Read Kpelle Kɔlɔnikɔ Veerɛi 22 Bible Online

Kɔlɔnikɔ Veerɛi 22 - Kpelle bible

Kɔlɔnikɔ Veerɛi 22

¹Zɛoraŋ saa pôlu mai, Zerusâlɛŋ-ƃelai dí ŋɔlôloŋ gbɛɛ-ŋai Aɣazia kɛ̀ a kâloŋ bɔ́ɔ-ŋa, kpɛ́ni fêi doo-ma-kɛ-ƃelai Arebi-ŋai dí Zioraŋ ǹóŋ-sinaai gbaya-kpaya kélee pàa a tãi díwɔlɔ tòo la mûui sui. Mɛni ma Aɣazia è nâa kɛ̀ a kâloŋ Zuda lɔii mɛi.

²Aɣazia è wɔ́lɔ kɛ̀ a kóraŋ buu-feerɛ káo feerɛ díkɛ gɛ̀ a kâloŋ. È kɛ̀ a kâloŋ Zerusâlɛŋ a kóraŋ tɔnɔ. Ǹee láa ƃé kɛ̀ a Atalia. Atalia è wɔ́lɔ kɛ̀ a Ɔŋri ǹóŋ ŋɔlòŋ.

³Aɣazia tûa-pere è wɔ́lɔ kɛ̀ nɔ́ yɛ̂ɛ Eea ŋɔnûai da, kpɛ́ni fêi ǹee è wɔ́lɔ déniŋ tɔ̀ɔ a mɛni nyɔ́mɔɔ kɛ́ɛ.

⁴È mɛni nyɔ́mɔɔ kɛ̀ Yâwɛɛ ŋ́ɛi-tuɛ yɛ̂ɛ berei Eɣa ŋɔsuui tûa-pere è kɛ̀ lai. Kpɛ́ni fei, tãi ǹáŋ è sàa lai, dia ƃé kɛ̀ a ǹia-woo ƃó-ƃela.

⁵È ŋɔ́nɔ ǹyée see dília-wooi mu da Eezuɛ-ŋai díkâloŋ Zoraŋ nyíi kɛ̀ a Eɣa ǹóŋ dí lí díkɔ pɛ́lɛi Siria Kaloŋ Azae ma Lemɔ Gilia. Asiria-ŋai dí Zoraŋ ŋwàna gɔ́i ŋí su.

⁶Nya ƃe è lène pôlu é lí Zariɛɛ taa-lêei su sále-lɔɔi ŋ̀wánai dí mò Lemɔ Giliai Siria kɔi su nyíi kɛ̀ da Siria Kaloŋ Azae díloai. Naa kɛ́ɛ tíi, Aɣazia nyíi kɛ̀ a Zuda kaloŋ è lì Zoraŋ naa kâai Zariɛɛ taa leei su.

⁷Naa kaai ŋí mɛni ƃé Ɣâla è wɔ́lɔ ǹyée kùla la Aɣazia mu. Aɣazia kɛ́ɛ a serii, da Zoraŋ dí lì a gɛ́ɛ dí Niŋsi ŋɔlôloŋ Zeu naa kaa. Zeu ŋí ƃe Yâwɛɛ è wɔ́lɔ zîɣe zu a gɛ́ɛ é Eɣa ŋɔsuui su karai.

⁸Tãi Zeu è kɛ̀ la Ɣâla ŋɔmɛni-ŋa-teɛɛi láa serii la Eɣa ŋɔsuui mai, è Zuda kaloŋ-lonii-ŋai kàa naa da Aɣazia ŋɔnûai dí nîa-pɛlɛɛi nyii-ŋai da Aɣazia ni dí pâi. Nya ƃe è díkelee kpɔ́ dípàa.

⁹Naa kɛ́ɛ tíi, Zeu è lì a gɛ́ɛ é Aɣazia kɔ́ri. Nya ƃe ǹûai kɛ̀ Zeu pôlui, dí lì dí Aɣazia soŋ. Aɣazia è kɛ̀ ǹoôi Sameria. Dí pà la dí dɛɛ Zeu pɔ. Nya ƃe Zeu è Aɣazia pàa dí ǹoo. Kpɛ́ni fêi, “Aɣazia è wɔ́lɔ kɛ̀ a Zeosafa nyíi wɔ́lɔ Yâwɛɛ wóo mɛ̀nii ǹóŋ.” Núu da fé lɛɛ ní Aɣazia ŋɔsuui su nyíi pɔri mâ è kɛ̀ mì a gɛ́ɛ é lɛ́ɛ gâloŋ-laai mɛi.

¹⁰Tãi Aɣazia ǹee Atalia è gɔ̀lɔŋ la a gɛ́ɛ da ǹóŋ Aɣazia paai, è nâa pɛ̀lɛ gâloŋ-lonii paa ma Zuda ŋɔsuui su.

¹¹Kɛ́lɛ Ziosiba nyíi kɛ̀ a Gâloŋ Zioraŋ ǹóŋ nɛnii è Aɣazia ǹóŋ-surɔŋ Zoasi kùla gâloŋ-lonii sama díkɛ̀ pâi dí paâi é ǹoo da ǹúui kɛ̀ mɛi kâai. È díloo ŋɔloŋpoi su. Ziosiba nyíi kɛ̀ a Gâloŋ Zioraŋ ǹóŋ nɛnii ƃé kɛ̀ a Zâla láa-soŋ-nuui Zeoiada ŋɔnɛnîi gɛ́ ƃò ŋɔ́nɔ a Aɣazia ŋɔsaaƃɔlɔ, zɛŋ ƃé gɛ̀ gɛ́ ǹôloŋ ŋí lòo.

¹²Zoasi è kɛ̀ loo-pere su Ɣâla ŋɔpɛ́rɛ kɛ́tɛi mu a kóraŋ lɔ́ɔlu mɛi-da. Tãi ŋí yée mu, Atalia ƃé kɛ̀ ǹɔii mɛi.