Read Kpelle Kɔlɔnikɔ Maa-ŋuŋ 25 Bible Online

Kɔlɔnikɔ Maa-ŋuŋ 25 - Kpelle bible

Kɔlɔnikɔ Maa-ŋuŋ 25

¹Gâloŋ Deeƃé da gɔ-kuluƃa-ŋai mɛi-ƃelai dí kɔ̀yɛŋ dí Asafa, Eemaŋ, da Zedutuŋ dílônii-sinaai síɣe a gɛ́ɛ díkɛ ŋ̀ule too-mɛnii láa túɛ Ŋ̀âla-pɛrɛ Kɛ́tɛi mu. Dítii ƃé kɛ̀ díkɛ Ɣâla ŋɔworɛ̂-wooi ƃò wule-woo, kɔnîŋ pɛlɛ-pɛlɛɛ, gbaya-gbaya da nyɛ̃-nyɛ́ŋ woo-ŋa su. Diai dí dílaa sìɣe m̀ɛnii ŋí kɛ́ mɛni mai ƃé kɛ̀ a:

²Asafa ǹônii-sinaai Zakɔ, Zosɛ, Nɛtaniɛ da Asarela. Dílaa túɛ-nuui ƃé kɛ̀ a Asafa. Asafa a kâa Ɣâla ŋɔwóoi ƃó ƃɛ́i kélee gâloŋ a kâa m̀o ma a gɛ́ɛ é m̀ó naai.

³Zedutuŋ ǹônii-sinaai ƃé kɛ̀ a: Gedalia, Zeri, Zesaya, Simei, Asabia, da Matitia. Díkelee díkɛ̀ lɔ́ɔlu mɛi da. Dínâŋ Zedutuŋ ƃé kɛ̀ dílaa túɛ. Díwɔ̂ tii ƃé kɛ̀ a gɛ́ɛ díkɛ Ɣâla ŋɔwóoi ƃò, díkɛ laa-ma-tɛ da sɛɣɛ-fei tɛ̀ɛ Yâwɛɛ pɔ́ a kɔnîŋ woo.

⁴Eemaŋ ǹônii-sinaa puu káo náaŋ ƃé kɛ̀ a: Bukia, Matania, Uziɛ, Sebuɛ, Zerimɔ. Anania, Anani, Iliata, Gidaati, Lomaŋti Izɛ, Zosiƃɛkasa, Maloti, Otiɛ da Maɣaziɔ.

⁵Eemaŋ è kɛ̀ a Ɣâla ŋɔlóno kɛ́-ƃelai dɔnɔ. Ɣâla è góno tèe ǹyêei a ǹônii-sinaai puu káo náaŋ ŋí da lônii-nɛyaa saaƃa a ƃaa kɛ́-maa.

⁶Emaŋ ǹônii-sinaai ŋí da kâa kɛ̀ wule toôi díkɛ kɔnîŋ da nyɛ-nyɛ́ŋ ɣale Yâwɛɛ ŋɔpɛ́rɛ kɛ́tɛi mu dínaŋ yée mu. Asafa, Zedutuŋ da Eemaŋ díkɛ tíi kɛ̂i gâloŋ ǹyaa kpîŋ-kpiŋ yée mu.

⁷Zinâa puu káo náaŋ ŋí kélee díkɛ a wule too-ƃela pɔlɔ-ŋa. Díƃarâa Liiva-ŋai dia máŋ dí kɛ̀ a wule too-ƃela pɔlɔ-ŋa. Díkelee díkɛ̀ a núu ŋ̀uŋ feerɛ pôlu buu lɔ́ɔlu mɛi saaƃa káo lɔ́ɔlu mɛi saaƃa (288).

⁸Tíi è kɛ̀ ǹúui kélee yêei gɛ́ mɛni ma, núu-tɔ̂ɔ, núu-pɔlɔ kpaa ƃɔ̂i.

⁹Dí ŋ̀ule too-ƃelai ŋáa kɔ̀lɛ a núu-kpulu buu feerɛ káo náaŋ. Dí díkelee dílaa pɔ̃yɛ díkaa-laai su-ƃelai láa túɛ-nuui láa mu-pere a tɛɛ-ŋa. Ǹyaŋ bere ƃé dí dílaa túɛ-ƃelai láa pɔ̃yɛ la ɣɛli ma dítii kɛ́ perei ma: M̀aa-ŋuŋ, Asafa ŋɔkáa-laai su-nuui, Zosɛ, veerɛi, Gedalia, zaaƃai, Zakɔ, ǹáaŋ, Zeri, ǹɔ́ɔlui, Nɛtaniɛ, m̀ɛi-dai, Bukia, m̀ɛi-feerɛi, Zɛsarela, m̀ɛi-saaƃai, Zesaiya m̀ɛi-náaŋ, Matania, buui, Simei, buu-káo-tɔnɔi, Azariɛ, buu-káo-feerɛi, Asaƃia, buu káo-saaƃai Sebuɛ, buu káo náaŋ, Matitaya, buu káo-lɔ́ɔlui, Zɛrimɔ, buu káo-lɔ́ɔlu mɛi-dai, Anania, buu káo-lɔ́ɔlu mɛi-feerɛi, Zosibɛkasa, buu káo-lɔ́ɔlu mɛi-saaƃai, Anani, buu káo-lɔ́ɔlu mɛi-náaŋ, Malɔti, buu-feerɛi, Iliata, buu-feerɛ káo-tɔnɔi, Otiɛ, buu-feerɛ káo-feerɛi, Gidaati, buu káo saaƃai, Maaziɔ, buu káo-naaŋ, Lomati Izɛ.