Read Kpelle Kɔlɔnikɔ Veerɛi 19 Bible Online

Kɔlɔnikɔ Veerɛi 19 - Kpelle bible

Kɔlɔnikɔ Veerɛi 19

¹Zeosafa nyíi kɛ̀ a Zuda kaloŋ, è lène pôlu Zerusâlɛŋ a gɔlɔi ponoɔɔ.

²Nya ƃe Ɣâla ŋɔlóno kɛ́-nuui nyíi da kâa dòli a Zeui nyíi kɛ̀ a Anani ǹóŋ-surɔŋ è lì bɔ́naa é mó mà ǹyɛɛi, “Gáa a mɛni lɛ́lɛɛ a gɛ́ɛ í kpɔŋ mâaa tɛ̀ɛ ŋ̀wana-lɔɔ-ƃelai pɔ́ í ŋɔ́nɔ tɔ́ɔ diai dífe Yâwɛɛ wɛ́ni-nii díƃelai ma pere? M̀ɛnii ŋí yaâ gɛ́i aâ gɛ́ Yâwɛɛ a ǹíi ŋwána yâ.

³Kɛ́lɛ é máŋ kɛ́ tí, ya mɛni lɛ́lɛɛ kɛ́. Kpɛ́ni fêi ya Asira ɣâla-ŋɛi-kɛ maa wurii kélee kúla ǹɔii ŋí su, íkili tɔɔ ŋɔ́nɔ Ɣâla ma.”

⁴Berei máŋ Zeosafa seeɛ è kɛ̀ la Zerusâlɛŋ, a kâa lì ǹûai pɔ́-naa Bɛɛsiba da ǹyée lɔii su Ifiraŋ ŋɔlɔii su a gɛ́ɛ é lóno dípɔ dí tínaŋ Yâwɛɛ nyíi kɛ̀ a dínâŋ-ni Díɣâlai pɔ́-naa pere.

⁵Nya ƃe è mɛni-saa ƃó-ƃela sèe ziɣãŋ-taa-lêe-ŋai kɛ́ Zudai kélee su.

⁶È mò dîa ǹyɛɛi, “Ka ká mɛi káa kpɔ́ a ǹɛ́lɛɛ m̀ɛni-ŋai su nyíi ka gɛ̀i, kpɛ́ni fêi káfe mɛni-saa ƃôi núu-kpune mɛni ma kɛ́lɛ kákaa mɛni-saa ƃôi Yâwɛɛ mì nyíi gáa kákɔlɛ ma a tãi ka kɛ̂ mɛnii ŋá-teei lai.

⁷Mɛni ma tɔɔ Yâwɛɛ ŋɔyao maa é kɛ́ kâa. Ka m̀ɛni-saai ƃó kpɔ́ a ǹɛ́lɛɛ, kpɛ́ni fêi Yâwɛɛ nyíi gáa a Kúɣâlai va fili mɛni ƃò kpaa máŋ é núu su ɣɛ́ɛ, kpaa máŋ é yèe pɛlɛ ǹá sɛŋ soŋ.”

⁸Zeosafa è ŋɔ́nɔ Liiva-ŋai, zâla láa-soŋ-ƃela da Eezuɛ nuu-suu-ŋai láa túɛ-ƃela lɛ̀ a gɛ́ɛ díkɛ Yâwɛɛ ŋɔtɔ̂ŋ mɛi kâa díkɛ ŋɔ́nɔ ǹûai loai kpɛ̂tɛ Zerusâlɛŋ. Ǹûai ŋí ni kélee seeɛ è kɛ̀ Zerusâlɛŋ kpîŋ.

⁹È dɔ̂ŋ-ŋai ŋí tɛ́ɛ dípɔ, “Ka tíi kɛ́ kpɔ́ a teniŋ-ƃo pere a kálii kélee Yâwɛɛ ŋɔyao-maai su.

¹⁰Mɛni-saai nyíi kélee kpɔ́ káƃarâi da pà là kápɔi, a nɛ̃ɛ ma díkula daa-lêei su, é máŋ kɛ́ a núu ŋwána mɛni, kpaa máŋ mɛni sîi da kpɛ́ni nyíi bîlaŋɔɔi dɔ̂ŋ mai, kpaa máŋ lia-woo ƃô, ka dília-woo ƃó a gɛ́ɛ dífe sɔnyɔ̂ŋ kɛ a Yâwɛɛ. À wàla kɛ́ tí, a pâi ǹíi ŋwânai kâa kánûai. Nyíŋi a kɛ́, gɛ̀ ní káfe pâi sɔnyɔ̂ŋ kɛ̂i.

¹¹Amaria nyíi gáa a zâla láa-soŋ-nuu kɛ́tɛi a pâi kɛ̂i kátuɛ m̀ɛni-ŋai kélee su nyii-ŋai bîlaŋɔɔi Yâwɛɛ mai. Isimɛi ǹóŋ Zibadia nyíi gáa Zuda nuu-suui mɛi a pâi kɛ̂i kátuɛ m̀ɛni-ŋai kélee bîlaŋɔɔi gâloŋ mai su. Ǹyaŋ Liiva-ŋai da pâi kɛ̂i a tíi kɛ́-ƃela kpaya-kpayai káŋɛi túɛ. Ka tûa kpɔ́ a lii-kpele pere. Yâwɛɛ é lûwa láa diai dîa da mɛni lɛ́lɛɛ kɛ̂i.”