Read Kpelle Samia Veerɛi 5 Bible Online

Samia Veerɛi 5 - Kpelle bible

Samia Veerɛi 5

¹Nya ƃe Eezuɛ-ƃelai kélee dí pà Deeƃé pɔ́-naa Iburɔŋ dîyɛɛ m̀ai, “Gáa, kúkaa a íkao da íluu da.

²Sɔ̂ɔ kɛ́ɛ a kâloŋ kúmɛi, ǹyaa ƃé kɛ̀ Eezuɛ-ŋai láa túɛ kɔ́ kɔ́-mɛni su. Yâwɛɛ è góno tèe íyêei ǹyɛɛi, ‘Ya pâi kɛ̂i ŋánûai mɛi kâai Eezuɛ. Ya pâi kɛ̂i a kâloŋ Eezuɛ lɔii mɛi.’ ”

³Eezuɛ nuu-pɔlɔ-ŋai kélee dí pà Deeƃé pɔ́-naa Iburɔŋ. È kpanaŋ-woo kɛ̀ naa díyêei Yâwɛɛ ŋɛ́i, dí wúlɔ pù ŋ̀ûa a gɛ́ɛ é kɛ́ a kâloŋ Eezuɛ lɔii mɛi.

⁴Deeƃé è kɛ̀ a kóraŋ buu saaƃa tãi dí gɛ̀ la a kâloŋ. È kâloŋ-laa kɛ̀ a kóraŋ buu náaŋ.

⁵Gɛ́ɛ Iburɔŋ è kâloŋ-laa kɛ̀ Zuda lɔii mɛi a kóraŋ lɔ́ɔlu mɛi feerɛ ɣáloŋ lɔ́ɔlu mɛi da. Gɛ́ɛ Zerusâlɛŋ, è kâloŋ-laa kɛ̀ Eezuɛ da Zuda lɔii mɛi a kóraŋ buu saaƃa káo saaƃa.

⁶Deeƃé da ŋɔnûai dí lì Zerusâlɛŋ dí kɔ́ pɛ́lɛ Zɛbusa-ŋai dîa, nyíi-ŋai kɛ̀ a ǹɔii-lonii naai. Ǹûai ŋí dí mò Deeƃé ma dîyɛɛi, “Káfe pâi pɔrîi ƃɛ́ sonii kúyêei. Ŋ̀ɛi-pu-ƃelai da gɔɔ-pu-ƃelai nɔ́ ƃé pâi kɔ̂i kápɔ́ díka kpɛ́.”

⁷Kɛ́lɛ Deeƃé è Zãiyɔŋ kwaa ma mɛni wála-walaai ŋí sòŋ é ǹáa sée naa ma.

⁸Deeƃé è mò a màa ɣelei tí ǹyɛɛi, “Diai pâi kɔ̂i Zɛbusa-ŋai pɔ́, tɔɔ dí tɛ́ɛ ƃɛ́i ǹyái a tɛ̀ɛ naa ǹɔii mui dí pɛ́lɛ gɔ́ɔ pu-ƃelai da ŋ̀ɛi-pu-ƃelai tí dîa. Deeƃé fé kɛ́ ní a ǹûai ŋí wɛ́liɛɛ. Mɛni ma dí mò dîyɛɛi, ‘Ŋ̀ɛi-pu-ƃelai da gɔ́ɔ-pu-ƃelai dífa pɔri lɔ̂i galoŋ-pɛrɛi mu.’ ”

⁹Deeƃé è sèe naa é ǹaa láa sée a Deeƃé ŋɔtaa-lêei. È siɣâŋ tɔ̀ɔ é dínaŋ naa ma é kúla Milo é lí daa-leei su-pere.

¹⁰Deeƃé ŋɔwála-walai su è kɛ̀ nɔ́ kɛ̂tɛi, kpɛ́ni fêi, Yâwɛɛ ŋ̀wála-wala kélee Ɣalai è kɛ̀ gɔlɛ.

¹¹Taya kaloŋ Iraŋ è pɛ́rɛ tɔɔ-ƃela tɛ̀ɛ Deeƃé pɔ́-naa a pɛ́rɛ tɔɔ-sãa. Dí lì dí ŋɔpɛ́rɛi tɔ́ɔ.

¹²Deeƃé è gɔ̀lɔŋ a gɛ́ɛ Yâwɛɛ è gɛ̀ a kâloŋ Eezuɛ-ŋai mɛi. Ŋɔnûai mɛni ƃé è kɛ̀ ǹyaa Deeƃé ŋɔkâloŋ-laai su kɛ̂tɛi la.

¹³Deeƃé kuláa Iburɔŋ lɔii sui, è nɛnî nina támaa kùla é bɛlɛ ŋɔnɛyâai dîa Zerusâlɛŋ. È lônii-sinaa da ǹɛyaa támaa maa sɔlɔ ƃò dîa.

¹⁴Ǹîa-pɛlɛɛi è dímaa sɔlɔ ƃò Zerusâlɛŋ dílaa ƃa: Samua, Soba, Netaŋ, Saloma,

¹⁵Iɣa, Ilisua, Nefe, Zafia

¹⁶Ilisama, Iliada da Ilifelɛ.

¹⁷Felesia-ŋai kɛ́ɛ da mɛ̀ni a gɛ́ɛ da Deeƃé kɛ́ a kâloŋ Eezuɛ lɔii mɛi, dí lì díkɛ gɔ̀ri. Kɛ́lɛ Deeƃé è m̀ɛnii ŋí mɛ̀ni é lí ŋɔtaai su.

¹⁸Felesia-ŋai dí pà dí díŋaa kɔ́lɛ Lefiaŋ Potoi su.

¹⁹Nya ƃe Deeƃé è Yâwɛɛ marê kɛ̀ ǹyɛɛ m̀ai, “Ŋa pɔri liî ŋá kɔ́ Felesia-ŋai pɔ́? Ya pâi ǹɛɛ̂i naa ŋá díyee mɛi ɣále?” Yâwɛɛ ǹyɛɛ m̀ai, “Lí. Ŋa pâi dítɛɛ tí-ti ƃôi ípɔ.”

²⁰Deeƃé è pà Baa-peraziŋ, é díyee mɛi ɣále naa. È mò ǹyɛɛi, “Yâwɛɛ aâ gɛ́ ŋa ŋákpɔara-ƃelai yée mɛi ɣále yɛ̂ɛ yá a galaŋ wôlo.” È m̀aa kwáai ma láa sèe a Baa-peraziŋ.

²¹Felesia-ŋai dí díɣâla-pɔkɔɔŋ-ŋai lɛ̀ɛ naa dí pú. Deeƃé da ŋɔnûai dí dísìɣe dí lí a dia.

²²Felesia-ŋai dí pà pôlu ŋɔ́nɔ dí díkîe-ni ŋáa kɔ́lɛ Lefiaŋ Potoi su.

²³Deeƃé è Yâwɛɛ marê kɛ̀ ŋɔ́nɔ ǹyɛɛ m̀ai, “Ya pɔri liî í kɔ́ dípɔ. Ífe tɛ̀ɛ díteniŋ ma pere. Tɛɛ dípôlu pere besãŋ wuru-ŋai naa pere.

²⁴À kɛ̀ yà nûa kɔ́ɔ mu-tiŋ mɛ̀ni ŋ̀elei su-pere póŋ-poŋ besãŋ wurui tôŋ su, íkpîŋ kpɛtɛ. Gɔ́lɔŋ a gɛ́ɛ Yâwɛɛ káa ítuɛ-pere a gɛ́ɛ é dípaa.”

²⁵Deeƃé è gɛ̀ yɛ̂ɛ berei Yâwɛɛ è mò la mai. È Felesia-ŋai pàa é síɣe Geba é tóo Gezɛ.