Read Kpelle Kâloŋ-ŋa Veerɛi 6 Bible Online

Kâloŋ-ŋa Veerɛi 6 - Kpelle bible

Kâloŋ-ŋa Veerɛi 6

¹Ɣâla ŋɔlóno-kɛ nuu-kpului su-ƃelai dí mò Ilasa ma dîyɛɛi, “Ƃɛ́i kwa koyâŋ naai, naa kuro têi a ŋánaa.

²Ǹɛɛ naa kú lí Zɔdiŋ Ya-leei ma, ƃɛ́i kwa pɔri wúru-kao-ŋa kulâi naa a gɛɛ kú kwaa ma kpɛtɛ naa.” Nya ƃe è mò dîa ǹyɛɛi, “Ka lí.”

³Nya ƃe ǹúui dɔnɔ è mò ma ǹyɛɛi, “Kpera yɛ̂, kúai a íyee mu-ƃelai, kwa kâa-ni kwaa lí.” Ilasa è zu tòo ǹyɛɛi, “Kwa kâa-ni kwa pâi liî.”

⁴Nya ƃe da dîa-ni dí lì. Dí lì Zɔdiŋ Ya-leei ma dí pɛ́lɛ naa ƃóɔɔ ma dí kɛ́ Ŋ̀úru-ŋai pɔ̀ŋ.

⁵Tãi ǹúui dɔnɔ è kɛ̀ ŋ̀úrui da pɔnii lai, ǹyuɔ̂i kɛ̀ ǹyêei è kpòloŋ mɛ̃lɛŋ é tóo ǹyái su. È lòno a ɣelêi pere ǹyɛɛi, “Óo ŋánuu-namui, lé ƃé a pɔ̂ri kɛ̂i? Ǹyuɔ̂i kɛ̀ ǹyéei è kɛ̀ a síɣaŋ yuɔ̂.”

⁶Ilasa è marê kɛ̀ ǹyɛɛi, “Mí ƃé è tòo naai?” Tãi è naa lɛ̀ la mai, Ilasa è wúru tèe é bili naa, gɔli yuɔ̂ mɛ̃lɛŋ é tɛ́ ǹyái ŋá.

⁷Ilasa è mò ma ǹyɛɛi, “Ziɣe ǹyái ŋá.” Nalôŋ è ǹyée sãa é ziɣe.

⁸È kɛ̀ a tãi da, Siria kaloŋ è kɛ̀ kɔ̂i Eezuɛ pɔ́. Tãi è kɛ̀ lônoi la ŋɔkɔ-kuluƃa-ŋai mɛi-ƃelai pɔ́i, è mò ǹyɛɛi, “Ŋa pâi ŋáƃûui pûi kwaa kɛ́ɛ ŋí, kɛ́ɛ ŋí ma.”

⁹Ŋ̀âla naloŋ Ilasa è ŋ̀óo tɛ̀ɛ Eezuɛ kaloŋ pɔ́ naa: “Í mɛi káa ífe tɛ̀ɛ gwaai tí ma pere, kpɛ́ni fêi, Siria-ŋai díkaa seêi ká perei naa.”

¹⁰Eezuɛ kaloŋ è ŋ̀óo tɛ̀ɛ maa kwaai mâ Ŋ̀âla naloŋ è lòno é pîlaŋ mai. Tãi támaa gâloŋ è Eezuɛ-ŋai lia-wôo ƃò nyii-ŋai kɛ̀ gwaai ŋí mai a gɛɛ dí díkpîŋ mɛi káa a gwaa-ŋai tí ma.

¹¹Mɛnii ŋí è ŋwàna Siria kaloŋ mâ. È ŋɔkɔ-kuluƃa-ŋai mɛi-ƃelai tòli díkîe ma é dí marê kɛ́, “Ka mó mâ kúai ŋí ƃɛ́i, gbɛ̂ɛ ƃé gáa Eezuɛ kaloŋ ŋɔƃélai ma pere nyii a m̀ɛnii kpɛtɛɛ kélee ƃò mà nyii kwa gbɛ̀tɛ ƃɛ́i?”

¹²Siria kaloŋ ŋɔnûai è kɛ̀ lônoi dí pɔ́i, dɔnɔ è ŋ̀óo su tòo ǹyɛɛ mai, “Ŋánuu-namui, kú ta fêi, kɛ́lɛ Ɣâla ŋɔlóno kɛ́-nuui Ilasa ƃè nyii gáa Eezuɛi. A mɛnii kélee ƃò Eezuɛ kaloŋ ma nyii-ŋai ƃa mò íloŋpoi sui.”

¹³Gâloŋ è mò dîa ǹyɛɛi, “Ka lí ká ƃɛ́i kɔ́ri gáa naai, a gɛɛ ŋá kpakolo-ŋa tɛɛ dí zoŋ.” Naa pôlu ma koraŋ ƃô è pà bɔ́ dîyɛɛi, “Ilasa káa Dotaŋ.”

¹⁴Gâloŋ è kɔ́-kɔ-ƃela támaa tɛ̀ɛ a soo-ŋa da kɔ́-kɔ keleŋ-ŋa. Dí sèri naa a kpíni dí daa-lêei ma tínaŋ.

¹⁵Tãi Ŋ̀âla naloŋ ŋɔyée mu-nuui è mù sìɣe a ŋ̀ele-wâla pɛpɛi, è kɔ́kɔ-ƃela kàa da daai ma tínaŋ da doo gîei. È mò ǹyɛɛi, “Lé ƃé kwa pâi gɛ̂i ŋánuu-namui?”

¹⁶Ɣâla ŋɔlóno-kɛ-nuui è zu tòo ǹyɛɛ mai, “Ífe yao. Ǹûai díkaa kúkɔlɛi, dí tâmaai é tɛ́ɛ ǹûai tí dîa.”

¹⁷Nya ƃe Ilasa è Yâwɛɛ fɛ̀li ǹyɛɛ mai, “Óo Yâwɛɛ, ŋ̀ɛ́i la ƃó a gɛɛ é kwaa káa.” Yâwɛɛ è Ilasa yée mu-nuui ŋɛ́i lá ƃò é naa káa é gáa a gɛɛ ǹyéei ma gwaa kélee láa è kɛ̀ a vɛ́ɛ a soo-ŋa da kɔ́-kɔ keleŋ-ŋa ŋɔŋ kɛ́ ƃò dîa, dí tínaŋɔɔ Ilasa kɔlɛ ma gwaa kélee.

¹⁸Tãi ŋɔkpɔara-ƃelai dí kɛ̀ ǹyéei yenîi la ma, Ilasa è Yâwɛɛ fɛ̀li ǹyɛɛi, “Ǹûai ŋí kélee kɛ́ díŋɛi é pú.” Nya ƃe Yâwɛɛ è gɛ̀ díŋɛi é pú yɛ̂ɛ berei Ilasa è m̀arê kɛ̀ a gɛɛ é gɛ́ lai.

¹⁹Ilasa è mò dîa ǹyɛɛi, “Berei fé ŋí. Daa lêei kpiŋ fe ŋí ka gɔrîi. Ka lɛɛ ńyãa kwaa lí, gɛ̀ ní ŋa pâi naloŋ lɛ̂i kâa kákaa gɔrîi.” Nya ƃe è lì a dia Sameria

²⁰Tãi dí sèri la daa-lêei sui, Ilasa è Yâwɛɛ fɛ̀li ǹyɛɛ mai, “Yâwɛɛ, gbakolo-ŋai ŋí ŋɛ́i lá ƃó a gɛɛ dí kwaa káa.” Nya ƃe Yâwɛɛ è díŋɛi lá ƃò. Dí gàa a gɛɛ díkaa Sameria.

²¹Tãi Eezuɛ kaloŋ è dí kàa lai, è Ilasa marê kɛ̀ ǹyɛɛ mai, “Ńâŋ, ŋá dí páa? Ŋá dí páa?”

²²È zu tòo ǹyɛɛ mai, “Ífe dí pàa. Ƃa pɔ̂ri gbakolo-ŋai paâi nyii ƃía kpîŋ í dí sòŋ a íƃoa-sɔkpɔi kpaa máŋ ítɔ̃ai. Mii-sɛŋ tɛɛ dípɔ dí mii, í yá tɛ́ɛ dípɔ dí gbele. Naa pôlu ma, tée dîa dí lí pôlu dínuu-namui pɔ́ naa.”

²³Nya ƃe è kúu kɛ́tɛ kɛ̀ dímɛni ma. Tãi dí kpɛ̀ɛ la a dílaa miî, dí díkpelei, è tèe dîa dí lí. Dí lène pôlu dínuu-namui pɔ́. É síɣe ma tãi tí ma, Siria-ƃelai dífe ŋɔ́nɔ kɛ́ pɛlɛ ní Eezuɛ lɔii ma.

²⁴Tãi su kôya tɛ̀ɛ pôlu ma, Siria Kaloŋ Bɛŋ-a-da è ŋɔkɔ́-kɔ-ƃelai kélee pù díkîe ma dí sia síɣe dí lí dí kɔ́ pɛ́lɛ Sameria taa-leei ma dí naa maa tínaŋ.

²⁵Maa tãi tí, puru è kɛ̀ a doɔɔ Sameria taa-leei su a zu kɛ́tɛ kpɛ́ni fêi daai maa tínaŋɔɔ Siria-ƃelai dîɛ, dí gɛ̀ naa a tãi su kôya. Nyíŋi è gɛ̀ wɛlɛ-sôo-ŋuŋ tɔnɔ sɔ̃ɔ è kɛ̀ a sɛŋ-kao kole kpua-kpua buu lɔ́ɔlu mɛi saaƃa, tòloŋ-kpo kɔpu tɔnɔ sɔ̃ɔ è kɛ̀ a sɛŋ-kao kole kpua-kpua lɔ́ɔlu.

²⁶Tãi Eezuɛ kaloŋ è kɛ̀ tɛɛ̂i la daa-leei ŋɔgalai kɔlɛi, nɛnî tɔnɔ è dòli a ɣelêi pere ǹyɛɛi, “Ŋánuu-namui gâloŋ, kpɔŋ-mâa tɛɛ mî ḿbɔ!”

²⁷Gâloŋ è zu tòo ǹyɛɛi, “À kɛ̀ Yâwɛɛ a wàla kpɔŋ-maa tɛɛ ípɔ, mí ƃé ŋa pâi gbɔŋ-mâai kulai naa a gɛɛ ŋá dɛɛ ípɔi? Ŋa pɔ̂ri gulâi mii-sɛ̂ŋ táŋ kwaai mâ? Ŋa pɔ̂ri gulâi ŋwãai kpɛtɛ kwaai mâ?”

²⁸Nya ƃe è nɛnîi marê kɛ̀ ǹyɛɛi, “Lé ƃé kɛ̀?” Ǹɛnîi è zu tòo ǹyɛɛ mai, “Ǹɛnîi ŋí è mò mâ ǹyɛɛi, ‘Íloŋ surɔŋ-loi tɛ́ɛ kú mii sâa, gɛ̀ ní, ŋa pâi ǹóŋ surɔŋ-loi tɛɛ̂i a gɛɛ kú mii tínaa.’

²⁹Nya ƃe kú ńoŋ surɔŋ-loi ɣîli kú mii. Bôlu ma ɣelei, ŋá mò ma, ‘Íloŋ surɔŋ-loi tɛ́ɛ a gɛɛ kú mii, kɛ́lɛ a ŋɔlóŋ surɔŋ-loi lôo.’ ”

³⁰Tãi Eezuɛ kaloŋ è nɛnîi wóo mɛ̀ni lai, è ŋɔkâloŋ yokpoi fàla-fala. Tãi è kɛ̀ siâi la a galai kóoi, ǹûai dí kɛ̀ gâai, ǹyaŋ dí gàa a gɛɛ ƃɔrɔ-sâa è kɛ̀ gbono mâ ŋɔseɣei mu-pere.

³¹È mò ǹyɛɛi, “Ɣâla é ŋ́gula maa kɛ́ a ŋánaa à kɛ̀ Safa ǹóŋ Ilasa ŋuŋ a sâa lɛ̀ɛ gâraŋ ŋa!”

³²Ilasa è nâa kɛ̀ seêi ŋɔpɛ́rɛi mu, ǹúu pɔlɔ-ŋai dí kɛ̀ seeni gɔlɛ. Gâloŋ è worɛ̂-woo ƃó-nuu tɛ̀ɛ duɛ. Kɛ́lɛ ǹúui é lɛ́ɛ pâi serii, Ilasa è mò ǹúu-pɔlɔ-ŋai dîa ǹyɛɛi, “Káfe berei kâai ǹúu paa-nûui ŋí aâ núu tɛ́ɛ la a gɛɛ é ḿbaai? Ká ƃɛ́ káa, ŋ̀orɛ̂-woo ƃó-nuui à pà, ka bɛ́rɛi láa tɛ́ berêi, ká tɔ́ɔ gbôŋ pôlu ká zoŋ a gbanaŋɔɔ vé lɔ̀. Ŋɔnuu-namui kɔ́ɔ mu tiŋ káa bôlu da ǹyaa dí kɛ́ pa.”

³³Tãi Ilasa è kɛ̀ nîi lônoi la dí pɔ́i, ŋ̀orɛ̂-woo ƃó-nuui è pà bɔ́. È mò mà ǹyɛɛ, gâloŋ ǹyɛɛi, “Mɛni kpɔ̂lui ŋí a kulâi Yâwɛɛ yêei. Ŋa pâi kɛ̂i nɔ́ Yâwɛɛ maa kpɛnîi nîi lé mɛni ma?”