Read Kpelle Kɔlɔnikɔ Maa-ŋuŋ 5 Bible Online

Kɔlɔnikɔ Maa-ŋuŋ 5 - Kpelle bible

Kɔlɔnikɔ Maa-ŋuŋ 5

¹Lubiŋ ƃé kɛ̀ a Eezuɛ ǹóŋ maa-ŋuŋ. Kɛ́lɛ è ǹyii a ǹâŋ ŋɔnɛnîi. M̀ɛnii ŋí è gɛ̀ dí ŋɔlóŋ maa-ŋuŋ laai kùla ǹyêei dí dɛɛ Zosɛ pɔ́. M̀ɛni ma dífe ǹáa pɔ̃yɛ ní ƃɛ́i maa nɛ̃ɛ̂i kɛ̀ dí bɔ̃yɛ naa díkaa-laai kɔlɔi su.

²Bere máŋ Zuda è kɛ̀ la a ŋ̀wála-wâlaa ǹîa da ǹêɣe-ni sáma kâloŋ-ŋa dí kúla ŋɔsuui sui, fɛ̂ɛ dí Eezuɛ ǹóŋ maa-ŋuŋ-laai kúla ǹyêei dí dɛɛ Zosɛ pɔ́.

³Lubiŋ kɛ̀ a Eezuɛ ǹóŋ duɛ-tuɛi. Ǹônii ƃé kɛ̀ a: Anosi, Paalu, Ɛsilɔŋ da Kami.

⁴Zoɛ ŋɔsuui su-ƃelai ƃa: Gɔ ǹâŋ Gɔ ǹâŋ Simaiya, Gɔ kɛ́ ƃò a Simei ǹâŋ. Simei è kɛ̀ a

⁵Maka ǹâŋ, Maka kɛ́ ƃò a Leaya ǹâŋ. Leaya è kɛ̀ a Baa ǹâŋ, Baa kɛ́ ƃò kɛ̀ a

⁶Beera ǹâŋ. Beera ƃé kɛ̀ a Lubiŋ ŋɔsuui su-ƃelai láa túɛ-nuui. Asiria kaloŋ è wɔ́lɔ Beera sòŋ é lí la a kɔ-soŋ. Gâloŋ ŋí láa ƃé kɛ̀ a Tikila Pilasɛ.

⁷Lubiŋ ŋɔsuui su-ƃelai díkaayɔɔ-ŋai láa káa ŋí yɛ̂ɛ berei dísuui è kɛ̀ lai. Dia ƃa: Zeiɛ, Zɛkɔraya,

⁸da Asazi ǹóŋ Bela. Asazi è kɛ̀ a Sima ǹóŋ. Sima ǹyaŋ è kɛ̀ a Zooɛ ǹóŋ. Díseɛɛ è kɛ̀ Aroɛ yá-ŋûa pere é tóo Nebo da Baa-Meoŋ loai.

⁹Dí lì kpɔ́ vóloi kula-pere é lɛ́ɛ la zu dí lí vɛ̃ɛ-kpâlaŋ tée ŋá Yufeletii Ya-leei kɔlɛ. Dí gɛ̀ tí, kpɛ́ni fêi, dítaa-tulɛ-ŋai è ƃûu ƃò díyêei a díkɛɛ kɛ̀ Giliai.

¹⁰Sɔ̂ɔ kɛ́ɛ a Kâloŋ, ǹûai ŋí Lubiŋ nuu suui su-ƃelai dí wɔ́lɔ kɔ́ pɛ̀lɛ Agiri-ŋai dîa dí díyee mɛi ɣále dí dípaa dí sée dílɔii su. Ǹɔii-ŋuŋ ŋí káa Gilia lɔii kpìniŋ ŋɔfólo kulai-pere.

¹¹Gâa ŋɔsuui è kɛ̀ Lubiŋ ŋɔsuui kɔlɛ é síɣe Basãŋ é seri Saleka.

¹²Zoɛɛ ƃé kɛ̀ a dílaa túɛ-nuui, Safaŋ kɛ́ ƃò a veerɛi. Zanai da Safa dí kɛ̀ a golii da kpɛ́ni láa túɛ-ƃela Basãŋ.

¹³Díkaayɔ-ŋai ƃé kɛ̀ a: Mikaɛ, Mɛsulaŋ, Seba, Zorai, Zakaŋ, Zia da Ɛbɛ. Díkelee díkɛ̀ lɔ́ɔlu mɛi-feerɛ.

¹⁴Ǹûai ŋí ƃé kɛ̀ a Uri ǹóŋ Abiai ŋɔlonii. Dísuui kɔ́ɔ è pìlaŋ Abiai, Uri, Zaloa, Gilia, Mikaɛ, Zesisai, Zado da Buzi dîa.

¹⁵Aƃidiɛ ǹóŋ Ai, gɛ́ ƃò ŋɔ́nɔ a Guni ǹóŋ ŋɔlóŋ ƃé kɛ̀ golii ŋí láa túɛ.

¹⁶Gâa ŋɔsuui su-ƃelai dí kɛ̀ Gilia, Basãŋ da naa kɔlɛ ma kpanaŋ-ŋai su. Díkɛ Salɔŋ ƃɛ́i kala támaa è kɛ̀ naa dítaa-tulɛ-ŋai mɛni mai.

¹⁷Dí ǹûai ŋí ní láa siɣe dínuu-suui-ŋai láa siɣe kɔlɔi ma Zotaŋ kâloŋ-laa kɛ́ koraŋ su Zuda lɔii mɛi da Zɛroboaŋ ŋɔkâloŋ-laa koraŋ su Eezuɛ-lɔii mɛi.

¹⁸Kɔ-kuluƃa (44,760) wála-wâlaa buu náaŋ káo náaŋ, ŋuŋ lɔ́ɔlu mɛi feerɛ pôlu buu lɔ́ɔlu mɛi da ƃé kɛ̀ Lubiŋ, Gâa da Manasɛ nuu sii gbului kɛ̀ vóloi-kulâi-pere sáma. Dí kɛ̀ kpɔ́ a kɔ́ kɔ́-ƃela wála-walaa. Da kâa kɔ̀ a ƃóa-sɔ̂kpɔ-ŋa da kerâŋ. Da kâa dímaa kɔ̃ɔ kpɔ́ a díyee ma kɔli-karaŋ a ǹɛ́lɛɛ.

¹⁹Dí lì dí kɔ́ pɛ́lɛ Agiri sii ma Zɛtu, Nafisi da Noda sii-ŋai dîa.

²⁰Dí díkili tɔ̀ɔ Ɣâla ma gɔ́i ŋí su. Nya ƃe Ɣâla è dífɛli-wooi mɛ̀ni é kpɔ́ŋ dîa dí Agiri-ŋai, Zɛtu-ŋai, Nafisi-ŋai, Noda-ŋai da díkpɔŋ mâaa-ƃelai kélee yée mɛi ɣále. Dí ǹûai ŋí ní yée mɛi ɣâle, kpɛ́ni fêi, Ɣâla è kɛ̀ dípôlu gɔ́i ŋí su.

²¹Lubiŋ, Gâa da Manasɛ nuu suui kɛ̀ Vóloi kulâi-perei díkɔ kɔ́-ƃelai dí soo-fáleŋ wála-wala buu lɔ́ɔlu (50,000), ƃála wála-wala ŋuŋ feerɛ pôlu buu lɔ́ɔlu (250,000) da wɛle-soo (2,000) wála-wala feerɛ soŋ gɔ́i ŋí su. Naa pôlu ma, dí ŋɔ́nɔ núu wála ŋuŋ tɔnɔ (100,000) sòŋ a kɔ-sôŋ-ŋa.

²²Dí núu támaa pàa gɔ́i ŋí su, kpɛ́ni fêi, Ɣâla ƃé kɛ̀ kɔ̂i dímɛni ma. Gɛ́ɛ tí, dí sèe ǹɔii su é lɛ́ɛ la zu dí lí a dia gɔ́ perei su.

²³Manasɛ ŋɔsuui gbulu nyíi kɛ̀ Vóloi kulâi-perei è ƃûu ƃò kpɔ́ a zu kɛ́tɛ. Díseɛɛ è kɛ̀ é síɣe Basãŋ lɔii su é tóo Baa Ɛmɔŋ é seri Senɛ da Ɛmɔŋ Yeei ma.

²⁴Díkoli-ŋai láa túɛ-ƃelai ƃé kɛ̀ a Ɛfɛ, Isi, Iliɛɛ, Aziriɛɛ, Zelemaya, Odaviaŋ da Zadiɛɛ. Dí kɛ̀ a kɔ-kuluƃa wála-walaa-ŋa tɔ̂ɔi kpanâŋɔɔ.

²⁵Kɛ́lɛ dífe kɛ́ ní a díteniŋ ƃôɔɔ dínâŋ ni Díɣâlai yêei. Dí dípôlu tɔ̀ɔ ma díkɛ̀ ǹûai Ɣâla è díkpɛ̂i díɣâla-ŋai fɛlîi ǹɔii tí su.

²⁶Nya ƃe Ɣâla è Asiria kaloŋ Puɛ nyíi da kâa dòli a Tikila-Pilɛsɛi kíli kùla é pá é Lubiŋ, Gâa da Manasɛ ŋɔsuui gbulu nyíi kɛ̀ Vóloi kulai-pere sìɣe é lí a dia a kɔ sôŋ-laai. È lì a dia é da-ŋa tɛɛ Ala, Abɔ, Ara da Gosɛŋ Ya-leei kɔlɛ ma. Díkaa naa é tóo sâa ma.