Read Kpelle Kâloŋ-ŋa Veerɛi 11 Bible Online

Kâloŋ-ŋa Veerɛi 11 - Kpelle bible

Kâloŋ-ŋa Veerɛi 11

¹Tãi kpɔ́ nɔ́ Gâloŋ Aɣazia ǹee Atalia è mɛ̀ni la a gɛɛ daâ ǹóŋ páai, è gâloŋ ŋɔkáayɔɔ-ŋai kélee pàa dí ta fa lâa lɛɛ la bɔ́ɔ ŋá a kâloŋ.

²Kɛ́lɛ Zɛosiba è Aɣazia ǹóŋ surɔŋ gbɛɛ ŋái Zoasi kùla maraâi sáma tãi dí kɛ̀ pâi baâi lai. È ǹoo a gɛɛ é nɛ̂wo maa kɔ̃ɔ. Zɛosiba ŋí è kɛ̀ a Gâloŋ Zɛoraŋ ǹóŋ-nɛni, gɛ́ ƃò máŋ a Gâloŋ Aɣazia zaaƃɔlɔ. Nɛnîi ŋí è m̀aleŋ lòo da ǹúui kɛ̀ mɛi-kaai. È dí lòo ŋâla-pɛrɛ kɛ́tɛi ŋɔnúu-laa loŋpoi da su a gɛɛ Atalia fé baa.

³Zoasi da mɛi-kaa-nuui dí lɛ́ɛ a dí loɔ́ɔ ŋâla-pɛrɛ kɛ́tɛi mu a kóraŋ lɔ́ɔlu mɛi da yée mu tãi. Atalia è kɛ̀ la nɛnî-kaloŋ Zuda lɔii mɛi.

⁴Góraŋ ǹɔ́ɔlu mɛi feerɛ ɣelei su, zâla láa-soŋ-nuui Zɛoida è gâloŋ kpono ma kɔ-kuluƃa-ŋai mɛi-ƃelai worɛ̂ tɛ̀ɛ da gâloŋ-pɛrɛ kɛ́tɛi mɛi-kaa kɔ-kuluƃa-ŋai mɛi-ƃelai. Da dîa-ni dí kòyaŋ ŋâla-pɛrɛ kɛ́tɛi lá. È gɛ̀ díkono tée dífoo a gɛɛ da pâi fâai mɛnii ma a m̀ôi dîai. Nya ƃe è Gâloŋ Aɣazia ǹóŋ Zoasi kùla ǹoôi é pá la dípɔ.

⁵È mò dîa ǹyɛɛi, “Mɛnii ká ŋí ŋa ŋ̀wɛ̂lii ká gɛi. Kánuu-kpulu saƃaai pâi sâa kɛ̂i tíi kɛ̂i a vii-tɔɔ ɣelei, ŋa ŋ̀wɛ̂lii a gɛɛ gbulu tɔ̂nɔ é kɛ́ gâloŋ-pɛrɛ kɛ́tɛi mɛi kâai.

⁶Ǹúu kpului veerɛ ɣelei é kɛ́ Suu galai lá. Gbului zaaƃa ɣelei é kɛ́ gâloŋ-pɛrɛ kɛ́tɛi ŋɔgalai lá gɛ́ naa mɛi kâa. Diai tí ƃé pâi lɛɛ̂i gâloŋ-pɛrɛ kɛ́tɛi mɛi káa kɔ-kuluƃ-ŋai pɔ́ɔ ŋá.

⁷Dí núu-kpului feerɛi kpéli dífe pâi kɛ̂i tíi ma a Vii-tɔɔ-ɣelei. Kɛ́lɛ ŋa dí feerɛ wɛ̂lii dí lɛ́ɛ ƃɛ́ ŋâla-pɛrɛ kɛ́tɛi lá díkɛ Gâloŋ Zoasi mɛi kâa.

⁸Fɛ̂ɛ í mó dîa a gɛɛ díkɛ bôlu dí tínaŋɔɔ ma ƃɛ́i kélee a lî naai ǹyaŋ díkɛ a díkpîŋ kpɛtɛɛ a dí ƃóa-sɔkpɔ-ŋai a gɛɛ da pɔ̂ri ǹúui nyii kélee paâi nyii pâi lɛɛ̂i gbono mai.”

⁹Gɔ-kuluƃa-ŋai mɛi-ƃelai dí mɛnii kélee kɛ̀ yɛ̂ɛ berei Zɛoiada è mò la dîai. Dí tɛi-tɛi kélee dí dínuu-kpulu-ŋai tòli, diai kɛ̀ pâi tíi kɛ̂i da diai kɛ̀ kulâi tíi kɛ̂i.

¹⁰Zɛoiada è pà a Gâloŋ Deeƃé ŋɔkɔ́-kɔ ƃoa-sɔkpɔ-ŋai da ŋɔkɔ́-kɔ-kɔli-kalaŋ-ŋai dí maa-kɔ̃ɔ mɛni ma é dɛɛ dípɔ nyii-ŋai kɛ̀ laai kɛ̂-pere su ŋ̀âla-pɛrɛ kɛ́tɛi mui.

¹¹Gɔ́-kuluƃa-ŋai mɛi-ƃelai dí gɔ́-kɔ-sãai sìɣe dí dɛ́ɛ díyee-mu-ƃelai pɔ́. Gɔ́-kuluƃa-ŋai dí tìnaŋ ŋâla-pɛrɛ kɛ́tɛi ma da ŋ̀âla-teƃelei dí ǹyée tóo gîei díkɛ gâloŋ ninai Zoasi maa kpɛ̂ m̀éla kélee ma.

¹²Zɛoiada è pà a gâloŋ ǹóŋ Zoasi banaŋ ma é gâloŋ ƃɔrɔi sée ŋ̀ûa. È Ɣâla ŋɔtɔ̂ŋ kɔlɔi tɛ̀ɛ bɔ́ é wúlɔ pú ŋ̀ûa nyii nɛ̀ a gɛɛ gáa nâa a ǹɔii ŋɔkâloŋ ninai. Gbɔŋ su-ƃelai dí díyee ŋá lòkpa díkɛ làɣi a ɣelêi-pere dîyɛɛi, “Gâloŋ lɛ̂wo lâai é kôya.”

¹³Nɛnî-kaloŋ Atalia è gbɔŋ wóo mɛ̀ni. Nya ƃe è lì ŋâla-pɛrɛ kɛ́tɛi lá.

¹⁴Tãi è sèri la naai, è Zoasi kàa tɔɔ-ni ŋâla-pɛrɛ kɛ́tɛi yée mu nɔɔi dɔnɔ kɔlɛ. Ǹɔii mɛi kaloŋ kɛ́tɛi tɔɔ̂i ká tí wɔ́lɔ a bɔlɔ. Gɔ-kuluƃa-ŋai, ŋule-too-ƃelai da dúru fɛ́ɛ-ƃelai díkɛ ƃò tɔɔ-ni gɔlɛ. Dúru fɛ́ɛ-ƃelai dí kɛ̀ dúrui fɛ̂ɛi ǹûai díkɛ pêle kɛ̀ a zu kɛ́tɛ. Atalia líi è wàna a zu kɛ́tɛ é maa sêɣe-ŋai fála-fala, é láɣi a ɣelêi-pere ǹyɛɛi, “Tɔɔ-maa ká ŋí! Tɔɔ-maa ká ŋí!”

¹⁵Zâla láa soŋ-nuui Zɛoiada fé kɛ́ ní ŋ̀wɛ̂lii a gɛɛ dí nɛnî-kaloŋ Atalia paa ŋâla-pɛrɛ kɛ́tɛi mu. Nya ƃe è mò gɔ-kuluƃa-ŋai mɛi-ƃelai dîa ŋáa ma ǹyɛɛi, “Ka zòŋ ká kúla la Yâwɛɛ ŋɔ-pɛrɛ kɛ́tɛi mu. Káfe bàa ƃɛ́. Ǹúui kélee pâi kɔ̂i a gɛɛ é m̀aa kɔ̃ɔi, ka bàa!”

¹⁶Nya ƃe gɔ-kuluƃa-ŋai mɛi-ƃelai dí kùla la gâloŋ-pɛrɛ kɛ́tɛi ŋɔgalai lá-pere ƃɛ́i da kâa tɛ̀ɛ naa a zoo-ŋai díkɛ lɔ̀ a dia bɛ́rɛi tí mui. Naa ƃé dí bàa naa.

¹⁷Zâla láa-soŋ-nuui Zɛoiada è Gâloŋ Zoasi da ǹûai marê kɛ̀ a gɛɛ dí Kpanaŋ-woo kɛ́ da Yâwɛɛ-ni dí loai a gɛɛ da pâi kɛ̂i a Yâwɛɛ ŋɔnûa, dí tela gɛ́ díkîe-ni loai.

¹⁸È kɛ̀ tí, gbɔŋ kélee è lì Bêe ɣala-pɔkɔŋ ŋɔpɛ́rɛi lá dí ŋólo dí bú ǹɔii ma. Ǹûai dí ŋâla-teƃele-ŋai wôlo, dí dífũa-fua. Dí Bêe Ɣalai ŋɔsâla láa-soŋ-nuui Mataŋ pàa naa ŋ̀âla-teƃelei ŋɛ́i-tuɛ. Zâla láa-soŋ-nuui Zɛoiada è gɛ̀ gɔ-kuluƃa-ŋai dí tínaŋɔɔ Yâwɛɛ ŋɔpɛ́rɛ kɛ́tɛi ma.

¹⁹È gɔ-kuluƃa-ŋai túɛ-ƃelai tòli díkîe ma, gâloŋ mɛi-kaa kɔ-kuluƃa-ŋai túɛ-ƃelai da ǹɔii-ƃela kpaya-kpayai kélee. Dí tɔ̀ɔ Gâloŋ Zoasi ma dí kúla la ŋâla-pɛrɛ kɛ́tɛi mu dí tɛ́ɛ la gâloŋ-pɛrɛ kɛ́tɛi mɛi-kaa kɔ-kuluƃa-ŋai dí galai lá dí lɔ́ la gâloŋ-pɛrɛ kɛ́tɛi mu. È sèe gâloŋ see-sɛŋ ŋá. È nâa kɛ̀ a kâloŋ Zuda lɔii mɛi.

²⁰Ǹûai kélee dí pêle kɛ́tɛ kɛ̀ díkɛ lii-nɛ̃ɛ kùla kpɛ́ni fêi, dí gâloŋ-nɛnii Atalia pàa gâloŋ-pɛrɛ kɛ́tɛi la. Zerusâlɛŋ è kɛ̀ ŋɔ́nɔ pôlu lii-see su.

²¹Zoasi è kɛ̀ nɔ́ a kóraŋ lɔ́ɔlu mɛi feerɛ tãi dí gɛ̀ la a kâloŋ.