Read Kpelle Kâloŋ-ŋa Veerɛi 1 Bible Online

Kâloŋ-ŋa Veerɛi 1 - Kpelle bible

Kâloŋ-ŋa Veerɛi 1

¹Gâloŋ Eɣa saá pôlu ma, Môa lɔii è tɔ̀ɔ Eezuɛ lɔii ma.

²Maa tãi tí su gâloŋ Aɣazia è kùla ŋɔkâloŋ-pɛrɛ kɛ́tɛi ŋ̀elei-pere loŋpoi su é tóo é mɛni ŋánaa kɛ́ la kpɔ́ a zu kɛ́tɛ Sameria. Nya ƃe è kéla-ŋa tɛ̀ɛ, ǹyɛɛ dîai, “Ka lí ká Ɛkulɔŋ ŋɔɣâlai Baaseƃɔ marê kɛ́, à kɛ̀ mɛni ŋánaai ŋí ŋ́gɛ̀i ŋa pâi ƃâloi.”

³Kɛ́lɛ Yâwɛɛ ŋɔkélai è mò Tɛsiba-nuui Ilaza ma ǹyɛɛi, “Lí ká kóyaŋ ka Sameria kaloŋ ŋɔworɛ̂-woo ƃó-ƃelai, í dí marê kɛ́, ‘Gáa kákili-ŋa a gɛɛ Ɣâla fé Eezuɛ lɔii su, nya ƃe kákaa liî la a gɛɛ ká Ɛkulɔŋ lɔii ŋɔɣâlai Baaseƃɔ marê kɛ́ lai?’

⁴Maa mɛni ma, mɛnii ká ŋí Yâwɛɛ a m̀ôi: Ífe pâi kulâi gbìŋ ŋá íkaa laani ŋái. Ƃa pâi saa títi ƃôi!” Nya ƃe Ilaza è kùla naa é lí.

⁵Tãi ŋ̀orɛ̂-woo ƃó-ƃelai dí pène la pôlu gâloŋ pɔ́ naai, è dímarê kɛ̀ ǹyɛɛi, “Lé ƃé kɛ̀ nyaa kà pá pôlui?”

⁶Dí zu tòo, “Nalôŋ da è pà kwa dîa-ni kú kòyaŋ. Nya ƃe mò kûa, ka pene pôlu gâloŋ pɔ́ naa nyii ká tɛ̀ɛi, ká mó mà, ‘Mɛnii ká ŋí Yâwɛɛ a môi, Gáa a sɛŋ Ɣâla fé Eezuɛ nyaa ƃé íkaa kpakolo-ŋa tɛɛ̂i la a gɛɛ dí Ɛkulɔŋ ŋɔɣâlai, Baaseƃɔɔ marê kɛ́ lai? Maa mɛni ma, ífe pâi kulâi gbìŋ ŋá íkaa lâai nai. Ƃa pâi sa títi ƃôi!’ ”

⁷Gâloŋ è dí marê kɛ̀, “Kpakolo kɛ́ɛ léŋ ƃé ka dîa-ni ká kòyaŋ nyii mɛni-ŋai ŋí ƃò kâai?”

⁸Dí zu tòo dîyɛɛi, “È kɛ̀ a kpakolo kɔlɔ-leɣa kuláa, sua-kɔlɔ bɛti kɛ́ ƃò ǹeŋei.” Gâloŋ è mò ǹyɛɛi, “Tɛsiba-nuui Ilaza ká kɛ̀ tí.”

⁹Nya ƃe gâloŋ è kɔ-kuluƃa-ŋa láa-tuɛ-nuu tɔnɔ tɛ̀ɛ nyii kɔ-kuluƃa buu lɔ́ɔlu dí kɛ̀ ǹyée mui. Gɔ-kuluƃa-ŋai mɛi-nuui da ǹyée mu-ƃelai dí lì Ilaza pɔ́ naa nyii kɛ̀ see-ni yée tɔnɔ tôŋ su ǹyɛɛ mai, “Ɣâla-naloŋ, gâloŋ ǹyɛɛi, ‘Pá í yéŋ ǹyéei kwára!’ ”

¹⁰Ilaza è gɔ-kuluƃa-ŋai mɛi-nuui wóo su tòo ǹyɛɛ mai, “À kɛ̀ ŋ́gaa a Ɣâla-naloŋ, ŋɔŋ é kúla Ɣâla-taa é tóo yâ ka í kɔ-kuluƃa buu lɔ́ɔlui é ká kéreŋ.” Nya ƃe ŋɔŋ è kùla Ɣâla-taa, é tóo gɔ-kuluƃa-ŋai mɛi-nuui ma da ŋɔkpakolo-ŋai é dí kéreŋ.

¹¹Tãi nyíŋi è kɛ̀ lai gâloŋ è ŋɔ́nɔ kɔ-kuluƃa-ŋa mɛi-nuu tɔnɔ da ǹyée mu-ƃela buu lɔ́ɔlu tɛ̀ɛ Ilaza pɔ́ naa. Gɔ-kuluƃa mɛi-nuui è mò Ilaza ma ǹyɛɛi, “Ɣâla-naloŋ, mɛnii ká ŋí gâloŋ a m̀ôi, ‘Yeŋ ǹyéei kwára kpɔ́ nɔ́ ŋí!’ ”

¹²Ilaza è zu tòo, “À kɛ̀ ŋ́gaa a Ɣâla-naloŋ, ŋɔŋ é kúla Ɣâla-taa é tóo yâ ka í kpakolo-ŋai é kákereŋ!” Nya ƃe ŋɔŋ è kùla Ɣâla-taa é tóo gɔkuluƃa-ŋai mɛi-nuui ma da ŋɔkpakolo-ŋai é díkereŋ.

¹³Nya ƃe gâloŋ è gɔ-kuluƃa-ŋai mɛi-nuui zaaƃa ɣelei tɛ̀ɛ da ǹyée mu kɔ-kuluƃa-ŋa buu lɔ́ɔlui. Gɔ-kuluƃa-ŋai mɛi-nuui è tɛ̀ ǹyéei ma, é pîlaŋ ŋ̀úme ŋá Ilaza kɔ́ɔ mu. È Ilaza kperai fè ǹyɛɛ mai, “Ɣâla-naloŋ, kpera yɛ̂, málôŋ káa kwa ŋá kpakolo-ŋai, kúai a íyee mu-ƃelai!

¹⁴Ƃɛ́ káa, ŋɔŋ è kùla ŋ̀elei su Ɣâla-taa é gɔ-kuluƃa-ŋai mɛi-ƃela feerɛi kéreŋ da dí kɔ-kuluƃa-ŋai kélee. Kɛ́lɛ kú malôŋ káa í kúfulu-laai lɛ́ɛ kúyêei!”

¹⁵Yâwɛɛ ŋɔɣâla-taa kelai è mò Ilaza ma ǹyɛɛi, “Ka ǹyaa ka yeŋ ǹyéei kwára. Ífe yào ma.” Nya ƃe Ilaza è mù sìɣe da ǹyaa dí yèŋ, dí lí gâloŋ pɔ́ naa.

¹⁶È mò gâloŋ ma ǹyɛɛi, “Mɛnii ká ŋí Yâwɛɛ a m̀ôi. Gáa a sɛŋ Ɣâla fé Eezuɛ a gɛɛ í m̀arɛ̂ kɛ́ é pîlaŋ m̀ɛni ŋánaai ma í kɛ̂i à kɛ̀ ƃa pâi ƃâloi, nya ƃe íkaa worɛ̂-woo ƃó-ƃela tɛɛ̂i la a gɛɛ dí Ɛkulɔŋ ŋɔɣâlai Baaseƃɔ marê kɛ́ lai? Maa mɛni ma, ífe pâi kulâi gbìŋ ŋá íkaa lâai ŋai. Ƃa pâi saa títi ƃôi!”

¹⁷Nya ƃe Aɣazia è sàa nɔ́ yɛ̂ɛ berei Yâwɛɛ è mò la Ilaza ma a gɛɛ é mói. Aɣazia fé lóŋ-surɔŋ maa sɔlɔ ƃó ní. Nya ƃe ǹêɣe surɔŋ Zoraŋ è lɛ̀ɛ bɔ́ɔ ŋá a kâloŋ a Zɛosafa ǹóŋ Zɛoraŋ ŋɔkâloŋ-laa koraŋ veerɛi Zuda lɔii mɛi.

¹⁸Aɣazia ŋɔkâloŋ-laai su mɛnii da mɛnii kpéli-ŋai kélee è gɛ̀i, bɔ̃yɛi Eezuɛ kaloŋ-ŋai dí mɛni pɔ̂lɔ kɔlɔ-ŋai su.