Read Kpelle Kɔlɔnikɔ Veerɛi 15 Bible Online

Kɔlɔnikɔ Veerɛi 15 - Kpelle bible

Kɔlɔnikɔ Veerɛi 15

¹Naa kɛ́ɛ tíi, Ɣâla ŋɔmɔ̂leŋ è pà Odɛ ǹóŋ Azaria pɔ́-naa.

²Nya ƃe Azaria è lì é mó Asa da Zuda-ƃelai é pɛ́lɛ Bɛŋsimaŋ ŋɔsuui su-ƃelai kélee dîa ǹyɛɛi, “Ka ŋ́oo mɛ́ni. Yâwɛɛ káa kápôlu à kɛ̀ kà kɛ̀ bôlu. À kɛ̀ ka vɛli, ka pâi gâai. Kɛ́lɛ à kɛ̀ ka káyee kùla mu, a pâi ǹyée kulâi ká mu.

³Tãi sukôya yée mu, dɔ̃yâ Ɣalai fé kɛ́ ní ŋɔ́nɔ Eezuɛ. Zâla láa-soŋ-ƃelai dífe kɛ́ ní naa a gɛ́ɛ dí sɛŋ lɛ́. Ɣâla ŋɔtɔ̂ŋ fé kɛ́ ní naa máŋ.

⁴Kɛ́lɛ tãi mɛni kpɔ̂lu a pà lai, da tînaŋ Eezuɛ Ŋɔɣâlai Yâwɛɛ pɔ́-naa-pere dí vɛli, gɛ̀ ní da pâi gâai.

⁵Tãi tí yée mu, vé kɛ́ ní a ǹɛ́lɛɛ a gɛ́ɛ núu tɔnɔ é sía gbɔ́ɔi yee ma, kpɛ́ni fêi ǹɔii su-ƃelai díkɛ̀ mɛni kpɔ̂lu su.

⁶Maa tãi tí ma, lɔii-ŋuŋ tɔnɔ a kâa mu sìɣe nɔ́ é marâŋ lɔii-ŋuŋ su kara. Daa-leei nyíŋi a mu siɣe é marâŋ taa-lêei su kara, kpɛ́ni fêi Ɣâla è kɛ̀ mɛni kpɔ̂lu é lâai dîa a lii too pôlu sii támaa.

⁷Kɛ́lɛ mɛni a kpèra kâa, katɔɔ a gbanaŋɔɔ. Káfii fé kpɛ̀ɛ, kpɛ́ni fêi díi kélee kákaa gɛ̂i, ka pâi ŋɔfela-fêi sɔlɔ ƃôi.”

⁸Asa kɛ́ɛ a Azaria ǹóŋ Odɛ nyíi kɛ̀ a Ɣâla ŋɔlóno kɛ́-nuui wóo mɛnii, ǹíi è kula. Naa pôlu ma, è ŋâla-pɔkɔɔŋ-ŋai kélee wòlo é díkula Zuda lɔii da Bɛŋsima lɔii gwaa kélee ma. È díkùla daa-ŋai kélee su nyíi è gùla yêei kɛ̀ gɔ́i su Ifiraŋ ǹyée lɔii su. Nya ƃe è ŋ̀âla-teƃelei nyíi kɛ̀ Yâwɛɛ ŋɔpɛ́rɛi ŋɛ́i-tuɛi pɛ́ŋ-pɛlɛ.

⁹Gɛ́ɛ tí, è Zuda da Bɛŋsima-ƃelai é pɛ́lɛ ǹûai dîa nyii-ŋai kùla Ifiraŋ, Manasɛ da Simiɔŋ lɔii kpiniŋ sui ŋáa tɛ̀ díkîe ma. Ǹûai dí kùla Eezuɛ gwaa kélee ma dí pá bɔ́naa kpɛ́ni fêi dí gàa a gɛ́ɛ Ŋɔɣâlai Yâwɛɛ è kɛ̀ bôlu.

¹⁰Asa kɛ́ɛ a kâloŋ ŋɔkóraŋ buu káo lɔ́ɔlui ŋɔɣáloŋ zaaƃai su ƃé dí gɔ̃yɛ̂ŋ ŋí tòo la Zerusâlɛŋ.

¹¹Maa tãi tí ma, dí sâla kùla Yâwɛɛ ma a niŋa ŋuŋ lɔ́ɔlu mɛi-feerɛ (700) da ƃoli da ƃála wála lɔ́ɔlu mɛi-feerɛ (7,000) nyíi dí zɔlɔ ƃô a tãi dí wɔ́lɔ lì la gɔ́ kɔ̂i.

¹²Dí kpanaŋ-woo kɛ̀ a gɛ́ɛ da pâi kɛ̂i Yâwɛɛ pôlu nyíi gáa a dínâŋ-ni Díɣâlai a dílii kélee da dímɔ̂leŋ kélee.

¹³Kɛ́lɛ diai nyíi kélee dífe pâi kɛ̂i Yâwɛɛ nyíi gáa a Eezuɛ Ŋɔɣâlai pôlui, da pâi baâi é máŋ kɛ́ a lôloŋ, núu kɛ́tɛ, nɛnî, kpaa máŋ surɔ̂ŋ.

¹⁴Dí díwoo tɛ̀ kpɔ́ ɣelêi dí dífoo Yâwɛɛ ŋɛ́i a ɣelêi pere túru da sua-mĩla fɛ́ɛ woo su.

¹⁵Zuda-ŋai kélee kpɔ́ líi è kɛ̀ a náa kpɛ́ni fêi dí kélee dí gùla dílii su dí dífoo Yâwɛɛ ŋɛ́i. Dí Ɣâla kɔ̀ri kpɔ́ a kili-kula-pere, ǹyaŋ dí gàa. Nya ƃe Yâwɛɛ è fii-tɔɔ tɛ̀ɛ dípɔ ƃéla kélee ma.

¹⁶Nya ƃe Gâloŋ Asa è ǹâŋ-nee kùla dɔɔ̂i a gâloŋ ǹee kpɛ́ni fêi è kɛ̀ a Asira ɣâla-ŋɛi-kɛ maa wurii fɛli nuu. Gâloŋ è Asira ɣâla-ŋɛi-kɛ-maa wurii su tèe-tee a gbua-kpua é gélee kpɔ́ kéreŋ Kiidɔŋ Tiŋ-tiŋ su.

¹⁷Berei máŋ Asa fé pɔri ní ŋ̀âla da kpɛ́ni-ŋai dí kwaa maa-waa-ŋai kélee su karai la Eezuɛ gwaa kélee mai, kɛ́lɛ gíli-kelee è kɛ̀ a dɔ́ɔ Yâwɛɛ ma ŋɔkɛ-ɣeniɛi su.

¹⁸È pà a gôo da gáne-sãai nyíi da ǹâŋ dí wɔ́lɔ dɛ̀ɛ Ɣâla pɔi, Ŋ̀âla-pɛrɛ Kɛ́tɛi mu.

¹⁹Lii-see è kɛ̀ Eezuɛ a tãi Asa síɣe tãi ŋí ma é lɛ́ɛ la zu ŋɔkâloŋ-laai ŋɔkóraŋ buu-saƃaa káo lɔ́ɔlui su ƃé dí tela kɔ́ pɛlɛ la Eezuɛ ma.