Read Kpelle Kâloŋ-ŋa Maa-ŋuŋ 3 Bible Online

Kâloŋ-ŋa Maa-ŋuŋ 3 - Kpelle bible

Kâloŋ-ŋa Maa-ŋuŋ 3

¹Saloma da Ize kaloŋ dí díkono tèe díkîe-ni yêei a gɛ́ɛ dífe pâi kɔ́ pɛlɛ̂i díkîe-ni dîa. Ize kaloŋ è ǹóŋ-nɛnii tɛ̀ɛ Saloma pɔ́ a gono-teei ŋí mɛi ɣirîi. Ǹɛnîi è kɛ̀ Deeƃé ŋɔtaa-lêei su é lɛ́ɛ la zu Saloma é ŋɔpɛ́rɛ kɛ́tɛi tɔ́ɔ, Ŋ̀âla-pɛrɛ Kɛ́tɛi da góraŋ è dínaŋ Zerusâlɛŋ taa-lêei ma.

²Tãi tí ma, Ɣâla-pɛrɛ kɛ́tɛ fé kɛ́ ní naa a gɛ́ɛ ǹûai dí Yâwɛɛ fɛli mu, ǹyaŋ ǹûai kélee da kâa sâla-ŋa kùla kwaa da kpɛ́ni-ŋa ma.

³Saloma è kɛ̀ a Yâwɛɛ wɛ́liɛɛ gɛ́ sìa a ǹâŋ Deeƃé ŋɔlia-woo-ŋai. Kɛ́lɛ Saloma è sâla-ŋa kùla máŋ, é tela kéreŋ sala-ŋa kula kwa da kpɛ́ni-ŋa ma.

⁴Gâloŋ è lì Gibiyɔŋ a gɛ́ɛ é sâla kula naa, kpɛ́ni fêi, naa ƃé kɛ̀ a gwaa ma mɛni kpanaŋɔɔi. A wɔ́lɔ sâla kùla gwaai ŋí ma a tɛ́ɛ gîei wála-tɔnɔ ma a bɔlɔ ŋ̀âla-teƃelei ma naa.

⁵Kpíni tɔnɔ da Yâwɛɛ Ɣâla è pà Saloma pɔ́ Gibiyɔŋ seêi-pere. Ɣâla è mò mà ǹyɛɛi, “Sɛŋ nyíi kélee ya ŋ̀wɛ̂lii, maa mare-kɛɛ kɛ́ mâ, ŋa pâi gɛ̂i yɛ̂.”

⁶Saloma è mò ǹyɛɛi, “Ńâŋ Deeƃé íyee mu nuui è kɛ̀ a núu-sãa ǹyaŋ è mɛnii kɛ̀ í mò mai. Mɛ̀ni ƃé í íwɛli-kɛ-maai lɛ̀ la ma, ǹyaŋ íkaa nîi ŋwɛli kɛ́-maai ŋí lɛ̂ia lóŋ-surɔŋ tɛ̀ɛ bɔ́ nyíi gáa nâa a kâloŋ bɔ́ɔ ŋá.

⁷Óo Yâwɛɛ Ŋáɣâlai, ya nâa íyee mu-nuui kɛ́ a kâloŋ ǹâŋ Deeƃé pɔ́ɔ ŋá. Ǹyaŋ ŋ́gaa nɔ́ a lôloŋ. Ḿve berei kɔ́lɔŋ ŋa pɔri lɔ̂i lai da berei ŋa pɔri kulâi lai.

⁸Íyee mu-nuui káa ínûai sáma nyíi ya dí síɣe zui, ínuu-suu su kɛ́tɛi ŋí nyíi núu fa pɔri dílônoi kpaa máŋ é dílaa síɣei, dí táma pere ma.

⁹M̀ɛni ma, mɛni ŋá káa târe tɛɛ ńyãai a íyee mu-nuui pɔ́ a gɛ́ɛ ŋ́gɛ ínûai dímɛnii ŋá tée a zãa, ŋá mɛni lɛ́lɛɛ da mɛni nyɔ́mɔɔ loai kɔ̂lɔnii. Kpɛ́ni fêi, gbɛ̂ɛ ƃa pɔri ínuu-suu su kɛ́tɛi ŋí dímɛnii ŋá têei?”

¹⁰Yâwɛɛ líi è làa a gɛ́ɛ Saloma è m̀arê kɛ̀ mɛ̀nii ŋí mɛni ma.

¹¹Nya ƃe Ɣâla è mò m̀a ǹyɛɛi, “Tãi nɔ́ ya m̀ɛnii ŋí mare-kɛ̂ɛ kɛ́i, ífe ílɛ̂wo su kôya mɛni mare kɛ̂ɛ kɛ́ níi, ífe tela tɔɔ-sãa mare kɛ̂ɛ kɛ́ ní íkpîŋ mɛni ma, kpaa máŋ íkpɔara-ƃelai su-kara mɛni, kɛ́lɛ ya mɛni ŋá káa maa târe mare-kɛɛ kɛ́ íkpîŋ mɛni ma a gɛ́ɛ í pɔri mɛni ŋá têei a zãai,

¹²ŋa pâi m̀ɛnii kɛ̂i yɛ̂ í maa mare-kɛ̂ɛ kɛ̀ mai. Ŋa pâi táre támaa tɛɛ̂i ípɔ da mɛni ŋá káa é tɛ́ɛ nyíi kélee ma núu da a wɔ́lɔ zɔlɔ ƃó ítuɛi kpaa máŋ é tɛ́ɛ nyíi kélee ma núu da a pâi wɔ́lɔ zɔlɔ ƃôi ŋ̀éniɛi ŋí sui.

¹³Ŋa pâi máŋ zɛŋ tɛɛ̂i ípɔ nyíi ífe m̀are-kɛ̂ɛ kɛ́ níi, tɔɔ-laa da ƃaa kɛ́-maa ífulu-laai su é tɛ́ɛ kâloŋ da kpɛ́ni kélee ma ŋ̀éniɛi su.

¹⁴À kɛ̀ ya ŋóo mɛni í ŋátɔŋ-ŋai mɛi káa yɛ̂ɛ berei ínâŋ Deeƃé è gɛ̀ lai, gɛ̀ ní ŋa pâi fúlu-laa su kôya tɛɛ̂i ípɔ.”

¹⁵Saloma è ŋ̀ɛ́i lá ƃò é gɔ́lɔŋ a gɛ́ɛ Ɣâla è lòno bɔ́ seêi-pere. Nya ƃe è pà Zerusâlɛŋ, é lí é tɔ́ɔ Yâwɛɛ ŋɔkpanaŋ-woo kɛ́ɛ Gãlai ŋɛ́i-tuɛ. È kéreŋ sala-ŋa kùla da kɛ-zu tɔnɔɔ sala-ŋa Yâwɛɛ ma. È kúu kɛ́tɛ kɛ̀ ŋɔyée mu-ƃelai kélee mɛni ma.

¹⁶Ɣele tɔnɔ ta wulu-wulu kɛ́ nɛyaa feerɛ dí pà dí tɔ́ɔ Gâloŋ Saloma ŋɛ́i-tuɛ.

¹⁷Ǹɛnîi dɔnɔ è mò m̀a ǹyɛɛi, “Óo ŋánuu-namui gâloŋ, kwa ǹɛnîi ŋí kúkaa pɛ́rɛ tɔnɔ mu. Ŋá lóŋ-surɔŋ-loo maa sɔlɔ ƃò kúpɔ́-golii gɛ́ ƃo naa.

¹⁸Ɣâla kpɔŋɔɔ ḿâi, fólo saaƃa tɛ̀ɛ pôlu ma, ǹyaa máŋ è lóŋ-surɔŋ-loo maa sɔlɔ ƃô. Kwaa ǹyaa kwaa tɔnɔ ma. Ŋɔ̃ya da kélee fé kɛ́ ní kúsama bɛ́rɛi mu.

¹⁹Ǹɛnîi ŋí ǹóŋ è sàa a gbínii, kpɛ́ni fêi, è làa mɛi.

²⁰Nya ƃe è mu sìɣe a gbínii sâmai é ŋálôloŋ síɣe ŋ́gɔlɛ a tãi ńyãai a íyee mu-nuui ŋá kɛ̀ nyiî lai, é ǹáa gɔ̃ɔŋ su, é ŋɔlôloŋ pomai síɣe é ǹáa ŋ́gɔ̃ɔŋ su.

²¹Bôlu ma ɣele-walai, ŋá ŋɛ́i ƃò a gɛ́ɛ ŋá ŋíni tɛ́ɛ ŋálôloŋ pɔ́, ŋá ǹôloŋ pomai lâani ŋ́gɔlɛ. Ŋá m̀aa-kpɛ̂ɛ a ǹɛ́lɛɛi, ŋá gàa a gɛ́ɛ ŋálôloŋ fêi.”

²²Kɛ́lɛ ǹɛnîi kpéli è mò ǹyɛɛi, “Kpaa! Ǹôloŋ fului káa a ŋálôloŋ ǹyaŋ ǹôloŋ pomai ƃé gáa a ŋɔloŋ.” Nɛnîi maa-ŋuŋ è zu tòo pôlu ǹyɛɛ, “Kpaa! Ǹôloŋ pomai káa a íwɔ̂i, ǹyaŋ ǹôloŋ fului ƃé gáa a ŋ́ɔ̂i.”

²³Gâloŋ Saloma ǹyɛɛ dîai, “Káfeerɛ ká m̀ôi ká kîe ma, ǹôloŋ fului ƃé gáa a ŋ́ɔloŋ ǹyaŋ ǹôloŋ pomai ƃé gáa a íwɔ̂ loŋ.”

²⁴Ǹyɛɛ dîai, “Ka pá a ƃóa-sɔ̂kpɔ mî.” Dí pà a ƃóa-sɔ̂kpɔ gâloŋ pɔ́.

²⁵Gâloŋ ǹyɛɛ ǹûai dîai, “Ka ǹôloŋ fului su tée feerɛ ká gbua tɔnɔ tɛɛ ǹúui dɔnɔ pɔ́, ká gbuai kpéli tɛ́ɛ ǹúui kpéli pɔ́.”

²⁶Nya ƃe nɛnîi nyíi ǹôloŋ fului è kɛ̀ a bɔ́ɔi è lòno gâloŋ pɔ́, kpɛ́ni fêi, ŋɔlôloŋ malôŋ è zòŋ, ǹíi láa é fɛ́ɛ a wɛli-kɛ m̀aa mɛni ma, ǹyɛɛi, “Óo gâloŋ, ŋánuu-namui, ǹôloŋ fului tɛ́ɛ bɔ́. Ífe bàa!” Kɛ́lɛ ǹɛnîi kpéli è mò ǹyɛɛi, “Ífe dɛ̀ɛ kúta kúpɔ. Zu tée zâmai, gɛ̀ ní vé pâi kɛ̂i a kúta kúpɔɔ.”

²⁷Gâloŋ è zu tòo, ǹyɛɛi, “Káfe ǹôloŋ paa! Ka dɛ́ɛ ǹɛnîi m̀aa-ŋuŋ pɔ́. Ǹôloŋ ǹee kpîŋ ká tí”

²⁸Gɛ́ɛ Eezuɛ-ƃelai da mɛni ŋá teɛɛ̂i ŋí duŋ mɛni nyíi Saloma è gɛ̀i, dí yào gâloŋ ma, kpɛ́ni fêi, dí gàa a gɛ́ɛ ŋɔtárei è kùla Ɣâla yêei mɛni-sâa ŋá tée mɛni ma a zãa.