŋɔŋ.”

⁸Deeƃé ŋɔkɔ́ kɔ́-ƃela kpaya-kpayai láa ká ŋí: Tasimɔna naloŋ Zosɛ-basebɛ. È kɛ̀ gɔ́ kɔ́-ƃela gbului láa túɛ nyíi da kâa dítòli a Saaƃai. È núu ŋuŋ lɔ́ɔlu mɛi saaƃa pàa a ŋɔkpálai kɔ́ tɔnɔ su.

⁹Gɔlɛ-ma nuui láa ƃé kɛ̀ a Iliaza. Iliaza ƃé kɛ̀ a Dôdo ǹóŋ, Aoi ǹóŋ-lóŋ. Da Deeƃé díkɛ̀ díkîe ma tãi dí kɔ́ pɛ̀lɛ la Felesia-ŋai dîa Eezuɛ-ŋai dí kɛ́ pui.

¹⁰È kɔ̀ Felesia-ŋai pɔ́ é lɛ́ɛ la zu ǹyée fíi é kpɛ́ɛ é kánaŋ M̀óa-sɔkpɔi ma. M̀aa ɣelei tí Yâwɛɛ è gɛ̀ ǹyée é tɛ́ɛ díkpɔara-ƃelai dîa. Gɔ́ kɔ́-ƃelai kpéli-ŋai páa pôlui, mɛni da kpɛ́ni fé kɛ́ ní naa a gɛ́ɛ dí gɛ́. Kɛ́lɛ dí lì dí zaa-ƃelai díkɔ kɔ́-sãai síɣe dí lí a dia.

¹¹Ǹúui kɛ̀ Iliaza kɔlɛi ƃé kɛ̀ ƃé kɛ̀ a Arari naloŋ Agee ǹóŋ Sama. Felesia-ŋai dí lì dí díŋaa tɛ́ mà Lêi dí gbã tée díperêi dɔɔŋ kpɔlɔi su. Eezuɛ-ŋai dí pù díyêei.

¹²Kɛ́lɛ Sama è tɔ̀ɔ a gbanaŋɔɔ é Felesia-ŋai páa. Yâwɛɛ è wála-wala tɛ̀ɛ dípɔ dí Felesia-ŋai yée mɛi ɣále.

¹³Ŋ̀wála-wâla kpakolo buu saaƃai zaaƃa dí lì Deeƃé pɔ́-naa gɔni-woloi su Adulaŋ a dísi-sãai m̀á kula kûui. Felesia-ŋai dí kɛ̀ ƃûu su Lefaiŋ tiŋ-tiŋ su.

¹⁴Deeƃé è kɛ̀ kwaa da ma ƃɛ́i gbɔara nuu da fa kâa pɔri serîi ma a fii-kpɛ̂ɛ perei Felesia-ŋai diaŋ díƃûui è kɛ̀ Bɛpeleɣɛ̃ɛ.

¹⁵Deeƃé è kɛ̀ gwaai ŋí ma kpele wɛ̂lii kɛ́ bàa ǹyɛɛi, “Óo núu da fé naa é yá kúla Bɛpeleɣɛ̃ɛ ya-loai su nyíi gáa ziɣãŋ lá é dɛɛ ḿbɔ ŋá ŋ́gbele la!”

¹⁶Nya ƃe gbakolo wála-wala saaƃai dí Felesia-ŋai díƃûui wòlo dí lɔ́ dí yá kúla naa dí pá la Deeƃé pɔ́. Kɛ́lɛ vé gbèle ní. È gɛ̀ a sâla-sɛŋ Yâwɛɛ mɛni ma,

¹⁷é m̀ó ǹyɛɛi, “É folôŋ ḿâ, óo Yâwɛɛ, a gɛ́ɛ ŋá ǹyái ŋí kpéle. Gáa yɛ̂ɛ dîai ŋãa nyíi-ŋai dífulu-laai kùla a sâla ǹyái kula mɛni mai.” Vé gɛ́ ní é ǹyái ŋí kpéle. Gɔ-kuluƃa wála-wala líi-kpeleɛɛ saaƃai ƃé mɛni-ŋai ŋí kɛ̀.

¹⁸Zeruia ǹóŋ Zôa ǹeɣê Abisai è kɛ̀ gɔ-kuluƃa buu saaƃai láa túɛ. È kɔ́ kɔ́-ƃela ŋuŋ saaƃa pàa a ŋɔkpálai. Ǹyaa máŋ ǹáa è kùla yɛ̂ɛ gbakolo saaƃai ŋí díta.

¹⁹Ǹáa è kùla máŋ é tɛ́ɛ gɔ-kuluƃa saaƃai díwɔ̂i ma. Dí gɛ̀ a dílaa túɛ-nuu. Kɛ́lɛ vé kɛ́ ní a díta.

²⁰Zeoiada ǹóŋ Benaiya nyíi kùla Kazeei. È kɛ̀ a ǹíi-kpeleɛɛ. È mɛni kpaya-kpaya támaa kɛ̀. È Môa kɔ-kuluƃai veerɛ pàa. È yala-sulu tɔnɔ pàa lôai a gɔ́lɛ kanei pú tãi.

²¹È Ize naloŋ lɛ́lɛɛ tɔnɔ pàa. Ǹalôŋ ŋɔkpálai è kɛ̀ ǹyêei kɛ́lɛ Benaiya è lɛ̀ɣɛ la ŋɔwúrui kɛ̀ ƃò ǹyêei. È gbálai kpâloŋ ǹyêei é bàa a gbɔ́ɔi kpâlai.

²²M̀ɛni saaƃai ŋí Benaiya è gɛ̀i è gɛ̀ ǹáa é kúla yɛ̂ɛ gɔ-kuluƃa saaƃai.

²³Ǹáa è kùla kɛ́lɛ vé kɛ́ ní a díta. Deeƃé è gɛ̀ a m̀ɛi káa-ƃelai láa túɛ-nuu.

²⁴Gɔ-kuluƃa nuu-kpulu buu saaƃai su-ƃelai kpéli-ŋai ƃé kɛ̀ a Zôa ǹeɣê Asaɛ da Dôdo ǹóŋ Ɛnanaŋ nyíi kùla Bɛpeleɣɛ̃ɛi.

²⁵Aro naloŋ feerɛi Sama da Ɛlika,

²⁶Paata naloŋ Ɛɛle, Tekoa naloŋ Ikesi ǹóŋ Ira,

²⁷Anatɔ nuui Abiezɛ da Usatai naloŋ Mebunai,

²⁸Aoɣiti nuui Zaamɔŋ da Nɛtofa naloŋ Maarai,

²⁹Nɛtofa nuui Baana ǹóŋ Ɛɛle, Gibea nuui Libai nyíi kùla Bɛŋsima ŋɔsuui sui ǹóŋ-surɔŋ Ita,

³⁰Piratɔŋ nuui Benaiya, Idai nyíi kùla Gâa ya-loŋ mai,

³¹Aba nuui Abi-aabɔŋ da Azimave nyíi kùla Bauriŋ,

³²Zaseŋ ǹônii-sinaai dɔnɔ Eliaba nyíi kùla Sa-aabɔŋ, Zonetaŋ,

³³Arari naloŋ Saama da Sâa ǹóŋ Abiaŋ nyíi kùla máŋ Arari,

³⁴Aasibai ǹóŋ Elifelɛ nyíi kùla Maakai, Gilo naloŋ Aitofɛ ǹóŋ Eliaŋ,

³⁵Iziro naloŋ Kamɛɛ, Abite naloŋ Paarai,

³⁶Zoba naloŋ Netaŋ ǹóŋ Iga, Gâa naloŋ Bani,

³⁷Amɔŋ naloŋ Zele, Bɛ-ɛro naloŋ Naarai, Zôa ŋɔkɔ kɔ́-kɔli-sɛŋ siɣe-nuui,

³⁸Ita naloŋ Ira, Itira naloŋ Gare

³⁹da Ita sii nuui Yuraya. Díkelee dí kɛ̀ a núu buu saaƃa káo lɔ́ɔlu mɛi feerɛ.