Read Kpelle Kɔlɔnikɔ Maa-ŋuŋ 15 Bible Online

Kɔlɔnikɔ Maa-ŋuŋ 15 - Kpelle bible

Kɔlɔnikɔ Maa-ŋuŋ 15

¹Deeƃé kɛ́ɛ a kpɛɛ a gbîŋ pɛrɛi-ŋai tɔɔ Zerusâlɛŋ, è kwaa ma kpɛ̀tɛ Ɣâla Ŋɔkpanaŋ-woo kɛ́ɛ maa Gãlai mɛni ma.

²È mò ǹyɛɛ, “Núu da kpɛ́ni fé pâi liî a Ɣâla Ŋɔkpanaŋ-woo kɛ́ɛ maa Gãlai fɛ̂ɛ nɔ́ Liiva-ŋai, kpɛ́ni fêi, dia ƃé Yâwɛɛ è dísiɣe zu a gɛ́ɛ dí gɛ́ tí, díkɛ ŋɔ́nɔ tíi kɛ̀ mì a ɣele kélee.”

³Deeƃé è Eezuɛ-ƃelai kélee ŋá tɛ̀ díkîe ma Zerusâlɛŋ a gɛ́ɛ dí lí dí pá a Yâwɛɛ Ŋɔkpanaŋ-woo kɛ́ɛ maa Gãlai ƃɛ́i ma è nàa kpɛ̀tɛ m̀ɛni mai.

⁴Gɛɛ tíi, è Eelɔŋ ŋɔsuui su-ƃelai da Liiva-ŋai ŋá tɛ̀ díkîe ma.

⁵Uriɛ ƃé kɛ̀ a Koa ŋɔsuui su-ƃelai láa-tuɛ-nuu. È pà a núu ŋ̀uŋ tɔnɔ pôlu buu feerɛ (1200) nyii-ŋai kùla ŋɔnûai sámai.

⁶Asaya ƃé kɛ̀ a Melali ŋɔsuui su-ƃelai láa-tuɛ-nuu. È pà a núu ŋ̀uŋ feerɛ pôlu buu feerɛ (220) nyii-ŋai kùla ŋɔnûai samai.

⁷Zoɛɛ ƃé kɛ̀ a Gɛsɔŋ ŋɔsuu su-ƃelai láa túɛ-nuu. È pà a núu ŋ̀uŋ tɔnɔ pôlu buu saaƃa (130) nyii-ŋai kùla ŋɔnûai samai.

⁸Simaiya ƃé kɛ̀ a Ilizafaŋ ŋɔsuui su-ƃelai láa túɛ-nuu. È pà a núu ŋ̀uŋ feerɛ (200) nyii-ŋai kùla ŋɔnûai samai.

⁹Ɛliɛ ƃé kɛ̀ a Iburɔŋ ŋɔsuui su-ƃelai láa túɛ-nuu. È pà a núu buu lɔ́ɔlu mɛi saaƃa nyii-ŋai kùla ŋɔnûai samai.

¹⁰Aminada ƃé kɛ̀ a Uziɛ ŋɔsuui su-ƃelai láa-tuɛ-nuui. È pà a núu ŋ̀uŋ tɔnɔ pôlu puu káo tɔnɔ (112) nyii-ŋai kùla ŋɔnûai samai.

¹¹Deeƃé è zâla-láa soŋ-ƃelai Zadɔ da Abiata tòli, Uriɛ, Asaya, Zoɛɛ, Semaiya, Ɛliɛ da Aminada nyii-ŋai kɛ̀ a Liiva ŋɔsuui su-ƃelai,

¹²ǹyɛɛ diai, “Káa ƃa Liiva-ŋai láa túɛ-ƃelai. M̀ɛni ma, ka kákpîŋ kpɛtɛ a gɛ́ɛ ká Eezuɛ Ɣâlai Yâwɛɛ Ŋɔkpanaŋ-woo kɛ́ɛ maa Gãlai síɣe ká pá la ƃɛ́i ŋá naa kpɛ̀tɛi.

¹³Káfe kɛ́ ní naa a m̀aa-ŋuŋ ká ziɣe ǹya ƃé gɛ̀ Kúɣâlai Yâwɛɛ kɛ́ ǹíi ŋwàna kûa. Kúfe m̀arê kɛ́ ní a gɛ́ɛ é berei lɛ́ kûa kwa pɔ̂ri vɛlîi lai.”

¹⁴Nya ƃe zâla láa soŋ-ƃelai da Liiva-ŋai dí díkpîŋ kpɛ̀tɛ a gɛ́ɛ dí lí dí pá a Eezuɛ Ɣâlai Yâwɛɛ Ŋɔkpanaŋ-woo kɛ́ɛ maa Gãlai.

¹⁵Nyíŋi pôlu ma, Liiva-ŋai dí lì a Ɣâla Ŋɔkpanaŋ-woo kɛ́ɛ maa Gãlai wúru ma díkâraŋ ŋá yɛ̂ɛ berei Yâwɛɛ è wɔ́lɔ mò la Mose ma a gɛ́ɛ dí gɛ́ lai.

¹⁶Deeƃé è mò Liiva ŋɔsuui su-ƃelai láa túɛ-ƃelai dîa a gɛ́ɛ dí dínûai da ni sìɣe zu a gɛ́ɛ díkɛ a wule too-ƃela da ɣale-sãa ɣale-ƃela díkɛ lii-nɛ̃ɛ wule-ŋa tòo díkɛ ɣale-sãa kɛ́ɛ yɛ̂ɛ kɔníŋ, gbuŋ-gbuŋ da nyɛ̃-nyɛ́ŋ ɣàle.

¹⁷Liiva-ŋai suui su-ƃelai dí ǹûai ŋí sìɣe zu a gɛ́ɛ díkɛ a ŋ̀ale-sãa ɣale-ƃelai ŋ̀ule too-ƃelai sáma. Dia ƃe kɛ̀ a: Zoɛɛ ǹóŋ Emaŋ da ŋɔkaayɔɔi Belekaya ǹóŋ Asafa, da Kusaiya ǹóŋ Itaŋ. Itaŋ è kɛ̀ a Melali ŋɔsuuui su nuu. Liiva-ŋai ŋí ƃé dí dísìɣe a díkpɔŋ mâa-ƃela. Díwɔ̂ tii ƃé kɛ̀ a gɔnîŋ tíŋɔɔ ɣaleɛ́ɛ. Dia ƃé kɛ̀ a: Zɛkɛraya, Zaaziɛ, Semiramɔ, Zeiɛɛ, Uni, Ilia, Maaseia da Benaiya. Dí Liiva-ŋai ŋí sìɣe zu a gɛ́ɛ dí kɛ́ gɔnîŋ tíŋ ŋáa-yeŋɔɔ-ŋai ɣale: Matitaiya, Ɛlifeleu, Mineiya da Azazia. Obɛɛ Idɔŋ da Zeiɛ ƃé dí dísìɣe a Ŋ̀âla-pɛrɛ Kɛ́tɛi mɛi káa-ƃela.

²²Dí Kenaniya sìɣe a gɛ́ɛ é kɛ́ Liiva wule too-ƃelai láa túɛ. Dí gɛ̀ ti, kpɛ́ni fêi, è kɛ̀ a wule too-nuu lɛ́lɛɛ.

²³Belekaya, Ɛɛkana, Obɛɛ Idɔŋ da Zeiya ƃé kɛ̀ a Gbanaŋ-woo-kɛɛ maa Gãlai mɛi káa-ƃela. Dí zâla láa soŋ-ƃelai, Sibaniya, Zosafa, Nɛtaniɛ, Amasai, Zɛkɛraya, Benaiya da Ilieza sìɣe a túru fɛ̀ɛ Gbanaŋ-woo-kɛɛ maa Gãlai ŋɛ́i-tuɛ.

²⁵Naa kɛ́ɛ tíi, Gâloŋ Deeƃé, Eezuɛ nua kpaya-kpayai da gɔ-kuluƃa-ŋai mɛi-ƃela kpaya-kpayai dí lí Obɛɛ Idɔŋ ŋɔpɛ́rɛi lá a gɛ́ɛ dí pá a Gbanaŋ-woo-kɛɛ maa Gãlai. Dí liɛɛi, dí kúu kɛ́tɛ kɛ̀ naa.

²⁶Dí niŋa-sirɛ lɔ́ɔlu mɛi feerɛ da ƃála-sirɛ lɔ́ɔlu mɛi feerɛ kùla a sâla. Dí zâlai ŋí kùla a gɛ́ɛ Ɣâla é kpɔŋ mâaa tɛɛ Liiva-ŋai pɔ́ kɛ̀ liî a Yâwɛɛ Ŋɔkpanaŋ-woo-kɛɛ maa Gãlai.

²⁷M̀aa ɣelei tí, Deeƃé è kɛ̀ a m̀aa ɣiriɛ́ɛ a yokpo nyíi dí gbɛ̀tɛ a seɣe lɛ́lɛɛi. Bere nɔ́ ƃé ŋ̀ule-too-ƃelai dia máŋ díkɛ̀ a dímaa ɣiriɛ́ɛ da Liiva-ŋai kɛ̀ liî a Gbanaŋ-woo-kɛɛ maa Gãlai. Kenaniya nyíi kɛ̀ a ŋ̀ule too-nuu kɛ́tɛi é kɛ́ a m̀aa ɣiriɛ́ɛ a bere sîi tɔnɔi tí. Deeƃé è kɛ̀ a m̀aa ɣiriɛ́ɛ a ífa nyíi dí gbɛtɛ a seɣe lɛ́lɛɛi.

²⁸Eezuɛ-ŋai kélee dí tɔ̀ɔ Yâwɛɛ Ŋɔkpanaŋ-woo kɛ́ɛ maa Gãlai ma dí pá la Zerusâlɛŋ díkɛ làɣi kpɔ́ a zu kɛ́tɛ, díkɛ lii-nɛ̃ɛ kùla, díkɛ sua-mĩla turu fɛ̀ɛ. Dí kɛ̀ nyɛ̃-nyɛ́ŋ ɣàle, kɔnîŋ da pêle kɛ́-sãa da kpɛ́ni-ŋa.

²⁹Díkɛɛ tɛ̂i a Gãlai Zerusâlɛŋ, Gâloŋ Deeƃé è kɛ̀ kpɔ́ mãlâi gɛ́ pìli gɛ́ pìlaŋ ǹûai ŋɛ́i-tuɛ. Ŋɔnɛnîi Maka nyíi kɛ̀ a Sɔ̂ɔ ǹóŋ-nɛnîi è gàa wônai lá é ǹíi ŋwána ma.