Read Kpelle Kâloŋ-ŋa Maa-ŋuŋ 8 Bible Online

Kâloŋ-ŋa Maa-ŋuŋ 8 - Kpelle bible

Kâloŋ-ŋa Maa-ŋuŋ 8

¹Gâloŋ Saloma è Eezuɛ nuu-pɔlɔ-ŋai tòli Zerusâlɛŋ taa-lêei su, zîi-ŋai láa túɛ-ƃelai kélee da Eezuɛ kaa-laa-ŋai láa túɛ-ƃelai, a gɛ́ɛ dí pá a Yâwɛɛ ŋɔkpanaŋ-woo-kɛ́ɛ Gãlai dí gula Zãiyɔŋ, Deeƃé ŋɔtaa-lêei su a gɛ́ɛ dí pá la Ŋ̀âla-pɛrɛ Kɛ́tɛi mu.

²Eezuɛ kpakolo-ŋai kélee dí pà Saloma pɔ́ a gúui ŋ̀ele Etaniŋ ɣaloŋ su nyíi gáa a ŋ̀áloŋ lɔ́ɔlu mɛi feerɛi.

³Eezuɛ nuu-pɔlɔ-ŋai kɛ́ɛ da pá ƃɛ́i Gbanaŋ-woo kɛ́ɛ Gãlai è kɛ̀ naai, zâla-laa soŋ-ƃelai dí Gbanaŋ-woo-kɛɛ Gãlai mu sìɣe.

⁴Dí pà a Yâwɛɛ ŋɔkpanaŋ-woo-kɛ́ɛ Gãlai da zua-kɔlɔ-pɛrɛi da kâa kòyaŋ ǹái da zɛŋ-folo maa-waa-ŋai kɛ̀ mui. Zâla-laa soŋ-ƃelai da Liiva-ŋai dí lì a dia. Ŋ̀âla-pɛrɛ Kɛ́tɛi mu.

⁵Gâloŋ Saloma da Eezuɛ-ƃelai kélee díkɛ tɔɔni Gbanaŋ-woo-kɛɛ Gãlai ŋɛ́i-tuɛ. Díkɛ sâla kulâi a ƃála-ŋa da niŋa sîrɛ-ŋa nyii-ŋai núu fa pɔri dílônii.

⁶Zâla-laa soŋ-ƃelai dí pà a Yâwɛɛ ŋɔkpanaŋ-woo-kɛ́ɛ Gãlai Ŋ̀âla-pɛrɛ Kɛ́tɛi ŋɔloŋpoi zu-pere ŋɔi su, gwaa maa waai ŋɔkwaa maa waai ma, dí zee goôŋ sãai koôŋ mu.

⁷Goôŋ sãai koôŋ è Gbanaŋ-woo-kɛɛ Gãlai da ziɣe wuru-ŋai mɛi pɛ̀lɛ.

⁸Gãlai siɣe wuru-ŋai díkɛ̀ kpɔ́ a díkôya. Núu a kâa pɔri nɔ́ díkâai a kɛ̀ maa nuui a kɛ̀ tɔɔni gwaa maa waai ma, kɛ́lɛ ya kùla gwaa maa waai ma, ífa díkàa. Díkaa naa a tóo sâa ma.

⁹Sɛŋ da kpɛ́ni fɛ́ kɛ́ ní Gbanaŋ-woo-kɛɛ Gãlai su fɛ̂ɛ nɔ́ gɔni-ƃela feerɛi nyíi Mose è dípù zu Sânai yeei ma, ƃɛ́i ma Yâwɛɛ è Gbanaŋ-wooi kɛ̀ naa da Eezuɛ-ŋai díloai dí kuláa Ize lɔii sui.

¹⁰Zâla-laa soŋ-ƃelai kuláa kɛ̀ gwaa maa waai mai, ŋ̀ele-kɔlɔŋ kolei è Yâwɛɛ ŋɔɣâla-pɛrɛ kɛ́tɛi láa fɛ̀ɛ.

¹¹M̀ɛnii ŋí è gɛ̀ zâla-laa soŋ-ƃelai dífe pɔri ní dítii kɛ̂i, kpɛ́ni fêi, Yâwɛɛ ŋɔfólo-laai è ŋɔɣâla-pɛrɛ kɛ́tɛi láa fɛ̀ɛ.

¹²Nya ƃe Saloma è Ɣâla fɛ̀li ǹyɛɛi, “Yâwɛɛ, í vóloi tɛ̀ ŋ̀elei su kɛ́lɛ ɣele-kɔlɔŋ tɛi su ƃa íkɛ̂i.

¹³Ŋá Ŋ̀âla-pɛrɛ Kɛ́tɛi ŋí tɔ̀ɔ yɛ̂ íkɛtɛ-laai mɛni ma. Naa ƃé pâi kɛ̂i a íkɛ̂i wɔ́lɔ-wɔlɔ da wɔ́lɔ-wɔlɔi.”

¹⁴Eezuɛ-ƃelai kélee díkɛ̀ tɔɔni naa. Gâloŋ Saloma è tìnaŋ dípɔ naa pere é lûwa too dîa.

¹⁵Èmò ǹyɛɛi, “Laa maa tɛ́ é tɛ́ɛ Yâwɛɛ pɔ́, Eezuɛ Ŋɔɣâlai, a ŋɔkono-teei ŋaa-see kɛ́ a gbɔ́ɔi yee nyíi è wɔ́lɔ gɛ̀ ńâŋ Deeƃé yêei é kúla ǹá ǹyaa kpîŋ, kpɛ́ni fêi, è mò ǹyɛɛ,

¹⁶‘É kúla ŋ̀elei ma ŋá ŋánûai Eezuɛ kùla la Ize lɔii sui, fé tá taa-lêe da siɣe ní zu Eezuɛ lɔii su gwaa kélee ɣâla-pɛrɛ kɛ́tɛ tɔɔ mɛni ma naa ńaai mɛni ma, ƃɛ́i nûa da pɔri ḿvɛlîi naai, kɛ́lɛ ŋa Deeƃé sìɣe zu a gɛ́ɛ é kɛ́ ŋánûai Eezuɛ láa-tuɛ.’ ”

¹⁷“È kɛ̀ ńâŋ Deeƃé kíli ŋá a gɛ́ɛ é ɣâla-pɛrɛ kɛ́tɛ tɔ́ɔ Eezuɛ Ŋɔɣâlai, Yâwɛɛ láa ma.

¹⁸Kɛ́lɛ Yâwɛɛ è mò ńâŋ Deeƃé ma ǹyɛɛi, ‘Í gbɛ̀tɛ ílii su a gɛ́ɛ í Ɣâla-pɛrɛ kɛ́tɛ tɔ́ɔ ńaa ma. Mɛni lɛ́lɛɛ ká tí í gbɛtɛi.

¹⁹É máŋ kɛ́ tí, ƃía fé pâi Ŋ̀âla-pɛrɛ Kɛ́tɛi kpîŋ tɔɔ̂i, kɛ́lɛ íkpɔɔi loŋ ƃe.’

²⁰“Yâwɛɛ a ŋɔkono-teei ŋ̀aa-see kɛ́. Ŋá ńâŋ Deeƃé pɔ́ɔ ŋá sìɣe ǹyaŋ ŋ́gaa nâa seeni gâloŋ see-sɛŋ ŋá Eezuɛ, yɛ̂ɛ berei Yâwɛɛ è góno tèe lai. Ŋa pâi Ŋ̀âla-pɛrɛ Kɛ́tɛi kpîŋ tɔɔ̂i Eezuɛ Ŋɔɣâlai, Yâwɛɛ láa ma, Yâwɛɛ láa ma.

²¹Ŋa kwaa ma kpɛtɛ naa Gbanaŋ-woo-kɛɛ Gãlai mɛni ma. Zu ƃé Yâwɛɛ ŋɔkpanaŋ-wooi káa naa nyíi è gɛ̀ kúnâŋ-ni yêei tãi è díkùla la Izei.”

²²Saloma è mù sìɣe é tɔ́ɔ Yâwɛɛ ŋɔɣâla-teƃelei láa-tuɛ Eezuɛ-ƃelai kélee ŋɛ́i-tuɛ, é ǹyée veerɛ tɛ́ ɣelêi Ɣâla-taa pere

²³ǹyɛɛi, “Óo Yâwɛɛ, Eezuɛ Ŋɔɣâlai, Ɣâla da kpɛ́ni fé naa yɛ̂ɛ ƃía, Ɣâla-taa ŋ̀elei su-pere kpaa máŋ ǹɔii ma mu-pere. Ƃa íkpanaŋ-wooi mɛi káa í gɛ̀ ínûai yêei, íkɛ íwɛli kɛ́-maai lɛ́ dîa à kɛ̀ da íwoo mɛni dí maa tûa kɛ́ a dílii kélee dí sía íkɔɔ-pɔɔi.

²⁴Ya íkono-teei ŋ̀aa-see kɛ́ íyee mu-nuui ńâŋ Deeƃé yêei. Í gono-teei kɛ̀ íla ǹyaŋ yâ ŋ̀aa-see kɛ́ a íyee yɛ̂ɛ berei gáa sâa lai.

²⁵Yâwɛɛ, Eezuɛ Ŋɔɣâlai, íkono-tee-ŋai ŋ̀aa-see kɛ́ í gɛ̀ ńâŋ Deeƃé yêei a gɛ́ɛ ǹônii-sinaai da a pâi kɛ̂i a Eezuɛ lɔii ŋɔkâloŋ, à kɛ̀ da kɔ̀ a gɛ́ɛ dí íwoo mɛni dí dûa kɛ́, yɛ̂ɛ berei è wɔ́lɔ gɛ̀ lai.

²⁶Óo Eezuɛ Ŋɔɣâlai, ǹɛɛ naa gono-teei í gɛ̀ íyee mu-nuui Deeƃé yêei ŋ̀aa-see é kɛ́.

²⁷“Kɛ́lɛ Ɣâla a pâi ŋɔkɛ-naai kɛ̂i ŋ̀éniɛi su? Ɣâla-taa nyíi gáa ɣelêi-pere póŋ-poŋ, fa pɔri íkɛtɛ-laai mu. Gɛ̀ ní ǹyaŋ Ŋ̀âla-pɛrɛ Kɛ́tɛi ŋí ŋa dɔ̀ɔi ya pâi pɔrii léŋ mu?

²⁸Kɛ́lɛ íwoli tɔ́ɔ íyee mu-nuui ŋɔɣâla fɛli-wooi ma da ŋɔkpera-fêi-wooi ma, óo Yâwɛɛ, Ŋáɣâlai. Íwoli tɔ́ɔ ńyãa a íyee mu-nuui ŋáfɛ̀lii-wooi ma í ŋ̀aa-see kɛ́ ḿî sâa ɣele-kuui ŋí ma.

²⁹Gɛ́ íŋɛi lá é kɛ́ a m̀óɔɔ Ŋ̀âla-pɛrɛ Kɛ́tɛi ŋí mɛi káa mɛni ma a kpíni da ɣele ƃɔ́ɔ, gwaai ŋí ma nyíi í m̀aa mɛni ƃò a gɛ́ɛ kú kɛ́ ífɛ̀li naai. Íyee mu-nuui ŋɔɣâla-fɛli-wooi mɛ́ni nyíi a gɛ́ gwaai ŋí mai.

³⁰Íyee mu-nuui ŋɔfɛli-wooi mɛni da ínûai Eezuɛ-ƃelai ŋ̀elei da tinaŋ la Ŋ̀âla-pɛrɛ Kɛ́tɛi ŋí naa pere dí ɣâla-fɛliɛɛ sui. Díɣâla fɛli-wooi mɛni, íɣâla-taa kaloŋ-laai su. Yà díɣâla-fɛli-wooi mɛni, dísu-mɛni lɛɛ.

³¹“Nuu da a m̀arâŋ nuu sɔŋ pú maa kɛ̀ a gɛ́ɛ a sɔŋ kɛ́ la. M̀aa nuui tí à pà íɣâla-teƃelei ŋɛ́i-tuɛ Ŋ̀âla-pɛrɛ Kɛ́tɛi ŋí mu é kperɔ mii é vóo a gɛ́ɛ m̀ɛnii dí m̀o a ǹáai tɔ̃yâ fêi,

³²gɛ̀ ní, lɛɛ kpɔ́ Ɣâla-taa í mɛni da kɛ́ é pîlaŋ ma. M̀ɛni kpîŋ ŋá tée díloai. Zɔnyɔ̂ŋ-nuui ŋɔsɔnyɔ̂ŋ kula maa kɛ́, í dɔ̃ya nuui féla fé ŋɔtɔ̃yâ-laai mɛni ma.

³³“À kɛ̀ ínûai Eezuɛ-ƃelai kpɔara-ƃela da díyee mɛi ɣàle kɔ́ su, kpɛ́ni fêi, dí sɔnyɔ̂ŋ kɛ̀ à yá, ǹyaŋ à kɛ̀ da tìnaŋ pôlu ípɔ pere, dí dísɔnyɔ̂ŋ ƃó, díkɛ ífɛ̀li a maa-yeŋ pere, a gɛ́ɛ í dísu-mɛni lɛɛ Ŋ̀âla-pɛrɛ Kɛ́tɛi ŋí mu,

³⁴gɛ̀ ní, lɛɛ Ɣâla-taa í dífɛli-wooi mɛni í dí su-mɛni lɛɛ zɔŋyɔ̂ŋ dí gɛ̀ a ƃíai mɛni ma í pá a dia pôlu ǹɔii ma í dɛ̀ɛ dínâŋ pɔlɔ-ŋai pɔ́i.

³⁵“À kɛ̀ ínûai da sɔnyɔ̂ŋ kɛ̀ à yá ǹyaŋ ífe tuna tɛɛ ní é pú ǹɔii ma dímɛni ma, à kɛ̀ da tìnaŋ Ŋ̀âla-pɛrɛ Kɛ́tɛi ŋí naa pere dí ífɛli, dí dípôlu tɔɔ dísɔnyɔ̂ŋ ma, kpɛ́ni fêi, ya díkula-maa kɛ́i,

³⁶gɛ̀ ní lɛɛ Ɣâla-taa í mɛni, í dísu mɛni lɛɛ. Sɛŋ lɛ́ dîa berei da pɔri ɣéniɛ kɛ̂i la a pere sîi sãai, í tuna tɛ́ɛ é pú ǹɔii ma nyíi í dɛ̀ɛ dípɔɔi.

³⁷“Puru kɛ́tɛ a tòo kpaa sí-sãa paa kɔlɔ-fela a pà ǹɔii su, góto-ŋa kpaa máŋ tonîŋ-ŋa da pà, kpaa máŋ díkpɔara-ƃelai dí kɔ́ pɛ́lɛ dîa, kpaa kɔlɔ-fela sii nyɔ́mɔɔ-ŋa da pà,

³⁸da Ɣâla fɛ̀li kpaa máŋ dí kpera fêi kɛ́, dítɛi-tɛi kélee da gɔ̀lɔŋ dílii su a gɛ́ɛ yâ díkula-maa kɛ̀, da díyee tɛ̀ ɣelêi Ŋ̀âla-pɛrɛ Kɛ́tɛi ŋí naa pere,

³⁹gɛ̀ ní lɛɛ Ɣâla-taa í mɛni, í dísu-mɛni lɛɛ, í dûa kɛ́. Ǹúui kélee dímɛnii su-too dîɛ tɛi-tɛi yɛ̂ɛ berei dítûa-pere káa lai nyíi nɔ́ í núu líi su-mɛni kɔ́lɔŋ, kpɛ́ni fêi, ƃía tɔnɔ nɔ́ ƃé núu-kpune líi su-mɛni kélee kɔ́lɔŋ.

⁴⁰Gɛ́ tí a gɛ́ɛ yao-maa kɛ́ ƃò díkɔlɔi a ɣele kélee díkɛ-ɣeniɛi su ǹɔii ma í dɛ̀ɛ kúnâŋ pɔlɔ-ŋai pɔ́i.

⁴¹“À kɛ̀ ŋɔ̃ya-ŋa nyíi-ŋai díkaa lɔii kôyaa sui da íwála-walai da m̀ɛni-ŋai yâ gɛ̂i duŋ mɛni dí pá a gɛ́ɛ dí Ɣâla ífɛli Ŋ̀âla-pɛrɛ Kɛ́tɛi lá,

⁴²

⁴³ye, lɛɛ ípɔ-taai Ɣâla-taa í mɛni. Í mɛni-ŋai kélee kɛ́ nyíi da vɛ̀li yâi a gɛ́ɛ ŋ̀éniɛi ŋí su-ƃelai kélee dí ílaa kɔ́lɔŋ, dí yao yâ yɛ̂ɛ berei ínûai Eezuɛ-ŋai da gɛ̀ lai, dí gɔ́lɔŋ a gɛ́ɛ bɛ́rɛi ŋí ŋá dɔɔi, ílaa káa ma.

⁴⁴“À kɛ̀ ínûai da lì kɔ̂i díkpɔara-ƃelai pɔ́, tãi kélee nɔ́ ya dí tɛ̀ɛ lai, ǹyaŋ à kɛ̀ da Yâwɛɛ fɛ̀li díŋɛi tínaŋɔɔ daa-lêei naa pere nyíi í zìɣe zui, da Ŋ̀âla-pɛrɛ Kɛ́tɛi ŋí ŋá dɔ̀ɔ ílaa mɛni mai,

⁴⁵gɛ̀ ní lɛɛ ípɔ-taai Ɣâla-taa í dífɛli-wooi mɛni da díkpera fêi-wooi, í nɛ̀ɛ naa dí díkpɔara-ƃelai yée mɛi ɣále.

⁴⁶“Berei máŋ núu kélee sɔŋ ƃa la sɔnyɔ̂ŋ, à kɛ̀ ǹûai ŋí da sɔnyɔ̂ŋ kɛ̀ a yá ílii a ŋwàna dîa, ífaa ma a gɛ́ɛ díkpɔara-ƃelai dí díyee mɛi ɣále, nyii-ŋai da lí a dia luɛ-laa su ŋɔ̃ya lɔii su, kwa kóya ma kpaa máŋ díkɔlɛ ma ǹɔii da su,

⁴⁷ǹyaŋ à kɛ̀ da dílii maa fàleŋ ŋɔ̃ya lɔii su da pâi liî naa a dia luɛ-laa sui, dí dípôlu tɔ̀ɔ dísɔnyɔ̂ŋ ma dí pɛ́lɛ a íkɔ́ɔ ŋɔ̃ya lɔii tí su dîyɛɛi, ‘Kwa sɔnyɔ̂ŋ kɛ́, kwa mɛni nyɔ́mɔɔ kɛ́, kú tùa a ŋwana-lɔɔ-pere.’

⁴⁸Dà tìnaŋ pôlu ípɔ-naa pere a dílii kélee da dímɔ̂leŋ kélee ŋɔ̃ya lɔii su díkpɔara-ƃelai da pâi liî naa a diai, da tìnaŋ ǹɔii ŋí naa-pere í dɛ̀ɛ dínâŋ-ni pɔ́i, dí tínaŋ daa-lêei naa-pere nyíi í zìɣe zui da Ŋ̀âla-pɛrɛ Kɛ́tɛi ŋí ŋá dɔ̀ɔ ílaa mai,

⁴⁹gɛ̀ ní, lɛɛ ípɔ-taai Ɣâla-taa í dífɛli-wooi mɛni da díkpera fêi wooi, í dí malôŋ káa.

⁵⁰Ínûai malôŋ káa, nyii-ŋai sɔnyɔ̂ŋ kɛ̀ a yai, zɔnyɔ̂ŋ-ŋai kélee dí gɛ̀ ílii kɛ́ ŋwànai, ǹyaŋ í tela gɛ́ diai dí sòŋ a luɛi, dí dímalôŋ káa,

⁵¹kpɛ́ni fêi, díkaa a ínûa da ípɔɔ-sɛŋ. Yá díkùla Ize, gɔli séyeŋ suluŋ kpɔlui tí sui.

⁵²“Íŋɛi mu siɣe í ínuai Eezuɛ-ŋai ŋɛ́i malôŋ káa da díkâlo.

⁵³Yá ƃé dísìɣe zu ǹɔii-ŋûŋ-ŋai kélee sáma ŋ̀éniɛi su a gɛ́ɛ díkaa a ípɔɔ-sɛŋ, yɛ̂ɛ berei í mò la íyee mu-nuui Mose sârai a ŋ̀elei. Óo wála-wala kélee Yâwɛɛ, yá ƃé kúnâŋ-ni kùla Ize.”

⁵⁴Saloma kɛ́ɛ a kpɛ̀ɛ Yâwɛɛ fɛlii gɛ́ kpera fêi-ŋa tɛ̀ɛ bɔ́i, è mu sìɣe é tɔ́ɔ ŋ̀âla-teƃelei ŋɛ́i-tuɛ ƃɛ́i ma è kɛ̀ a bîlaŋɔɔ naa ŋ̀úme ŋá a ǹyée veerɛ tɛ́ɛ ɣelêi-perei.

⁵⁵È mu sìɣe é tɔ́ɔ é lûwa too Eezuɛ kpɔŋ kɛ́tɛi ma a ŋ̀óo tɛ́ɛ ɣelêi ǹyɛɛi,

⁵⁶“Laa-ma-tɛ é tɛ́ɛ Yâwɛɛ pɔ́ nyíi a fii tɔɔ tɛ̀ɛ ŋɔnûai Eezuɛ-ŋai pɔ́ yɛ̂ɛ berei è góno tèe lai. Vé tá wɔ́lɔ fɛɣɛ ní a dɔnɔ kpîŋ a gɛ́ɛ é ŋɔkono-têe lɛ́lɛɛ-ŋai ŋ̀aa-see kɛ́ nyíi è gɛ̀ ǹyée mu-nuui Mose sârai.

⁵⁷Yâwɛɛ Kúɣâlai é kɛ́ kúkɔlɛ ma yɛ̂ɛ berei è wɔ́lɔ kɛ̀ la kúnâŋ pɔlɔ-ŋai kɔlɛ mai. É gɛ́ vé tèe kûa kpaa é ǹyée kúla kúmu.

⁵⁸É gɛ́ kúlii é tínaŋ bɔ́-naa pere, a gɛ́ɛ kú sía a ŋɔpere-ŋai da ŋɔtɔ̂ŋ-ŋai da dɔ̂ŋ da kpɛ́ni-ŋai nyii-ŋai è wɔ́lɔ dɛ̀ɛ kúnâŋ pɔlɔ-ŋai pɔ́i.

⁵⁹Ǹyaŋ é gɛ́ ŋ̀óo-ŋai ŋí nyíi ŋá Yâwɛɛ fɛ̀li la ŋ̀ɛi-tuɛi, dí kɛ́ Kúɣâlai Yâwɛɛ kíli ŋá a tãi kélee, ɣele lá ƃóɔɔ da kpíni kélee. É ǹyée mu-nuui da ŋɔnûai Eezuɛ-ŋai malôŋ káa a gɛ́ɛ zɛŋ ǹɛ́lɛɛi dí mɛni ma a ɣele láa ƃóɔɔ tɛi-tɛi kélee, dí zɔlɔ ƃó,

⁶⁰a gɛ́ɛ ŋ̀éniɛi su-ƃelai kélee dí gɔ́lɔŋ Yâwɛɛ káa a Ɣâla ǹyaŋ Ɣâla da kpɛ́ni fé naa.

⁶¹Kɛ́lɛ fɛ̂ɛ káai a ŋɔnûai, ká kálii kélee tɛ́ɛ bɔ́, ká kɛ́ a káteniŋ ƃoɔɔ Kúɣâlai, Yâwɛɛ mì, a gɛ́ɛ ká ŋ̀óo mɛni da ŋɔtɔ̂ŋ-ŋai ká m̀ɛni-ŋai kélee mɛi káa è mò kâai, yɛ̂ɛ berei ká káa sâa gɛ̂i lai.”

⁶²Gâloŋ da Eezuɛ-ƃela kélee dí sâla-ŋa kùla Yâwɛɛ ŋɛ́i-tuɛ.

⁶³Saloma è kɛ-zu-tɔnɔɔ sala-ŋa kùla Yâwɛɛ ma. Niŋa sîrɛ wála buu feerɛ káo feerɛ (22,000), ƃála da ƃoli wála ŋuŋ tɔnɔ pôlu buu feerɛ (120,000). Nya ƃe gâloŋ da Eezuɛ-ƃelai kélee dí Ŋ̀âla-pɛrɛ Kɛ́tɛi tɛ̀ɛ Yâwɛɛ pɔ́.

⁶⁴Ŋ̀ele tɔnɔi tí yée mu, gâloŋ è Ŋ̀âla-pɛrɛ Kɛ́tɛi ŋɔkâlai sámai tɛ̀ɛ Yâwɛɛ pɔ́ nyíi kɛ̀ Ŋ̀âla-pɛrɛ Kɛ́tɛi ŋɛ́i-tuɛi. Naa ƃé è kéreŋ sala-ŋa, mii-sãa sala da zua wulɔi nyíi è gùla a kɛ-zu-tɔnɔɔ sala sãai kùla naa a sâla, kpɛ́ni fêi, m̀ara ɣala-teƃelei nyíi kɛ̀ Yâwɛɛ ŋɛ́i-tuɛi è kɛ̀ a guro-teɛɛ géreŋ sala sãai kélee soŋ mɛni ma.

⁶⁵Eezuɛ-ƃelai kélee dí gúui tí kùla a m̀aa ɣelei tí. Kpɔŋ su kɛ́tɛ ká kɛ̀ tí. Ǹûai dí kùla Leƃo-Ama ǹɔii ŋûa-pere é tóo máŋ Ize lɔii ŋɔkoyaŋ-pere ma ǹɔii kwára-pere. Dí ŋ̀ele kûu kɛ́tɛ-ŋai ŋí kùla Yâwɛɛ Kúɣâlai ŋɛ́i-tuɛ a ɣele lɔ́ɔlu puu káo náaŋ.

⁶⁶Bôlu ma ɣelei è ǹûai kélee tɛ̀ɛ pôlu dípɔ-taai. Dí lûwa tòo gâloŋ mâ. Gɛ̀ ní dí nâa lì dípɔ-taai. Ǹûai dí lii-nɛ̃ɛ kùla a zu kɛ́tɛ mɛni lɛ́lɛɛ-ŋai kélee mɛni ma nyíi Yâwɛɛ è gɛ̀ ǹyée mu-nuui Deeƃé mɛni ma da ŋɔnûai Eezuɛ-ŋai.