Read Kpelle Kâloŋ-ŋa Maa-ŋuŋ 13 Bible Online

Kâloŋ-ŋa Maa-ŋuŋ 13 - Kpelle bible

Kâloŋ-ŋa Maa-ŋuŋ 13

¹Yâwɛɛ è gɛ̀, Ɣâla naloŋ tɔnɔ è kúla Zuda è pá Bɛtɛ, Zɛroboaŋ kɛ́ɛ tɔɔni kɛ̀ ŋ̀âla-teƃelei kɔlɛ a gɛ́ɛ é sáma-sãa tɛɛi.

²È wɔ̀lɔ a ŋ̀óo tɛ́ɛ ɣelêi a nyɔ́mɔɔ é pîlaŋ ŋ̀âla-teƃelei ma a Yâwɛɛ wóo ǹyɛɛi, “Óo Ɣâla-teƃele, Ɣâla-teƃele! M̀ɛnii ká ŋí Yâwɛɛ a m̀ôi: Da pâi lóŋ-surɔŋ maa sɔlɔ ƃôi Deeƃé ŋɔpɛ́rɛi mu dí ǹáa sée a Zosaya. A pâi sâla kulâi íŋa a zâla láa soŋ-ƃelai nyii-ŋai dí káa nâa sáma-sãa tɛɛ̂i ƃɛ́i, ǹyaŋ a pâi núu káo-ŋa kêrenii í ŋá.”

³M̀aa ɣele tɔnɔ tí ŋ̀âla naloŋ tí è ŋɛi-kɛ-maa lɛ̀: “Ŋ̀ɛi-kɛ-maai ká ŋí Yâwɛɛ a nɛ̀i: Ŋ̀âla-teƃelei a pâi ƃêlai gîe ma ǹyaŋ ǹuu-ŋai ŋ̀ái da pâi pûi.”

⁴Gâloŋ Zɛroboaŋ kɛ́ɛ a m̀ɛnii mɛ́ni ŋ̀âla naloŋ è wɔ̀lɔ a ɣelêi pere a nyɔ́mɔɔ é pîlaŋ ŋ̀âla-teƃelei ma kɛ̀ Bɛtɛi, è lɛ̀ɛ ŋ̀âla-teƃelei ma é ǹyée sã́a nalôŋ ma ǹyɛɛi, “Ka zoŋ!” Kɛ́lɛ ǹyéei è zã̀a ŋ̀âla naloŋ mai, è sàa ma ŋ̀á ma. Nya ƃe pɔri fé kɛ́ ní mì a gɛ́ɛ é ǹyée lɛ́ɛ la ŋɔ́nɔ pôlu.

⁵Ŋ̀âla-teƃelei máŋ è ƃèla gîe ma ǹuui é pú yɛ̂ɛ berei Yâwɛɛ è ma ŋ̀ɛi-kɛ-maai lɛ̀ la ŋ̀âla naloŋ sârai.

⁶Nya ƃe gâloŋ è mò ŋ̀âla naloŋ ma ǹyɛɛi, “Lóno Íɣâlai Yâwɛɛ pɔ́ í tela Ɣâla fɛli a gɛ́ɛ é ńyee ƃálo mî pôlu.” Nya ƃe Ɣâla ŋɔlóno kɛ́-nuui è lòno Yâwɛɛ pɔ́ màa mɛ̂ni ma, ǹyaŋ gâloŋ yée è ŋɔ́nɔ ƃàlo pôlu é kɛ́ yɛ̂ɛ berei è kɛ̀ la a bɔlɔi.

⁷Gâloŋ è mò Ɣâla ŋɔlóno kɛ́-nuui ma, “Pá kwa yá kú lí ŋápɛrɛi lá a gɛ́ɛ í mii-sɛŋ mii. Ŋa pâi sáma-sɛŋ tɛɛ̂i ípɔ.”

⁸Kɛ́lɛ ŋ̀âla naloŋ è gâloŋ wóo su tòo ǹyɛɛ m̀ai, “A nɛ̃ɛ ma kpîŋ í ítɔɔ-sãai gbûra tɛ̀ɛ ḿbɔ, fé pâi lɛɛ̂i ípôlu kpaa máŋ ŋá mii-sɛŋ mii kpaa ŋá yá kpéle ƃɛ́,

⁹kpɛ́ni fêi, Yâwɛɛ è mò ḿâ a gɛ́ɛ fé mii-sɛŋ mìi naa kpaa ŋá yá kpéle kpaa máŋ ŋá lene pôlu a berei ŋá pà lai.”

¹⁰Nya ƃe è lì a pere da kpɛ́ni. Vé lène ní pôlu a berei è pà la Bɛtɛi.

¹¹Ɣâla ŋɔlóno kɛ́-nuu pɔlɔ tɔnɔ è kɛ̀ Bɛtɛ. Ǹônii dí pà bɔ́ dí m̀ɛni-ŋai kélee ƃó ma Ɣâla ŋɔlóno kɛ́-nuui è gɛ̀ a ŋ̀elei tii.

¹²Dínâŋ è dímarê kɛ̀ ǹyɛɛ dîai, “Mí pere ƃé è lì lai?” Ǹônii dí berei lɛ̀ ma Ɣâla ŋɔlóno kɛ́-nuui kùla Zuda è lɛ̀ɛ mai.

¹³È mò ǹônii-sinaai dîa ǹyɛɛi, “Ka ŋáwɛlɛ-sôoi kpɛtɛ mî.” Dí páa a ŋ̀wɛlɛ-sôoi dí gbɛ̀tɛi, è sèe mɛi é lí.

¹⁴È lɛ̀ɛ Ɣâla ŋɔlóno kɛ́-nuui pôlu gɛ́ lì. È gàa seeni wúru kɛ́tɛ tɔnɔ mu. È m̀arê kɛ̀ ǹyɛɛ m̀ai, “Ƃía ƃa Ɣâla ŋɔlóno kɛ́-nuui kùla Zudai?” Ǹyɛɛ m̀ai, “Óowei.”

¹⁵Ɣâla ŋɔlóno kɛ́-nuu pɔlɔi è mò ma ǹyɛɛi, “Pá kú lí ŋápɛrɛi lá í ílaa míi.”

¹⁶Ɣâla ŋɔlóno kɛ́-nuui è mò mà, “Ḿve pɔrîi lenêi pôlu a gɛ́ɛ kwa yá kú lí, kpaa máŋ ŋá mii-sɛŋ mii kpaa máŋ ŋá yá kpéle gwaai ŋí ma.

¹⁷Yâwɛɛ è mò ḿâ ǹyɛɛi, ‘Ífe mii-sɛŋ mìi kpaa í yá kpéle naa kpaa máŋ í lene pôlu a berei í lì la naai.’ ”

¹⁸Ɣâla ŋɔlóno kɛ́-nuu pɔlɔi è zu tòo ǹyɛɛ m̀ai, “Ńyãa máŋ ŋ́gaa a Ɣâla ŋɔlóno kɛ́-nuu nɔ́ yɛ̂ɛ berei íkaa lai. Ɣâla-taa kela tɔnɔ è lòno ḿbɔ a Yâwɛɛ wóo ǹyɛɛi, ‘Pá la pôlu ípɛrɛi lá a gɛ́ɛ é mii-sɛŋ mii, é yá kpéle.’ ” Kɛ́lɛ è kɛ̀ lɛ́ɛ kɛ̂i ma.

¹⁹Nya ƃe da Ɣâla ŋɔlóno kɛ́-nuui dí lène pôlu é ǹáa míi é gbele ŋɔpɛ́rɛi mu.

²⁰Dí kɛ́ɛ kɛ̀ seeni teƃelei mai, Yâwɛɛ è lòno Ɣâla ŋɔlóno kɛ́-nuu pɔlɔi pɔ́ nyíi pà la pôlui.

²¹È wɔ̀lɔ a ɣelêi pere Ɣâla ŋɔlóno kɛ́-nuui ma nyíi kùla Zudai, “M̀ɛnii ká ŋí Yâwɛɛ a m̀ôi: Ƃa Yâwɛɛ wóo píli ǹyaŋ ífe dɔ̂ŋ mɛi káa ní Íɣâlai Yâwɛɛ è dɛ̀ɛ ípɔi.

²²Í pà pôlu, í ílaa míi, í yá kpéle gwaai ma è mò yâ a gɛ́ɛ ífe ílaa mìi naa kpaa máŋ í íkpele naai. M̀aa mɛ̂ni ma dífe pâi íloôi ƃɛ́i ma dí ínâŋ pɔlɔ-ŋai lòo naai.”

²³Ɣâla ŋɔlóno kɛ́-nuui è kpɛ̀ɛ a ǹáa miiɛɛ é gbele. Nya ƃe Ɣâla ŋɔlóno kɛ́-nuui pà la pôlui è ŋɔsoo-fáleŋ kpɛ̀tɛ mì.

²⁴Gɛ́ɛ kɛ̀ perêi gɛ́ lìi, yala-sulu tɔnɔ è gàa berei su é pɛ́lɛ ma é bàa. È boma pìli é dóo bere-lêei ma. Ŋ̀wɛlɛ-sôoi da ǹyala-sului dífeerɛ dí kɛ̀ tɔɔni bomai kɔlɛ.

²⁵Ǹûai tɛ̀ɛ naai dí bomai kàa tooni naa, ǹyala-sului kɛ́ ƃò tɔɔni gɔlɛ. Dí lì dí maa mɛni ƃó daa-lêei su Ɣâla ŋɔlóno kɛ́-nuu pɔlɔi ma kɛ̀ naai ma.

²⁶Ɣâla ŋɔlóno kɛ́-nuu pɔlɔi pà la pôlui kɛ́ɛ a mɛ̀nii, è mò ǹyɛɛ, “Ɣâla ŋɔlóno kɛ́-nuui pɔlɔi kùla Zudai ká tí. È Yâwɛɛ wóo pìli. Ǹya ƃé è dɛ̀ɛ la ǹyala-sului pɔ́ é báa.”

²⁷Ɣâla ŋɔlóno kɛ́-nuui è mò ǹônii-sinaai dîa ǹyɛɛi, “Ŋá wɛlɛ-sôoi kpɛtɛ mî.” Ǹyaŋ dí gɛ̀ tí.

²⁸Nya ƃe è lì é bomai káa tooni bere-lêei ma, ŋ̀wɛlɛ-sôoi da ǹyala-sûlui dí kɛ́ ƃò tɔɔ̂-ni gɔlɛ. Ǹyala-sûlui fé bomai mii ní kpaa máŋ é ŋ̀wɛlɛ-sôoi páa.

²⁹Ɣâla ŋɔlóno kɛ́-nuu pɔlɔi è Ɣâla ŋɔlóno kɛ́-nuui poma sîɣe, é ǹáa ŋwɛlɛ-sôoi mɛi, é pá la ŋɔtaai su a gɛ́ɛ é maa wɔ̂lɔ kɛ́ é ǹoo.

³⁰È bomai lòo gbîŋ ƃoloŋ su, dí maa wɔ̂lɔ kɛ̀, ǹyɛɛi, “Óo, ńeɣê-surɔŋ!”

³¹Gɛ́ɛ a zaai loôi, è mò ǹônii-sinaai dîa ǹyɛɛi, “Ŋa sàa, ka ńoo molôŋ su ƃɛ́i kú Ɣâla ŋɔlóno kɛ́-nuui lòo naai ŋ́gao é láa gao kɔlɛ,

³²kpɛ́ni fêi, ŋ̀orɛ̂-wooi è mò é pîlaŋ ŋ̀âla-teƃelei ma nyíi gáa Bɛtɛi, bîlaŋɔɔi máŋ zâla kula kwaa-ŋai kélee ma Sameria taa-ŋai su. Gélee ŋ̀aa-see a pâi kɛ̂i a tɔ̃yâ.”

³³M̀ɛnii ŋí kɛ́ɛ pôlu ma, Zɛroboaŋ fé kpera ní ŋɔsɔnyɔ̂ŋ-ŋai dîa. Kɛ́lɛ è ŋɔ́nɔ lì tuɛ-pere a sâla láa-soŋ-ƃela seɛ́ɛ ŋɔsâla kula kwaa-ŋai ma nyii-ŋai è díkùla nûa sii kélee sáma. Ǹúui nyíi kélee kɛ̀ ŋ̀wɛ̂lii é kɛ́ a sâla láa-soŋ-nuui, è wúlɔ pù maa-nuui tí ŋûa ŋɔsâla kula kwaa-ŋai ma mɛni ma ǹyée-tɔɔ-ŋai tôŋ su.

³⁴Zɔnyɔ̂ŋ ŋí ƃé gɛ̀ Zɛroboaŋ ŋɔkâloŋ-laai é wólo é gɛ́ ŋɔnúu-suui kélee dí sáa.