Read Kpelle Kɔlɔnikɔ Veerɛi 11 Bible Online

Kɔlɔnikɔ Veerɛi 11 - Kpelle bible

Kɔlɔnikɔ Veerɛi 11

¹Leoboaŋ kɛ́ɛ a seri Zerusâlɛŋ, è Zuda da Bɛŋsima dísuui su kɔkuluƃa-ŋai ŋáa tɛ̀ gîe ma díkɛ ƃò a kɔkuluƃa wála ŋuŋ tɔ̂nɔ pôlu buu lɔ́ɔlu mɛi-saaƃa (180,000). Nya ƃe è gbɛ̀tɛ gíli-ŋa a gɛ́ɛ é lí é kɔ́ pɛ́lɛ Eezuɛ ma é ŋɔkâloŋ-laai kɛ́ ǹɔii kélee mɛi.

²Nya ƃe Yâwɛɛ è lòno Ɣâla ŋɔlóno kɛ́-nuui Semaiya pɔ́ ǹyɛɛ,

³“Mó Zuda kaloŋ Leoboaŋ nyíi gáa a Saloma ǹóŋ ma da Eezuɛ-ŋai díkaa Zuda da Bɛŋsima lɔii kpiniŋ sui,

⁴Yâwɛɛ ǹyɛɛi, ‘Káfe kɔ́ pɛ̀lɛ ká ǹûai dîa. Kákelee ka lene pôlu ká lí ká pɔ́-taai. Kpɛ́ni fêi, ńyãa ƃé mɛnii ŋí kɛ̀.’ ” Nya ƃe dí díyee sèe Yâwɛɛ wóo mu dí lene pôlu. Dífe ŋɔ́nɔ kɔ́ pɛlɛ ní Zɛroboaŋ ma.

⁵Leoboaŋ è nâa sèe Zerusâlɛŋ é taa-ŋa tɔɔ a gɛ́ɛ dí Zuda da Bɛŋsima lɔii-kpiniŋ maa kɔ̃ɔ.

⁶Daa-ŋai kpîŋ ƃé kɛ̀ a: Bɛpeleɣɛ̃ɛ, Itaŋa, Tekoa,

⁷Bɛɛ Zuɔ, Soko, Adulaŋ,

⁸Gâa, Marisa, Zifi,

⁹Adoraŋ, Lakesi, Azika,

¹⁰Zora, Aizalɔŋ da Iburɔŋ. Daa-ŋai ŋí ƃe è Zuda da Bɛŋsima lɔii-kpiniŋ maa kɔ̃ɔ la.

¹¹È siɣãŋ kpanaŋɔɔ tìnaŋ dîa é kɔkuluƃa kpaya-kpaya-ŋa see dímɛi é mii-sãa, ɔle-wulɔ da ŋwã̂ai tɛɛ naa.

¹²È kpála ŋá-ɣale kɔli-kalaŋ-ŋa da kpála-ŋa tɛ̀ɛ daa-lee-ŋai kélee su a gɛ́ɛ díkɛ a taa-lêe tɔ̂ɔi kpanaŋɔɔ-ŋa. Nyíŋi è gɛ̀ Zuda da Bɛŋsima lɔii kpiniŋ-ŋai dí lɛ́ɛ Leoboaŋ yée mu.

¹³Naa kɛ́ɛ tíi, zâla láa-soŋ-ƃelai da Liiva-ŋai kɛ̀ Eezuɛ lɔii-kpiniŋ ŋ̀ua pere díkelee dípà Zuda.

¹⁴Liiva-ŋai dí díyee kùla díkpâlaŋ-ŋa tii da díkɔ̃liŋ kélee su dí pa dísee Zuda da Zerusâlɛŋ kpɛ́ni fêi, Zɛroboaŋ da diai lɛ̀ɛ bôlu gâloŋ-laai su dífe Liiva-ŋai káa ní a Yâwɛɛ ŋɔsâla láa soŋ-ƃela.

¹⁵Zɛroboaŋ è gbɔ́ɔi sala láa-soŋ-ƃela tɔ̀ɔ díkɛ tíi kɛ̀ ŋâla-pɔkɔɔŋ-ŋai fɛli kwaa-ŋai ma. È ƃoli da niŋa-loŋ pɔkɔɔŋ-ŋa kpɛ̀tɛ a Ŋɔɣâlai.

¹⁶Nya ƃe ǹûai nyii-ŋai kùla Eezuɛ sii-ŋai su, nyii-ŋai kɛ̀ a díkili-tɔɔ Yâwɛɛ, Eezuɛ-ŋai Díɣâlai mai díkelee dílɛ̀ɛ Liiva-ŋai pôlu dí lí Zerusâlɛŋ a gɛ́ɛ dísâla kula Yâwɛɛ ma nyíi kɛ̀ a dínâŋ-ni Díɣâlai.

¹⁷Dí nâa gɛ̀ kpɔ́ Zuda kaloŋ lɔii tɔɔ̂i é kpanaŋ. Díkelee dí díyee sèe Leoboaŋ nyíi kɛ̀ a Saloma ǹóŋ mu a kóraŋ saaƃa, díkɛ tíi kɛ̀ mì yɛ̂ɛ berei dí gɛ̀ la a Deeƃé da Saloma dítãi.

¹⁸Leoboaŋ è Maâla nyíi kɛ̀ a Deeƃé ǹóŋ Zɛrimɔ ǹóŋ nɛnii kûla a ŋɔnɛnî. Maâla ǹee ƃé kɛ̀ a Abiai. Abiai è kɛ̀ a Zɛse ǹóŋ surɔŋ Ilia ǹóŋ nɛnî.

¹⁹Leoboaŋ da Maâla dílônii sinaa saaƃa maa sɔlɔ ƃô. Dílaa ƃé kɛ̀ a: Zeusi, Simariya da Zaâŋ.

²⁰Nya ƃe Leoboaŋ è ŋɔ́nɔ Maaka nyíi kɛ̀ a Abisaloŋ ǹóŋ nɛnii kùla a nɛnî. Da ǹyaa dí lônii sinaa náaŋ sɔlɔ ƃô. Dílaa ƃé kɛ̀ a: Aƃiza, Atai, Ziza da Silome.

²¹Leoboaŋ è kɛ̀ a ŋɔnɛnîi Maaka nyíi kɛ̀ a Abisaloŋ ǹóŋ nɛnii wɛ́liɛɛ kpɔ́ a ŋánaa é tɛ́ɛ ŋɔnɛ̂nii gbéli-ŋai da bɛlɛ-pɛlɛɛ-ŋai kélee dîa. Ŋɔnɛyãai kélee bù gîe ma è kɛ̀ a nɛyâa puu káo lɔ́ɔl mɛi-saaƃa. Bɛ́lɛ-pɛlɛɛi díkɛ a nɛyaa-pɛlɛ-pɛlɛɛ buu-lɔ́ɔlu mɛi-da ma. Ǹônii-sinaa díkɛ̀ buu-feerɛ káo-lɔ́ɔlu mɛi-saaƃa. Ǹônii-nɛyãai díkɛ ƃò buu lɔ́ɔlu mɛi da.

²²Nya ƃe Leoboaŋ è Aƃiza nyíi kɛ̀ a Maaka ǹóŋ-surɔŋ kɛ̀ ǹônii-sinaai kélee láa tuɛ a gɛ́ɛ é lɛ́ɛ gɛ́ é lɛ́ɛ bɔ́ɔ-ŋa a kâloŋ.

²³Kɛ́lɛ è tùa a táre-pere é ǹônii-sinaai gbéli-ŋai kɛ́ a nûa-kpaya-kpaya-ŋa Zuda da Bɛŋsima lɔii-kpiniŋ su daa-ŋai mɛi siɣãŋ è kɛ̀ a dínaŋɔɔ diai. È ŋɔ́nɔ sãa támaa tɛ̀ɛ dípɔ naa a díkɔ̃liŋ, é nɛnî támaa kɔ́ri dímaa mɛni ma.