Read Kpelle Kâloŋ-ŋa Maa-ŋuŋ 12 Bible Online

Kâloŋ-ŋa Maa-ŋuŋ 12 - Kpelle bible

Kâloŋ-ŋa Maa-ŋuŋ 12

¹Leoboaŋ è lì Sɛkɛŋ, kpɛ́ni fêi, Eezuɛ-ŋai kélee dí lì naa a gɛ́ɛ dí gɛ́ a kâloŋ.

²Neƃa ǹóŋ Zɛroboaŋ è nyíŋi mɛ̀ni lai, è kɛ̀ niî Ize lɔii su ƃɛ́i ma è pù Gâloŋ Saloma yêei é lí naai. Nya ƃe è kùla Ize é lene pôlu.

³Dí Zɛroboaŋ worɛ̂ tɛ̀ɛ, ǹyaa da Eezuɛ kpɔŋ kélee dí lí Leoboaŋ pɔ́-naa dîyɛɛ m̀ai,

⁴“Ínâŋ è kpîri wuyɛɛ tɛ̀ɛ kúpɔ, kɛ́lɛ bɔlɔtɔ tii foɣâŋ kúmɛni ma da gbîri wuyɛɛ è dɛ̀ɛ kúpɔi, kwa pâi tíi kɛ̂i yɛ̂.”

⁵Leoboaŋ è zu tòo ǹyɛɛ dîai, “Ka lí pôlu fólo saaƃa a tɛ̀ɛ ká pá pôlu ḿbɔ. Ǹûai dí lì pôlu.”

⁶Gâloŋ Leoboaŋ è ŋuŋ ma pìlaŋ a núu pɔlɔ-ŋai da ǹâŋ Saloma-ni dí kɛ̀ tíi kɛ̂i a tãi è kɛ̀ la ɣele mai ǹyɛɛ dîai, “Ŋá ǹûai wóo su tòo pere kɛ́ léŋ?”

⁷Dîyɛɛ m̀ai, “À kɛ̀ ya pâi sâa íkpîŋ kɛ̂i a ǹûai ŋí dítii kɛ́-nuu, ye tíi kɛ́ dîɛ. Yà díwoo su tòo a ǹɛ́lɛɛ, da pâi kɛ̂i a íyee mu-ƃela a ɣele kélee.”

⁸Kɛ́lɛ Leoboaŋ è ǹyée kùla ǹúu pɔlɔ-ŋai dí lia-wooi mu dí dɛ̀ɛ bɔ́i, é lí ǹyáŋkpa-ŋai pɔ́ da dîa-ni dí ƃɔ̀lɔ gîe ma, nyii-ŋai kɛ̀ tíi kɛ̂i mìi a gɛ́ɛ é díwɔ̂ lia-wooi mɛ́ni.

⁹È dímarê kɛ̀ ǹyɛɛ dîai, “Káwɔ̂ lia-wooi ƃa lé? Kwa pɔri ǹûai ŋí wóo su too pere kɛ̂i léŋ nyii-ŋai mò ḿâ dîyɛɛi, ‘Gbîrii wuyɛɛi foyâŋ kú mɛni ma nyíi ínâŋ è dɛ̀ɛ kúpɔi?’ ”

¹⁰Ǹyáŋkpa-ŋai dîyɛɛ m̀ai, “M̀ó ǹûai ŋí dîa m̀o yâi, ‘Ínâŋ è kpîri wuyɛɛ tɛ̀ɛ kúpɔ, kɛ́lɛ kúkpîrii foɣâŋ,’ yɛ̂i, ‘Ńyee-gbua-loŋ kɛ́tɛi é tɛ́ɛ ńâŋ leŋei ma.

¹¹Ńâŋ è kpîri wuyɛɛ làa káŋûa. Kɛ́lɛ ŋa pâi gɛ̂i kpîŋ a ŋ̀uyɛɛ é tɛ́ɛ ńâŋ ŋ̀ɔi ma. Ǹâŋ è ká lòkwa a fáa, kɛ́lɛ ŋa pâi ká lôkwai a kɔli-kâlaŋ gbatu.’ ”

¹²Fólo saaƃa tɛ̀ɛ pôlu ma Zɛroboaŋ da ǹûai kélee dí lène pôlu Leoboaŋ pɔ́-naa yɛ̂ɛ berei gâloŋ è mò la dîa ǹyɛɛi, “Ka pá pôlu fólo saaƃa a tɛ̀ɛ.”

¹³Gâloŋ è ǹûai wóo su tòo a wóo kpanaŋ. É ŋ̀ɛ́i nàɣiŋ ǹúu pɔlɔ-ŋai dília-wôoi mɛi,

¹⁴é lɛ́ɛ ǹyáŋkpa-ŋai dílîa-wooi pôlu ǹyɛɛi, “Ńâŋ è tíi wuyɛɛ tɛ̀ɛ kápɔ kɛ́lɛ ŋa pâi gɛ̂i kpîŋ a ŋ̀uyɛɛ é tɛ́ɛ ńâŋ ŋ̀ɔi ma. Ńâŋ è kálòkwa a fáa, kɛ́lɛ ŋa pâi kálôkwai a kɔli-kâlaŋ gbatu.”

¹⁵Gâloŋ fé ŋ̀óli tɔɔ ní ǹûai dîa, kpɛ́ni fêi, mɛnii sîi ŋí è kùla Yâwɛɛ yêei a gɛ́ɛ m̀ɛnii Yâwɛɛ è mò Neba ǹóŋ Zɛroboaŋ ma Silo-nuui Aiza sârai ŋàa-see é kɛ́.

¹⁶Eezuɛ-ƃelai kélee kɛ́ɛ da gàa a gɛ́ɛ gâloŋ fé fáa ní é ŋ̀óli tɔ́ɔ dîai, dí gâloŋ wóo su tòo dîyɛɛi, “Vé kûa a kpa a gɛ́ɛ kúkɛ Deeƃé ŋɔsuui yée mu. Lé ƃé Zɛse ǹóŋ a gɛ́ kûɛi? Eezuɛ-ƃela, kwaa lí kúpɔ taai! Óo Deeƃé, ípɛrɛi mɛi káa yá kpîŋ.” Nya ƃe Eezuɛ-ŋai dí lì dípɔ taai.

¹⁷Kɛ́lɛ Eezuɛ-ŋai díseɛɛ è kɛ̀ Zuda taa-ŋai sui, Leoboaŋ è kɛ̀ dí mɛi a kâloŋ.

¹⁸Gâloŋ Leoboaŋ è Adoniraŋ tɛ̀ɛ kɛ̀ bɔlɔtɔ tii mɛi a gɛ́ɛ é lóno ǹûai pɔ́, kɛ́lɛ Eezuɛ-ƃelai kélee dí zɔ̀ɔ a kɔni dí bàa. Gâloŋ Leoboaŋ è pere kɔ̀ri a maa félaa é píli ŋɔkɔ́-keleŋ su é pú é lí Zerusâlɛŋ.

¹⁹M̀ɛni ma é síɣe ŋ̀elei tí ma é tóo gɔlɔi ŋí pɔ̃yɛ tãi ma, Eezuɛ tɔɔ̂i kpɔ́ nɔ́ Deeƃé ŋɔpɛ́rɛi ma.

²⁰Eezuɛ-ŋai dí mɛ̀ni a gɛ́ɛ Zɛroboaŋ a lene pôlui. Nya ƃe dí ŋ̀orɛ̂ tɛ̀ɛ a gɛ́ɛ é pá gbɔŋ su dí gɛ́ a kâloŋ Eezuɛ-ŋai kélee mɛi. Zuda ŋɔsuui su-ƃelai nɔ́ ƃé kɛ̀ Deeƃé pôlu.

²¹Leoboaŋ è seriɛɛ kɛ̀ Zerusâlɛŋ, è Zuda da Bɛŋsima nuu suu-ŋai su kɔ-kuluƃa-ŋai ŋɔwála ŋuŋ tɔnɔ pôlu buu lɔ́ɔlu mɛi saaƃa pù díkîe ma a gɛ́ɛ dí kɔ́ pɛ́lɛ Eezuɛ-ƃelai kélee dîa. È gɛ̀ tí a gɛ́ɛ Saloma ǹóŋ Leoboaŋ ŋɔkâloŋ-laai é kɛ́ ǹɔii kélee mɛi.

²²Kɛ́lɛ Ɣâla è worɛ̂ tɛ̀ɛ a ŋɔlóno kɛ́-nuui Semaiya

²³a gɛ́ɛ é mò Saloma ǹóŋ Zuda kaloŋ Leoboaŋ ma, Zuda da Bɛŋsima suui su-ƃelai da ǹûai kpéli-ŋai kélee.

²⁴M̀ɛnii ká ŋí Yâwɛɛ a m̀ôi, “Káfe lì a gɛ́ɛ ká kɔ́ pɛ́lɛ káƃarâa Eezuɛ-ŋai dîa. Kákelee ká lí kápɔ taai, kpɛ́ni fêi, ŋ́gɛ mɛni ká ŋí.” Nya ƃe dí Yâwɛɛ wóo mɛ̀ni, dí lì pôlu dípɔ taai ŋɔ́nɔ yɛ̂ɛ berei Yâwɛɛ è mò la dîai.

²⁵Nya ƃe Gâloŋ Zɛroboaŋ è Sɛkɛŋ-taai maa tìnaŋ é dóo galai ǹyée lɔii su Ifiraŋ é sée naa. È kùla naa é lí é Pɛnuɛ tɔɔ a taa.

²⁶Zɛroboaŋ è gíli ŋá sìa gbîŋ kponôi ǹyɛɛi, “Ɣele da gâloŋ-laai a pâi nâa lenêi pôlu Deeƃé ŋɔpɛ́rɛi mu.

²⁷À kɛ̀ ǹûai ŋí da lì a gɛ́ɛ dí sâla-ŋa kula Yâwɛɛ ŋɔɣâla-pɛrɛ kɛ́tɛi mu Zerusâlɛŋ, da pâi tînanîi pôlu dínuu-namui, Zuda kaloŋ Leoboaŋ pɔ́-naa pere. Da pâi ḿbaâi dí pôlu bɔ́-naa.”

²⁸È dília-wooi mɛ̀ni, é gôo niŋa-loŋ feerɛ kpɛ̀tɛ é mò ǹûai dîa ǹyɛɛ, “Gáa a mɛni kpânaŋ a gɛ́ɛ ká kɛ́ lì Zerusâlɛŋ a ɣele kélee. Óo Eezuɛ, kaɣâla-ŋai ká ŋí, nyii-ŋai kákùla Ize lɔii sui.”

²⁹È dɔnɔ sèe Bɛtɛ é gbélii sée Daŋ.

³⁰M̀ɛnii ŋí è kɛ̀ a sɔnyɔ̂ŋ. Ǹûai da kâa lì kwaa kôya ma kɛ́ɛ yɛ̂ɛ Daŋ a gɛ́ɛ dí sâla kula naa nyíi ma è zèe naai.

³¹Zɛroboaŋ è sâla kùla kwaa-ŋa ma kpɛ̀tɛ ǹyée tɔɔ-ŋai ma, é sâla láa soŋ-ƃela kula núu da kpɛ́ni-ŋa sáma ƃɛ́i kélee è kɛ̀ ŋ̀wɛ̂lii, berei máŋ dífe kɛ́ ní la a Liiva-ŋai.

³²È kúu tɔ̀ɔ a gɛ́ɛ é kɛ́ a ŋ̀áloŋ ǹɔ́ɔlu mɛi saaƃai ŋɔfólo puu káo lɔ́ɔlu ɣele, yɛ̂ɛ gúui da kâa gɛ̀ Zuda, díkɛ sâla-ŋa kùla naa ŋ̀âla-teƃelei ŋái. È nyíŋi kɛ̀ Bɛtɛ ƃɛ́i díkɛ̀ sâla kulâi naa gôo niŋa-loŋ-ŋai dîai. È sâla láa-soŋ-ƃela sèe Bɛtɛ zâla kula kwaa-ŋai ma è díkpɛ̀tɛi.

³³Ŋ̀áloŋ ǹɔ́ɔlu mɛi saaƃai ŋɔfólo puu káo lɔ́ɔlui ma, ŋ̀áloŋ è zìɣe zu gbɔ́ɔi yee mai, è sâla kùla ŋ̀âla-teƃelei ma nyíi è dɔ̀ɔ Bɛtɛi. Nya ƃe è gúui ŋí sèe Eezuɛ-ŋai mɛni ma. È lì ŋ̀âla-teƃelei ma a gɛ́ɛ é sâla-ŋa kula.