Read Kpelle Kâloŋ-ŋa Veerɛi 24 Bible Online

Kâloŋ-ŋa Veerɛi 24 - Kpelle bible

Kâloŋ-ŋa Veerɛi 24

¹Tãi Zɛoakiŋ è kɛ̀ la a kâloŋ Zuda lɔii mɛi, ma tãi tí ƃé Babelɔŋ kaloŋ Nɛbukinaza è pà la é kɔ́ pɛ́lɛ Zuda lɔii ma é naa siɣe gɔ́i su. Zɛoakiŋ è kɛ̀ Nɛbukinaza yée-mu a kóraŋ saaƃa. Kɛ́lɛ è tɔ̀ɔ Nɛbukinaza ma é kúla ŋɔkâloŋ-laai mu.

²Maa tãi tí, Yâwɛɛ è pɛ̀lɛ kɔ́-kɔ-ƃela tɛɛ ma a gɛɛ dí ŋúma kɛ́ Zuda taa-ŋai su dí naa su kara-kara. Gɔ́-kɔ-ƃelai ŋí da-ni dí kùla Babelɔŋ, Siria, Môa da Amɔŋ lɔii kpiniŋ-ŋai su. Yâwɛɛ è wɔ́lɔ ŋɔlóno-kɛ-ƃelai tɛ̀ɛ a gɛɛ dí Zuda-ƃelai lia-woo ƃó é pîlaŋ mɛnii ŋí ma.

³Yâwɛɛ è nâa mɛnii ŋí kɛ̀ a gɛɛ é kɛ́. Zuda lɔii-ŋuŋ su è kɛ̀ pâi karâi e kúla Yâwɛɛ ŋɛ́i kpɛ́ni fêi, Manasɛ è sɔnyɔ̂ŋ kɛ̀,

⁴Ŋuŋ kpîŋ ƃa ǹûai è dí pàa nyii-ŋai dí sɔŋ fé kɛ́ ní zui. Yâwɛɛ fé kɛ́ ní pâi mɛnii ŋí su-mɛni lɛɛ̂i.

⁵M̀ɛni da kpɛ́ni kélee Zɛoakiŋ è gɛ̀ tãi è kɛ̀ la a kâloŋ bɔ̃yɛ̂i Zuda kaloŋ-ŋai dí mɛni-pɔlɔ kɔlɔi su.

⁶Gâloŋ Zɛoakiŋ è sàa. Dí ǹóŋ Zɛoasiŋ kɛ̀ a kâloŋ bɔ́ɔ ŋá.

⁷Babelɔŋ kaloŋ Nɛbukinaza è wɔ́lɔ kɔ́ pɛ̀lɛ Ize kaloŋ Niko ma é ǹyée mɛi ɣále gɔ́i su. È ŋɔlɔii kélee sìɣe é kúla Ize Ya-lee kɛ́tɛi ŋɔkoyaŋ-perei ma é tóo Yufeletii Ya-leei ma ǹɔii ŋûa-pere. Mɛni ma, pɔri maa fé ŋɔ́nɔ kɛ́ ní Niko mì a gɛɛ é kɔ́ pɛ́lɛ Zuda lɔii ma.

⁸Zɛoasiŋ è kɛ̀ a kóraŋ puu káo lɔ́ɔlu mɛi saaƃa tãi è tɛ̀ la gâloŋ see-sɛŋ ŋái. Zeéɛ è kɛ̀ Zerusâlɛŋ ǹyaŋ è gɛ̀ nɔ́ gâloŋ-laai su a ɣáloŋ saaƃa. Ǹee ƃé kɛ̀ a Nesuta nyii kɛ̀ a Ɛnatâŋ ǹóŋ-nɛnii. Zerusâlɛŋ ƃé kɛ̀ a bɔ́-taai, zeɛ́ɛ naa.

⁹Zɛoasiŋ è Yâwɛɛ wóo pìli kpɔ́ nɔ́ yɛ̂ɛ berei ǹâŋ Zɛoakiŋ è wɔ́lɔ gɛ̀ lai.

¹⁰Tãi kpɔ́ nɔ́ dí Zɛoasiŋ sèe la a kâloŋ, maa tãi tí ƃé Babelɔŋ kaloŋ Nɛbukinaza è ŋɔkɔ́-kɔ-ƃelai tɛ̀ɛ la a gɛɛ dí kɔ́ pɛ́lɛ Zerusâlɛŋ ma.

¹¹Tãi dí nâa kɛ̀ gɔ́i kɔ̂i lai, Nɛbukinaza ǹyaa kpîŋ è nâa pà é tɛ́ daa-leei su.

¹²Naa ŋá ma kpɔ́ nɔ́ tí a naa ma félaa, Gâloŋ Zɛoasiŋ è gbîŋ tɛ̀ɛ Nɛbukinaza pɔ́ é pɛ́lɛ ǹee ma, ŋɔnɛyâai, ǹônii, ǹyée-mu-ƃelai, ŋɔkɔ́-kɔ-ƃela kpaya-kpayai, da ŋɔgɔmɛnɛ-ƃela kpaya-kpayai. Nya ƃe Nɛbukinaza è gâloŋ Zɛoasiŋ da ŋɔnûai sòŋ a tɔ̂ŋ-kara-ƃela. Mɛni-ŋai ŋí dí kɛ̀ Babelɔŋ kaloŋ Nɛbukinaza ŋɔkâloŋ-laa koraŋ ǹɔ́ɔlu mɛi saaƃai su.

¹³Yâwɛɛ è wɔ́lɔ mò a lia-woo a gɛɛ ɣele da a pâi nyii nûa da pâi dɔɔ-sãai kélee kulâi gâloŋ-pɛrɛ kɛ́tɛi mu da ŋâla-pɛrɛ kɛ́tɛi é pɛ́lɛ zãai kélee Gâloŋ Saloma è wɔ́lɔ dí kpɛ̀tɛ ŋâla-pɛrɛ kɛ́tɛi mɛni mai. Ǹyaŋ mɛnii ŋí kpɔ́ nɔ́ ƃé Nɛbukinaza è mò ŋɔkɔ-kɔ-ƃelai dîa a gɛɛ dí gɛ́.

¹⁴Nɛbukinaza è ǹûai ŋí sòŋ máŋ a tɔ̂ŋ-kara-ƃela é lí a dia: Zerusâlɛŋ mɛi-ƃela kpaya-kpayai, gɔ́-kɔ-ƃelai mɛi-ƃela kpaya-kpayai, da nyɛrɛ-kɛ-ƃelai. Dí kɛ̀ a núu wála puu. Gôlo-ƃela ŋá ŋánaai nɔ́ ƃé dí dí lɛ̀ɛ Zuda.

¹⁵Nɛbukinaza è lì a Zɛoasiŋ Babelɔŋ é pɛ́lɛ ǹee ma da ŋɔnɛyâai, ǹônii, ŋɔkɔ́-kɔ-ƃela kpaya-kpayai, ǹyée-mu-ƃelai, ŋɔgɔmɛnɛ-ƃela kpaya-kpayai é pɛ́lɛ Zuda lɔii-ƃela kpaya-kpayai dîa.

¹⁶È lì máŋ a kɔ́kɔ-ƃela wála lɔ́ɔlu mɛi feerɛ, yɛrɛ-kɛ-ƃela wála tɔnɔ da ǹúui nyii kélee nɔ́ pɔri-maa è kɛ̀ mì a gɛɛ é lí kɔ́ mai.

¹⁷Nɛbukinaza è Zɛoasiŋ gêra, Matania kɛ̀ a kâloŋ bɔ́ɔ ŋá, é ǹáa maa fáleŋ a Zɛdikia.

¹⁸Zɛdikia è kɛ̀ a kóraŋ buu feerɛ káo tɔnɔɔ tãi dí gɛ̀ la a kâloŋ Zuda lɔii mɛi ǹyaŋ zeɛ́ɛ è kɛ̀ Zerusâlɛŋ a kóraŋ puu káo tɔnɔ. Ǹee ƃé kɛ̀ a Amuta nyii kɛ̀ a Zɛlemaya ǹóŋ-nɛnii nyii kɛ̀ a Lina taa-leei su-nuui.

¹⁹Zɛdikia è Yâwɛɛ wóo pìli kpɔ́ nɔ́ yɛ̂ɛ berei Zɛoakiŋ è wɔ́lɔ gɛ̀ lai.

²⁰Zuda da Zerusâlɛŋ-ƃelai dí Yâwɛɛ líi ŋwàna a ŋánaa nyii gɛ̀ é bôlu tɔɔ dîa. Nya ƃe gɛ̀ Yâwɛɛ é dí kpɛ́ dí kúla ŋ̀ɛi. Gbɛɛ-ŋai, Gâloŋ Zɛdikia è tɔ̀ɔ Babelɔŋ kaloŋ Nɛbukinaza ma.