Read Kpelle Kâloŋ-ŋa Maa-ŋuŋ 17 Bible Online

Kâloŋ-ŋa Maa-ŋuŋ 17 - Kpelle bible

Kâloŋ-ŋa Maa-ŋuŋ 17

¹Tisibi-nuui Ilaiza nyíi kùla Tisibi Gilia lɔii sui è mò Gâloŋ Eɣa ma ǹyɛɛi, “Nyíi nɔ́ Yâwɛɛ, Eezuɛ Ŋɔɣâlai káa ɣele mai, nyíi ŋ́gaa tíi kɛ̂i mìi, lúu kpaa máŋ tuna fé pâi pûi kóraŋ kpɛ́-kpɛɛ yée mu fɛ̂ɛ nɔ́ ŋá mò a gɛ́ɛ é kɛ́ tí.”

²Nya ƃe Yâwɛɛ è mò Ilaiza ma ǹyɛɛi,

³“Kula ƃɛ́, tínaŋ vóloi kulâi-pere í íloo Kɛriɛ ya-loŋ kɔlɛ, vóloi kulâi-pere Zɔdiŋ Ya-leei ma.

⁴Ya pâi kɛ̂i íkpelêi a ǹya-ɣɛli loŋ su. Ŋa pâi gɛ̂i gɔ̃ɔ-ŋai da pâi kɛ̂i íŋaa-kɔ̂nii ƃɛ́.”

⁵È lì Kɛriɛ ya-loŋ kɔlɛ, vóloi kulâi-pere Zɔdiŋ Ya-leei ma é lɛ̀ɛ naa yɛ̂ɛ berei Yâwɛɛ è mò la m̀ai.

⁶Gɔ̃ɔ-ŋai da kâa pà bɔ́ a kpólo da sua a ŋ̀ele-walai da ŋ̀ele-wulii. À kɛ̀ tí a 1náa mìi é gbèle a ǹya-ɣɛli loŋ.

⁷Ǹya-ɣɛli loŋ ŋí è kpàla tãi su kóya tɛ̀ɛ pôlu ma, kpɛ́ni fêi, tuna fé kɛ́ ní pûi ǹɔii su.

⁸Nya ƃe Yâwɛɛ è mò Ilaiza mà ǹyɛɛi,

⁹“Lí Zarefa Sidɔŋ kɔlɛ ma í lɛ́ɛ naa. Ŋa mò pɔɔ nɛni tɔnɔ ma nyíi gáa gwaai tí ma a gɛ́ɛ é mii-sɛŋ tɛɛ ípɔ.”

¹⁰Nya ƃe è lì Zarefa. Báa kɛ̀ daai siɣãŋ lai, pɔɔ nɛni tɔnɔ è kɛ̀ naa gɛ́ kɔi ŋáa lɛ̀ɛ gîe ma. È dòli ǹyɛɛ m̀ai, “Ye pá mî a yá ŋá gbéle”

¹¹Tãi è kɛ̀ liî la ǹyái kanai, è dòli ŋɔ́nɔ pôlu ǹyɛɛ m̀ai, “Kpera yɛ̂, pá mî máŋ a kpólo kpua.”

¹²È zu tòo ǹyɛɛ mài, “Tɔ̃yâ ma, yɛ̂ɛ berei Yâwɛɛ Íɣâlai káa la ɣele mai, kpólo da kélee fé ńyêei. Felaƃa ŋɔyee fɛ̂ɛ tɔnɔ nɔ́ ƃé ǹyéei sane su da wúlɔ loŋ múluŋ su. Ŋ́gaa kɔi loŋ siɣêi ŋá lí la a gɛ́ɛ ŋá kúkɔnɔŋ kpɛtɛ la kwa ńoŋ-surɔŋ-looi kúmɛni ma, a gɛ́ɛ kú mii burui é lɛ́ɛ pâi kúpaâi.”

¹³Ilaiza ǹyɛɛ m̀ai, “Ílii fé sɛ̀lɛŋ. Lí ípɔ-naa í gɛ́ yɛ̂ɛ berei í mò lai. Kɛ́lɛ kpólo loŋ kpɛtɛ fúlɔi í pá la ḿî é kúla nyíi loŋ su gáa íyêei, gɛ̀ ní, da kpɛtɛ ka íloŋ-surɔŋ kámɛni ma.

¹⁴Ǹyɛɛ m̀ai, m̀ɛnii ŋí ƃé Yâwɛɛ, Eezuɛ Ŋɔɣâlai a môi, ‘Felaƃai fé pâi kpɛɛ̂i zanei su, ŋ̀úlɔi fé pâi kpɛɛ̂i m̀úluŋ su é lɛ́ɛ la zu ŋ̀elei tí é seri Yâwɛɛ a pâi tuna pûi la ǹɔii mai.’ ”

¹⁵È lì é gɛ́ yɛ̂ɛ berei Ilaiza è mò la mài. Nya ƃe mii-sãa è kɛ̀ naa Ilaiza, bɔɔ-nɛnii da ŋɔkáa-laai su-ƃelai yêei ɣele kûu támaa mɛni ma.

¹⁶Felaƃai fé kpɛɛ ní zanêi, ŋ̀úlɔi fé kpɛɛ ní m̀úluŋ su yɛ̂ɛ berei Yâwɛɛ è mò la Ilaiza mai.

¹⁷Ɣele kûu kpɛ́-kpɛ̂ɛ tɛ̀ɛ pôlu ma, bɔɔ nɛnii ŋí ǹóŋ-surɔŋ è kɔ̀lɛ. Gɔlɔ-felai su è kɛ̀ nɔ́ kɛ́tɛi. Naa kɛ́ɛ tíi, è sàa.

¹⁸Ǹɛnîi è mò Ilaiza ma ǹyɛɛi, “Ɣâla-nuu, lé ƃé íkoi é pîlaŋ mai? Í pà a gɛ́ɛ í ŋásɔnyɔ̂ŋ mɛni too Ɣâla kíli ŋá a gɛ́ɛ é ńoŋ surɔŋ-looi páa?”

¹⁹Ilaiza ǹyɛɛ m̀ai, “Íloŋ surɔŋ-looi tɛ́ɛ ḿbɔ́.” È gùla ǹyêei é lí la bɛ́rɛi ɣelei-pere loŋpoi su ƃɛ́i è kɛ̀ naai é ǹáa naa ŋɔgbìŋ ŋá.

²⁰È wɔ̀lɔ Yâwɛɛ ma a ɣelêi pere ǹyɛɛ m̀ai, “Óo Ŋáɣâlai Yâwɛɛ, ya pá máŋ a maloŋ too-maa bɔɔ-nɛnii ŋí pɔ́ nyíi ŋ́gaa bɔ́ naai. Ya ǹóŋ-surɔŋ páa ǹyêei lé mɛni ma?”

²¹Nya ƃe Ilaiza è pɛ̀lɛ zurɔŋ-looi mɛi é gbîŋ su sãa gîei saaƃa é wɔ̀lɔ Yâwɛɛ mai, “Óo Ŋáɣâlai Yâwɛɛ, nɛ̀ɛ naa ǹôloŋ lɛ̂wo é tóo pôlu gbonôi!”

²²Yâwɛɛ è Ilaiza wóo mɛ̀ni. Ǹôloŋ ŋɔfúlu-laai è tòo pôlu gbonôi é ŋɔ́nɔ kɛ́ a vúlu.

²³Ilaiza è ǹôloŋ mu sìɣe é kúla loŋpoi su é yéŋ la bɛ́rɛi mu-pere é dɛɛ ǹee pɔ́ ǹyɛɛ mai, “Gáa, íloŋ aâ kɛ́ pôlu a vúlu!”

²⁴Ǹɛnîi ǹyɛɛ Ilaiza mai, “Ŋaâ gɔ́lɔŋ a gɛ́ɛ íkaa a Ɣâla-nuu. Yâwɛɛ ŋɔwóoi a kula ílai gáa a tɔ̃yâ woo.”