Read Kpelle Kâloŋ-ŋa Maa-ŋuŋ 14 Bible Online

Kâloŋ-ŋa Maa-ŋuŋ 14 - Kpelle bible

Kâloŋ-ŋa Maa-ŋuŋ 14

¹Maa tãi tí su Zɛroboaŋ ǹóŋ Abiza è nâa pɛ̀lɛ kɔ̂lɛi.

²Zɛroboaŋ è mò ŋɔnɛnîi ma ǹyɛɛi, “Lí í íkpîŋ maa ɣíri a gɛ́ɛ núu da à íkàa, vé íkɔ̀lɔŋ a gɛ́ɛ Gâloŋ bɔ̂ŋ ƃa yá. Gɛ̀ ní, ye lí Silo. Ɣâla ŋɔlóno kɛ́-nuui Aiiza káa naa nyíi mò ḿâ a gɛ́ɛ ŋa pâi kɛ̂i a kâloŋ ǹûai ŋí mɛi.

³Kpólo kpua puu síɣe kpólo filɛ-filɛ-ŋa da kɔ̃́iŋ-wulɔ sane tɔnɔ í lí bɔ́-naa. A pâi m̀ɛnii ƃôi yâ pâi kɛ̂i a zurɔ̂ŋ-looi.”

⁴Nya ƃe Zɛroboaŋ bɔ̂ŋ è gɛ̀ yɛ̂ɛ berei è mò la mai. È lì Aiiza ŋɔpɛ́rɛi lá Silo. Aiiza è kɛ̀ a bɔlɔɔ va pɔrii ŋɔ́nɔ kɛ̀ kwaa kâai a ǹɛɛ́lɛɛ.

⁵Kɛ́lɛ Yâwɛɛ è mò Aiiza ma ǹyɛɛi, “Zɛroboaŋ ŋɔnɛnîi a pâi ímarê kɛ̂i é pîlaŋ ǹóŋ-surɔŋ ma, kpɛ́ni fêi, gáa kɔ̂lɛi. À pà ŋ̀óo su tòo yɛ̂ɛ bere ŋa pâi môi la yâi.” Ǹɛnîi kɛ́ɛ a sèri naai, è gbîŋ kɛ̀ yɛ̂ɛ nɛnî da kpɛ́ni.

⁶Aiiza è gɔ́ɔ mu tìŋ mɛni nɔ́ ǹyɛɛ m̀ai, “Ye lɔ́ Zɛroboaŋ ŋɔnɛnîi. Ƃa íkpîŋ kɛ̂i yɛ̂ɛ núu da kpɛ́ni lé mɛni ma? Worɛ̂-woo nyɔ́mɔɔ káa ńa ímɛni ma.

⁷Lí í mò Zɛroboaŋ ma a gɛ́ɛ m̀ɛnii ká ŋí Yâwɛɛ, Eezuɛ Ŋɔɣâlai a m̀ôi, ‘Ŋá ímu sìɣe ǹûai sáma ŋá íkɛ a núu láa-tuɛ-nuu ŋánûai Eezuɛ-ŋai mɛi.

⁸Ŋá gâloŋ-laai kùla Deeƃé ŋɔpɛ́rɛi mu ŋá dɛɛ ípɔ. Kɛ́lɛ ífe niî kɛ́ ní yɛ̂ɛ ńyee mu-nuui a ŋátɔ̂ŋ-ŋai mɛi kàai. È kɛ̀ ḿbôlu a ǹíi kélee gɛ́ m̀ɛni-ŋai kɛ̀ nyíi kɛ̀ a tɔ̃ya mɛni-ŋa ŋɛ́i.

⁹Ƃa sɔnyɔ̂ŋ támaa kɛ́ tɛɛ dia-ŋai kélee dîa kɛ̀ a kâloŋ ítuɛi. Ƃa Ɣâla da kpɛ́ni-ŋa kpɛ̀tɛ íkpîŋ mɛni ma, Ɣâla pɔkɔɔŋ-ŋa nyíi dí kpɛtɛɛ̂i a kɔli. Ƃa gɛ́ ńii a ŋwána a zu kɛ́tɛ ƃa ḿbili ípôlu pere.

¹⁰Ísɔŋ a gɛ́ ŋa pâi pâi a mɛni kpɔ̂lu Zɛroboaŋ ŋɔpɛ́rɛi ma. Ŋa pâi zinâai kélee su-karâi ŋɔpɛ́rɛi mu Eezuɛ. É máŋ kɛ́ a luɛ kpaa máŋ núu ŋuŋ-ma ƃóɔɔ. Ŋa pâi Zɛroboaŋ ŋɔpɛ́rɛi kêrenii yɛ̂ɛ núu a túluŋ kèreŋ é lɛ́ɛ la zu gélee é kpɛ́ɛ.

¹¹Zɛroboaŋ ŋɔnûai kélee pâi saâi daa-lêei sui, ɣîla-ŋa da pâi dípoma miî, ǹyaŋ nyii-ŋai pâi saâi víyeŋ ŋá ǹɔɔi sui, ŋ̀ɔni-ŋai da pâi dípoma kpelêi. Yâwɛɛ a mò.’ ”

¹²Aiiza è mò Zɛroboaŋ ŋɔnɛnîi ma ǹyɛɛi, “Lí pôlu ípɔ-taai. Ya pâi pîlanii nɔ́ kátaa-lêei su, zurɔ̂ŋ-looi é sáa.

¹³Eezuɛ kélee a pâi maa wɔ̂lɔ kɛ̂i dí ǹoo. Ǹyaa tɔnɔ nɔ́ ƃa Zɛroboaŋ ŋɔnuui nyíi da pâi ǹoôi, kpɛ́ni fêi, ǹyaa tɔnɔ nɔ́ ƃé Zɛroboaŋ ŋɔpɛ́rɛi mu nyíi Yâwɛɛ, Eezuɛ Ŋɔɣâlai a mɛni lɛ́lɛɛ da káa gbonôi.

¹⁴Yâwɛɛ ǹyaa kpîŋ a pâi kâloŋ seêi Eezuɛ mɛi nyíi pâi Zɛroboaŋ ŋɔkáa-laai su-ƃelai su-karâi. Sâa ƃa a ŋ̀elei! Owei, lonii ma kpîŋ ƃe!

¹⁵Yâwɛɛ a pâi Eezuɛ kula maa kɛ̂i. A pâi kɛ̂i yɛ̂ɛ kpalo a kɛ̀ túmo-tûmoi yá ŋá. A pâi Eezuɛ kulâi ǹɔii lɛ́lɛɛi ŋí ma nyíi è dɛ̀ɛ dínâŋ pɔlɔ-ŋai pɔ́i. A pâi dítaa-taai Yufeletii Ya-leei pôlu pere, kpɛ́ni fêi, dí ǹíi ŋwàna a wúru kôya-ŋa tɔ̀ɔ díɣâlai Asira fɛ̀li mɛni ma.

¹⁶Ǹyaŋ a pâi ǹyée kulâi Eezuɛ mu zɔnyɔ̂ŋ-ŋai mɛni ma Zɛroboaŋ è gɛ̀ nyíi Eezuɛ-ŋai dí pìlaŋ gɔ́ɔ pɔɔi dí kɛ́ díkɛ̂i.”

¹⁷Nya ƃe Zɛroboaŋ ŋɔnɛnîi è mù sìɣe é lí Taaza. Tãi kpɔ́ nɔ́ è gɔ́ɔ ƃɔ̀rɔŋ la bɛ́rɛi mui, zurɔ̂ŋ-looi è sàa.

¹⁸Dí ǹoo, ǹyaŋ Eezuɛ è maa wɔ̂lɔ kɛ̀ yɛ̂ɛ berei Yâwɛɛ è mò la ŋɔyée mu-nuui Aiiza sarâi.

¹⁹Zɛroboaŋ ŋɔkâloŋ-laai su mɛni-ŋai kpéli-ŋai, gɔ́-ŋai è gɔi, da berei è ŋɔkâloŋ-laai kɛ̀ lai, gélee pɔ̃yɛɛ̂i Eezuɛ kaloŋ-ŋai dímɛni pɔlɔ-ŋai maa kɔlɔi su.

²⁰È ŋɔkâloŋ-laai kɛ̀ a kóraŋ buu feerɛ káo feerɛ. È sàa é lí ǹâŋ pɔlɔ-ŋai pɔ́. Ǹóŋ Nada è lɛ̀ɛ bɔ́ɔ ŋá a kâloŋ.

²¹Saloma ǹóŋ Leoboaŋ è kɛ̀ a kâloŋ Zuda. È kɛ̀ a kóraŋ buu náaŋ káo tɔnɔ gâloŋ-laai sɔlɔ ƃóɔɔ m̀ii. È ŋɔkâloŋ-laai kɛ̀ Zerusâlɛŋ a kôraŋ puu káo lɔ́ɔlu mɛi feerɛ, daa-lêei su Yâwɛɛ è zìɣe zu Eezuɛ ŋɔsîi-ŋai kélee sáma nyíi è ǹáa sèe mai. Ǹee láa ƃé kɛ̀ a Neema. È kɛ̀ a Amɔŋ nuu.

²²Zuda è sɔnyɔ̂ŋ kɛ̀ Yâwɛɛ ŋɛ́i-tuɛ. Zɔnyɔ̂ŋ-ŋai dí gɛ̂i è kɛ̀ dɛ́ɛ nyii-ŋai dîa dínâŋ pɔlɔ-ŋai dí wɔ́lɔ gɛi. M̀ɛnii ŋí è gɛ̀ Yâwɛɛ é ǹíi ŋwàna dîa é tɛ́ɛ bɔlɔi ma.

²³Dí kwaa-ŋa ma kpɛ̀tɛ máŋ díkpîŋ mɛni ma dí ɣâla pɔkɔɔŋ-ŋai fɛli mɛni ma. Dí kɔni-ŋa tɔ̀ɔ a Ɣâla teƃele da wúru kóya-ŋa díɣâlai Asira fɛli mɛni ma ǹyée tɔɔ-ŋai ma da ŋ̀úru-ŋai mu.

²⁴Wulu-wulu kɛ́ sinaa dí kɛ̀ díɣâla fɛli kwaa-ŋai ma ǹɔii su. Ǹûai dí kɛ̀ dua-pere nyɔ̂ŋ-ŋai kélee kɛ̂i nyii-ŋai ǹɔii-ŋûŋ-ŋai dí kɛ̀ gɛ̂i nyíi Yâwɛɛ è díkpɛ̀ Eezuɛ-ƃelai ŋɛ́i-tuɛi.

²⁵Gâloŋ Leoboaŋ ŋɔkâloŋ koraŋ ǹɔ́ɔlui su, Ize kaloŋ Sisa è kɔ́ pɛ̀lɛ Zerusâlɛŋ ma.

²⁶È dɔɔ-sãai kélee sìɣe kɛ̀ Yâwɛɛ ŋɔɣâla-pɛrɛ kɛ́tɛi mui da dɔɔ-sãai kélee kɛ̀ gâloŋ ŋɔkaloŋ-pɛrɛ kɛ́tɛi mui. È zãai kélee sìɣe é pɛ́lɛ gɔ́ kɔ́-ƃelai dí gôo maa kɔ̃ɔ sãa kpaya-kpayai dîa Saloma è díkpɛ̀tɛi.

²⁷Gâloŋ Leoboaŋ è gɔ́ kɔ́-ƃelai maa kɔ̃ɔ sãa nina-ŋa kpɛ̀tɛ a ƃara a gɛ́ɛ dí dípɔɔ-ŋa síɣe. Èdí tɛ̀ɛ ŋɔkɔ́ kɔ́-ƃelai láa túɛ-ƃelai pɔ́ nyii-ŋai kɛ̀ tíi kɛ̂i gâloŋ ŋɔkâloŋ-pɛrɛ kɛ́tɛi ŋɔsiɣãŋ-ŋai lái.

²⁸Gâloŋ a kâa lì Yâwɛɛ ŋɔɣâla-pɛrɛ kɛ́tɛi lá, mɛi káa kuluƃa-ŋai da kâa gɔ́-kuluƃa-ŋai maa kɔ̃ɔ sãai sìɣe. Ǹaa pôlu ma, da lêne a dia pôlu dí dípûi kɛ́ loŋpoi su laai kɛ́ pere su.

²⁹M̀ɛni kpéli-ŋai kélee Leoboaŋ è gɛ̀ ŋɔkâloŋ-laai sui, gélee pɔ̃yɛ̂ɛi Zuda kaloŋ-ŋai dímɛni pɔlɔ kɔlɔ-ŋai su.

³⁰Kɔ́ è kɛ̀ nɔ́ Leoboaŋ da Zɛroboaŋ loai.

³¹Leoboaŋ è lì ǹâŋ pɔlɔ-ŋai pɔ́. Dí nòo díkɔlɛ Deeƃé ŋɔtaa-lêei su. Ǹee láa ƃé kɛ̀ a Neema. Ǹee è kɛ̀ a Amɔŋ nuu. Ǹóŋ Abiza è lɛ̀ɛ bɔ́ɔ ŋá a kâloŋ.