Read Kpelle Samia Veerɛi 6 Bible Online

Samia Veerɛi 6 - Kpelle bible

Samia Veerɛi 6

¹Deeƃé è gɔ-kuluƃa lɛ́lɛɛ-ŋai kélee ŋáa tɛ̀ ma. Dí kɛ̀ a núu wála buu saaƃa (30,000).

²È dísìɣe da dîa-ni dí lí Beela taa-leei su Zuda a gɛ́ɛ dí pá a Ɣâla ŋɔkpanaŋ-woo kɛ́ɛ maa gãlai. Gãlai ŋí è wɔ́lɔ kɛ̀ naa, Ŋwála-wala kélee Ɣâlai Yâwɛɛ láai su. Yâwɛɛ ŋɔsee-sɛŋ è kɛ̀ seeni ŋ̀âla-taa kooŋ-sãai loai.

³Gãlai ŋí è kɛ̀ nalôŋ tɔnɔ ŋɔpɛ́rɛi mu ǹyée tôŋ su. Ǹalôŋ kpîŋ láa ƃé kɛ̀ a Abinada. Nya ƃe Deeƃé-ni dí gãlai sìɣe dí zee niŋa sia-keleŋ nina su díkɛ lì la. Abinada ǹônii, Uza da Aio ƃé kɛ̀ ǹiŋai teniŋ tɔɔ̂i.

⁴Aio kɛ́ ƃò dítuɛ.

⁵Deeƃé da ŋɔnûai kélee dí kɛ̀ gɔnîŋ ɣalêi, nyɛyɛ̂ŋ, díkɛ gbuŋgbuŋ tua, díkɛ pâni-kalaŋ lòkwa gîe ma, díkɛ wule tòo, dí kɛ́ lii-nɛ̃ɛ kùla Yâwɛɛ ŋɛ́i a díwala-walai kélee.

⁶Dí seriɛ́ɛ Nakɔ̃ŋ mii-sãa táŋ kwaai mai, Uza è ǹyée tɛ̀ ɣelêi é Gbanaŋ-woo-kɛɛ maa gãlai sóŋ. Daa tulɛ-ŋai kɛ̀ gãlai ɣâlai dí kàreŋ gãlai kɛ́ pa toôi.

⁷Yâwɛɛ è ǹíi ŋwàna ma é bàa kpɔ́ nɔ́ ŋáa ma, kpɛ́ni fêi, è ǹyée lɛ̀ɣɛ Gbanaŋ-woo-kɛɛ maa gãlai ma. È bàa naa gãlai kɔlɛ.

⁸Deeƃé líi è tòo pôlu Uza paa mɛni ma. È màa kwaai ma tòli a Perezi-Uza. Gwaai ŋí ma láa ká tí tóo sâa ma.

⁹Deeƃé è yào Yâwɛɛ ma a ŋ̀elei tí. È mò ǹyɛɛi, “Yâwɛɛ Ŋɔkono-tee Gãlai a pɔri pá pere kɛ̂i léŋ ḿbɔ naa?”

¹⁰Ǹalôŋ ŋí kɛ́ɛ a saai, Deeƃé è yào kpɔ́ a ŋ̀ánaa. Vé pɔri ní liî a gãlai ŋí ŋɔtaai su. Kɛ́lɛ è lì la Gitai taa-lee su naloŋ Obe-idɔŋ ŋɔpɛ́rɛi lá.

¹¹È gɛ̀ naa a ɣáloŋ saaƃa Yâwɛɛ è lûwa làa Obɛ Idɔŋ ma da ŋɔpɛ́rɛi mu-ƃelai kélee.

¹²Dí mò Deeƃé ma dîyɛɛi, “Yâwɛɛ aâ lûwa láa Obɛ Idɔŋ ma da ŋɔpɛ́rɛi mu-ƃelai kélee ŋɔkpanaŋ-woo kɛ́ɛ maa gãlai mɛni ma.” Nya ƃe Deeƃé è lì é Ɣâla ŋɔkpanaŋ-woo kɛ́ɛ maa gãlai kúla naa é pá la Zerusâlɛŋ a lii-nɛ̃ɛ.

¹³Diai kɛ̀ liî a Gbanaŋ-woo-kɛɛ maa gãlai kɛ́ɛ da sìa a kɔ́ɔ-loai lɔ́ɔlu mɛi dai, Deeƃé è sâla kùla a niŋa sirɛ da niŋa dɔŋ-dɔŋ tɔnɔ.

¹⁴Deeƃé è m̀ãla Yâwɛɛ ŋɛ́i-tuɛ a ŋɔwála-walai kélee. È kɛ̀ a m̀aa ɣiriɛ́ɛ a ɛfɔ.

¹⁵Da Eezuɛ-ƃelai kélee dí pà a Yâwɛɛ Ŋɔkpanaŋ-woo-kɛɛ maa gãlai dí kɛ́ túru fɛ̀ɛ, dí kɛ́ làɣi a zu kɛ́tɛ.

¹⁶Díkɛɛ pâi a gãlai Deeƃé ŋɔtaai sui, Sɔ̂ɔ ǹóŋ-nɛnii Maka è kɛ̀ Deeƃé kâai gɛ́ pìli ɣelêi gɛ́ pìlaŋ gɛ́ m̀ãla Yâwɛɛ ŋɛ́i-tuɛ. Kɛ́lɛ Deeƃé kɛ́-pere fé ǹíi láa ní.

¹⁷Dí pà a gãlai m̀ûui mu dí zèe ƃɛ́i Deeƃé è naa kpɛ̀tɛ m̀ɛni mai. Deeƃé è kéreŋ sala da lii-see sala kùla naa Yâwɛɛ ŋɛ́i-tuɛ.

¹⁸Deeƃé kpɛɛ́ a géreŋ sâlai da ǹíi-see salai kulâi, è lûwa tòo ǹûai dîa Ŋ̀wála-wâla kélee Yâwɛɛi láai su.

¹⁹È kpólo, sua ŋɔŋ da wúru-ƃa kpɔlu-ŋa ŋáa kɔ̀lɛ dîa. Dí lì pôlu dípɔ-taai a tɛɛ-ŋa.

²⁰Deeƃé ǹyaŋ è lì pôlu a gɛ́ɛ é lûwa too ŋɔpɛ́rɛi mu-ƃelai dîa. Kɛ́lɛ gɛɛ liî, Sɔ̂ɔ ǹóŋ-nɛnii Maka è pà berei tɔɔ̂i ǹyɛɛ m̀ai, “Eezuɛ kaloŋ, í sâa ƃaa kɛ́-maa tɛɛ-pere kɛ̀ léŋ tí íkpîŋ pɔ́i? Í ímaa kpôloŋ íyee mu-nɛyãai kpaya-kpayai ŋɛ́i léŋ tí yɛ̂ɛ ƃoo nuui.”

²¹Deeƃé ǹyɛɛ m̀ai, “Ŋá kɛ̀ mãlâi Yâwɛɛ mɛni ma kɛ́lɛ dia fêi. Yâwɛɛ ŋí ƃé ŋ́gɛ̀ a kâloŋ Eezuɛ-ŋai mɛi é ínâŋ lɛɛ. M̀ɛni ma, ŋa pâi kɛ̂i lii-nɛ̃ɛ kulâi nɔ́ ŋ̀ɛ́i ŋ́gɛ ƃaa kɛ́-maa tɛ̀ɛ bɔ́.

²²Ŋa pâi ƃâa kulâi ŋ́gbîŋ ma é tɛ́ɛ nyíti ma. A pâi kɛ̂i a ƃɛlɛ too mɛni íŋɛi. Kɛ́lɛ a pâi kɛ̂i a ƃaa kɛ́-maa kɛ́tɛ ǹɛyâai ŋɛ́i ḿɛni ma ya lônoi é pîlaŋ dîai.”

²³M̀ɛni ma Ɣâla è Maka, Sɔ̂ɔ ǹóŋ-nɛnii kɛ́ a kpóma nɛni m̀ɛnii é wɔ́lɔ mò Deeƃé mai a ŋ̀aa-see kɛ́ɛ. Ǹyaŋ vé pâi wɔ́lɔ lóŋ da maa sɔlɔ ƃôi ŋɔfúlu-laai su.