Read Kpelle Kɔlɔnikɔ Maa-ŋuŋ 13 Bible Online

Kɔlɔnikɔ Maa-ŋuŋ 13 - Kpelle bible

Kɔlɔnikɔ Maa-ŋuŋ 13

¹Naa kɛ́ɛ tíi, Deeƃé da ŋɔnûai mɛi-ƃelai dí díŋuŋ pîlaŋ. Ǹûai kɛ̀ ŋuŋ-pilaŋ ŋí sui dia ƃé kɛ̀ a ǹûai kɛ̀ núu wála tɔnɔ-tɔnɔ da núu ŋuŋ tɔnɔ-tɔnɔ mɛi.

²Nya ƃe Deeƃé è mò Eezuɛ-ƃelai kélee dîa ǹyɛɛi, “À kɛ̀ gáa a kánîa mɛni, gɛ́ ƃò tela a Yâwɛɛ Kúɣâlai nîa mɛni, gɛ̀ ní tɔɔ kú kela-ŋa tɛɛ kwaa kélee ma kúnûai kpéli-ŋai pɔ́-naa dítaa-lêe-ŋai su da gbanâŋ-ŋai lá Eezuɛ lɔii sui, kú da-ŋa tɛɛ zâla láa soŋ-ƃelai da Liiva-ŋai pɔ́-naa a gɛ́ɛ dí pá ƃɛ́ kúpɔ naa.

³Dí pá a gɛɛ kú lí kú pá a Kúɣâlai Ŋɔkpanaŋ-woo-kɛ́ɛ maa Gãlai pôlu, kpɛ́ni fêi, kúfe kɛ́ ní kɛ̀ a kúkpaaŋɔɔ m̀aa mɛni ma Sɔ̂ɔ kɛ́ɛ a kâloŋ.”

⁴Ǹûai kélee dí fàa Gâloŋ Deeƃé wóo ma, kpɛ́ni fêi, è kɛ̀ a mɛni lɛ́lɛɛ díkelee dímɛni ma.

⁵Deeƃé è ǹûai kélee tòli é síɣe Siɔ Ya-leei ma Izei é tóo Lebo Ama a gɛ́ɛ dí lí dí pá a Díɣâlai Ŋɔkpanaŋ-woo-kɛ́ɛ maa Gãlai dí gula Kiria-Zeriŋ.

⁶Deeƃé da ǹûai kélee dí lì Bala taa-leei su nyíi da kɛ̂ ma Kiria-Zeriŋ, Zuda ŋɔlɔii-kpiniŋ sui dí Ɣâla Ŋɔkpanaŋ-woo-kɛ́ɛ maa Gãlai kɛ̀ Yâwɛɛ láai su seeni ŋâla-taa kooŋ-sɛŋ feerɛi pɔkɔɔŋ loai.

⁷Dí Gbanaŋ-wóo-kɛɛ maa Gãlai kùla Aƃinada ŋɔpɛ́rɛi mu. Dí zèe wúru-ƃela keleŋ nina tɔnɔ su. Uza da Aio ƃé kɛ̀ mɛi kâa.

⁸Deeƃé da ǹûai kélee díkɛ̀ lii-nɛ̃ɛ kulâi kpɔ́ a zu kɛ́tɛ díkɛ laa-maa tɛ̂ tɛ̀ɛ Ɣâla pɔ́. Dí kɛ̀ pêle kɛ̂i díkɛ mãla díkɛ ɣale-sãa kɛ́ɛ yɛ̂ɛ kɔnîŋ, gbuŋ-gbuŋ, nyɛ̃ɛ-yɛ́ŋ ɣàle díkɛ túru fɛɛ.

⁹Dí seríɛɛ Kidɔŋ ŋɔmii-sɛŋ táŋ kwaai mai, ǹiŋa-sirɛi kɛ̀ géleŋ ɣâlai è kàreŋ. Gãlai é túmo gɛ́ pà toôi. Nya ƃe Uza è ǹyée pɛlɛ Gãlai ma a gɛ́ɛ é zee zeêi.

¹⁰È kɛ̀ nɔ́ tí, Yâwɛɛ é ǹíi ŋwàna ma é baa ŋ̀áa ma, kpɛ́ni fêi, è ǹyée pɛ̀lɛ Gãlai ma. È sàa naa Ɣâla ŋɛ́i-tuɛ.

¹¹Dí gwaai tí ma láa sèe a Pɛresi Uza. Ǹaa láa ká tí é tóo sâa ma. Ɣâla kɛ́ɛ a Uza paâi, Deeƃé è ǹíi ŋ̀wana kpɔ́ a ŋ̀ánaa, kpɛ́ni fêi, Yâwɛɛ è ǹíi ŋ̀wana é Uza kula maa kɛ́.

¹²M̀ɛnii ŋí è gɛ̀ Deeƃé è yào kpɔ́ Ɣâla ma a ŋ̀ánaa ǹyɛɛi, “Ŋa pâi gɛ̂i léŋ ŋ́gɛ lì a Gbanaŋ-wóo-kɛɛ maa Gãlai ƃɛ́i ŋ́gaa naai?”

¹³M̀aa ɣelei tí, Deeƃé fé pɔri ní liî a Gãlai Zerusâlɛŋ. È lì la Obɛɛ Idɔŋ ŋɔpɛ́rɛi lá. Obɛɛ Idɔŋ è kɛ̀ a Gâa taa-leei su nuu.

¹⁴Gãlai ŋí è gɛ̀ Obɛɛ Idɔŋ ŋɔpɛ́rɛi lá a ɣáloŋ saaƃa. Nya ƃe Yâwɛɛ è lûwa làa Obɛɛ Idɔŋ ma, ŋɔnûai kélee da gɔ̃liŋ kélee.