Read Kpelle Kâloŋ-ŋa Maa-ŋuŋ 21 Bible Online

Kâloŋ-ŋa Maa-ŋuŋ 21 - Kpelle bible

Kâloŋ-ŋa Maa-ŋuŋ 21

¹Nalôŋ tɔnɔ è kɛ̀ naa ǹáa ƃé kɛ̀ a Nabo. È kɛ̀ a Zariɛɛ ŋɔsuui su nuu. Kpɔmɔ kpâlaŋ è kɛ̀ ǹyêei Zariɛɛ, Sameria kaloŋ Eɣa ŋɔkâloŋ pɛrɛ kɛ́tɛi kɔlɛ.

²Ɣele tɔnɔ da Eɣa è mò Nabo ma ǹyɛɛi, “Íkpɔmɔ kpâlaŋ tɛ́ɛ ḿbɔ ŋá naa kɛ́ a ŋásûa, kpɛ́ni fêi, gáa ŋákâloŋ pɛrɛ kɛ́tɛi kɔlɛ ma. Ŋa pâi kpɔmɔ kpâlaŋ lɛ́lɛɛ tɛɛ̂i ípɔ a bɔɔ-ŋa tòo é tɛ́ɛ nyíŋi ma, kpaa máŋ ƃa kɛ̀ ŋ̀wɛ̂lii, ŋá zɔ̃ɔ tɛ́ɛ ípɔ a sɛŋ-kao ŋa pâi gɛ̂i tí.”

³Kɛ́lɛ Nabo è mò ma ǹyɛɛi, “Yâwɛɛ fé mɛni a gɛ́ɛ ŋá ńâŋ-ni dípɔɔ-sɛŋ tɛ́ɛ ípɔ.”

⁴Nya ƃe Eɣa è lì pôlu bɔ́-taai, lii-too pôlu da lii-ŋwâna su, kpɛ́ni fêi, Zariɛɛ-nuui Nabo è mò ma ǹyɛɛi, “Fé pâi ńâŋ pɔlɔ-ŋai díkɔ̃liŋ tɛɛ̂i ípɔ.” È làa ŋɔgbìŋ ŋá a lii-ŋwâna. Vé fáa ní ma a gɛ́ɛ é mii-sɛŋ da mii.

⁵Ŋɔnɛnîi Zɛsebɛɛ è pà bɔ́ é marê kɛ́ ǹyɛɛ mai, “Lé mɛni ƃé ŋ̀wanâi yâ ímɛi saai? Lé ƃé kɛ̀ ífe ŋ̀wɛ̂lii í mii-sɛŋ da kélee mii?”

⁶È ŋɔnɛnîi wóo su tòo ǹyɛɛ m̀ai, “Ŋá mò Zariɛɛ-nuui Nabo ma, ‘Íkpɔmɔ kpâlaŋ kɔ́lɛ ḿâ kpaa máŋ yà kɛ̀ ŋ̀wɛ̂lii, ŋa pâi kpɔmɔ kpâlaŋ da kpɛ́ni tɛɛ̂i ípɔ a bɔɔ-ŋa too.’ Kɛ́lɛ è mò ḿâ ǹyɛɛi, ‘Ḿve pâi ŋá kpɔmɔ kpâlaŋ tɛɛ̂i ípɔ.’ ”

⁷Ŋɔnɛnîi Zɛsebɛɛ ǹyɛɛ m̀ai, “Bere ƃé ya tûa la ƃíai a Eezuɛ kaloŋ? Ímu siɣe í ílaa míi! Lii-nɛ̃ɛ kula. Ŋa pâi Zariɛɛ-nuui Nabo ŋɔkpɔmɔ kpâlaŋ sɔlɔ ƃôi ímɛni ma.”

⁸Nya ƃe è kɔlɔ-ŋa pɔ̃yɛ Gâloŋ Eɣa láai su é Gâloŋ yée pɔɔ kɛ́ dîa, é dítɛɛ ǹúu-pɔlɔ-ŋai da dɔɔ-ƃela kpaya-kpayai nyii-ŋai kɛ̀ daa-lêei su ƃɛ́i Nabo è kɛ̀ naai dípɔ.

⁹È bɔ̃yɛ gɔlɔ-ŋai tí su ǹyɛɛi, “Ka sûŋ siɣe mɛni kpɛ̀tɛ. Ka Nabo see ƃaa kɛ́-maa see-sɛŋ lɛ́lɛɛ ŋá ǹûai sáma.

¹⁰Ka ŋaa-ƃâlaŋ maa-ƃela feerɛ sée gɔlɛ, dí sêre-faa kɛ́ é pîlaŋ ma a gɛ́ɛ è Ɣâla làraŋ da gâloŋ. À kɛ̀ tí, ka zìɣe ká kúla la ka zɔ̀ɔ a kɔni ká baa.”

¹¹Nya ƃe ǹúu-pɔlɔ-ŋai da dɔɔ-ƃela kpaya-kpayai kɛ̀ daa-lêei su Nabo è kɛ̀ naai, dí gɛ̀ yɛ̂ɛ berei Zɛsebɛɛ è bɔ̃yɛ la gɔlɔ-ŋai su é dɛɛ dípɔi.

¹²Dí zûŋ siɣe maa ɣele kuui mɛni kpɛ̀tɛ dí Nabo sèe ƃaa kɛ́-maa see-sɛŋ lɛ́lɛɛ ŋá ǹûai sáma.

¹³Nya ƃe ŋaa-ƃâlaŋ maa-ƃela feerɛ dí pà dí sée gɔlɛ dí pɛ́lɛ mɛni lɛɛ̂i Nabo ma ǹûai ŋɛ́i, dîyɛɛi, “Nabo a Ɣâla larâŋ da gâloŋ.” Dí kùla la daa-lêei su dí lɛ́ɛ zɔɔ̂i a kɔni é lɛ́ɛ la zu é sáa.

¹⁴Gɛ́ɛ tí, dí díwoo tɛ̀ɛ Zɛsebɛɛ pɔ́-naa dîyɛɛ m̀ai: “Kú lɛ̀ɛ Nabo sɔɔ̂i a kɔni é lɛ́ɛ la zu é sáa.”

¹⁵Zɛsebɛɛ è m̀ɛnii ŋí mɛ̀ni nɔ́, è mò Eɣa ma ǹyɛɛi, “Ímu siɣe í lí í Zariɛɛ-nuui Nabo ŋɔkpɔmɔ kpâlaŋ síɣe a ípɔɔ nyíi vé fáa ní kɛ̀ é gɔlɛ yâi. Vé ŋɔ́nɔ a vúlu, aâ saa.”

¹⁶Eɣa ǹyaŋ è mɛ̀ni nɔ́, é mù sìɣe é yéŋ naa a gɛ́ɛ é gbɔmɔ kpâlaŋ síɣe mì.

¹⁷Gɛ́ɛ tí, Yâwɛɛ è worɛ̂ tɛ̀ɛ a Ɣâla ŋɔlóno kɛ́-nuui Ilaiza kùla Tisibi ǹyɛɛ m̀ai,

¹⁸“Lí ka Eezuɛ kaloŋ Eɣa ká koyaŋ. Zeɛ́ɛ káa Sameriai. Gáa naa Nabo ŋɔkpɔmɔ kpâlaŋ ŋá, ƃɛ́i è lì naa a gɛ́ɛ é ziɣe a bɔ́ɔi.

¹⁹M̀ó m̀a yɛ̂i, ‘M̀ɛnii ká ŋí Yâwɛɛ a m̀ôi: Í ǹalôŋ pàa í ŋɔ́nɔ gɔ̂liŋ siɣe? Gɛ̀ ní, m̀ó m̀a ŋɔ́nɔ yɛ̂i, m̀ɛnii ká ŋí Yâwɛɛ a môi: Gwaa tɔnɔi tí ma ɣîla-ŋa dí Nabo ŋãa kɔ̂mɔ naai, ɣîla-ŋa da pâi íŋãa kɔ̂mɔi naa máŋ. Óowei, a pâi kɛ́ tí-ti ƃôi.’ ”

²⁰Eɣa è mò Ilaiza ma ǹyɛɛi, “Gɛ̀ ní, ƃaâ ŋ́gaa ŋákpɔara-nuui!” Ilaiza ǹyɛɛ m̀ai, “Ŋaâ íkaa, kpɛ́ni fêi, ya fáa ma a gɛ́ɛ í mɛni nyɔ́mɔɔ kɛ́ a Yâwɛɛ.

²¹Yâwɛɛ a m̀ôi yâ ǹyɛɛi, ‘Ŋa pâi a mɛni kpɔ̂lu ípɔ. Ŋa pâi ísuui su karâi. Ŋa pâi Eɣa ǹóŋ-sinaai gbɛɛ ŋái kélee su karâi Eezuɛ, luɛ, kpaa máŋ núu ŋuŋ ma ƃóɔɔ.

²²Ŋa pâi ípɛrɛi kɛ̂i yɛ̂ɛ Neƃa ǹóŋ Zɛroboaŋ ŋ̀ɔi da Aiza ǹóŋ Baasa ŋɔpɛ́rɛi, kpɛ́ni fêi, ya ńii ŋwána ƃa Eezuɛ kɛ́ a sɔnyɔ̂ŋ kɛ́.’

²³À kɛ̀ a Zɛsebɛɛ, Yâwɛɛ a mò a gɛ́ɛ ɣîla-ŋa da pâi baâi dí mii Zariɛɛ galai kɔlɛ ma.

²⁴Eɣa ŋɔnûai pâi saâi daa-lêei sui ɣîla-ŋa da pâi dípoma miî. Diai pâi saâi víyeŋ-ŋai pâi saâi víyeŋ ŋái ŋ̀ɔni-ŋai da pâi díluu kpelêi.”

²⁵(Kpakolo ta fé wɔ́lɔ kɛ́ ní naa zɔŋ nyɔ́mɔɔ yɛ̂ɛ Eɣa. Ŋɔnɛnîi Zɛsebɛɛ è gɛ̀ é sɔnyɔ̂ŋ kpɛ́ɛ pôlu ŋánaa kɛ́ a Yâwɛɛ.

²⁶È ŋumɛ tûa nyɔ́mɔɔ-ŋa kɛ̀ a gɛ́ɛ liî ɣâla pɔkɔɔŋ-ŋa pôlu yɛ̂ɛ berei Amora-ŋai dí gɛ̀ la Yâwɛɛ kɛ́ díkpɛ̀ ǹɔii su Eezuɛ-ŋai ŋɛ́i tuɛi.)

²⁷Eɣa è kɛ́ɛ a ŋ̀óo-ŋai ŋí mɛ́nii, è ŋɔseɣe-ŋai kùla ma é dífala-fâla, é maloŋ too-maa seɣe too ma, è sûŋ sìɣe. È kɛ̀ lâani ƃɔrɔ-sâa su. A kâa kɛ̀ tɛɛ-tɛɛ̂i a lii maa yêŋ pere maloŋ tòo maa su.

²⁸Nya ƃe Yâwɛɛ è m̀o Tisibi-nuui Ilaiza ǹyɛɛi,

²⁹“Ƃa berei káa Eɣa a gbîŋ maa yéŋ la ŋɛ́i-tuɛi? M̀ɛni ma, fé pâi pâi bɔ́ a mɛni kpɔ̂lu ŋɔɣele-ŋai ma. Kɛ́lɛ ŋa pâi pâi a maa mɛni kpɔlui ŋɔpɛ́rɛi ma a ǹóŋ ŋɔɣele-ŋai ma. Ŋa pâi ŋɔsuui kélee su karâi.”