Read Kpelle Kâloŋ-ŋa Maa-ŋuŋ 11 Bible Online

Kâloŋ-ŋa Maa-ŋuŋ 11 - Kpelle bible

Kâloŋ-ŋa Maa-ŋuŋ 11

¹Gâloŋ Saloma è lɔii da kpɛ́ni su nɛyaa támaa kùla é kúla Ize kaloŋ ǹóŋ-nɛnii pôlu. È nɛyâa kùla Môa nuu suui su, Amɔŋ-ŋai, Idɔŋ-ŋai, Sidɔŋ-ŋai da Ita-ŋai.

²Dí kùla lɔii ŋuŋ da kpɛ́ni-ŋa su nyíi Yâwɛɛ è dímaa mɛni ƃò Eezuɛ-ŋai dîa ǹyɛɛi, “Káfe díta kùla a nɛnî kpaa surɔ̂ŋ. Kà gɛ̀ tí, da pâi kálii penêi díɣâla-ŋai pɔ́-naa pere.” É máŋ kɛ́ tí, Saloma è kɛ̀ nɔ́ a ganaŋɔɔ dîa wɛli-kɛ-maa pere su.

³Saloma è kâloŋ lonii ŋuŋ lɔ́ɔlu mɛi feerɛ kùla a nɛyâa. Ŋɔnɛyâa pɛlɛ-pɛlɛɛi dí kɛ̀ a ŋuŋ saaƃa. Ǹɛyâai ŋí dí gɛ̀ é bôlu tɔɔ Ɣâla ma.

⁴Saloma pɔlɔɔi, ŋɔnɛyâai dí ǹíi pène é pɛ́lɛ Ɣâla da kpɛ́ni-ŋa fɛliɛɛ ma. Ǹíi fé ŋɔ́nɔ kɛ́ ní a guláa Ŋɔɣâlai Yâwɛɛ mɛni ma, yɛ̂ɛ berei ǹâŋ Deeƃé líi è kɛ̀ a guláa lai.

⁵È kɛ̀ Sidɔŋ-ŋai díɣâlai Asatɔra fɛlîi da Amɔŋ-ŋai díɣâlai Molɛ nyíi maa mɛni ƃɛlɛ fé Ɣâla koi.

⁶Saloma è sɔnyɔ̂ŋ kɛ̀ Yâwɛɛ ŋɛ́i. Vé lɛɛ ní Yâwɛɛ pôlu a ǹíi kélee yɛ̂ɛ berei ǹâŋ Deeƃé è gɛ̀ lai.

⁷È Ɣâla fɛli kwaa ma kpɛ̀tɛ Zerusâlɛŋ ǹyéei ma vóloi kulâi-pere, Môa-ŋai díɣâla nyɔ́mɔɔi Kemɔ nyíi kɛ̀ a m̀ɛlɛ kpɛɛ Yâwɛɛ koi fɛli mɛni ma da Amɔŋ-ŋai díɣîalai Molɛ.

⁸È m̀ɛni tɔnɔi ŋí kɛ̀ ŋɔlɔii ŋuŋ da kpɛ́ni su nɛyâai mɛni ma. Dí kɛ̀ kéreŋ sãa kúŋ nɛ̃ɛ kêrenii naa díkɛ sâla kùla díɣâla-ŋai dîa.

⁹Yâwɛɛ líi è ŋwàna Saloma ma, kpɛ́ni fêi, è bôlu tɔ̀ɔ ǹyaa Yâwɛɛ, Eezuɛ Ŋɔɣâlai ma nyíi kùla ŋ̀ɛ́i gîei feerɛi.

¹⁰Berei máŋ è mò la Saloma ma a gɛ́ɛ vé pìlaŋ Ɣâla da kpɛ́ni-ŋa pôlui, Saloma fé ŋɔlia-wooi siɣe ní.

¹¹Nya ƃe Yâwɛɛ è mò ma ǹyɛɛi, “Nyíi nɔ́ ítûa-pere ƃe ŋí, ífe ŋákpanaŋ-wooi da ŋátɔ̂ŋ-ŋai mɛi káa ní nyii-ŋai ŋá mò yâ í díkɛ́i, ŋa pâi gâloŋ-laai kula tí-ti ƃôi íyêei ŋá dɛ́ɛ íyee mu-ƃelai dɔnɔ pɔ́.

¹²É máŋ kɛ́ tí, ínâŋ Deeƃé maa mɛni ma, ḿvé pâi gulâi íyêei tãi íkaa la ɣele mai. Ŋa pâi gulâi í lóŋ yêei.

¹³É máŋ kɛ́ tí, ḿve pâi gâloŋ-laai kélee kulâi ǹyêei, kɛ́lɛ ŋa pâi ǹúu-suui dɔnɔ lɛɛ̂i ǹyêei ńyee mu-nuui Deeƃé maa mɛni ma da Zerusâlɛŋ mɛni ma nyíi ŋá zìɣe zui.”

¹⁴Nya ƃe Yâwɛɛ è Saloma ŋɔkpɔara-nuu Ada kɛ̀ é tɔ́ɔ ma. Ada è kɛ̀ a Idɔŋ-nuu. È kɛ̀ a Idɔŋ kaloŋ-laai su nuui dai.

¹⁵Gâloŋ Deeƃé kɛ́ɛ wɔ́lɔ kɛ̀ kɔ̂i Idɔŋ pɔ́i, ŋɔkɔ-kuluƃa-ŋai láa-tuɛ-nuui Zôa, nyíi wɔ́lɔ lì naa a gɛ́ɛ é boma-ŋai lóoi, è Idɔŋ sinaai kélee pàa.

¹⁶Zôa da Eezuɛ-ƃelai kélee dí kɛ̀ naa a ɣáloŋ lɔ́ɔlu mɛi da é lɛ́ɛ la zu dí Idɔŋ sinaai kélee su kara.

¹⁷Kɛ́lɛ Ada, nyíi kɛ̀ niî a surɔ̂ŋ-looi, è pù é lí Ize da Idɔŋ-ƃelai láa túɛ-ƃelai da-ni kɛ̀ tíi kɛ̂i ǹâŋ yée mui.

¹⁸Dí kùla Midiaŋ dí lì Paraŋ. Dí Paraŋ sinaai da-ŋa sìɣe da dîa-ni dí lí Ize. Ize kaloŋ è pɛ́rɛ, lɔii mii-sɛŋ tɛ̀ɛ Ada pɔ́.

¹⁹Ize kaloŋ líi è kɛ̀ kpɔ́ a ǹáa Ada yêei. È ŋɔnɛnîi Tapɛnɛ ǹeɣê tɛ̀ɛ bɔ́ a ŋɔnɛnî.

²⁰Tapɛnɛ ǹêɣe è lóŋ-surɔŋ maa sɔlɔ ƃò Ada mì é ǹáa sée a Genuƃa. Tapɛnɛ è 1ǹôloŋ ŋí kùla zu gâloŋ ŋɔpɛ́rɛi mu. Genuƃa da gâloŋ ǹônii-sinaai dí kɛ̀ naa díkîe ma.

²¹Ada kɛ́ɛ Ize lɔii sui, è mɛ̀ni a gɛ́ɛ Deeƃé a saa. E mɛ̀ni máŋ a gɛ́ɛ a gɔ-kuluƃa-ŋai láa-tuɛ-nuui Zôa ǹyaa máŋ a saa. Ada è mò gâloŋ ma ǹyɛɛi, “Ǹɛɛ naa ŋá lene pôlu ŋ́gbɔɔi lɔii su.”

²²Gâloŋ è marê kɛ̀, “Lé ƃé vé ƃɛ́ íyêei ǹyaa ƃa ŋ̀wɛ̂lii í lí pôlu íkpɔɔi lɔii sui?” Ada ǹyɛɛ m̀ai, “Sɛŋ da kôlo fé too ní ḿâ, kɛ́lɛ nɛ̀ɛ naa ŋá lí!”

²³Ɣâla è Iliada ǹóŋ Lezoŋ kɛ̀ máŋ é tɔ́ɔ Saloma ma. Lezoŋ è pù ŋɔmɛi-nuui Adadezɛ yêei. Adadezɛ è kɛ̀ a kâloŋ Zoba.

²⁴È kpakolo kpulu ŋáa lɛ̀ɣɛ díkîe ma gɛ́ ƃò a dílaa túɛ-nuu. Ǹûai ŋí dí kɛ̀ a tɔɔ-ma-ƃela a tãi Gâloŋ Deeƃé è kɛ̀ Zoƃa kɔ-kuluƃa-ŋai su karai lai. Dɔɔ-ma-ƃelai dí lì Dɛmɛika, dí sée naa dí Lezoŋ kɛ́ a díkâloŋ.

²⁵Lezoŋ è kɛ̀ a Eezuɛ maa kpɔara-nuu Saloma ŋɔtãi ma. M̀ɛnii ŋí è gɛ̀ ŋɔmɛni-solii su é kɛ́tɛ Ada è kɛ̀ la bôlui.

²⁶Ǹúui ŋɔ́nɔ tɔ̀ɔ Saloma mai ƃé kɛ̀ a Zɛroboaŋ. Zɛroboaŋ è kɛ̀ a Saloma ŋɔnûai láa túɛ-ƃelai dɔnɔ. Ǹâŋ láa ƃé kɛ̀ a Neba. Ǹee láa ƃé kɛ̀ a Zɛrua. Ǹee kɛ̀ a pɔɔ-nɛnî kɛ́lɛ ǹâŋ è kɛ̀ ɣele ma. Dí kɛ̀ a Ifiraŋ-nuu suui su-ƃela. Dípɔ-taai ƃa Zereda

²⁷Berei ká ŋí è tɔ̀ɔ la gâloŋ mai. Saloma è kɛ̀ ǹyée-ƃela-ŋai láa fɛ̂ɛi ǹɔii su, gɛ́ galai pɛ́ŋ-pɛ̀lɛ nyíi kɛ̀ a dínaŋɔɔ ǹâŋ Deeƃé ŋɔtaa-lêei mai.

²⁸Zɛroboaŋ è kɛ̀ a dɔɔ̂i lɛ́lɛɛ, ǹyaŋ tãi Saloma è gàa la a gɛ́ɛ gáa a tíi kpanaŋ lɛ́lɛɛ kɛ́-nuui, è bù díi kpanaŋ-ŋai kélee mɛi Manasɛ da Ifiraŋ suui su-ƃelai dí kɛ̀ gɛ̂i.

²⁹È kɛ̀ a fólo tɔnɔ da Zɛroboaŋ è kɛ̀ kulâi Zerusâlɛŋ gɛ́ lì, ǹyaŋ Ɣâla ŋɔlóno kɛ́-nuui Aiza kùla Siloi è gàa berei su, yokpo nina kɛ́ ƃò ma. Dí fereŋɔɔ díkɛ̀ dí tee-tee kwaa ma ǹɔii su.

³⁰Nya ƃe Aiza è ŋɔyokpo ninai kɛ̀ mai sòŋ é vála-fala a gbua-gbua puu káo feerɛ.

³¹È mò Zɛroboaŋ ma ǹyɛɛi, “Gbua-kpua puu síɣe íkpîŋ mɛni ma, kpɛ́ni fêi, m̀ɛnii ŋí ƃé Yâwɛɛ, Eezuɛ Ŋɔɣâlai à mò ǹyɛɛi, ‘Gáa, ŋa pâi gâloŋ-laai kulâi Saloma yêei ŋá dɛɛ káai a ǹúu-suui puu su-ƃelai Kápɔ.

³²Kɛ́lɛ ńyee mu-nuui Deeƃé maa mɛni ma da Zerusâlɛŋ taa-lêei nyíi ŋá zìɣe zu ǹúu-suui kélee sáma Eezuɛi, ǹúu-suui dɔnɔ a pâi lɛɛ̂i ǹyêei.

³³Ŋa pâi nyíŋi kɛ̂i, kpɛ́ni fêi, Saloma a bôlu tɔ̀ɔ ḿâ, gɛ́ ŋ̀âla-ŋai ŋí fɛ̀li, Sidɔŋ-ŋai díɣâlai, Atorɛ díɣâlai, Môa-ŋai díɣâlai Kemɔ, da Amɔŋ-ŋai díɣâlai Molɛ. Vé sia ní a ŋápere-ŋai, kpaa máŋ é mɛnii kɛ́ nyíi ǹɛ̂lɛɛi ŋɛ́i, kpaa máŋ é mɛni-ŋai mɛi káa ŋá nɛ̀ mai da ŋátɔ̂ŋ-ŋai yɛ̂ɛ berei ǹâŋ Deeƃé è gɛ̀ lai.

³⁴Kɛ́lɛ fé pâi gâloŋ-laai kélee kulâi ǹyêei. Ŋá gɛ̀ a kâloŋ tãi nɔ́ gáa la ɣele mai ńyee mu-nuui Deeƃé maa mɛni ma, nyíi ŋá zìɣe zui. È ŋátɔ̂ŋ-ŋai mɛi kâa da mɛni-ŋai ŋá mò mai.

³⁵Ŋa pâi gâloŋ-laai kulâi ǹóŋ yêei ŋá dɛɛ káai a ǹúu-suui puu su-ƃelai kápɔ.

³⁶Ŋa pâi ǹúu-suui dɔnɔ tɛɛ̂i ǹóŋ pɔ́ a gɛ́ɛ laŋpoi é kɛ́ ńyee mu-nuui Deeƃé yêei ŋɛ́i-tuɛ Zerusâlɛŋ, daa-lêei nyíi ŋá zìɣe zu a gɛ́ɛ ŋá ńaa see mai.

³⁷É máŋ kɛ́ tí, mɛni a kpèra yâ, ŋa pâi ísiɣêi, yá pâi kɛ̂i diai kélee mɛi ya ŋ̀wɛ̂lii, ya pâi kɛ̂i a kâloŋ Eezuɛ mɛi.

³⁸À kɛ̀ yà m̀ɛnii kélee kɛ̀ nyíi ŋa pâi môi yâi, í sía ŋ́gɔɔ-pɔɔi, í mɛni-ŋai kɛ́ ǹɛ̂lɛɛi ŋɛ́i, í ŋátɔ̂ŋ-ŋai kélee mɛi káa yɛ̂ɛ berei ńyee mu-nuui Deeƃé è gɛ̀ lai, ŋa pâi kɛ̂i íkɔlɛ. Ŋa pâi gɛ̂i gâloŋ-laai é tûa ísuui yêei yɛ̂ɛ berei ŋá gɛ̀ la a Deeƃé, ŋá Eezuɛ tɛɛ ípɔ.

³⁹Nyíŋi mɛni ma, ŋa pâi tɔ̂ŋ kpɛ̂i Deeƃé ŋɔsuui ma kɛ́lɛ vé pâi kɛ̂i a wɔ́lɔ-wɔlɔ da wɔ́lɔ-wɔlɔ.’ ”

⁴⁰Saloma è kɔ̀ a gɛ́ɛ é Zɛroboaŋ paa, kɛ́lɛ Zɛroboaŋ è pù é lí Ize kaloŋ Sisa pɔ́ é lɛ́ɛ naa é lɛ́ɛ la zu Saloma é sáa.

⁴¹M̀ɛni da kpɛ́ni-ŋai Saloma è gɛ̀ gɛ́ɛ ɣele mai, ŋɔtârei è nɛ̀i, gélee pɔ̃yɛ̂i ŋɔkâloŋ-laai su mɛni-ŋai maa kɔlɔi su.

⁴²Saloma è kɛ̀ a kâloŋ Eezuɛ lɔii gwaa kélee mɛi a kóraŋ buu náaŋ.

⁴³È sàa dí nòo ǹâŋ Deeƃé ŋɔtaa-lêei su. Ǹóŋ Leoboaŋ ƃé lɛ̀ɛ bɔ́ɔ ŋá a kâloŋ.