Read Kpelle Samia Veerɛi 7 Bible Online

Samia Veerɛi 7 - Kpelle bible

Samia Veerɛi 7

¹Deeƃé kɛ́ɛ Yâwɛɛ a ŋ̀uŋ ma ƃó ŋɔkpɔara-ƃelai kélee yêei, è nâa kɛ̀ ŋɔkâloŋ-pɛrɛi mu lii-see su.

²È mò Ɣâla ŋɔlóno kɛ́-nuui Netaŋ ma ǹyɛɛi, “Gáa, ŋápɛrɛi tɔɔ̂i a sîda wuru. Kɛ́lɛ Ɣâla ŋɔkpanaŋ-woo-kɛɛ maa gãlai káa ƃûu mu.”

³Netaŋ ǹyɛɛ m̀ai, “Lí í m̀ɛnii kélee kɛ́ nyíi ya gbɛ̀tɛ ílii sui. Yâwɛɛ káa íkɔlɛ.”

⁴Kɛ́lɛ gbíni tɔnɔi tí, Yâwɛɛ è mò Netaŋ ma ǹyɛɛi,

⁵“Lí í m̀ó ńyee mu-nuui Deeƃé ma yɛ̂ɛ mai, Yâwɛɛ ǹyɛɛ: ‘Ya pɔ̂ri pɛ́rɛ tɔɔ̂i ḿî?

⁶Fé tá nyíi ní pɛ́rɛ mu é síɣe tãi ma ŋá Eezuɛ-ŋai kùla la Ize lɔii su é tóo sâa ma. Kɛ́lɛ ŋ́gaa nɔ́ wɔ́lɔ sia-sîai ŋ́gɛ nyìi ƃûu mu.

⁷Ƃɛ́i-ŋai kélee kwa Eezuɛ-ŋai kwa tɛ̀ɛ naai, ka tá gáa ŋá dílaa túɛ-nuui da marê kɛ́ ńyɛɛ ma lé ƃé ífe sîda wuru pɛrɛ tɔɔ-ni la ḿɛni mai?’

⁸“M̀ɛni ma, m̀ó ńyee mu-nuui Deeƃé ma yɛ̂ɛ Ŋ̀wála-wâla kélee Yâwɛɛi ǹyɛɛ, ‘Ŋá íkùla kala ŋûnu su a gɛ́ɛ ífe ŋɔ́nɔ kɛ̀ a ƃála mɛi káa nuu, kɛ́lɛ íkɛ ŋánûai mɛi a kâloŋ.

⁹Ŋ́gaa íkɔlɛ ƃɛ́i kélee ya lì naai. Ŋá íkpɔara-ƃelai kélee pù íkɔɔ mu. Ŋa pâi gɛ̂i ílaa mu é wuyɛ yɛ̂ɛ dîai dílaa mu-wuyɛ̂ɛi ŋ̀éniɛi sui.

¹⁰Ŋa pâi kwaa ma kpɛtɛ̂i ŋánûai Eezuɛ-ŋai mɛni ma. Naa a pâi kɛ̂i a díkpɔɔi kwaa ma núu da fa ŋɔ́nɔ díkula naa. Wála-wala nuu da fa ŋɔ́nɔ dímaa yào yɛ̂ɛ berei da kâa gɛ̀ la a diai,

¹¹é síɣe ŋ̀elei ma ŋá dílaa túɛ-ƃela pù la dímɛi. Ŋa pâi gɛ̂i ka káfii tɔ́ɔ kákpɔara-ƃelai yêei. É kúla nyíŋi pôlu, Yâwɛɛ ŋá mò kâa a gɛ́ɛ ŋa pâi pɛ́rɛ tɔɔ̂i kámɛni ma.

¹²Íwɔ̂ ɣele kûu-ŋai da kpɛɛ ya sàa, ŋa pâi gɛ̂i íkpɔɔi loŋ-sinaai dɔnɔ é ípɔɔ ŋá síɣe. Ŋa pâi gɛ̂i ŋɔkâloŋ-laai su kpanaŋɔɔ.

¹³A pâi pɛ́rɛ tɔɔ̂i mî, ǹyaŋ ŋa pâi gɛ̂i ŋɔkâloŋ-laai kɛ́ ƃò a wɔ́lɔ-wɔlɔ kaloŋ-laa.

¹⁴Ŋa pâi kɛ̂i a ǹâŋ, ǹyaa máŋ gɛ́ ƃò a ńoŋ. A mɛni nyɔ́mɔɔ da kɛ̀ ŋa pâi gula maa kɛ̂i.

¹⁵Kɛ́lɛ ŋáwɔlɔ-wɔlɔ wɛli kɛ́-maai a pâi kɛ̂i nɔ́ ńyêei m̀ɛni ma. Fé pâi gulâi ǹyêei yɛ̂ɛ berei ŋá gɛ̀ la a Sɔ̂ɔi.

¹⁶Ŋa pâi íkɔ̃liŋ da íkâloŋ-laai maa kɔ̃ɔ̂i. Íkâloŋ see-sɛŋ a pâi kɛ̂i naa wɔ́lɔ-wɔlɔ da wɔ́lɔ-wɔlɔ.’ ”

¹⁷Netaŋ è ŋ̀óo-ŋai ŋí kélee su kùla Deeƃé ma da nyíi-ŋai è gàa zĩa sui.

¹⁸Nya ƃe Gâloŋ Deeƃé è lì é m̀aa yéŋ Yâwɛɛ ŋɛ́i-tuɛ ǹyɛɛ m̀ai, “Óo Yâwɛɛ Ɣala, gbɛ̂ɛ ƃa ńyãa ya pɔri mɛni kɛ́tɛ kɛ́ɛi ŋí kɛ̂i ḿɛni ma kwa ŋánûai?

¹⁹M̀ɛni-ŋai ŋí fé nɔ́ íŋɛi a mɛni fii-kpɛɛ, óo Yâwɛɛ Ɣala. Ya íkono-teei lí máŋ tuɛ-pere íyee mu-nuui ǹóŋ ŋɔlônii mɛni ma, óo Yâwɛɛ Ɣâla!

²⁰Lé ƃe ŋɔ́nɔ ńa ŋá m̀ó yâi? Í íyee mu-nuui kɔ́lɔŋ a ǹɛ́lɛɛ, óo Yâwɛɛ Ɣala!

²¹Ya m̀ɛni-ŋai kélee kɛ́ í díkpɛ̀tɛ ílii sui, ya ǹɛɛ naa íyee mu-nuui a díkɔlɔŋ.

²²M̀ɛni ma í kɛ́tɛi. Sɛŋ da fé naa é seri ípɔ. Ɣâla da kpɛ́ni fé naa é kɛ́ yɛ̂ɛ yá, yɛ̂ɛ berei kwa íkɛ mɛni-ŋai kâai lai.

²³Lɔii-ŋuŋ da fé naa é kɛ́ yɛ̂ɛ Eezuɛ nyíi í zu-ƃela kùla luɛ-laa su í díkɛ a ínûai. Í mɛni kpaya-kpaya támaa kɛ̀ dîɛ. Í díŋuŋ ma ƃò lɔii-ŋuŋ támaa yêei da díɣâla-ŋai.

²⁴Ya ínûai kɛ̂i kɛ́ ma ya kɛ́ a Díɣâla.

²⁵“M̀ɛni ma íkono-teei ŋ̀aa see kɛ́ nyíi í gɛ̀ íyee mu-nuui yêei da ŋɔpɛ́rɛi mu-ƃelai, óo Yâwɛɛ.

²⁶Nûa da pâi ílaa maa tɛ̂i a ŋ̀ánaa. Da pâi m̀ôi dîyɛɛi, ‘Yâwɛɛ, Ŋ̀wála-wâla kélee Ɣalai káa Eezuɛ mɛi,’ ǹyaŋ a pâi ńyee mu-nuui Deeƃé ŋɔpɛ́rɛi maa kɔ̃ɔ̂i,

²⁷kpɛni fêi, óo Yâwɛɛ, Ŋ̀wála-wâla Ɣalai, í mɛ̀ni-ŋai ŋí kélee maa kili ŋa-pono tɛ̀ɛ íyee mu-nuui pɔ́ yɛ̂ɛ mai, ‘Ŋa pâi pɛ́rɛ tɔɔ̂i yɛ̂.’ M̀ɛni ma, Eezuɛ Ɣalai, Ŋ̀wála-wâla kélee Yâwɛɛ, íyee mu-nuui líi kulâi a gɛ́ɛ é ífɛli bere sîi ŋí su, kpɛni fêi, ya m̀ó ḿâ a gɛ́ɛ ńônii-sinaai da nɔ́ ƃé pâi lɛɛ̂i ḿbɔɔ ŋá.

²⁸“Óo Yâwɛɛ Ɣâla, íkaa a Ɣâla. Íwooi káa a tɔ̃yâ, ǹyaŋ ya Gbanaŋ-woo-kɛɛ lɛ́lɛɛi ŋí kɛ́ íyee mu-nuui yêei.

²⁹M̀ɛni ma, lûwa láa íyee mu-nuui ma a gɛ́ɛ ŋɔfúlu-laai su é kôya. Óo Yâwɛɛ Ɣâla, yaâ m̀ó ǹyaŋ ísârai, íyee mu-nuui a lûwa sɔlɔ ƃôi.”