Read Kpelle Kɔlɔnikɔ Veerɛi 21 Bible Online

Kɔlɔnikɔ Veerɛi 21 - Kpelle bible

Kɔlɔnikɔ Veerɛi 21

¹Zeosafa è nâa sàa dí ǹóo ǹâŋ-ni dí saa-loo kwaai ma Deeƃé ŋɔtaa-lêei su. Nya ƃe ǹóŋ Zɛoraŋ è lɛ̀ɛ bɔ́ɔ-ŋa a gâloŋ.

²Zɛoraŋ ǹêɣe-sinaai nyii-ŋai dínâŋ Zeosafa è wɔ́lɔ dímaa sɔlɔ ƃôi dia ƃé kɛ̀ a: Azaria, Zeiɛ, Zɛkɛrɔya, Azariau, Makɛɛ da Sifatia. È wɔ́lɔ ǹîa-pɛlɛɛ ŋí maa sɔlɔ ƃô a tãi è wɔ́lɔ kɛ̀ la a kâloŋ Eezuɛ lɔii mɛi.

³Dínâŋ è wɔ́lɔ káne da gôo támaa tɛ̀ɛ dípɔ é pɛ́lɛ tɔɔ-sãa sɔ̃ɔ kpanaŋɔɔ-ŋa dîa. È ŋɔ́nɔ dí sèe taa tɛi-tɛi mɛi nyii-ŋai siɣãŋ è kɛ̀ a dínaŋɔɔ dîa Zuda lɔii sui. Kɛ́lɛ è gâloŋ-laai tɛ̀ɛ Zɛoraŋ pɔ, kpɛ́ni fêi Zɛoraŋ ƃé kɛ̀ a ǹóŋ-surɔŋ maa-ŋuŋ.

⁴Zɛoraŋ kɛ́ɛ naa a dɔɔ̂i káa gâloŋ-laai sui, è ǹêɣe-ni kélee kpɔ́ pàa a ƃóa-sɔ̂kpɔ é pɛ́lɛ Eezuɛ kaloŋ lonii-sinaai da-ŋa dîa.

⁵Zɛoraŋ è wɔ́lɔ kɛ̀ a kóraŋ buu saaƃa káo feerɛ é lɛ́ɛ pâi kɛ̂i a kâloŋ. È gɛ̀ gâloŋ-laai su a kóraŋ lɔ́ɔlu mɛi-saaƃa Zerusâlɛŋ.

⁶È wɔ́lɔ tùa nɔ́ yɛ̂ɛ Eezuɛ kaloŋ-ŋai. Dûa-pere è wɔ́lɔ kɛ̀ nɔ́ yɛ̂ɛ Eɣa ŋɔnîa-pɛlɛɛ-ŋai da, kpɛ́ni fêi è wɔ́lɔ Eɣa ǹóŋ-nɛnii dɔnɔ kùla a ŋɔnɛnî. È wɔ́lɔ mɛni nyɔ́mɔɔ tâmaa kɛ̀ Yâwɛɛ ŋ́ɛi tuɛ.

⁷Berei máŋ dûa-pere è kɛ̀ la a nyɔ́mɔɔi, Yâwɛɛ fé kɛ́ ní ŋ̀wɛ̂lii é baa, kpɛ́ni fêi è wɔ́lɔ kpanaŋ-woo kɛ̀ Deeƃé yêei a gɛ́ɛ vé pâi Deeƃé ŋɔpɛ́rɛi su karâi. Yâwɛɛ è wɔ́lɔ góno tèe a gɛ́ɛ Deeƃé ŋɔsuui a pâi kɛ̂i Eezuɛ mɛi wɔ́lɔ-wɔlɔ da wɔ́lɔ-wɔlɔ.

⁸Tãi Zɛoraŋ è kɛ̀ la a kâloŋ, Idɔŋ-ƃela dítɔ̀ɔ Zuda ma dínaa tɔɔ díkpɔɔi yee ma dí díkpîŋ kaloŋ see.

⁹Nya ƃe Zɛoraŋ da ŋɔtíi kɛ́-ƃela kpaya-kpayai é pɛ́lɛ ŋɔkɔkɔ keleŋ-ŋai dîa dí lì a gɛ́ɛ dí kɔ́ pɛ́lɛ Idɔŋ-ŋai dîa. Kɛ́lɛ dí liɛɛi, Idɔŋ-ŋai dítìnaŋ dîa. Kɛ́lɛ dí dímu sìɣe a gbínii dí pú díkula dísama.

¹⁰É síɣe tãi tí ma, Idɔŋ-ŋai dí nâa kɛ̀ díkpɔɔi yee ma. Tãi tɔnɔi ŋí nɔ́ ƃé Lebina taa-lêei máŋ è tɔ̀ɔ la Zuda ma, kpɛ́ni fêi Zɛoraŋ è bôlu tɔ̀ɔ Yâwɛɛ ma nyíi kɛ̀ a ǹâŋ-ni Díɣâlai.

¹¹Zɛoraŋ è ŋɔ́nɔ ɣâla-pɔkɔɔŋ fɛli kwaa-ŋa ma kpɛ̀tɛ ǹyéei su Zuda lɔii su. Nyíŋi è wɔ́lɔ gɛ̀ Zuda da Zerusâlɛŋ-ƃela dí sɔnyɔ̂ŋ kɛ́ a Yâwɛɛ.

¹²Naa kɛ́ɛ tíi, Ɣâla ŋɔlóno kɛ́-nuui Ilaiza è kɔlɔ tɛ̂ɛ Zɛoraŋ mì. Gɔlɔi ŋí wóo ƃé kɛ̀ a: “Yâwɛɛ nyíi gáa a ínâŋ Deeƃé Ŋɔɣâlai ǹyɛɛi, ‘Ífe tûa-ni yɛ̂ɛ ínâŋ Zeosafa, kpaa máŋ Asa nyíi kɛ̀ a Zuda kaloŋ.

¹³Kɛ́lɛ ya tûa nɔ́ yɛ̂ɛ Eezuɛ kaloŋ-ŋai ǹyaŋ yâ gɛ́ Zuda da Zerusâlɛŋ-ƃelai da tûa yɛ̂ɛ Eɣa ŋɔnûai. Yâ ílêɣe-ni paa da ínâŋ ŋɔkáayɔ-ŋai. Ǹûai ŋí tûa-pere è kɛ̀ a ǹɛ́lɛɛ é tɛ́ɛ yâ.

¹⁴Mɛni ma, Yâwɛɛ a pâi nâa ínûai kula-maa kɛ̂i, ínîa-pɛlɛɛi, da ínɛyâai. A pâi íkɔ̃liŋ kélee su karâi.

¹⁵Koi kɔlɔ-fela a pâi ísonii. Gɔlɔ-felai ŋi su a pâi kɛ̂i kɛ́tɛi kpɔ́ a ɣele kélee. Íkoi kɛ́ sòli kpɔ́ a ŋánaa. A pâi penei yâ a pulu-kula-kpàŋ.’ ”

¹⁶Naa kɛ́ɛ tíi, Yâwɛɛ è gɛ̀ Felesia, Arebia, da Itiopia-ƃela dí tɔ́ɔ Zɛoraŋ ma. Ǹûai ŋí ní dílɔii-ŋai díkɛ̀ Itiopia-ŋai dílɔii kɔlɛ ma.

¹⁷Nya ƃe dí pà dí kɔ́ pɛ́lɛ Zuda ma. Dí li kpɔ́ a gâloŋ kɔ̃liŋ lɛ́lɛ-lɛlɛɛ-ŋai kélee nyíi kɛ̀ gâloŋ-pɛrɛi mui é pɛ́lɛ ŋɔnîa-pɛlɛɛ-ŋai da ŋɔnɛyâai kélee dîa. Aɣazia nyíi kɛ̀ a ŋɔlôloŋ gbɛɛ-ŋai nɔ́ ƃé lɛ̀ɛ.

¹⁸Nyíŋi pôlu ma, Yâwɛɛ è koi-kɔlɔ-fela nyíi zále fé mai pìli Zɛoraŋ ma.

¹⁹È lɛ̀ɛ kpɔ́ gɔlɔ-felai ŋí su é lɛ́ɛ la zu góraŋ veerɛi kpɛɛ-ŋai su é nâa saa. Gɔlɔ-felai ŋí a kâa sòli kpɔ́ ma a ŋánaa. Ǹyée mu-ƃelai dífe m̀aa-kɛ-maai da kâa dɛ̀ɛ ǹân-ni pɔ́i da tɛɛ ní bɔ́.

²⁰Zɛoraŋ è wɔ́lɔ kɛ̀ a kóraŋ buu saaƃa káo feerɛ é lɛ́ɛ pâi kɛ̂i a kâloŋ. È gɛ̀ gâloŋ laai su a kóraŋ lɔ́ɔlu mɛi saaƃa Zerusâlɛŋ. Kɛ́lɛ tãi è sàa lai, núu da fé malôŋ see-ƃo ní. Dí ǹoo kwa da kpɛ́ni ma Deeƃé ŋɔtaai su. Dífe ǹoo ní gâloŋ-ŋai loôi.