Read Kpelle Kɔlɔnikɔ Maa-ŋuŋ 10 Bible Online

Kɔlɔnikɔ Maa-ŋuŋ 10 - Kpelle bible

Kɔlɔnikɔ Maa-ŋuŋ 10

¹Felesia-ŋai dí kɔ́ pɛ̀lɛ Eezuɛ-ŋai dîa. Díyee è tɛ̀ɛ dîa dí pù díyêei da Gâloŋ Sɔ̂ɔ ni é pɛ́lɛ ǹônii-sinaai dia. Dí Eezuɛ-ŋai dámaa pàa Giboa Yee kɛ́tɛi ma.

²Naa pôlu ma, Felesia-ŋai dí kànaŋ kpɔ́ Sɔ̂ɔ da ǹônii-sinaai dîa é lɛ́ɛ la zu dí ǹônii-sinaai Zonetaŋ, Abinada da Makisua pàa.

³Gɔ́i è kpàla Sɔ̂ɔ lá a ŋ̀ánaa. Nya ƃe Felesia-nuui dɔnɔ è mòŋ a dɔ̃ai é ŋ̀wána kpɔ́ a ŋ̀ánaa.

⁴Gɛ́ɛ tí, Sɔ̂ɔ è mò ŋɔkɔ́ kɔ́-sãa siɣe-nuui ma ǹyɛɛi, “Íƃoa-sɔkpɔi kúla í ḿbaa la. Felesia-ŋai ŋí dífe Ɣâla kɔ́lɔŋ. Fé ŋ̀wɛ̂lii dí ƃaa-kula-maa tua kɛ́ a ńyãa.” Kɛ́lɛ ǹalôŋ ŋí è yào kpɔ́ vé pɔri ní Sɔ̂ɔ paâi. Nya ƃe Sɔ̂ɔ è tòo gbîŋ ƃoa-sɔkpɔi ŋá é gbîŋ paa.

⁵Ǹalôŋ kɛ́ɛ gɔ̀lɔŋ a gɛ́ɛ Sɔ̂ɔ aâ saai, ǹyaa máŋ è tòo ŋɔƃóa-sɔkpɔi ŋá é gbîŋ paa.

⁶Sɔ̂ɔ da ǹônii-sinaai saaƃai dí lɛ̀ɛ gɔ́i su. Sɔ̂ɔ ŋɔsuui su-ƃelai dɔnɔ kpîŋ fé lɛ́ɛ ní bɔ́ɔ ŋá a kâloŋ Eezuɛ lɔii mɛi.

⁷Tãi Eezuɛ-ŋai nyii-ŋai kɛ̀ Zariɛɛ tiŋ-tiŋ su dí m̀ɛni la a gɛ́ɛ Eezuɛ kɔkuluƃa-ŋai dí pú Felesia-ŋai yêei, Sɔ̂ɔ da ǹônii-sinaai da lɛ́ɛ gɔ́i sui, dia máŋ dí kùla dítaa-ŋai su dí pú. Nya ƃe Felesia-ŋai dí pà dí sée naa.

⁸Bôlu ma ɣelei, Felesia-ŋai dí pà a gɛ́ɛ dí boma-ŋai maa ɣɛ́ɛ. Dí Sɔ̂ɔ da ǹônii-sinaai poma kàa Giboa Yee kɛ́tɛi ma.

⁹Dí Sɔ̂ɔ ŋuŋ tèe m̀a dí ŋɔkɔ́ kɔ́-seɣei kúla m̀a. Dí kéla tɛ̀ɛ dínûai pɔ́-naa dílɔii gwaa kélee ma a gɛ́ɛ dí duŋ ƃó dínûai dia da díɣâla-pɔkɔɔŋ-ŋai.

¹⁰Dí ŋɔkɔ́ kɔ́-seɣei pù díɣâla-pɛrɛ kɛ́tɛi mu, dí ŋ̀uŋ sɛ̀lɛŋ díɣâlai Dagɔŋ ŋɔpɛ́rɛi ma.

¹¹Kɛ́lɛ, tãi ǹûai kɛ́ Zabɛɛ Gelea lɔii su dí m̀ɛnii mɛ̂ni Felesia-ŋai dí gɛ̀ a Sɔ̂ɔi,

¹²díkɔ-kuluƃa-ŋai dí lì dí Sɔ̂ɔ da ǹônii-sinaai dípoma siɣe naa dí pá a dia Zabɛɛ dí díloô ôo wuruii mu nyíi kɛ̀ Zabɛɛi dísuŋ siɣe dí maa mɛ̂ni ma a fólo-lɔ́ɔlu mɛi feerɛ.

¹³M̀ɛni ma Sɔ̂ɔ è saa, kpɛ́ni fêi, vé kɛ́ ní a deniŋ-ƃoɔɔ Yâwɛɛ yêei. Vé Yâwɛɛ ŋɔtɔ̂ŋ mɛi káa ní, kɛ́lɛ è kɛ̀ liî diai pɔ́ da lôno saa-ƃela pɔ́ a gɛ́ɛ dí déniŋ tɔ́ɔ.

¹⁴Kɛ́lɛ vé Yâwɛɛ marê kɛ́ ni a gɛ́ɛ é déniŋ tɔɔ. Nya ƃe Yâwɛɛ kɛ́ bàa é gâloŋ-laai tɛ́ɛ Zɛse ǹóŋ Deeƃé pɔ́.