Read Kpelle Kɔlɔnikɔ Maa-ŋuŋ 14 Bible Online

Kɔlɔnikɔ Maa-ŋuŋ 14 - Kpelle bible

Kɔlɔnikɔ Maa-ŋuŋ 14

¹Taya kaloŋ Iraŋ è kéla-ŋa tɛ̀ɛ dí pá a sîda wuru kpono-ŋa, kɔni pɛrɛ tɔɔ-ƃela da pɛ́rɛ tɔɔ-ƃela a gɛ́ɛ dí Deeƃé ŋɔpɛ́rɛi tɔ́ɔ.

²M̀ɛnii ŋí ƃé gɛ̀ Deeƃé kɛ́ gɔ̀lɔŋ a gɛ́ɛ Yâwɛɛ a zee a kâloŋ Eezuɛ mɛi. Ƃaa kɛ́-maa kɛ́tɛ è kɛ̀ ŋɔkâloŋ-laai ma Eezuɛ-ŋai mɛni ma.

³Deeƃé kɛ́ɛ kɛ̀ Zerusâlɛŋ, è ŋɔnɛyâai dámaa tòo ma é lônii-sinaa támaa da nɛyâa maa sɔlɔ ƃó dîa.

⁴Ǹîa-pɛlɛɛi è dí maa sɔlɔ ƃô naai dia ƃé kɛ̀ a: Samua, Soba, Netaŋ, Saloma,

⁵Ibaŋ, Ilisua, Ɛɛpele,

⁶Nogaŋ, Nɛfɛ, Zafia,

⁷Ilisama, Beliada da Ilifelɛ.

⁸Felesia-ŋai kɛ̂ɛ da mɛ̀ni a gɛ́ɛ da Deeƃé sée a kâloŋ Eezuɛ lɔii kélee mɛi, dí díkɔ-kuluƃa-ŋai sìɣe a gɛ́ɛ dí lí dí zoŋ. Gɛ́ɛ Deeƃé a mɛ̀nii ŋí mɛ́nii, da ŋɔnûai dí dímù-siɣe dí li a gɛ́ɛ da dîa ní dí kɔyɛŋ.

⁹Felesia-ŋai dí pà dítoo ma kɛ́ Lefaiŋ tiŋ-tiŋ su.

¹⁰Deeƃé è Ɣâla marê kɛ̀ ǹyɛɛ m̀ai, “Ŋá lí ŋá pɛ́lɛ Felesia-ŋai dîa? Ya pâi ǹɛɛ̂i naa ŋá díyee mɛi ɣále?” Yâwɛɛ ǹyɛɛ m̀ai, “Ye lí, ŋa pâi dítɛɛ̂i ípɔ.”

¹¹Nya ƃe Deeƃé da ŋɔnûai dí lì dí pɛ́lɛ Felesia-ŋai dîa Baa Pɛraziŋ dí díyee mɛi ɣále naa. Gɛ́ɛ tí, Deeƃé è mò ǹyɛɛ, “Ɣâla a ŋ́gɛ ŋá díkɔ-kuluƃa-ŋai yée mɛi ɣále ŋa sia dímɛi yɛ̂ɛ ya-fɛ̂ɛ a sìa sɛŋ mɛi.” M̀ɛni ma è gwaai ŋí ma láa sèe a Baa Pɛraziŋ.[3]

¹²Felesia-ŋai kɛ́ɛ kɛ̀ pûi, dí díɣâla-ŋai lɛ̀ɛ naa dí pú. Deeƃé è mò ŋɔnûai dîa a gɛ́ɛ dí díkereŋ.

¹³Naa kɛ́ɛ tí, Felesia-ŋai dí ŋɔ́nɔ pà pôlu dí pɛ́lɛ too mâ kɛ̂i diŋ-tiŋ su.

¹⁴Deeƃé è ŋɔ́nɔ Ɣâla marê kɛ̀. Ɣâla é ŋ̀óo su too ǹyɛɛ mài, “Ífe lì díteniŋ ma a gɛ́ɛ í pɛ́lɛ dîa. Kɛ́lɛ dímaa-laa í pɛ́lɛ dîa dípôlu-pere besaŋ wuru-ŋai mu.

¹⁵Yà pà ŋ̀úru-ŋai mu, ye maa kpɛ̂ŋ kɛ́ é lɛ́ɛ la zu ínuu sia tiŋ mɛni ŋ̀úru-laai su. Yà ǹúui sia tiŋ mɛni besaŋ wuru-laai su, gɛ̀ ni ye lí í pɛ́lɛ dîa. Ŋa pâi kɛ̂i ítuɛ ŋá lí ŋá Felesia-ŋai díkɔ-kuluƃa-ŋai páa.”

¹⁶Deeƃé è gɛ̀ yɛ̂ berei Ɣâla è mò la mai. Dí lì dí Felesia-ŋai páa é síɣe Gibiɔŋ é seri Gezɛ.

¹⁷M̀ɛnii ŋí è gɛ̀ Deeƃé láa é sía kpɔ́ ǹɔii gwaa kélee ma. Yâwɛɛ è gɛ̀ ǹɔii ŋuŋ-ŋai kélee su-ƃela dí yào Deeƃé ma.