Read Kpelle Kɔlɔnikɔ Maa-ŋuŋ 19 Bible Online

Kɔlɔnikɔ Maa-ŋuŋ 19 - Kpelle bible

Kɔlɔnikɔ Maa-ŋuŋ 19

¹Ɣele kpɛ́-kpɛɛ tɛɛ pôlu ma, Amɔŋ-ŋai díkâloŋ Nasi è sàa dí ǹóŋ Anuŋ sée bɔ́ɔ ŋá.

²Deeƃé è gíli ŋá sìa ǹyɛɛi, “Ŋa pâi kɛ̂i a teniŋ ƃô nuu Nasi ǹóŋ Anuŋ m̀ɛni ma, kpɛ́ni fêi, ǹâŋ è wɔ́lɔ kɛ́ a deniŋ ƃóɔɔ m̀ɛni ma.” Deeƃé è núu kpulu tɔnɔ tɛ̀ɛ a gɛ́ɛ é kpulɔŋ Anuŋ ma ǹâŋ saa mɛni ma. Kɛ́lɛ tãi Deeƃé ŋɔnûai dí sèri la Amɔŋ-ŋai dílɔii su a gɛ́ɛ dí zaa kpulɔŋ maai kɛ̂i,

³Amɔŋ kaloŋ-ŋai dí mò Anuŋ ma dîyɛɛi, “Gáa íkili ŋá a gɛ́ɛ Deeƃé è ǹûai ŋí tɛ̀ɛ a gɛ́ɛ dí kpulɔŋ maa kɛ́ a yá ínâŋ sàa mɛnii ma? Ífe gɔ́lɔŋ a gɛ́ɛ ǹûai ŋí dí pà a gɛ́ɛ dí sía ǹɔii su dí naa maa kpɛ́ɛ a gɛ́ɛ dí kɔ́ pɛ́lɛ kûa dí kúyee mɛi ɣále?”

⁴Anuŋ è Deeƃé ŋɔnûai sòŋ é díla-leɣa pú, é díyokpo-ŋai maa tée zamai díwulaŋ mɛi-pere é dítɛɛ pôlu.

⁵Gɛ́ɛ tí, núu tɔnɔ ta è pà Deeƃé pɔ́-naa é m̀ó ma berei daâ ƃâa kùla la a ŋɔnûai da dítɛ̀ɛi. Deeƃé è nûa tɛ̀ɛ a gɛ́ɛ dí m̀ó ǹûai ŋí dîa ǹyɛɛi, “Gâloŋ ǹyɛɛ ká lɛ́ɛ Zɛleko é lɛ́ɛ la zu ká lá-leɣa é tɛ́ kálɛɛ pâi.”

⁶Gâloŋ Anuŋ da ŋɔnûai kɛ́ɛ da gɔ̀lɔŋ a gɛ́ɛ daâ Deeƃé líi ŋwána mɛni kɛ́i, dí lì dí káne wála buu lɔ́ɔlu mɛi saaƃa (80,000) kɔ́lɛ a gɛ́ɛ díkɔ kɔ́-keleŋ-ŋa yá dí zia-ƃela féla fé la Mɛsepotamia mɛi pere kpiniŋ su da Siria lɔii Maaka da Zoba kpiniŋ su.

⁷Gɔ́ kɔ́-keleŋ zia-ƃela wála buu saaƃa káo feerɛ (32,000) dí díyà a gɛ́ɛ dí kɔ́ dimɛni mai da Maaka kaloŋ ŋɔkɔ-kuluƃa-ŋai dí pà dí díƃûui pú Mɛdeba kɔlɛ ma. Amɔŋ kɔ-kuluƃa-ŋai dia máŋ dí díkpîŋ kpɛ̀tɛ dítaa-ŋai su dí pá gɔ́i kɔ́ mɛni ma.

⁸Deeƃé kɛ́ɛ a m̀ɛnii ŋí mɛ́nii, è Zoa da Eezuɛ kɔ́ kɔ́-ƃelai kélee tɛ̀ɛ.

⁹Amɔŋ-ŋai dí kùla dítaa-ŋai su dí pá dí kpɛyɛŋ gɔ́ kɔ́ ŋ̀énei ŋá dítaa-lêei ŋɔsiɣãŋ lá. M̀aa tãi tí, gâloŋ-ŋai pà a gɛ́ɛ dí kpɔŋ mâa tɛ̀ɛ dípɔi, díkɛ̀ maa kpɛ̂ŋ kɛ̂i víyeŋ ŋá pere.

¹⁰Zoa è gɔ̀lɔŋ a gɛ́ɛ díkpɔara-ƃelai díkɛ̀ dípôlu-pere da-ŋa dí ƃò dítuɛ-pere. Gɛ́ɛ tí, Zoa è Eezuɛ ŋɔkɔ-kuluƃa-ŋai ŋ̀wála-walaa-ŋa kùla zu é dítɔɔ Siria-ŋai kɛ̀ dípôlu pere díperêi.

¹¹È nâa gɔ-kuluƃa-ŋai gbéli-ŋai pù ǹêɣe Abisai yée mu. Diai ŋí ƃé kɛ̀ tɔɔ-ni Amɔŋ-ŋai perêi.

¹²Zoa è mò ǹyɛɛi, “À kɛ̀ Siria-ŋai da kɛ̀ a díwala-walaa é tɛ́ɛ ḿâ, gɛ̀ ní ka pâi ŋ́gula-yeei kɛ̂i. À kɛ̀ Amɔŋ-ŋai da kɛ̀ a díwala-walaa é tɛ́ɛ kâa, gɛ̀ ní ŋa pâi pâi ŋá kákula-yeei kɛ̂i.

¹³Ka kɛ́ a kátɔɔ̂i kpanaŋɔɔ, ká kálii kpele a gɛ́ɛ ká kɔ́ kúnûai da Ɣâla ŋɔtaa-lêe-ŋai mɛni ma. Yâwɛɛ a pâi m̀ɛnii kɛ̂i nyíi ǹɛ̂lɛɛi a ǹîai.”

¹⁴Zoa da ŋɔkɔ-kuluƃa kpului dí lì a gɛ́ɛ dí pɛ́lɛ Siria-ŋai dîa. Kɛ́lɛ gɛ́ɛ Siria-ŋai da díkaai díkelee dí pù.

¹⁵Amɔŋ-ŋai dí gàa nɔ́ a gɛ́ɛ Siria-ŋai díkɛ̀ pûi, dia máŋ dí pɛ̀lɛ pûi Eezuɛ-ŋai gbéli-ŋai yêei kɛ̀ Abisai pôlu perei. Dí pù dítɛɛ daa-lêei su. Gɛ́ɛ tí, Zoa è lène pôlu é lí Zerusâlɛŋ.

¹⁶Siria-ŋai kɛ́ɛ da gáa a gɛ́ɛ Eezuɛ-ŋai daâ díyee mɛi ɣálei, dí kɔ́ kɔ́-ƃela kùla Siria taa-leei da-ŋa su Yufeletii Ya-leei vóloi kulai-pere a gɛ́ɛ dí kpɔ́ŋ dîa. Zoba kâloŋ Adadezɛ ŋɔkɔ-kuluƃa-ŋai mɛi-nuui Soba ƃé dí dɔ̀ɔ dílaa túɛ.

¹⁷Deeƃé kɛ́ɛ a mɛ̀nii ŋí duŋ mɛ̀nii, è Eezuɛ kɔ-kuluƃa-ŋai kélee sìɣe da dîa-ni dí Zɔdiŋ Ya-leei tíyeŋ dí lí dí kpiyɛ̂ŋ dí perêi. Deeƃé è ŋɔkɔ-kûluƃa-ŋai kpɛ̃̀yɛŋ Siria-ŋai perêi dí pɛ́lɛ kɔ́ɔ ma da dîa-ni.

¹⁸Eezuɛ-ŋai dí Siria-ŋai tùaŋ. Kɛ́lɛ Deeƃé è Siria kɔ kɔ́-keleŋ sia-ƃela wála lɔ́ɔlu mɛi feerɛ (7,000) pàa, kɔ-kuluƃa wála buu náaŋ (40,000) da dílaa túɛ nuui kɛ́tɛi Soba pàa.

¹⁹Adadezɛ ŋɔyée mu-ƃelai dí gàa nɔ́ a gɛ́ɛ Deeƃé aâ díyee mɛi ɣále a tɔ̃yâi, da Deeƃé ni dí díloai kpɛ̀tɛ dí díkpîŋ kɛ́ a ǹyaa Deeƃé ǹyée mu-ƃela. É síɣe ŋ̀elei tí ma, Siria-ŋai dífe wɔ́lɔ fáa ní ma a gɛ́ɛ díkpɔŋ mâa da tɛɛ Amɔŋ-ŋai pɔ́ kɔ́ kɔ́ mɛni su.