Read Kpelle Kɔlɔnikɔ Maa-ŋuŋ 16 Bible Online

Kɔlɔnikɔ Maa-ŋuŋ 16 - Kpelle bible

Kɔlɔnikɔ Maa-ŋuŋ 16

¹Dí pà a Gbanaŋ-woo-kɛ́ɛ maa Gãlai dí zée zua-kɔlɔ-seɣe pɛrɛi mu Deeƃé è dɔ̀ɔ m̀ɛni mai. Dí kéreŋ sala da lawei-laa sala kùla Ɣâla ma.

²Deeƃé è kpɛɛ́ a géreŋ-salai da ǹawei-laa salai kulaái, è lûwa tòo ǹûai dîa Yâwɛɛ láai su.

³Ǹaa pôlu ma, Deeƃé è mii-sɛŋ tɛ̀ɛ ǹûai kélee pɔ́. È kpólo kane tɛi-tɛi tɛ̀ɛ zinâai da nɛyâai pɔ́ da sua kpua-kpua tɛi-tɛi da lesiŋ kane tɛi-tɛi a tɛɛ-ŋa.

⁴Deeƃé è Liiva-ŋai da-ŋa lɛ̀ a gɛ́ɛ díkɛ tíi kɛ̀ Yâwɛɛ Ŋɔkpanaŋ-woo-kɛ́ɛ maa Gãlai ŋɛ́i-tuɛ díkɛ Eezuɛ Ɣâlai Yâwɛɛ kperai-fe, díkɛ sɛɣɛ-fei tɛɛ bɔ́, díkɛ ńaa maa tɛ.

⁵Dí Asafa lɛ̀ a dílaa túɛ-nuu, dí Zɛkarɔya kɛ́ a gɔlɛ ma nuu. Dí Zeiɛ, Semaramɔ, Zeiɛ, Matilaya, Ilia, Benaiya, Obɛɛ Idɔŋ, da Zeiɛ-ni sìɣe a gɛ́ɛ díkɛ gɔnîŋ bɛlɛ-pɛlɛɛi da gbaya-kpayai ɣàle. Asafa ŋɔtíi ƃé kɛ̀ a gɛ́ɛ gɛ́ ǹyɛ-nyɛ́ŋ ɣàle.

⁶Zâla-laa soŋ-ƃelai Benaiya da Zaaziɛ díwɔ̂ tii ƃé kɛ̀ a dúrii fɛ́ɛ Ɣâla Ŋɔkpanaŋ-woo-kɛɛ maa Gãlai ŋɛ́i-tuɛ a ɣele kélee.

⁷Tãi maa ŋuŋ ká ŋí Deeƃé kɛ̀ ǹaa-maa tɛ́ wulei too tii tɛ̀ɛ Asafa da Liiva-ŋai da kpɛ́ni-ŋai pɔ́ Yâwɛɛ maa mɛni ma.

⁸Sɛɣɛ-fei tɛɛ Yâwɛɛ pɔ́. Ŋɔkɛ́tɛ-laai tuŋ too. M̀ɛni-ŋai a gɛ̀i, m̀ó ǹɔii ŋuŋ-ŋai dîa.

⁹Laa-ma-tɛ wule too Yâwɛɛ ma. M̀ɛni maa pɔlɔ-pɔlɔɔ-ŋai a gɛ̀i, duŋ too.

¹⁰Ka lii-nɛ̃ɛ kula, kpɛ́ni fêi, kúkaa a bɔ́ɔ. Tɔɔ diai kélee da vɛlii, dí lii-nɛ̃ɛ kula.

¹¹Ka lí Yâwɛɛ pɔ́ ŋɔwála-wala-laai mɛ̂ni ma, ká vɛli a ɣele kélee.

¹²Káai a Zeeka ŋɔsuui su-ƃelai, káai a Ɣâla ŋɔtíi kɛ́-ƃelai, káai a Eezuɛ ŋɔsuui su-ƃelai Ɣâla a kásiɣe zui, ŋ̀ɛi kɛ́-maa-ŋai Ɣâla è gɛ̀i, gíli é lɛ́ɛ káŋa da m̀ɛni ŋá téɛɛi è gɛ̀i.

¹⁴Yâwɛɛ ƃa Kúɣâlai. Ŋɔtɔ̂ŋ-ŋai káa ŋ̀éniɛi kélee mɛni ma.

¹⁵Káfe wɔ́lɔ nìa Ɣâla ŋɔkpanaŋ-wooi ma, nyíi è gɛ̀ gáa naa wɔ́lɔ-wɔlɔ da wɔ́lɔ-wɔlɔi.

¹⁶Gbanaŋ-wooi ŋí ƃé è gɛ̀ Eberaɣɛ̃ɛ yêei da gono-teei è gɛ̀ Aise yêei.

¹⁷Yâwɛɛ è kpanaŋ-woo kɛ̀ Zeeka yêei, nyíi pâi kɛ̂i naa wɔ́lɔ-wɔlɔ da wɔ́lɔ-wɔlɔi.

¹⁸È mò ǹyɛɛi, “Ŋa pâi Keena lɔii tɛɛ̂i kápɔ,” “A pâi kɛ̂i a kákpɔɔi pɔɔ.”

¹⁹Ɣâla ŋɔnûai dífe kɛ́ ní a dítamaa. Díkɛ̀ nɔ́ a ŋɔ̃ya-ŋa Keena.

²⁰Dí kɛ̀ nɔ́ pɔŋ-pɔ̂nii lɔii ŋuŋ-ŋa loai díkɛ nɔ́ kùla kâloŋ tɔnɔ yée mu díkɛ lì da kpɛ́ni-ŋa yée mu.

²¹Kɛ́lɛ Ɣâla fé fáa ní ma a gɛ́ɛ núu da é dímɔ̃lɛ. È gâloŋ-ŋai lia-woo ƃò a gɛ́ɛ dífe kpéŋ ɣàle da ma ǹyɛɛ dîai,

²²“Káfe lɛ̀ɣɛ ŋánûai dîa ŋá dísiɣei. Káfe mɛni ŋánaa kɛ̀ a ŋálono kɛ́-ƃelai da.”

²³Káai kélee ŋ̀éniɛi sui ka wule tóo Yâwɛɛ ma. Ka ŋɔƃalo-laai maa tuŋ tòo a ɣele kélee.

²⁴Ka ŋɔmaa waa-laai maa mɛni ƃó ǹɔii ŋuŋ-ŋai kélee su. Ka ŋɔwála-wala-laai maa mɛni ƃó ǹûai kélee dîa.

²⁵Yâwɛɛ kɛ́tɛi, maa nɛ̃ɛ a gɛ́ɛ ká ǹaa maa tɛ́ a zu kɛ́tɛ. Ká ƃaa kɛ́-maa tɛ́ɛ bɔ́ é tɛ́ɛ ŋ̀âla-ŋai kélee dîa.

²⁶Ŋ̀âlai nyíi gáa lɔii-ŋuŋ da kpɛ́ni sui gáa a ɣâla-pɔkɔɔŋ. Kɛ́lɛ Yâwɛɛ ƃé ŋ̀elei kpɛ̀tɛ.

²⁷M̀aa tínaŋɔɔ̂i a ŋɔmaa waa-laai da kâloŋ-laa. Ŋɔpɛ́rɛi láa-fɛ̂ɛi a wála-wala-laa da lii-nɛ̃ɛ.

²⁸Káai kélee ɣele mai, ka laa-ma-tɛ tɛɛ Ɣâwɛɛ pɔ́. Ka ǹáa maa tɛ́ ŋɔmaa waa-laai da ŋɔwála-wala-laai mɛni ma.

²⁹Ka laa-maa-tɛ tɛɛ Yâwɛɛ pɔ́ ŋɔmaa waa-laai mɛni ma. Ka pá a sama-sɛŋ bɔ́-naa ŋɔpɛ́rɛi mu. Ka Yâwɛɛ fɛli ŋɔmaa waa-laai mɛni ma.

³⁰Káai kélee ŋ̀éniɛi sui ka pá bɔ́ a ŋumɛ pere. A ǹɔii kɔ́ɔ tɔ́ɔ a gbanaŋɔɔ a gɛ́ɛ vé kùla dɔɔ̂i.

³¹Tɔɔ ŋ̀elei da ǹɔii dí lii-nɛ̃ɛ kùla! Ka m̀ó ǹɔii ŋuŋ-ŋai dîa a gɛ́ɛ Yâwɛɛ káa a kâloŋ.

³²Tɔɔ ǹyuoi da zu sãa kélee dítiŋ é tɛ́. Tɔɔ ǹɔii da zu sãa kélee dí lii-nɛ̃ɛ kula!

³³Ŋ̀olâai su wuru-ŋai kélee da pâi wule toôi. Díkelee da pâi wule toôi Yâwɛɛ ŋɛ́i-tuɛ a pa gɛ́ ƃò a kâloŋ ǹɔii mɛi.

³⁴Ka sɛɣɛ-fei tɛɛ Yâwɛɛ pɔ́, kpɛ́ni fêi, dûa-pere lɛ́lɛɛi, Ŋɔwɛli kɛ́-maai káa naa wɔ́lɔ-wɔlɔ da wɔ́lɔ-wɔlɔ.

³⁵Ka m̀ó mà kâai, “Óo Ɣâla, ye kúƃalo, kúƃalo-nuui. Ye kúkula ǹɔii ŋuŋ-ŋai yêei í kúŋaa tɛ́ gîe ma. Yà gɛ̀ tí, kwa pâi sɛɣɛi-fei da laa-maa-tɛ tɛɛ̂i ípɔ ímaa waa-laai mɛni ma.”

³⁶Ka Eezuɛ Ŋɔɣâlai Yâwɛɛ láa maa tɛ́! Ka ǹaa maa tɛ́ wɔ́lɔ-wɔlɔ da wɔ́lɔ-wɔlɔ. Ǹûai kélee dí mò dîyɛɛi, “É kɛ́ tí” laa-maa-tɛ é tɛ́ɛ Yâwɛɛ pɔ.

³⁷Gâloŋ Deeƃé è Asafa da ŋɔkɔlɛ ma-ƃelai lɛ̀ɛ Gbanaŋ-woo-kɛɛ maa Gãlai mɛi a gɛ́ɛ díkɛ tíi kɛ̀ naa yɛ̂ɛ berei gáa a sɛŋ dí gɛ́ la a ɣele kéleei.

³⁸È ŋɔ́nɔ Zedutuŋ ǹóŋ Obɛɛ Idɔŋ da Liiva buu lɔ́ɔlu mɛi-da káo lɔ́ɔlu mɛi saaƃai lɛ̀ɛ naa a gɛ́ɛ da dîa-ni dí tii kɛ́. Obɛɛ Idɔŋ da Osa díkɛ̀ a Ŋ̀âla-pɛrɛ Kɛ́tɛi ŋɔsiɣãŋ lá mɛi káa-ƃela.

³⁹Deeƃé è zâla-láa soŋ-nuui Zadɔ da m̀arâa sala-láa soŋ-ƃelai lɛ̀ɛ Yâwɛɛ ŋɔsua kɔlɔ-seɣe ɣala-pɛrɛi mɛi kɛ̀ Giƃiyɔŋ,

⁴⁰a gɛ́ɛ díkɛ kéreŋ sala kùla Yâwɛɛ ma géreŋ sala kula ɣâla-teƃelei ŋá a ɣele-wala da ɣele-wulii kélee yɛ̂ɛ berei bɔ̃yɛ̂ɛi la Yâwɛɛ ŋɔtɔ̂ŋ su è dɛ̀ɛ Eezuɛ-ŋai pɔ́i.

⁴¹Naa pôlu ma Emaŋ da Zedutuŋ díkɛ̀ nàa da diai dí dílaa sìɣei a gɛ́ɛ díkɛ laa-maa-tɛ̂ wule tòo, díkɛ sɛɣɛ-fei tɛ̀ɛ Yâwɛɛ pɔ́, ŋɔwɔ́lɔ-wɔlɔ da wɔ́lɔ-wɔlɔ wɛli kɛ-maai mɛni ma.

⁴²Emaŋ da Zedutuŋ dítii ƃé kɛ̀ a gɛ́ɛ dí dúrii fɛ́ɛ, dí ǹyɛ-nyɛ́ŋ ɣále da ŋ̀ale-sãai da kpɛ́ni-ŋai da kɛ̀ ŋ̀ule maa waa-ŋai toôi. Zedutuŋ ǹônii-sinaai ƃé kɛ̀ Ŋ̀âla-pɛrɛ Kɛ́tɛi ŋɔsiɣãŋ lá.

⁴³Gɛ́ɛ tí, ǹûai kélee dí lì dípɛrɛi-ŋai lá tɛi-tɛi. Deeƃé ǹyaa máŋ è lì ŋɔnûai pɔ́-naa ŋɔpɛ́rɛi lá.