Read Kpelle Samia Veerɛi 9 Bible Online

Samia Veerɛi 9 - Kpelle bible

Samia Veerɛi 9

¹È kɛ̀ tí Deeƃé é m̀ó ǹyɛɛi, “Núu fé lɛ̀ɛ ní Sɔ̂ɔ ŋɔpɛ́rɛi mu nyíi ŋa pɔri ŋáwɛli kɛ́-maai lɛ̂i Zonetaŋ mɛni ma?”

²Sɔ̂ɔ yée mu-nuu tɔnɔ è kɛ̀ naa. Ǹáa ƃé kɛ̀ a Ziƃa. Dí dòli Deeƃé ǹyɛɛ mai, “Yá ƃé da kɛ̂ yâ Ziƃai?” Ǹyɛɛ mai, “Ńyãa ƃe.”

³Gâloŋ ǹyɛɛ m̀ai, “Núu da è lɛ̀ɛ Sɔ̂ɔ ŋɔpɛ́rɛi mu nyíi ŋa pɔri ŋáwɛli kɛ́-maai lɛ̂i ma yɛ̂ɛ berei ŋá ŋ́gono tèe la Yâwɛɛ yeei?” Ziƃa ǹyɛɛ m̀ai, “Zonetaŋ ǹóŋ surɔŋ tɔnɔ káa niî naa. Kɛ́lɛ gɔ̃liŋɔ̂ɔi.”

⁴Ǹyɛɛ mai, “Ǹyaa kɔɔ?” Ziƃa ǹyɛɛ m̀ai, “Gáa Amɛɛ ǹóŋ Maka pɔ́-naa Lo-deba taai su.”

⁵Gâloŋ Deeƃé è ŋ̀orɛ̂ tɛ̀ɛ dí pá la.

⁶Sɔ̂ɔ ǹóŋ lóŋ Mɛfebosɛ è pà é pîlaŋ ŋ̀ume ŋá Deeƃé ŋɛ́i-tuɛ é ƃaa kɛ́-maa tɛ́ɛ bɔ́. Deeƃé ǹyɛɛ m̀ai, “Mɛfebosɛ!” È zu tòo ǹyɛɛ m̀ai, “Íyee mu-nuui ká ŋí.”

⁷Deeƃé ǹyɛɛ m̀ai, “Ífe yao. Ŋa pâi ŋáwɛli kɛ́-maai lɛ̂i yâ ínâŋ sârai. Ŋa pâi ínâŋ ŋɔlɔii-ŋai kélee tɛɛ̂i ípɔ. Ya pâi kɛ̂i ílaa miî ŋáteƃelei ma a ɣele kélee.”

⁸Mɛfebosɛ è pìlaŋ ŋ̀ume ŋá gâloŋ ŋɛ́i túɛ ǹyɛɛ m̀ai, “Íyee mu-nuui kɔɔ ǹyaa ya mɛni lɛ́lɛɛ kɛ́ɛ ŋí kɛ̂i ɣîla kɛ́ɛ yɛ̂ɛ ńyãa ḿîi?”

⁹Nya ƃe gâloŋ è Sɔ̂ɔ yée mu-nuui Ziƃa tòli ǹyɛɛ m̀ai, “Ŋa Sɔ̂ɔ kɔ̃liŋ da ŋɔpɛ́rɛi mu-ƃelai kélee tɛɛ̂i ǹóŋ pɔ́.

¹⁰Yá, ílônii-sinaai da íyee mu-ƃelai ka pâi kɛ̂i ǹyée mu. Ka kɛ́ tíi kɛ̀ mì. Mii-sɛŋ é kɛ́ ŋɔpɛ́rɛi mu a ɣele kélee. Kɛ́lɛ Mɛfebosɛ a pâi kɛ̂i ǹáa miî ŋáteƃelei ma.” Ziƃa ǹônii-sinaai díkɛ̀ puu káo lɔ́ɔlu, ǹyée mu-ƃelai díkɛ ƃò buu feerɛ.

¹¹Ziƃa ǹyɛɛ gâloŋ mai, “Ŋa pâi mɛ̀nii kélee kɛ̂i yɛ̂ɛ berei ya m̀ó la ḿâi.” Mɛfebosɛ a kâa ǹáa mìi Deeƃé ŋɔteƃelei ma yɛ̂ɛ gâloŋ ǹônii da.

¹²Mɛfebosɛ è lóŋ-surɔŋ maa sɔlɔ ƃò é ǹáa sée a Maka. Ǹyaŋ dîai kélee kɛ̀ Ziƃa yée mui dí kɛ̀ a Mɛfibosɛ yée mu-ƃela.

¹³Mɛfebosɛ è sèe Zerusâlɛŋ, kpɛ́ni fêi, a kâa ǹáa mìi gâloŋ ŋɔteƃelei ma. Gɔ́ɔ veerɛ è kɛ̀ a búɔɔ.