Read Kpelle Samia Veerɛi 24 Bible Online

Samia Veerɛi 24 - Kpelle bible

Samia Veerɛi 24

¹Yâwɛɛ è ŋɔ́nɔ ǹíi ŋwàna Eezuɛ-ŋai dîa é gɛ́ Deeƃé é tɔ́ɔ dîa. È mò Deeƃé ma ǹyɛɛi, “Lí í Eezuɛ-ŋai da Zuda-ƃelai lóno”

²Nya ƃe Deeƃé è mò ŋɔkɔ-kuluƃa-ŋai láa túɛ-nuui Zôa ma ǹyɛɛi, “Lí Eezuɛ lɔii gwaa kélee í ǹûai kélee láa síɣe é síɣe Daŋ é tóo Bɛɛsiba ma a gɛɛ ŋá gɔ́lɔŋ núu ɣɛɛlu ƃé naai.”

³Zôa ǹyɛɛ m̀ai, “Ŋánuu-namui, tɔɔ Yâwɛɛ é gɛ́ ǹûai ŋí dísuui su é kɛ́tɛ a gɛ́ɛ núu tɔnɔ é ƃûu ƃó a ŋuŋ tɔnɔ ílɛɛ ɣele ma í naa káa. Kɛ́lɛ lé ƃé ya ŋ̀wɛ̂lii kú m̀ɛnii ŋí kɛ́ m̀ɛni mai?”

⁴Kɛ́lɛ gâloŋ wóo è gɛ̀ Zôa da ǹyée mu-ƃelai dí sía a m̀ɛnii è m̀o dîai. Dí dímu sìɣe dí lí.

⁵Dí Zɔdiŋ Ya-leei tìyeŋ dí díi kɔ́ɔ pîlaŋ Aroɛ da daa-leei su kɛ̀ ǹyéei loai, dí lí Gâa da Zazɛ pere.

⁶Dí pà Gilia dí sèri Ita-ŋai dílɔii Kedɛ ma dí pá Daŋ. Dí kuláa Daŋi dí lì dí tínaŋ Sidɔŋ ma,

⁷dí sèri Taya taa lee-ŋa maa tínaŋɔɔ a galai dîa dí tɛ́ɛ naa dí lí Iva-ŋai dítaa lêe-ŋai kélee su dí tóo Keena-ŋai díwɔ̂ taa lêe-ŋai kélee su. Dí lì Zuda lɔii kwára-pere dí seri Bɛɛsiba.

⁸Dí sìa ǹɔii su gwaa kélee dí pá Zerusâlɛŋ a ŋ̀áloŋ puui ŋɔfólo buu feerɛ ɣele.

⁹Zôa è pà é góraŋ ƃôi tɛ́ɛ Gâloŋ Deeƃé pɔ́. Kɔ́ kɔ́-kpakolo lii-kpeleɛɛ wála ŋuŋ lɔ́ɔlu mɛi saaƃa (800,000) ƃé kɛ̀ Eezuɛ lɔii su. Zuda kpakolo-ŋai dí kɛ̀ a wála ŋuŋ lɔ́ɔlu (500,000).

¹⁰Kɛ́lɛ m̀ɛnii ŋí kɛ́ɛ naa pôlu ma Deeƃé líi è ƃèla ma. È mò Yâwɛɛ ma ǹyɛɛi, “Ŋaâ sɔnyɔ̂ŋ kɛ́tɛ kɛ́ a yá. Kɛ́lɛ Yâwɛɛ, ŋa íkperâi fêi a gɛ́ɛ í ńzu mɛni lɛɛ, kpɛ́ni fêi, ŋa ƃoo tûa kɛ́.”

¹¹Deeƃé é lɛ́ɛ pâi mu-siɣêi a bôlu ma ɣele-walai, Yâwɛɛ è mò ŋɔlóno kɛ́-nuui Gâa ma ǹyɛɛi,

¹²“Lí í m̀ó Deeƃé ma yɛ̂ɛ Yâwɛɛ ǹyɛɛi, ‘Ŋa sɛŋ saaƃa tɛɛ̂i ípɔ. Dɔnɔ siɣe zu nyíi ya ŋ̀wɛ̂lii ŋá gɛ́ yɛ̂i.’ ”

¹³Gâa è pà Deeƃé pɔ́-naa ǹyɛɛ m̀ai, “Ya wɛ̂lii puru é tóo ílɔii su a kóraŋ saaƃa kpaa íkpɔara-ƃelai dí kɔ́ pɛ́lɛ yâ a ɣáloŋ saaƃa kpaa kɔlɔ-fela nyɔ́mɔɔ é pá ílɔii su a fólo saaƃa? Dɔnɔ siɣe zu nyíi ŋa pɔri liî a maa kili-ŋa pono ŋá dɛɛ ǹúui pɔ́ ńdɛ̀ɛi.”

¹⁴Deeƃé è mò Gâa ma ǹyɛɛi, “M̀ɛni-ŋai ŋí kélee káa a mɛni kpânaŋ-ŋa. Tɔɔ kúlɛɛ Yâwɛɛ yêei. A pâi kúmalôŋ kâai é tɛ́ɛ la kúlɛɛ núu-kpune yêei ma.”

¹⁵Deeƃé è gɔlɔ-fela nyɔ́mɔɔi sìɣe zu. Nya ƃe Yâwɛɛ è kɔlɔ-fela nyɔ́mɔɔ pìli Eezuɛ-ŋai dîa é síɣe ŋ̀ele-walai ma é tóo tãi ma è gbɛ̀tɛi. Diai sàai dí kɛ̀ a núu wála buu lɔ́ɔlu mɛi feerɛ (70,000) é síɣe Daŋ é tóo Bɛɛsiba.

¹⁶Ŋ̀âla-taa kelai kɛ́ɛ a ǹyée sã́a Zerusâlɛŋ mɛi-pere a gɛ́ɛ é naa su-karai, Yâwɛɛ è ǹíi pène ǹyɛɛ m̀ai, “É lɛ́ɛ nâa tí. Nyíŋi gula kɛ̂ɛ ƃoɔɔ̂i. Íyee síɣe pôlu.” Ŋâla-taa-kelai ŋí è kɛ̀ Zɛbusa naloŋ Arana ŋɔsí-sãa táŋ kwaai ma.

¹⁷Deeƃé kɛ́ɛ a ŋ̀âla-taa kelai káa pâi ǹûai su-kara mɛni mai, è mò Yâwɛɛ ma ǹyɛɛi, “Gáa, ŋa sɔnyɔ̂ŋ kɛ́ a yá. Ńyãa ƃé zɔnyɔ̂ŋ kɛ̀. Ǹûai ŋí díwɔ̂ sɔnyɔŋ ƃa lé? Dí lɛ̀ɛ nɔ́ ḿbôlu yɛ̂ɛ ƃála-ŋa da lɛ̀ɛ ƃála mɛi káa nuu pôlu. Ŋa íkpera fêi a gɛ́ɛ í íyee síɣe dímɛi. Ŋ́gula maa kɛ́ kwa ŋánûai.”

¹⁸Gâa è pà Deeƃé pɔ́ a m̀aa ɣelei tí ǹyɛɛ m̀ai, “Lí í Ɣâla teƃele tɔɔ Yâwɛɛ mɛni ma Zɛbusa naloŋ Arana ŋɔsí-sãa táŋ kwaai ma.”

¹⁹Deeƃé è sìa a Gâa ŋɔlia-wooi yɛ̂ɛ berei Yâwɛɛ è déniŋ tɔ̀ɔ lai.

²⁰Arana è ŋ̀ɛ́i sìa é Deeƃé káa gɛ́ pà da ŋɔnûai. Arana è lì é díla kòyâŋ é pîlaŋ ŋ̀úme ŋá é ƃaa kɛ́-maa tɛ́ɛ Deeƃé pɔ́,

²¹ǹyɛɛ m̀ai, “Ŋánuu-namui, ká pà lé mɛni ma?” Deeƃé ǹyɛɛ m̀ai, “Ŋá pà a gɛɛ ŋá ísi-sãai táŋ-kwaai ma yá a gɛ́ɛ ŋá Ɣâla-teƃele tɔɔ naa Yâwɛɛ mɛni ma a gɛ́ɛ gɔlɔ-felai é kpɛ́ɛ ǹûai dîa.”

²²Arana ǹyɛɛi, “Gwaai ma siɣe í ísâlai kúla naa. Zâla kula niŋa-ŋai ká ŋí da díkɔŋ ma-wuru-ŋai. Ya pɔri díkɛ̂i a kɔi.”

²³Arana è zãai ŋí kélee tɛ̀ɛ Deeƃé pɔ́ ǹyɛɛ m̀ai, “Íɣâlai Yâwɛɛ é ǹyée sée ímu.”

²⁴Deeƃé ǹyɛɛ m̀ai, “Kpao. Ŋa pâi vela-fei kɛ̂i íyêei. Fé pâi sɛŋ da kulâi Yâwɛɛ ma a sâla nyíi fé ǹyá níi.” Nya ƃe Deeƃé è gwaai ma da niŋa-ŋai yà a sɛŋ-kâo kole kpua-kpua buu lɔ́ɔlu.

²⁵Deeƃé è ŋɔɣâla-teƃelei tɔ̀ɔ naa é kéreŋ sala da lii-see sala kùla naa. Ɣâla è Eezuɛ-ŋai malôŋ kàa gɔlɔ-felai é kpɛ́ɛ dîa.