Read Kpelle Kɔlɔnikɔ Maa-ŋuŋ 28 Bible Online

Kɔlɔnikɔ Maa-ŋuŋ 28 - Kpelle bible

Kɔlɔnikɔ Maa-ŋuŋ 28

¹Gâloŋ Deeƃé è Eezuɛ tii kɛ́-ƃela kpaya-kpayai tòli, ǹúu-suu-ŋai láa túɛ-ƃelai, diai kɛ̀ ǹúu-kpulu-ŋai mɛi kɛ̀ tíi kɛ̂i gâloŋ m̀ii, diai kɛ̀ ǹúu wála-ŋai da ǹúu ŋuŋ tɔnɔ-tɔnɔ mɛi, ŋɔtaa-tulɛ-ŋai mɛi káa-ƃelai, ǹônii-sinaai, diai kélee kɛ̀ tii kɛ̂i ŋɔpɛ́rɛ kɛ́tɛi lái, gɔ-kuluƃa kpaya-kpayai da ǹúu ŋuŋ-ŋai dí díŋa tɛ́ ma Zerusâlɛŋ.

²Gɛ́ɛ tí, è mù-siɣe é tɔ́ɔ ǹyɛɛ dîai, “Ŋánûa, ka káwoli tɔ́ɔ ḿâ. Ŋá gbɛtɛ ŋ́gili ŋá a gɛ́ɛ ŋá pɛ́rɛ tɔɔ ƃɛ́i kwa pɔri Yâwɛɛ ŋɔgbanaŋ-woo-kɛɛ maa Gãlai seêi naai da ƃɛ́i Kúɣâlai a pɔri gɔ̀ɔ tɔɔ̂i naai. Ŋá mɛni kpɛtɛɛ kɛ́ a pîlaŋ bɛ́rɛi ní tɔɔ mɛ̂ni ma.

³Kɛ́lɛ Ɣâla è mò ḿâ ǹyɛɛi, ‘Ífa pɔ̂ri pɛ́rɛ tɔɔ̂i ḿaa mɛ̂ni ma, kpɛ́ni fêi, íkaa a kɔkuluƃa. Ya ǹúu támaa páa.’

⁴Kɛ́lɛ, é máŋ kɛ̀ tí, Yâwɛɛ, Eezuɛ-ŋai Díɣâlai è ŋ́zîɣe zu ŋánûai sáma é ŋ́gɛ a kâloŋ Eezuɛ mɛi wɔ́lɔ-wɔlɔ da wɔlɔ-wɔlɔ. È Zuda siɣe Eezuɛ-ŋai sáma a núu láa-tuɛ nuu. È ǹâŋ ŋɔsuui sìɣe Zuda-ƃelai sáma. È kɛ̀ a ǹîa mɛni é ńziɣe ǹâŋ ŋɔsuui su-ƃelai sáma a ŋ́gɛ a kâloŋ Eezuɛ-ŋai kélee mɛi.

⁵È lônii-sinaa támaa tɛ̀ɛ ḿbɔ. Kɛ́lɛ è ńoŋ Saloma siɣe dísama a gɛ́ɛ é kɛ́ a kâloŋ Yâwɛɛ ŋɔkâloŋ-laai su.

⁶“È mò ḿâ ǹyɛɛi, ‘Ílôloŋ Saloma ƃé pâi Ŋápɛrɛi tɔɔ̂i, kpɛ́ni fêi, ŋá zìɣe a ńoŋ. Ŋa pâi kɛ̂i a ǹâŋ.

⁷A kɛ̀ Saloma a ŋ̀óli tɔ̀ɔ ḿâ é ŋátɔ̂ŋ-ŋai mɛi káa yɛ̂ berei a sâa gɛ̂i lai. Ŋa pâi gɛ̂i ŋɔkâloŋ-laai su é kôya wɔ́lɔ-wɔlɔ da wɔ́lɔ-wɔlɔ.’

⁸“M̀ɛni ma, ŋa kámarê kɛ̂i káai a Eezuɛ-ƃelai kélee ŋɛ́i da Yâwɛɛ, Kúɣâlai a gɛ́ɛ ká káyee sée Yâwɛɛ Kúɣâlai ŋɔ tɔ̂ŋ-ŋai kélee mu a gɛ́ɛ ká ǹɔii lɛ́lɛɛi ŋí sɔlɔ ƃó é lɛ́ɛ kánîa-pɛlɛɛi yêei a díkɔ̃liŋ wɔ́lɔ-wɔlɔ da wɔ́lɔ-wɔlɔ.”

⁹“Ńoŋ Saloma, ínâŋ-ni Díɣâlai kɔ́lɔŋ, ítii kɛ́ mi a ílii kélee. Íkili kúla kpɔ́ ítii kɛ́ mi, kpɛni fêi, Yâwɛɛ è núu líi su mɛni kélee da ŋɔkili-ŋa siai kɔ́lɔŋ. A kɛ̀ yâ gɔ̀ri, yâ pâi gâai. Kɛ́lɛ, a kɛ̀ yâ ípolu tɔɔ m̀a, a pâi ípilii kpɔ́ wɔ́lɔ-wɔlɔ da wɔ́lɔ-wɔlɔ.

¹⁰É lɛ́ɛ íkili ŋá a gɛ́ɛ Yâwɛɛ a ísiɣe zu a gɛ́ɛ í ŋɔpɛ́rɛ maa-waai tɔ́ɔ. M̀ɛni ma, kɛ́ a ítɔɔ̂i kpanaŋɔɔ.”

¹¹Nya ƃe Deeƃé è bɛ́rɛi tɔɔ-pere maa pɔkɔɔŋ tɛ̀ɛ ǹóŋ Saloma pɔ́. È pia-saai, bɛ́rɛi gbîŋ-kpîŋ, zãai pui kɛ̂i, ŋ̀elei-su-pere loŋpo-ŋai da loŋpoi zu-pere ŋ̀ɔi, da Gwaa Ma-waai Ŋɔkwaa Ma-waa Kɛ́tɛi maa loŋpoi ƃɛ́i da su-mɛni lɛɛ kɛ̀ naai maa pɔkɔɔŋ kélee tɛ̀ɛ bɔ́.

¹²M̀ɛni kpɛtɛɛi kélee è gɛ̀ é pîlaŋ bɛ́rɛi kɔlɛ ma mɛni-ŋai diai kélee tɛ̀ɛ bɔ́. È loŋpo-ŋai kɛ̀ a dinaŋɔɔ mai da zãa-laai kɛ́ loŋpo-ŋai kɛ̀ Ɣâla ŋɔpɛ́rɛi mai da zãa lâai kɛ́-kwaai ma kɛ̀ zama-sãa maa-waa-ŋai kélee mɛ̂ni mai naa mɛni kpɛtɛɛ tɛ̀ɛ bɔ́ máŋ.

¹³Deeƃé è ŋɔ́nɔ berei lɛ́ m̀a a pɔri zâla láa-soŋ-ƃelai da Liiva-ŋai ŋá kɔlɛ̂i la díi-ŋai kɛ́ mɛ̂ni ma Yâwɛɛ ŋɔpɛ́rɛi mui. È ŋɔ́nɔ díi kɛ́-sɛŋ fólo-ŋai kpɛtɛ pere lɛ̀ dîa tɛi-tɛi.

¹⁴È gôo sɛŋ-folo-ŋai da gáne sɛŋ-folo-ŋai kélee díwiɛ lɛ̀ tɛi-tɛi yɛ̂ɛ berei dítii kɛ́-pere è kɛ̀ lai,

¹⁵gôo laŋpo see-wuru-ŋai díwiɛ,

¹⁶gôo-ŋai kɛ̀ gbólo maa-waa-ŋai láa teƃelei ŋái díwiɛ, da gáne-ŋai kɛ̀ gáne teƃele-ŋai mɛ̂ni mai.

¹⁷È ŋɔ́nɔ gôoi kɛ̀ gɔli taɣãŋ lá ƃóɔɔ ŋái mɛ̂ni mai, bane-ŋai, gbele kɔɛɛ-ŋai da gôo sɛŋ-fólo-ŋai díwiɛ lɛ̀ da gáne sɛŋ fólo-ŋai tɛi-tɛi.

¹⁸Ǹaa pôlu ma, è ŋ̀âla-teƃelei kɛ̀ a gbɛtɛɛ a gôo waai géreŋ sɛŋ kúŋ nɛ̃ɛi ŋɔwiɛ lɛ̀, géleŋ dí gbɛ̀tɛ ŋ̀âla-taa kooŋ-sãai mɛ̂ni ma zoo-ŋai da kâa ŋ̀âlai mɛ̂ni ma. Goôŋ-sãai ŋí ƃé díkoôŋ è kɛ̀ a bɛlɛ́ɛ Yâwɛɛ ŋɔgbanaŋ-woo kɛ́ɛ m̀aa Gãlai mɛi.

¹⁹Gâloŋ Deeƃé è mò ǹyɛɛi, “Nyíŋi-ŋai kélee káa a Yâwɛɛ ǹyaa kpîŋ ǹyée pɔ̂ɔ nyíi è dɛ̀ɛ ḿbɔ a kili-ŋa pôno é pîlaŋ la berei ma yâ pɔ̂ri bɛ́rɛi tɔɔ̂i lai.”

²⁰Ǹaa kɛ́ɛ tíi, Deeƃé è mò ǹóŋ Saloma m̀a ǹyɛɛi, “Kɛ́ a ítɔɔ̂i kpanaŋɔɔ, íkili kuláa a ǹɛ́lɛɛ í díi ŋí kɛ́. Ífe yao, kpaa máŋ ílii é kɔ́ kɔ̀, kpɛ́ni fêi, Íɣâlai Yâwɛɛ, kpaa máŋ Ŋáɣâlai káa íkɔlɛ. Vé pâi ǹɛɛ̂i naa í fɛ́ɣɛ, kpaa máŋ é bôlu tɔɔ yâ é lɛ́ɛ la zu díi-ŋai díkaa Yâwɛɛ ŋɔpɛ́rɛi mai é kpɛ́ɛ.

²¹Tíi káa zâla láa-soŋ-ƃelai da Liiva-ŋai yêei Ŋ̀âla-pɛrɛi Kɛ́tɛi mu. Díŋaa kɔlɛɛ̂i díkpulu ma díkpîŋ kpɛtɛɛ díi-ŋai kɛ́ mɛ̂ni ma Ɣâla ŋɔpɛ́rɛi mɛ̂ni ma da diai kélee da ǹyɛrɛ tii sii kélee kɛ̂i. Díi kɛ́-ƃela kpaya-kpayai da ǹûai da pâi díwoli tɔɔ̂i íwoo ma a dílii kélee.”