Read Kpelle Kɔlɔnikɔ Maa-ŋuŋ 20 Bible Online

Kɔlɔnikɔ Maa-ŋuŋ 20 - Kpelle bible

Kɔlɔnikɔ Maa-ŋuŋ 20

¹È kɛ̀ a vólo láa ƃóɔɔ tãi nyíi kâloŋ-ŋa da kâa lì la kɔ́ kɔ̂i. Ɣele tɔnɔ da Zoa è Eezuɛ kɔ-kûluƃa-ŋai sìɣe a gɛ́ɛ dí lí kɔ́ kɔ́. Dí lì dí Amɔŋ-ŋai dílɔii síɣe. Kɛ́lɛ Gâloŋ Deeƃé è lɛ̀ɛ Zerusâlɛŋ. Zoa è lì é pɛ́lɛ Laba taa-leei ma é naa sòŋ.

²Deeƃé kɛ́ɛ a pâi, è lì é díɣâla-pɔkɔɔŋ Maakɔŋ ŋɔkâloŋ ƃɔrɔi síɣe é zèe ŋ̀ûa. M̀ɔrɔi ŋí ŋɔwuyɛ è kɛ̀ a gôo ŋɔpãŋ 75. Kɔni-sɔ̃ɔ kpanaŋɔɔ è kɛ̀ m̀ɔrɔi ŋí ma. Deeƃé è ŋɔ́nɔ sãâ támaa sìɣe daai ŋí su.

³Naa pôlu ma, Deeƃé è ŋɔ́nɔ daai su-ƃelai sìɣe é díkɛ a ǹyée mu-ƃela díkɛ tíi kɛ̀ mì. Díkɛ tíi kɛ̂i a wúru ƃéla kɔli, kɔli-kɔɔ-ŋa kɔlɔ da yûɔ-ŋa. Deeƃé è mɛni sîi tɔnɔi ŋí kɛ̀ a Amɔŋ-ŋai dítaa-ŋai kélee su-ƃela. Nya ƃe Deeƃé da ŋɔkɔ-kuluƃa-ŋai kélee dí lène pôlu dí lí Zerusâlɛŋ.

⁴Naa kɛ́ɛ tí, laa-sâa è tòo Eezuɛ-ŋai da Felesia-ŋai kɛ̀ Gezɛ díloai. Gɔ́i ŋí su ƃé Sibɛka nyíi kɛ̀ a Usai-nuui è Felesia-ŋai dínamu-sirɛi nyíi da kâa dòli a Sipâi paa la. Maa tãi tí ma dí Felesia-ŋai yée mɛi ɣâle.

⁵Gɔ́i dɔnɔ è ŋɔ́nɔ tèe Felesia-ŋai da Eezuɛ-ŋai díloai. Gɔ́i ŋí ŋɔtãi ƃé Zaiɛ ǹóŋ Ɛlana è Laami nyíi kɛ̀ a Gâa taa-leei su nuui Golaya ǹêɣei pàa la. Laami ŋɔkpálai ŋuŋ è kɛ̀ yɛ̂ɛ seɣe-pala siaŋ tɔɔ wûru.

⁶Naa pôlu ma, gɔ́i dɔnɔ è ŋɔ́nɔ tèe Gâa taa-leei su. Kɔ-kuluƃa tɔnɔ è kɛ̀ naa ǹyée-gbua è kɛ̀ puu káo feerɛ, gɔ́ɔ-gbua kɛ́ ƃò puu káo feerɛ. Ǹalôŋ ŋí è kɛ̀ a gɔ-kuluƃa-ŋai dísuui su-nuui dɔnɔ.

⁷Báai, è Eezuɛ-ŋai maa fôo. Nya ƃe Deeƃé ǹêɣe Semaiya ǹóŋ Zonetaŋ è pà é baa.

⁸Ǹúu saaƃai ŋí Deeƃé da ŋɔkɔ-kuluƃa-ŋai dípàai, díkɛ̀ a Gâa taa-leei su kɔ-kuluƃa-ŋai dísuui su-ƃela.