Read Kpelle Kâloŋ-ŋa Veerɛi 15 Bible Online

Kâloŋ-ŋa Veerɛi 15 - Kpelle bible

Kâloŋ-ŋa Veerɛi 15

¹Tãi Eezuɛ kaloŋ Zɛroboaŋ è kɛ̀ la ŋɔkâloŋ-laa su a koraŋ buu feerɛ káo lɔ́ɔlui, dí Azaria kɛ̀ a Kâloŋ Zuda. Amazia ŋí ǹâŋ láa ƃé kɛ̀ a Amazia.

²Azaria è kɛ̀ a kóraŋ puu káo lɔ́ɔlu mɛi da tãi dí gɛ̀ la a kâloŋ ǹyaŋ è kɛ̀ gâloŋ-laai su a kóraŋ buu lɔ́ɔlu káo feerɛ. Zeɛ́ɛ è kɛ̀ Zerusâlɛŋ. Ǹee láa ƃé kɛ̀ a Zɛkolia. Zɛkolia pɔ́-taai ƃé kɛ̀ a Zerusâlɛŋ.

³Azaria è mɛni lɛ́lɛɛ kɛ̀ Yâwɛɛ ŋɛ́i kpɔ́ nɔ́ yɛ̂ɛ berei ǹâŋ Amazia è wɔ́lɔ gɛ̀ lai.

⁴É máŋ kɛ́ tí, vé ǹûai díɣâla-pɔkɔŋ fɛli kwaa-ŋai ma su kara ní. Ǹûai dí kɛ̀ kpɔ́ nɔ́ nîi sâla-ŋa kulâi naa díkɛ kéreŋ-sɛŋ kúŋ nɛ̃ɛ kèreŋ naa.

⁵Yâwɛɛ è gɛ̀ kpono-ma kɔlɔ-fela nyɔ́mɔɔ é Gâloŋ Azaria soŋ. Gɔlɔ-felai ŋí è lɛɛ ma é lɛ́ɛ la zu é sáa. Gɔlɔ-felai è gɛ̀ vé kɛ́ ní gâloŋ-pɛrɛ kɛ́tɛi mu kɛ́lɛ è kɛ̀ pɛ́rɛ da kpɛ́ni mu ǹyaa tɔ̂nɔ. Azaria ǹóŋ Zotaŋ ƃé kɛ̀ gâloŋ-pɛrɛ kɛ́tɛi mɛi kâai da diai kɛ̀ tíi kɛ̂i naai, é pɛ́lɛ ǹɔii su-ƃelai kélee dîa a tãi ǹâŋ è kɛ̀ kɔ̂lɛi lai.

⁶Mɛni da kpɛ́ni-ŋai kélee Azaria è gɛ̀ tãi è kɛ̀ la a kâloŋ, gélee pɔ̃yɛ̂i Zuda kaloŋ-ŋai dímɛni pɔ̂lɔ kɔlɔi su.

⁷Gâloŋ Azaria è sàa é lí ǹâŋ pɔlɔi-ŋai pɔ́. Dí nòo dí kɔlɛ Gâloŋ Deeƃé ŋɔtaai su. Naa pôlu ma dí ǹóŋ Zotaŋ kɛ̀ a kâloŋ bɔ́ɔ ŋá.

⁸Tãi Zuda kaloŋ Azaria è kɛ̀ la ŋɔkâloŋ-laai su a kóraŋ lɔ́ɔlui, dí Zɛrɛrâya kɛ̀ a kâloŋ Eezuɛ. Zɛkɛraya ŋí ǹâŋ láa ƃɛ́ kɛ̀ a Zɛroboaŋ. È kɛ̀ a kâloŋ Eezuɛ lɔii mɛi a ɣáloŋ lɔ́ɔlu mɛi da. Zeeɛ́ɛ è kɛ̀ Sameria.

⁹Zɛkɛraya è sɔnyɔ̂ŋ kɛ̀ Yâwɛɛ ŋɛ́i kpɔ́ nɔ́ yɛ̂ɛ berei ǹâŋ pɔlɔ-ŋai dí wɔ́lɔ gɛ̀ lai. Vé bôlu tɔ̀ɔ ní zɔnyɔ̂ŋ-ŋai dîa Neba ǹóŋ Zɛroboaŋ è wɔ́lɔ dí kɛ̀i, nyii Eezuɛ-ŋai dí wɔ́lɔ pìlaŋ gɔ́ɔ pɔ̂ɔi díkɛ gɛ̀i.

¹⁰Zabɛi ǹóŋ Sɛluŋ è wɔ́lɔ tɔ̀ɔ Zɛkɛraya ma. È pɛ̀lɛ ma a ǹûai ŋɛ́i panaŋ ma é bàa. Naa pôlu ma, è gbîŋ kɛ̀ a kâloŋ bɔ́ɔ ŋá.

¹¹Mɛni da kpɛ́ni-ŋai Zɛrɛrâya è gɛ̀ tãi è kɛ̀ la gâloŋ-laai sui, gélee pɔ̃yɛ̂i Eezuɛ kaloŋ-ŋai dí mɛni pɔ̂lɔ kɔlɔi su.

¹²M̀ɛnii Yâwɛɛ è wɔ́lɔ mò Zewu mai, ŋaa-see è kɛ̀, ǹyɛɛi, “Ílônii sinaai zeêi ǹáaŋ da pâi kɛ̂i a kâloŋ-ŋa Eezuɛ lɔii mɛi íkâloŋ-laai pôlu ma.”

¹³Tãi Zuda kaloŋ Uzia è kɛ̀ la ŋɔkâloŋ-laai su a kóraŋ buu saaƃa káo lɔ́ɔlu mɛi náaŋ, Sɛluŋ è gbîŋ kɛ̀ a kâloŋ Eezuɛ. Sɛluŋ ŋí ǹâŋ láa ƃɛ́ kɛ̀ a Zɛbɛi. È kɛ̀ a kâloŋ Eezuɛ lɔii mɛi a ɣáloŋ tɔnɔ. Zeeɛ́ɛ è kɛ̀ Sameria.

¹⁴Gɛ́ɛ tí, Gadi ǹóŋ Minaŋɛŋ è kùla Taza é lí Sameria. È pɛ̀lɛ Zɛbɛi ǹóŋ Sɛluŋ ma Sameria taa-leei su. È bàa é gbîŋ kɛ́ a kâloŋ bɔ́ɔ ŋá.

¹⁵Mɛni da kpɛ́ni-ŋai Sɛluŋ è dí kɛ̀ tãi è la a kâloŋ da ŋɔtɔɔ-ma mɛnii è gɛ̀i, gélee pɔ̃yɛ̂i Eezuɛ kaloŋ-ŋai dí mɛni pɔ̂lɔ kɔlɔi su.

¹⁶Ma tãi tí su, Minaŋɛŋ è ŋɔsiai sîɣe é kúla Tafisa daai é lí é kɔ́ pɛ́lɛ Tapua taai ma da diai kélee kɛ̀ naa kɔlɛ ma kpiniŋ tí sui, kpɛ́ni fêi, dífe fáa ní kɛ̀ ma a gɛɛ dí dígala-ŋai lá ƃó berei. È Tapua taai su kàra-kara é nàa-ƃela kélee páa, é goo-nɛni-ŋai kélee koi láa ƃó a ŋɔƃóa-sɔ̂kpɔi.

¹⁷Tãi Zuda kaloŋ Azaria è kɛ̀ la ŋɔkâloŋ-laai su a kóraŋ buu saaƃa káo lɔ́ɔlu mɛi náaŋ, Minaŋɛŋ è gbîŋ kɛ̀ a kâloŋ Eezuɛ. Minaŋɛŋ ŋí ǹâŋ láa ƃɛ́ kɛ̀ a Gadi. È kɛ̀ a kâloŋ Eezuɛ lɔii mɛi a ɣáloŋ tɔnɔ. Zeeɛ́ɛ è kɛ̀ Sameria.

¹⁸È sɔnyɔ̂ŋ kɛ̀ Yâwɛɛ ŋɛ́i. Tãi è kɛ̀ la gâloŋ-laai sui, è pìlaŋ Neba ǹóŋ Zɛroboaŋ kɔ́ɔ pɔ̀ɔ su a zɔnyɔ̂ŋ-ŋai kɛ́ɛ nyii Eezuɛ-ŋai dí pîlaŋ gɔ́ɔ pɔ̂ɔi dí kɛ́ gɛ̀i.

¹⁹Tãi Minaŋɛŋ è kɛ̀ la ŋɔkâloŋ-laai sui, Asiria kaloŋ Tigila Pileza è kɔ́ pɛ̀lɛ Eezuɛ lɔii ma. È fàa ma é kpɔŋ-maa tɛɛ Minaŋɛŋ pɔ́ naa a gɛɛ é tûa ŋɔkâloŋ-laai su, à kɛ̀ Minaŋɛŋ a fàa ma é sɛŋ kâo kole kpua-kpua ŋɔpãŋ wála buu lɔ́ɔlu mɛi feerɛ káo lɔ́ɔlu mɛi da (76,000) tɛɛ bɔ́.

²⁰Minaŋɛŋ è zɛŋ kâoi ŋí kélee kùla Eezuɛ lɔii su. È ŋ̀óo tɛ̀ɛ Eezuɛ lɔii su gwaa kélee a gɛɛ dɔɔ-ƃelai kélee dí sɛŋ kâo kole kpua-kpua buu lɔ́ɔlu tɛ́ɛ é bú gîe ma, é dɛ́ɛ Asiria kaloŋ pɔ́. Tãi dɔɔ-ƃelai dí zɛŋ kâoi ŋí tɛ̀ɛ lai, Minaŋɛŋ è gélee pù gîe ma é dɛ́ɛ. Naa pôlu ma, Gâloŋ Tigila Pileza è ŋɔkɔ-kuluƃa-ŋai sìɣe dí kúla Eezuɛ lɔii su.

²¹Mɛni da kpɛ́ni-ŋai kélee Minaŋɛŋ è gɛ̀ tãi è kɛ̀ la a kâloŋ, gélee pɔ̃yɛ̂i Eezuɛ kaloŋ-ŋai dí mɛni pɔ̂lɔ kɔlɔi su.

²²Minaŋɛŋ è sàa é lí ǹâŋ pɔlɔ-ŋai pɔ́. Dí ǹóŋ Pikaia kɛ̀ a kâloŋ bɔ́ɔ ŋá.

²³Tãi Zuda kaloŋ Azaria è kɛ̀ la ŋɔkâloŋ-laai su a kóraŋ buu lɔ́ɔlui, dí Pikaia kɛ̀ a kâloŋ Eezuɛ. Pikaia ŋí ǹâŋ láa ƃɛ́ kɛ̀ a Minaŋɛŋ. È kɛ̀ a kâloŋ Eezuɛ lɔii mɛi a ɣáloŋ tɔnɔ. Zeeɛ́ɛ è kɛ̀ Sameria.

²⁴Pikaia è Yâwɛɛ wóo pìli. Vé bôlu tɔ̀ɔ ní zɔnyɔ̂ŋ-ŋai dîa nyii Neba ǹóŋ Zɛroboaŋ è gɛ̀i nyii Eezuɛ-ŋai dí pìlaŋ gɔ́ɔ pɔ̂ɔi dí kɛ́ gɛ̀i.

²⁵Limalia ǹóŋ Pika ƃé kɛ̀ a gâloŋ Pikaia ŋɔkɔ-kuluƃa-ŋai mɛi-nuu kɛ́tɛi. Kɛ́lɛ è gbɛ̀tɛ gíli ŋá a gɛɛ é gâloŋ páa. È Gilia kɔ-kuluƃa-ŋai buu lɔ́ɔlu sìɣe é lí a dia Sameria. Dí pɛ̀lɛ Gâloŋ Pikaia ma dí bàa da Aago é pɛ́lɛ Arie ma gâloŋ-pɛrɛ kɛ́tɛi mu. Pika è gâloŋ Pikaia pàa é gbîŋ kɛ́ a kâloŋ bɔ́ɔ ŋá.

²⁶Mɛni da kpɛ́ni-ŋai kélee Pikaia è gɛ̀ tãi è kɛ̀ la a kâloŋ, gélee pɔ̃yɛ̂i Eezuɛ kaloŋ-ŋai dí mɛni pɔ̂lɔ kɔlɔi su.

²⁷Tãi Zuda kaloŋ Azaria è kɛ̀ la ŋɔkâloŋ-laai su a kóraŋ buu feerɛi, Pika è gbîŋ kɛ̀ a kâloŋ Eezuɛ. Pika ŋí ǹâŋ láa ƃɛ́ kɛ̀ a Limalia. È kɛ̀ a kâloŋ Eezuɛ lɔii mɛi a ɣáloŋ tɔnɔ. Zeeɛ́ɛ è kɛ̀ Sameria.

²⁸È Yâwɛɛ wóo pìli. È mɛni nyɔ́mɔɔ kɛ̀ kpɔ́ nɔ́ yɛ̂ɛ Neba ǹóŋ gâloŋ Zɛroboaŋ nyii Eezuɛ-ŋai dí pìlaŋ gɔ́ɔ pɔ̂ɔi dí kɛ́ gɛ̀i.

²⁹Tãi Pika è kɛ̀ la a kâloŋ Eezuɛ lɔii mɛi, Asiria kaloŋ Tigila Pileza è pà é kɔ́ pɛ́lɛ ma, é daa-ŋai ŋí síɣe, Izɔŋ, Ebɛ-Bɛmaaka, Zanôa, Kedɛ da Azɔ. È ǹɔii kpîniŋ-ŋai ŋí sìɣe máŋ, Gilia, Galalii da Nɛfɛtɛli. È Eezuɛ-ƃelai kùla gwaa-ŋai tí ma é lí a dia a kɔ-soŋ-ŋa.

³⁰Zuda kaloŋ Zotaŋ ŋɔkâloŋ-laa koraŋ buu feerɛi su, Ila ǹóŋ Osia è gbɛ̀tɛ gíli-ŋa a gɛɛ é tɔ́ɔ Lemalia Pika ma. È pɛ̀lɛ ma é báa. Naa pôlu ma, Zotaŋ ǹóŋ Osia è gbîŋ kɛ̀ a kâloŋ Eezuɛ lɔii mɛi.

³¹M̀ɛni da kpɛ́ni-ŋai kélee Pika è gɛ̀ tãi è kɛ̀ la a kâloŋ, gélee pɔ̃yɛ̂i Eezuɛ kaloŋ-ŋai dí mɛni pɔ̂lɔ kɔlɔi su.

³²Tãi Eezuɛ kaloŋ Pika è kɛ̀ la ŋɔkâloŋ-laai su a kóraŋ buu feerɛ káo lɔ́ɔlui, dí Zotaŋ kɛ̀ a kâloŋ Zuda. Zotaŋ ŋí ǹâŋ láa ƃɛ́ kɛ̀ a Uzia.

³³Zotaŋ è kɛ̀ a kóraŋ buu feerɛ káo lɔ́ɔlu tãi dí gɛ̀ la a Zuda kaloŋ. Zeɛ́ɛ è kɛ̀ Zerusâlɛŋ. È kɛ̀ gâloŋ-laai su a kóraŋ puu káo lɔ́ɔlu mɛi da. Ǹee láa ƃé kà a Zerusa, Zadɔ ǹóŋ-nɛnii.

³⁴Zotaŋ è pìlaŋ ǹâŋ Uzia kɔ́ɔ pɔ̀ɔ su a Yâwɛɛ wóo mɛniɛɛ.

³⁵É máŋ kɛ́ tí, vé ǹûai díɣâla-pɔkɔɔŋ fɛli kwaa-ŋai ma su kaa ní. Ǹûai díkɛ̀ nɔ́ sâla-ŋa kulâi díkɛ kéreŋ-sãa kúŋ-nɛ̃ɛ-ŋa kèreŋ naa. Gâloŋ Zotaŋ ƃé ŋâla-pɛrɛ kɛ́tɛi ŋɔgalai lá kpoŋ kpɛ̂tɛ a nina nyii kɛ̀ Yá-ŋua-perei.

³⁶Mɛni da kpɛ́ni-ŋai kélee Zotaŋ è gɛ̀ tãi è kɛ̀ la a kâloŋ, gélee pɔ̃yɛ̂i Zuda kaloŋ-ŋai dímɛni pɔlɔ kɔlɔi su.

³⁷Ŋ̀ele-ŋai tí su, Yâwɛɛ è pɛ̀lɛ Siria Kaloŋ Leziŋ da Eezuɛ kaloŋ, Lemalia ǹóŋ Pika tɛɛ̂i a gɛɛ dí kɔ́ pɛ́lɛ Zuda lɔii ma.

³⁸Zotaŋ è sàa dí nòo ǹâŋ pɔlɔ-ŋai kɔlɛ Zerusâlɛŋ taa-leei su. Dí ǹóŋ Eɣa kɛ̀ a kâloŋ bɔ́ɔ ŋá.