Read Kpelle Kâloŋ-ŋa Maa-ŋuŋ 6 Bible Online

Kâloŋ-ŋa Maa-ŋuŋ 6 - Kpelle bible

Kâloŋ-ŋa Maa-ŋuŋ 6

¹Góraŋ ŋuŋ náaŋ pôlu buu lɔ́ɔlu mɛi saaƃa tɛ̀ɛ pôlu ma tãi Eezuɛ-ŋai dí kùla la Ize lɔii sui, Saloma ŋɔkâloŋ-laa koraŋ ǹáaŋ su Eezuɛ lɔii mɛi, ŋ̀áloŋ veerɛi su da dòli a Zî, è pɛ̀lɛ Ŋ̀âla-pɛrɛ Kɛ́tɛi tɔɔ ma Yâwɛɛ mɛni ma.

²Ŋ̀ala-pɛrɛ kɛ́tɛi Gâloŋ Saloma è dɔ̀ɔ Yâwɛɛ mɛni mai, zu-pere ŋɔkôya è kɛ̀ a núu kɔ́ɔ pîlanii buu lɔ́ɔlu mɛi náaŋ, ŋɔŋa-kɛ̂tɛ kɛ́ ƃò a núu kɔ́ɔ pîlanii buu saaƃa, ŋɔmɛi-kôya è ƃò a núu kɔ́ɔ pîlaii buu náaŋ káo lɔ́ɔlu.

³Gâlai dí gbɛ̀tɛ Ŋ̀âla-pɛrɛ Kɛ́tɛi ŋɛ́i-tuɛi, ŋɔŋa-kɛ̂tɛ è kɛ̀ a núu kɔ́ɔ pîlanii buu saaƃa, ŋɔsu-siŋ kɛ́ ƃò a núu kɔ́ɔ pîlanii puu káo lɔ́ɔlu.

⁴È wêna pɛlɛɛ-ŋa kpɛ̀tɛ Ŋ̀âla-pɛrɛ Kɛ́tɛi maa nyíi kɛ̀ a zu-kɛtɛɛ bɛ́rɛi mu-pere, ǹá koro teɛɛ ŋ̀énei ŋá pere.

⁵È sãa pûi kɛ́ loŋpo-ŋa tɔ̀ɔ é dínaŋ Ŋ̀âla-pɛrɛ Kɛ́tɛi m̀éla veerɛ ma da bôlu-pere. È sãa pûi kɛ́ loŋpo-ŋa kùla Ŋ̀âla-pɛrɛ Kɛ́tɛi kaŋ ma é bɔŋ bɛ́rɛ kaŋ ma è dɔ̀ɔ é dínaŋ ma. Loŋpo-ŋai dí kɛ̀ a dí tɔ́ɔ gîe mɛi saaƃa.

⁶Loŋpo-ŋai ŋí díkɛ díkîe mɛi saaƃa. Loŋpoi kɛ̀ naai gélee bu gîe ma è kɛ̀ a loŋpo buu-lɔ́ɔlu mɛi náaŋ. Buu saaƃa è kɛ̀ mu-pere, buu saaƃa kɛ́ ƃo ǹaa samɛi, buu saaƃai gbeli kɛ́ ƃò m̀ɛi-pere. Loŋpo-ŋai ŋí dífe kɛ̀ ni a díkanaŋɔɔ Ŋ̀âla-pɛrɛ Kɛ́tɛi kaŋ ma. Loŋpo-ŋai ŋí buu saaƃai kɛ̀ gélee mɛi-pere díkɛ̀ a mu kɛ́tɛ dí tɛ́ɛ zâmai ŋɔ-ŋai dîa. Zâmai ŋɔ-ŋai diaŋ dí mu kɛ́tɛ dí tɛ́ɛ mu-pere ŋɔ-ŋai dîa. Loŋpo-ŋai ŋí kélee dí kɛ̀ a díkanaŋɔɔ Ŋ̀âla-pɛrɛi kaŋ ma.

⁷Ŋ̀âla-pɛrɛ Kɛ́tɛi tɔɔ kɔ̂ni-ŋai nyíi dí dèe yɛ̂ɛ bîleki-ŋai dí díkpɛ̀tɛ gɔni teɛɛi su ǹyaŋ tãi dí pà là a gɔni-ŋai ŋâla-pɛlɛi tɔɔ sui, dífe ŋɔ́nɔ da tée ní ma. Dí ǹáa nɔ́ é pɔri ǹâai. Núu da fé tíi kɛ́ kɔli-sɛŋ da kélee tíŋ mɛni ní naa yɛ̂ɛ kpɔ́-kpɔ, yûɔ, kpaa máŋ tíi kɛ́ kɔli-sɛŋ da kélee.

⁸Loŋpoi mu-pere ŋ̀ɔ́i lá è kɛ̀ a gúlaa Ŋ̀âla-pɛrɛ Kɛ́tɛi kwára-pere. Núu siai è kɛ̀ naa é tɛ́ zámai ŋ̀ɔ́i ma, ǹyaŋ è kɛ̀ tí máŋ é seri loŋpoi naa mɛi-pere ŋ̀ɔ́i ma.

⁹Nya ƃe è Ŋ̀âla-pɛrɛ Kɛ́tɛi tɔ̀ɔ é kpɛ́ɛ ma, é bìli-ɣelei a wúru-kpono-ŋa da sîda wuru-ƃela-ŋa.

¹⁰Loŋpo-ŋai è dìnaŋ Ŋ̀âla-pɛrɛ Kɛ́tɛi mai, dímɛi kôya è kɛ̀ a núu kɔ́ɔ pîlanii lɔ́ɔlu mɛi feerɛ da gbura, ǹyaŋ díkɛ̀ a dípɔŋɔɔ Ŋ̀âla-pɛrɛ Kɛ́tɛi ma a sîda wuru-kpono-ŋa.

¹¹Yâwɛɛ è lòno Saloma pɔ́ ǹyɛɛi,

¹²“Mɛni a kpèra Ŋ̀âla-pɛrɛ Kɛ́tɛi ŋí ma íkaa dɔɔ̂i, à kɛ̀ yà ŋátɔ̂ŋ-ŋai mɛi kâa, í mɛni-ŋai kɛ́ yɛ̂ɛ berei ŋá mò la yái, í ŋátɔ̂ŋ-ŋai kélee síɣe a gbanaŋɔɔ, í ŋ́oo mɛ́ni, í gɛ́ a ǹɛ́lɛɛ, ŋa pâi ŋákono-têei ŋàa-see kɛ̂i íyêei nyíi ŋá gɛ̀ ínâŋ Deeƃé yêei.

¹³Ŋa pâi kɛ̂i Eezuɛ-ŋai sáma, ǹyaŋ fé pâi mbôlu fêi ŋánûai Eezuɛ mì.”

¹⁴Nya ƃe Saloma è Ŋ̀âla-pɛrɛ Kɛ́tɛi tɔ̀ɔ é kpɛ́ɛ ma.

¹⁵È Ŋ̀âla-pɛrɛ Kɛ́tɛi mu-pere kpɛ̀tɛ a sîda wuru-ƃela seeɛ gîe lá bɛ́rɛ kaŋ ma é síɣe bɛ́rɛi káo ma é tɛ́ ŋ̀elêi ǹyaŋ é pãai wuru-ƃela kpɛ̃yɛŋ gîe kɔlɛ Ŋ̀âla-pɛrɛ Kɛ́tɛi káo ma é mu-pere kélee mɛi pɛ́lɛ a pãai wuru-ƃelai.

¹⁶È lôŋpo tèe Ŋ̀âla-pɛrɛ Kɛ́tɛi mu gbóŋ ŋá-pere nyíi ŋɔsu-kɛ̂tɛ è kɛ̀ a núu kɔ́ɔ pîlanii buu saaƃa m̀éla kélee ma a sîda ƃela-ŋa. É síɣe Ŋ̀âla-pɛrɛ Kɛ́tɛi kaŋ pîlanii é tɛ́ ŋ̀elei-pere, è kɛ̀ a loŋpoi zu-pere-ŋɔɔ Ŋ̀âla-pɛrɛ Kɛ́tɛi mu, Gwaa Maa waai ŋɔkwaa maa waai ma.

¹⁷Loŋpoi gbîŋ nyíi dí gùla ma Gwaa Maa waai ŋɔkwaa maa waai ma ŋɛ́i túɛi, ŋɔkôya è kɛ̀ a núu kɔ́ɔ pîlanii buu lɔ́ɔlu mɛi da.

¹⁸Ŋ̀ala-pɛrɛ kɛ́tɛi mu gwaa kélee è kɛ̀ à sîda, ma pɔ̃yɛɛ a gònoŋ sii da kpɛ́ni-ŋa pɔkɔɔŋ da wúru-poa fúloŋɔɔ-ŋa pɔkɔɔŋ. Zɛŋ kélee è kɛ̀ à sîda. Maa fé nɛ̃ɛ ní kɛ̀ a gɛ́ɛ núu é gɔni-ŋai da káa.

¹⁹Lôŋpoi dí gbɛ̀tɛ zu-pere Ŋ̀âla-pɛrɛ Kɛ́tɛi kpóŋ ŋá-pere, naa ƃé dí kɛ̀ pâi Yâwɛɛ ŋɔkpanaŋ-woo-kɛɛ Gãlai sêei naa.

²⁰Loŋpoi zu-pere ŋ̀ɔ́i dí gbɛ̀tɛi ŋɔkôya è kɛ̀ a núu kɔ́ɔ pîlanii buu saaƃa, ŋɔsu-kɛtɛ kɛ́ ƃò a núu kɔ́ɔ pîlanii buu saaƃa, ǹyaŋ ŋɔmɛi kôya è ƃò a núu kɔ́ɔ pîlanii buu saaƃa. È loŋpoi ŋí su gwaa kélee mɛi pɛ̂lɛ a gôo kpîŋ-kpiŋ, ǹyaŋ ŋ̀âla-teƃelei mɛi nyíi dí gbɛ̀tɛ a sîda wurui, dí mɛi pɛ̂lɛ a gôo.

²¹Saloma è Ŋ̀âla-pɛrɛ Kɛ́tɛi mu gwaa kélee mɛi pɛ̂lɛ a gôo kpîŋ-kpiŋ, é gôo yɔlɔ-ŋa pili loŋpoi ŋí lá nyii-ŋai è dí mɛi pɛ̂lɛ a gôo gwaa kélee.

²²Nya ƃe è Ŋ̀âla-pɛrɛ Kɛ́tɛi mu-pere gwaa kélee mɛi pɛ̂lɛ a gôo. È ŋ̀âla-teƃelei kɛ̀ loŋpoi zu-pere ŋ̀ɔ́i sui mɛi pɛ̂lɛ máŋ a gôo.

²³È Ɣâla-taa kooŋ-sãa pɔkɔɔŋ feerɛ kpɛ̀tɛ a wúlɔ-wuru loŋpoi zu-pere ŋ̀ɔ́i su. Dɔnɔ ŋɔmɛi kôya è kɛ̀ a núu kɔ́ɔ pîlanii puu káo lɔ́ɔlu.

²⁴Ŋâla-taa kɔɔŋ-sɛŋ pɔkɔɔŋ maa-ŋuŋ koôŋ dɔnɔ ŋɔkôya è kɛ̀ a núu kɔ́ɔ pîlanii lɔ́ɔlu mɛi feerɛ da gbûra, goôŋ veerɛ ɣelei da maa-ŋuŋ dí kɛ̀ a dípɔriɛɛ é síɣe ŋâla-taa kɔɔŋ-sɛŋ pɔkɔɔŋ maa-ŋuŋ koôŋ dɔnɔ tée ŋá é seri gbéli tée ŋá è kɛ̀ a núu kɔ́ɔ pîlanii puu káo lɔ́ɔlu.

²⁵Ŋâla-taa kooŋ-sɛŋ pɔkɔɔŋ veerɛ ɣelei è kɛ̀ máŋ a núu kɔ́ɔ pîlanii puu káo lɔ́ɔlu, kpɛ́ni fêi ŋâla-taa kooŋ-sãa pɔkɔɔŋ veerɛŋɔɔ dí kɛ̀ a dípɔriɛɛ a díkîe pere sîi kélee su.

²⁶Ŋâla-taa kooŋ-sãai pɔkɔɔŋ dɔnɔ ŋɔtɔɔ-mɛi kpaa máŋ ŋɔmɛi-koya è kɛ̀ a núu kɔ́ɔ pîlanii puu káo lɔ́ɔlu.

²⁷È ŋâla-taa kooŋ-sãa pɔkɔɔŋ lɔ̀ loŋpoi zu-pere ŋ̀ɔ́i su Ŋ̀âla-pɛrɛ Kɛ́tɛi mu, díkoôŋ-ŋai dí kɛ̀ a dí fúlomoɔɔ. Ŋâla-taa kooŋ-sãa pɔkɔɔŋ dɔnɔ koôŋ è sɔ̀ɔ bɛ́rɛ kaŋ ma gbéli koôŋ è sɔ̀ɔ máŋ bɛ́rɛ kaŋ kpéli ma. Dífeerɛ dí koôŋ è sèe gîe lá loŋpoi sámai.

²⁸È ŋâla-taa kooŋ-sãa pɔkɔɔŋ mɛi pɛ̂lɛ a gôo.

²⁹È Ɣâla-taa kooŋ-sãa pɔkɔɔŋ-ŋa, pãa-wuru pɔkɔɔŋ-ŋa da wuru-poa fúloŋɔɔ-ŋa pɔkɔɔŋ-ŋa kpɛ̀tɛ a yɛrɛ-pɛrɛ Ŋ̀âla-pɛrɛ Kɛ́tɛi kaŋ ma gwaa kélee da zu-pere loŋpo-ŋai. È gɛ̀ tí máŋ a zɔɔ ma-ŋai maa loŋpo-ŋai su pere da ŋene ŋá pere.

³⁰È gôo pù máŋ ŋâla-pere kɛ́tɛi káo ma mu-pere loŋpo-ŋai da bôlu-pere loŋpo-ŋai kélee su.

³¹È wúlɔ-wuru-ƃela kpoŋ feerɛ kpɛ̀tɛ loŋpoi zu-pere ŋ̀ɔ́i lá mɛni ma. È gbôŋ soŋ wurui kpɛ̀tɛ a wúlɔ-wuru nyíi m̀éla ma è kɛ̀ lɔ́ɔlu.

³²Ŋ̀úlɔ-wuru kpoŋ è dí kpɛ̀tɛi, è Ɣâla-taa kooŋ-sãa, pãa-wuru-ŋa da wúru-poa fúloŋɔɔ-ŋa pɔkɔɔŋ-ŋa pɔ̃yɛ dîa, é goôŋ sãai da pài-wuru-ŋai mɛi pɛ́lɛ a gôo ɣaléɛɛ fɛŋ-fɛŋ.

³³Bere sîi tɔnɔi tí su è kpôŋ kpɛ̀tɛ a wúlɔ-wuru-ƃela Ŋ̀âla-pɛrɛ Kɛ́tɛi ŋɔloŋpo kɛ́tɛi lá mɛni ma é gbôŋ soŋ wurui kpɛtɛ a ŋ̀úru-ƃela-ŋa nyíi m̀ela ma è kɛ̀ náaŋ.

³⁴È pãai wuru-ƃela kpoŋ feeerɛ kpɛ̀tɛ máŋ. È kɛ̀ a kpôŋ nyíi dɔnɔ m̀éla è kɛ̀ feerɛ ǹá kɛ́ ƃò bôlu-pere.

³⁵È Ɣâla-taa kooŋ-sãa, pãai wuru-ŋa da felaƃa fúloŋɔɔ-ŋa pɔkɔɔŋ kpɛ̀tɛ dîa é dímɛi pɛ́lɛ gwaa kélee a gôo ɣaleɛ́ɛ fɛŋ-fɛŋ lɛ́lɛɛ.

³⁶È siɣãŋ tɔ̂ɔ é dínaŋ bɛ́rɛi ma. È dɔ̀ɔ a kɔni da sîda wuru maa kɛ́ɛ nɛ̃ɛ-nɛ̃ɛ. A kâa gɔnii zaaƃa làa é sîda wuru láa mɛi.

³⁷Dí Yâwɛɛ ŋɔɣâla-pɛrɛ kɛ́tɛi pîlanii kɔni-ŋai làa a Saloma kɛ́ɛ a kâloŋ ŋɔkóraŋ ǹáaŋ su ŋáloŋ su da dòli a Zîi.

³⁸Góraŋ buu káo tɔnɔi su, ŋ̀áloŋ su da dòli a Ƃûu, ŋ̀áloŋ ǹɔ́ɔlu mɛi saaƃai su dí kpɛ̀ɛ Ŋ̀âla-pɛrɛ Kɛ́tɛi tɔɔ ma pere sîi kélee su yɛ̂ɛ berei maa mɛni kpɛtɛɛ-ŋai dí kɛ̀ lai. È kóraŋ lɔ́ɔlu mɛi feerɛ sìɣe a gɛ́ɛ é kpɛ́ɛ dɔɔ̂i.