Read Kpelle Kɔlɔnikɔ Veerɛi 17 Bible Online

Kɔlɔnikɔ Veerɛi 17 - Kpelle bible

Kɔlɔnikɔ Veerɛi 17

¹Asa kɛ́ɛ a saai, ǹóŋ Zeosafa è lɛ̀ɛ bɔ́ɔ-ŋa a kâloŋ. È ŋɔkâloŋ-laai su kpanaŋ Eezuɛ mɛni ma.

²Nya ƃe è kɔkuluƃa kpulu-ŋa ŋáa kɔ̀lɛ Zuda taa-lêe-ŋai siɣãŋ è kɛ̀ a dínaŋɔɔ dîai su. È gɔ́luluƃa-ŋai díkpanaŋtɔ̀ɔ Zuda da daa-ŋai kɛ̀ Ifiraŋ lɔii su nyíi ǹâŋ Asa è wɔ́lɔ gùla yêei kɛ̀i su.

³Ǹyaŋ Yâwɛɛ è wɔ́lɔ kɛ̀ Zeosafa pôlu kpɛ́ni fêi tãi è wɔ́lɔ ŋɔtíi kɔ́ɔ pìlaŋ lai, è wɔ́lɔ tùa yɛ̂ɛ berei ǹâŋ Deeƃé è wɔ́lɔ tùa lai. Vé wɔ́lɔ Bêe Ɣala-pɔkɔɔŋ fɛli ní.

⁴Kɛ́lɛ è wɔ́lɔ ǹâŋ Ŋɔɣâlai fɛ̀li é Ɣâla ŋɔtɔ̂ŋ ŋàa sèe kɛ́. Vé wɔ́lɔ lɛɛ ní Eezuɛ-ŋai dítûa-perei pôlu.

⁵Gɛ́ɛ tí, Yâwɛɛ è gɛ̀ ŋɔkâloŋ-laai tɔɔ̂i é kpanaŋ. Nya ƃe Zuda-ƃela dí pà a sama-sãa Zeosafa pɔ́ nyíi gɛ̀ é tɔ́ɔ kpɔ́ a zu kɛ́tɛ ƃaa kɛ́-maa támaa kɛ́ ƃò ma.

⁶È gíli tɔ̀ɔ Yâwɛɛ ma a gbanaŋɔɔ é ŋ̀âla da kpɛ́ni-ŋai kélee díɣâla fɛli kwaa-ŋai kélee ma kara da Asira ɣâlai fɛli nyii-ŋai kɛ̀ Zuda lɔii kpiniŋ sui.

⁷Tãi Zeosafa è gɛ̀ la gâloŋ-laai su a kóraŋ saaƃai, è ŋɔtíi kɛ́-ƃelai da-ŋa kùla zu a gɛ́ɛ dí lí dísɛŋ lɛ́ Zuda taa-ŋai su. Ǹûai lì zɛŋ lɛ́ siai ma dia ƃé kɛ̀ a: Bɛŋ-Ali, Obidaya, Zɛkɛraya, Nɛtaniɛ, da Makaya.

⁸È Liiva-ƃela mɛi-naaŋ da sâla láa-soŋ-ƃela feerɛ tɛ̀ɛ a gɛ́ɛ da dîa-ni dí lí. Liiva-ŋai ƃé kɛ̀ a: Semaiya, Nɛtania, Zebadia, Asaɛ, Simiramɔ, Zio Netaŋ, Adoniza, Toƃiza da To-Adoniza. Zâla láa-soŋ-ƃelai ƃɛ́ kɛ̀ a Ilasama da Zɛoraŋ.

⁹Dí Yâwɛɛ ŋɔtɔ̂ŋ-kɔlɔi sîɣe díli la Zuda lɔii-kpiniŋ gwaa kélee ma díkɛ nɛ̀ ǹûai dîa daa-ŋai kélee su.

¹⁰Nya ƃe Yâwɛɛ maa mɛni duŋ è kɛ̀ ǹɔii-ŋûŋ-ŋai kɛ̀ a dínaŋɔɔ Zuda lɔii ma díkelee dí yào a gɛ́ɛ díkɔ pɛ́lɛ Zeosafa ma.

¹¹Felesia-ŋai da-ni dí pà a sama-sãa Zeosafa pɔ́-naa. Dí pà a káne a díŋuŋ-fela fêi. Arebi-ŋai máŋ dí pà a taa-tulɛ-ŋa bɔ́naa. Dí pà a ƃála-sirɛ wála lɔ́ɔlu mɛi-feerɛ pôlu ŋuŋ lɔ́ɔlu mɛi-feerɛ (7,700) da ƃoli-sirɛ wála lɔ́ɔlu mɛi-feerɛ pôlu ŋuŋ lɔ́ɔlu mɛi-feerɛ (7,700).

¹²Zeosafa tɔɔ̂i è kpànaŋ kpɔ́ a ŋánaa é kɔkuluƃa-ŋa díkpanaŋ-ŋa da sãa-laai kɛ́ taa-lêe-ŋa tɔ̀ɔ Zuda gwaa kélee

¹³Ƃɛ́i dí mii-sãa támaa lâai kɛ̀ naai. È ŋɔ́nɔ kɔkuluƃa wála-walaa nyii-ŋai kɛ̀ a kɔ́kɔ-ƃela tɔɔ̂i kpanaŋɔɔ tɛ̀ɛ Zerusâlɛŋ.

¹⁴Dí dílaa sìɣe dísuu ma. Zuda ŋɔsuui láa túɛ kɔkuluƃa kɛ́tɛi láa ƃé kɛ̀ a Adina. Kɔ-kûluƃa wála ŋuŋ saaƃa (300,000) ƃé kɛ̀ ǹyée mu.

¹⁵Gɔlɛ ma nuui ƃé kɛ̀ a Zioana nyíi kɛ̀ kɔkuluƃa wála ŋuŋ feerɛ pôlu buu lɔ́ɔlu mɛi saaƃa (280,000) mɛi,

¹⁶Naa pôlu ma nuui ƃé kɛ̀ a Amasia ǹóŋ nyíi gbîŋ tɛ̀ɛ a gɛ́ɛ é tíi kɛ́ Yâwɛɛ mii. Kɔkûluƃa wála ŋuŋ feerɛ (200,000) ƃé kɛ̀ ǹyée mu.

¹⁷Bɛŋsima ŋɔsuui su kɔluluƃa kɛ́tɛi ƃé kɛ̀ a Ilaida. È kɛ̀ a kɔluluƃa tɔɔ̂i kpanaŋɔɔ. È kɛ̀ kɔkûluƃa wála ŋuŋ feerɛ (200,000) mɛi nyii-ŋai da kâa kɔ̀ a kerâŋ da kpála ŋá-ɣale kɔli-kalaŋ-ŋa.

¹⁸Bôlu ma nuui ƃé kɛ̀ a Ziozaba nyíi kɛ̀ kɔkûluƃa wála ŋuŋ tɔnɔ pôlu buu lɔ́ɔlu mɛi saaƃa (180,000) mɛi. Ǹûai ŋí díkɛ̀ a díkpîŋ kpɛtɛɛ kɔ́ kɔ́ mɛni ma.

¹⁹Ǹûai ŋí ƃé kɛ̀ tíi kɛ̂i gâloŋ mì Zerusâlɛŋ é tée nyii-ŋai pôlu kɛ̀ a díseeɛɛ ziɣãŋ taa-lêe-ŋai sui Zuda m̀ela kélee mai.