Read Kpelle Kâloŋ-ŋa Maa-ŋuŋ 15 Bible Online

Kâloŋ-ŋa Maa-ŋuŋ 15 - Kpelle bible

Kâloŋ-ŋa Maa-ŋuŋ 15

¹Dí Abiza kɛ̀ a kâloŋ Zuda Neba ǹóŋ Zɛroboaŋ ŋɔkâloŋ-laa koraŋ buu káo lɔ́ɔlu mɛi saaƃai su.

²È ŋɔkâloŋ-laai kɛ̀ Zerusâlɛŋ a kóraŋ saaƃa. Ǹee láa ƃé kɛ̀ a Maaka, Aƃisaloŋ ǹóŋ-nɛnii.

³È zɔnyɔ̂ŋ-ŋai kélee kɛ̀ nyíi ǹâŋ è gɛ̀i. Vé ǹíi kélee tɛɛ ní Ŋɔɣâlai Yâwɛɛ pɔ́, yɛ̂ɛ berei ǹâŋ pɔlɔi Deeƃé líi è kɛ̀ lai.

⁴É máŋ kɛ́ tí, Deeƃé maa mɛni ma, Ŋɔɣâlai Yâwɛɛ è lóŋ-surɔŋ tɛ̀ɛ bɔ́ a gɛ́ɛ é kɛ́ a kâloŋ bɔ́ɔ ŋá Zerusâlɛŋ a gɛ́ɛ é Zerusâlɛŋ kɛ́ gɛ́ ƃò a ŋ̀wála-walaa,

⁵kpɛ́ni fêi, Deeƃé è m̀ɛnii kɛ̀ nyíi kɛ̀ a ǹɛ́lɛɛ Yâwɛɛ ŋɛ́i ǹyaŋ vé fɛɣɛ ní a gɛ́ɛ é Yâwɛɛ ŋɔtɔ̂ŋ-ŋai mɛi káa ŋɔkɛ-ɣeniɛi su fɛ̂ɛ nɔ́ Ita-nuui Yuraya ŋɔmɛnii wɔ́lɔ kɛ̂i.

⁶Kɔ́ è wɔ́lɔ kɛ̀ nɔ́ Leoboaŋ da Zɛroboaŋ loai a ɣele kélee Abiza kɛ́ɛ ɣele mai.

⁷Abiza ŋɔkâloŋ-laai su mɛni-ŋai da mɛni kpéli-ŋai kélee è díkɛi, gélee pɔ̃yɛ̂ɛi Zuda kaloŋ-ŋai dímɛni pɔlɔ kɔlɔ-ŋai su. Kɔ́ è kɛ̀ nɔ́ Abiza da Zɛroboaŋ loai.

⁸Abiza è lì ǹâŋ pɔlɔ-ŋai pɔ́, ǹyaŋ dí nòo Deeƃé ŋɔtaa-lêei su. Ǹóŋ Asa è lɛ̀ɛ bɔ́ɔ ŋá a kâloŋ.

⁹Dí Asa kɛ̀ a kâloŋ Zuda Eezuɛ kaloŋ Zɛroboaŋ ŋɔkâloŋ-laa koraŋ buu feerɛi su.

¹⁰È ŋɔkâloŋ-laai kɛ̀ Zerusâlɛŋ a kóraŋ buu náaŋ káo tɔnɔɔ. Ǹee ŋɔlee láa ƃé kɛ̀ a Maaka, Abisaloŋ ǹóŋ-nɛnii.

¹¹Asa è m̀ɛni-ŋai kɛ̀ nyíi kɛ̀ a ǹɛ́lɛɛ Yâwɛɛ ŋɛ́i, yɛ̂ɛ berei ǹâŋ Deeƃé è wɔ́lɔ gɛ̀ lai.

¹²Ŋ̀ulu-wulu kɛ́ sinaai nyii-ŋai kɛ̀ ŋ̀âla da kpɛ́ni-ŋai fɛli kwaa-ŋai mai, è dí kpɛ̀ ǹɔii su. È dí Ɣâla pɔkɔɔŋ-ŋai kélee su kàra nyii-ŋai ǹâŋ-ni dí gbɛ̀tɛi.

¹³È máŋ kpîŋ ǹee ŋɔlee Maka kùla dɔɔ̂i a kâloŋ-nɛni, kpɛ́ni fêi, è wúru kôya kpɛ̀tɛ ŋ̀âla-pɔkɔɔŋ Asira láai mɛni ma. Asa è ŋ̀úru kôyai tèe é géreŋ Kidurɔŋ potoi su.

¹⁴É máŋ kɛ́ tí, vé ǹûai díɣâla da kpɛ́ni-ŋai fɛli kwaa-ŋai ma kélee su kara ní. Asa líi kélee è kɛ̀ Yâwɛɛ pɔ́-naa pere ŋɔkɛ-ɣeniɛi su.

¹⁵È pà Yâwɛɛ ŋɔɣâla-pɛrɛ kɛ́tɛi mu a gánei, gôoi da zãai kélee ǹâŋ è wɔ́lɔ dɛ̀ɛ Yâwɛɛ pɔ́i.

¹⁶Kɔ́ é tèe Asa da Eezuɛ-kaloŋ Baasa loai díkâloŋ-laa koraŋ-ŋai su.

¹⁷Eezuɛ kaloŋ Baasa è kɔ́ pɛ̀lɛ Zuda ma é Lama-taai maa tìnaŋ a siyãŋ a gɛ́ɛ é nûa kpera dífe lì kpaa máŋ édí pá Zuda kaloŋ Asa ŋɔkpiniŋ su.

¹⁸Nya ƃe Gâloŋ Asa è gánei da gôoi kélee sìɣe nyíi lɛ̀ɛ Yâwɛɛ ŋɔɣâla-pɛrɛ kɛ́tɛi da ŋɔkâloŋ-pɛrɛ kɛ́tɛi mui. È dɛ̀ɛ ŋɔtíi kɛ́-ƃela kpaya-kpayai da-ŋa pɔ́ a gɛ́ɛ dí dɛ́ɛ Tariŋmɔŋ ǹóŋ Bɛŋ-Ada pɔ́ kɛ̀ a Iziɔŋ ŋɔlóŋ, nyíi kɛ̀ a Siria kaloŋ. Zeɛ́ɛ è kɛ̀ Dɛmɛika.

¹⁹È mò ǹyɛɛi, “Ǹɛɛ naa mɛni kpɛtɛɛ é kɛ́ kwa yá kúloai, yɛ̂ɛ berei è wɔ́lɔ kɛ̀ la ńâŋ loai da ínâŋ. Gáa, ŋa káne da gôo tɛɛ̂i ípɔ a sáma-sɛŋ. M̀ɛni kpɛtɛɛi káloai ka Eezuɛ kaloŋ Basai, ŋa ŋ̀wɛ̂lii í gbèra. Ƃà gɛ̀ tí, gɛ̀ ní a pâi ŋɔkɔ́-kɔ-ƃelai kulâi ḿbɔ naa.”

²⁰Bɛŋ-Ada è fàa Gâloŋ Asa wóo ma. È ŋɔkɔ́ kɔ́-ƃelai láa túɛ-ƃelai tɛ̀ɛ a gɛ́ɛ dí kɔ́ pɛ́lɛ Eezuɛ taa-ŋai dîa. È gwaa-ŋai ŋí ma sòŋ gɔ́i su. Dia ƃa Azɔ̂ŋ, Daŋ, Ebɛ Bɛɛ Maaka, Galalii da Nɛfɛtɛli kpiniŋ su gwaa kélee.

²¹Baasa kɛ́ɛ a nyíŋi mɛ́nii, è kpèra Lama-taai tɔɔ ma é pú é lí Taza.

²²Nya ƃe Gâloŋ Asa è ŋ̀óo tɛ̀ɛ Zuda gwaa kélee. Núu da fé kɛ́ ní a guláa zu. Dí gɔni-ŋai da ŋ̀úru-ƃela-ŋai kélee kùla Lama nyii-ŋai Baasa è kɛ̀ tíi kɛ̂i a diai. Gâloŋ Asa è Geƃa-taai tɔ̀ɔ a dia Bɛŋsima kpiniŋ su da Mizipa taa-lêei máŋ.

²³Asa ŋɔkâloŋ-laai su mɛni-ŋai kpéli-ŋai è gɛ̀i, díi lɛ́lɛɛ-ŋai kélee, daa-lee-ŋai è dɔ̀ɔi, gélee maa mɛni pɔlɔi pɔ̃yɛ̂ɛi Zuda kaloŋ-ŋai dímɛni-pɔlɔ kɔlɔi su. Tãi è pɔlɔ lai, kɔɔ-soli kɔlɔ-fela è zòŋ.

²⁴Nya ƃe Gâloŋ Asa è sàa é lí ǹâŋ pɔlɔ-ŋai pɔ́ dí nòo díkɔlɛ ǹâŋ Deeƃé ŋɔtaai su. Dí ǹóŋ Zeosafa kɛ̀ a kâloŋ bɔ́ɔ ŋá.

²⁵Dí Zɛroboaŋ ǹóŋ Nada kɛ̀ a kâloŋ Eezuɛ Zuda kaloŋ Asa ŋɔkâloŋ-laa koraŋ veerɛi su. È kɛ̀ a kâloŋ Eezuɛ mɛi a kóraŋ feerɛ.

²⁶È sɔnyɔ̂ŋ kɛ̀ Yâwɛɛ ŋɛ́i. È m̀ɛni-ŋai kɛ̀ yɛ̂ɛ berei nɔ́ ǹâŋ è kɛ̀ lai. È gɛ̀ Eezuɛ-ŋai dí pìlaŋ gɔ́ɔ pɔɔi.

²⁷Aiza ǹóŋ Baasa nyíi kɛ̀ a Isaka ŋɔpɛ́rɛi mu-nuui, è mɛni nyɔ́mɔɔ kpɛ̀tɛ é pîlaŋ Nada ma. È dùa é tóo ǹɔii ma é sáa Giƃiyɔŋ, Felesia taai su. È kɛ̀ tí a tãi Nada da Eezuɛ-ŋai kélee díkɛ̀ daai ŋí kulâi lai.

²⁸Baasa è Nada pàa a Zuda kaloŋ Asa ŋɔkâloŋ-laa koraŋ zaaƃai é bɔ́ɔ ŋá síɣe.

²⁹È pɛ̀lɛ kpɔ́ nɔ́ ŋɔkâloŋ-laai kɛ́ɛ ma, é Zɛroboaŋ ŋɔkáa-laai su-ƃelai kélee páa. Vé Zɛroboaŋ ŋɔnûai dɔnɔ kpîŋ lɛɛ ní a vúlu. Kɛ́lɛ è díkelee su-kàra yɛ̂ɛ berei Yâwɛɛ ŋɔlóno kɛ́-nuui Aiza, Sɛlonia-nuui è wɔ́lɔ mò lai.

³⁰È gɛ̀ tí, kpɛ́ni fêi, Zɛroboaŋ è sɔnyɔ̂ŋ kɛ̀ Eezuɛ-ŋai dí pìlaŋ gɔ́ɔ pɔɔi.

³¹M̀ɛni-ŋai kélee Nada è gɛ̀ ŋɔkâloŋ-laai sui, gélee pɔ̃yɛ̂ɛi Eezuɛ kaloŋ-ŋai dí mɛni pɔlɔ kɔlɔi su.

³²Kɔ́ è kɛ̀ nɔ́ Gâloŋ Asa da Eezuɛ kaloŋ Baasa loai díkâloŋ-laa kɛ́ɛi su.

³³Zuda kaloŋ Asa ŋɔkâloŋ-laa koraŋ zaaƃai su, Aiza ǹóŋ Baasa è kɛ̀ a kâloŋ Eezuɛ kélee mɛni ma. Zeɛ́ɛ è kɛ̀ Tiiza. È kɛ̀ a kâloŋ a kóraŋ buu feerɛ káo náaŋ.

³⁴È sɔnyɔ̂ŋ kɛ̀ Yâwɛɛ ŋɛ́i, gɛ́ sìa ǹâŋ Zɛroboaŋ kɔ́ɔ pɔɔi. Eezuɛ-ŋai dí pìlaŋ gɔ́ɔ pɔɔi.