Read Kpelle Samia Veerɛi 3 Bible Online

Samia Veerɛi 3 - Kpelle bible

Samia Veerɛi 3

¹Gɔ́i kɛ̀ Sɔ̂ɔ da Deeƃé dínûai loai è wɔ́lɔ kɛ̀ a kɔ́ su kôyaa. Kɛ́lɛ Deeƃé ŋɔnûai tɔɔ̂i è kɛ̀ nɔ́ kpanâni a ɣele kélee, Sɔ̂ɔ ŋɔnûai díwala-wala laai maa kɛ́ yèŋ.

²Deeƃé è lônii-sinaa lɔ́ɔlu mɛi da maa sɔlɔ ƃò Iburɔŋ lɔii su. Ǹóŋ-surɔŋ maa-ŋuŋ láa ƃé kɛ̀ a Amɔŋ. Da Zariɛɛ nɛnii Ainoaŋ ƃé màa sɔlɔ ƃò.

³Ǹóŋ-surɔŋ veerɛi láa ƃé kɛ̀ a Silea. Da Neeba ŋɔpɔɔ nɛnii Aƃigee ƃé m̀aa sɔlɔ ƃô. Aƃigee è kɛ̀ a Kamɛɛ nɛni. Zaaƃa ɣelei láa ƃe kɛ́ a Asalɔŋ. Asalɔŋ ǹee láa ƃé kɛ̀ a Maaka. Maaka ǹâŋ láa kɛ̀ a Tamaai. Taamai è kɛ̀ a kâloŋ Gesu.

⁴Ǹáaŋ ɣelei láa ƃe kɛ̀ a Adoniza. Adoniza ǹee ƃé kɛ̀ a Agi. Ǹɔ́ɔlu ɣelei láa ƃé kɛ̀ a Sefatia nyíi da Abita dí màa sɔlɔ ƃoi.

⁵Gbɛɛ ŋái láa ƃé kɛ̀ a Itireaŋ. Itireaŋ ǹee láa ƃé kɛ̀ a nyíi Igila. Deeƃé è ǹîa-pɛlɛɛi ŋí kélee maa sɔlɔ ƃò Iburɔŋ.

⁶Ǹaa-sâai è kɛ̀ nɔ́ tûai zu Deeƃé da Sɔ̂ɔ dínûai loai, Anɛ ŋɔwála-wala-laai su kɛ́ kɛ́tɛ a ɣele kélee Sɔ̂ɔ ŋɔnûai sáma.

⁷Ɣele tɔnɔ da, Isibosɛ è mò a gɛ́ɛ Anɛ da ǹâŋ Sɔ̂ɔ ŋɔnɛnî-loŋ Lizipa dí kɛ̀ nɛ̃ɛ-ma-laa su. Lizipa ǹee láa ƃé kɛ̀ a Aia.

⁸Isibosɛ wóoi ŋí è ŋwàna kpɔ́ Anɛ ma a ŋ̀ánaa é láɣi mà ǹyɛɛi, “Ya ŋ́gâai yɛ̂ɛ ɣîla Zuda mɛni ma? É kúla gɔ́ɔ pîlanii ŋ́gaa nɔ́ tɔ̃yâ mɛni-ŋa kɛ̂i ínâŋ Sɔ̂ɔ ŋɔpɛ́rɛi mu-ƃelai da ŋɔwɛli kɛ́-maa-ƃelai mɛni ma. Fé tá ńyee kùla ní ímu ŋá ítɛɛ Deeƃé pɔ́. Sâa ƃé ya laa-saa pɛlɛ̂i la ḿâ é pîlaŋ nɛniî ŋí mɛni ma!

⁹Ɣâla é ŋ́gula maa kɛ́ kpɔ́ a ŋ̀ánaa à kɛ̀ fé m̀ɛnii kɛ́ ní Yâwɛɛ è maa kono-tee kɛ̀ la Deeƃé yêei

¹⁰a gɛ́ɛ a pâi Sɔ̂ɔ ŋɔkâloŋ-laai kulâi ǹyêei é dɛ́ɛ Deeƃé pɔ́, é kɛ́ Eezuɛ da Zuda lɔii mɛi é síɣe Daŋ é tóo Bɛɛsiba.”

¹¹Isibosɛ fé ŋɔ́nɔ pɔri ní Anɛ wóo su toôi, kpɛ́ni fêi, è kɛ̀ yaôi ma.

¹²Nya ƃe Anɛ è kela-ŋa tɛ̀ɛ Deeƃé pɔ́-naa Iburɔŋ ǹyɛɛ dîai, “Ka lí ká m̀arê kɛ́ gbɛ̂ɛ ƃé ǹɔii káa a bɔ́ɔi. Tɔɔ é pá kwa ǹyaa kú kúwoo sée. Ŋa pâi kɔ̂i m̀ɛni ma ŋá Eezuɛ-ŋai kélee tɛ́ɛ bɔ́.”

¹³Deeƃé ǹyɛɛ m̀ai, “Mɛni lɛ́lɛɛ ká tí. Kwa yá kwa pâi kúwoo seêi. Kɛ́lɛ mɛni tɔnɔ ƃé ŋa ŋ̀wɛ̂lii í gɛ́ ḿî. Fɛ̂ɛ í pá a ŋánɛnîi Maka fúlɔi, Sɔ̂ɔ ǹóŋ-nɛnii ílɛɛ pâi ŋ́ɛi kâai.”

¹⁴Deeƃé è kela-ŋa tɛ̀ɛ Sɔ̂ɔ ǹóŋ Isibosɛ pɔ́-naa ǹyɛɛ dîai, “Ka m̀ó mà é ŋánɛnîi Maka tɛɛ pôlu nyíi ŋá m̀aa sɛŋ kɔ̀lɛ a Felesia ŋuŋ tɔnɔ paai.”

¹⁵Isibosɛ è Maka worɛ̂ tɛ̀ɛ. Dí lì dí gula ŋɔsurɔ̂ŋ ninai Lai ǹóŋ Patiɛ yêei.

¹⁶Kɛ́lɛ Patiɛ è lɛ̀ɛ dípôlu gɛ́ wɔ̀lɔ é lɛ́ɛ la zu dí seri Ba-uriŋ. Anɛ ǹyɛɛ m̀ai, “Lene pôlu.” È lène pôlu é lí bɔ́-taai.

¹⁷Anɛ è lòno Eezuɛ nuu pɔlɔ-ŋai pɔ́ ǹyɛɛ dîai, “Ɣele kûu kpɛ́-kpɛɛ tɛɛ yée mu kákaa Deeƃé wɛ̂lii a gɛ́ɛ é kɛ́ kámɛi a kâloŋ.

¹⁸Kwaa kú lóno nâa é pîlaŋ ma. Yâwɛɛ è góno tèe Deeƃé yêei a gɛ́ɛ ǹyaa Deeƃé ƃé pâi ŋɔnûai kula yêei kɛ̂i Felesia-ŋai da díkpɔara-ƃelai kélee yêei.”

¹⁹Anɛ è lòno máŋ Eezuɛ-ƃelai da Bɛŋsima suui su-ƃelai pɔ́. È kùla naa é lí Iburɔŋ Deeƃé pɔ́-naa é m̀ɛni lɛ́lɛɛ-ŋai kélee su-kula ma nyíi-ŋai Eezuɛ-ŋai dí gbɛ̀tɛ a gɛ́ɛ dí gɛ́i.

²⁰Anɛ páa Iburɔŋ Deeƃé pɔ́-naa a ŋɔkpakolo buu feerɛi, Deeƃé è kúu kɛ̀ dîa.

²¹Anɛ è mò Deeƃé ma ǹyɛɛi, “Ŋa pâi mu siɣêi ŋá lí ŋá Eezuɛ-ŋai kélee ŋáa tɛ́ ma ŋá lóno dípɔ ímɛni ma a gɛ́ɛ dí fáa ma í gâloŋ-laai sɔlɔ ƃó, í mɛni-ŋai kɛ́ dîɛ nyíi-ŋai ya gbɛ̀tɛ ílii sui.” Nya ƃe Deeƃé è nɛ̀ɛ naa Anɛ é lí lii-see su.

²²Ǹaa è kɛ̀ nɔ́ tí Deeƃé ŋɔnûai da Zôa-ni dí kɛ́ pà. Dí kùla too maa kɛ̂i sãa támaa kɛ̀ ƃò díyêei nyíi-ŋai dí gùla nûa yêei. Dípaai, dífe Anɛ káa ní Iburɔŋ, kpɛ́ni fêi, Deeƃé è dɛ̀ɛ pôlu lii-see su.

²³Zôa da ŋɔkɔ-kuluƃa-ŋai kɛ́ɛ dífe Anɛ káa níi, Gɔkuluƃa-ŋai dí mò Zôa ma dîyɛɛi, “Nɛ̂ɛ ǹóŋ Anɛ è pà Gâloŋ Deeƃé pɔ́-naa, kɛ́lɛ gâloŋ è nɛ̀ɛ naa é lí lii-see su.”

²⁴Nya ƃe Zoa è lì é m̀ó gâloŋ ma ǹyɛɛi, “Lé ƃé í gɛ̀ tí a kúai? Anɛ è pà ípɔ-naa, í dɛ̀ɛ pôlu lé mɛni ma?

²⁵Í gɔ́lɔŋ a gɛ́ɛ Nɛ̂ɛ ǹóŋ Anɛ è pà a gɛ́ɛ é íkiri, é berei kɔ́lɔŋ ya lɔ̂i la íkɛ kulai, a gɛ́ɛ é mɛnii kélee kɔ́lɔŋ ya gɛ̂i.”

²⁶Zôa kuláa naai, è kɔkuluƃa-ŋa tɛ̀ɛ Anɛ tôlii. Dí lì dí gáa Sira ya-loai lá. Kɛ́lɛ Deeƃé fé kɛ́ ní a mɛni da kɔ́lɔŋɔɔ é pîlaŋ dóli mɛni ma.

²⁷Anɛ leneɛ́ɛ pôlu Iburɔŋ, Zôa è zìɣe da ǹyaa dí lí ziɣãŋ lá yɛ̂ɛ ǹyaa ƃé a kɛ̀ ŋ̀wɛ̂lii é lóno bɔ́ loo-pere su. Da ǹyaa dí liɛɛ̂i, Zôa è zɔ̀ɔ goi a m̀óa-sɔkpɔii é baa. È bàa ǹyaa Zôa ǹeɣê Asaɛ paa mɛni ma.

²⁸Duŋ ŋí mɛniɛɛ Deeƃé mìi, è mò ǹyɛɛi, “Ńyãa kwa ŋápɛrɛi mu-ƃelai kúsɔŋ fé Nɛ̂ɛ ǹóŋ Anɛ paa mɛni su Yâwɛɛ ŋɛ́ túɛ.

²⁹Tɔɔ ŋ̀ãa mɛni é kɛ́ Zôa da ŋɔpɛ́rɛi mu-ƃelai ŋûa. Bóŋ pala kpono ma kɔlɔ-fela fé pâi wɔ́lɔ kpɛɛ̂i ŋɔpɛ́rɛi mu. Puru a pâi dípaâi dí ƃóa-sɔ̂kpɔ saa kɛ́.”

³⁰Zôa da ǹeɣê Abisai dí Anɛ pàa, kpɛ́ni fêi, è díleɣê Asaɛ paa kɔ́ su Gibiɔŋ.

³¹Nya ƃe Deeƃé è mò Zôa ma da ŋɔnûai ǹyɛɛi, “Ka káseɣe-ŋai fála-fala, ka maloŋ too-maa seɣe-ŋa too kâa ka maloŋ-see ƃó Anɛ mɛni ma.” Nya ƃe Gâloŋ Deeƃé è lɛ̀ɛ Zaa-gãlai pôlu.

³²Dí Anɛ lòo Iburɔŋ. Deeƃé da ŋɔnûai dí wɔ̀lɔ kpɔ́ m̀olôŋ lá a ŋ̀ánaa.

³³Deeƃé è wɔ̀lɔ Anɛ mɛni ma ǹyɛɛi, “Anɛ, ya pɔ̂ri saâi yɛ̂ɛ ƃoo nûu?

³⁴Ǹyée lá fé kɛ́ ní a ŋ̀íriɛɛ. Yɔlɛ fé kɛ̀ gɔ́ɔ ma È sàa nɔ́ yɛ̂ɛ núu a tòo sɔnyɔ̂ŋ-ƃela yêei, ǹyaa ká ŋí a lɛɛ zu.” Ǹûai kélee dí wɔ̀lɔ m̀ɛni ma.

³⁵Ǹûai kélee dí pà dí kɛ́ Deeƃé ŋa-nɛnɛ, dí kɛ́ lòno bɔ́ a gɛ́ɛ é ǹáa míi a vóloi ŋá. Deeƃé è vòo ǹyɛɛ dîai, “Ɣâla é folôŋ ḿâ a gɛ́ɛ ŋá gɛ́ tí. Fé pâi sɛŋ da kélee miî é lɛ́ɛ la zu vóloi-káoi é tóo!”

³⁶Ǹûai kélee da Eezuɛ-ƃelai dí m̀ɛnii ŋí maa kpɛ̀ɛ. È kɛ̀ a dílii láa mɛni nɔ́ yɛ̂ɛ mɛnii gbeli-ŋai gâloŋ è kɛ̀ gɛ̂i.

³⁷Dí ŋ̀á kàa ma a ŋ̀elei tí dí gɔ́lɔŋ a gɛ́ɛ gâloŋ nîa mɛni fé kɛ́ ní a Nɛ̂ɛ ǹóŋ Anɛ paa mɛni.

³⁸Gâloŋ è mò ŋɔnûai dîa ǹyɛɛi, “Káfe gɔ́lɔŋ a gɛ́ɛ gâloŋ gɛ́tɛ tɔnɔ aâ sâa láŋ Eezuɛ lɔii su?

³⁹Kɔlɔ kpɛɛ̂i ḿâ sâa berei máŋ ŋ́gaa la a kâloŋ. Zeruia ǹônii-sinaai ŋí sɔŋ kpanaŋɔɔ̂i. Tɔɔ Yâwɛɛ é m̀ɛnii ŋí gula maa kɛ́ a dia m̀ɛni nyɔ́mɔɔi ŋí da gɛi m̀ɛni ma!”