Read Kpelle Kɔlɔnikɔ Veerɛi 23 Bible Online

Kɔlɔnikɔ Veerɛi 23 - Kpelle bible

Kɔlɔnikɔ Veerɛi 23

¹Atalia kɛ́ɛ a kâloŋ ŋɔkóraŋ ǹɔ́ɔlu mɛi feerɛi su, Zioda è gbîŋ kpɛ̀tɛ da gɔ-kûluƃa láa túɛ-ƃelai kɛ̀ núu ŋuŋ tɛi-tɛi mɛi dí kpanaŋ-woo kɛ́ díloai. Ǹûai kpîŋ ƃé kɛ̀ a Azaria nyíi kɛ̀ a Ziroaŋ ǹóŋ-surɔŋ, Isimaɛ nyíi kɛ̀ a Zioana ǹóŋ-surɔŋ, Azaria nyíi kɛ̀ a Obɛɛ ǹóŋ-surɔŋ, da Maaseia nyíi kɛ̀ a Adaia ǹóŋ-surɔŋ é pɛ́lɛ Ɛlisafa ma nyíi kɛ̀ a Zikuli ǹóŋ-surɔŋ.

²Nya ƃe díkelee dí lì kpɔ́ Zuda lɔii gwaa kélee ma dí Liiva-ŋai da Eezuɛ nuu-suu-ŋai kélee mɛi-ƃelai kɛ́ daa-ŋai sui ŋáa tɛ́ díkîe ma. Dí pá a dîa Zerusâlɛŋ.

³Díkelee dí kpanaŋ-woo kɛ̀ da gâloŋ-ni Ɣâla ŋɔpɛ́rɛ kɛ́tɛi lá. Zeoiada è mò dîa ǹyɛɛi, “Gâloŋ ǹóŋ-surɔŋ a pâi kɛ̂i ǹɔii mɛi yɛ̂ɛ berei Yâwɛɛ è wɔ́lɔ góno tèe lai é pîlaŋ Deeƃé ŋɔsuui mai.

⁴Gɛ̀ ní m̀ɛnii ka pâi gɛ̂i nya ká ŋí: Zâla láa soŋ-ƃelai da Liiva-ŋai díkpulu zaaƃai nyíi pâi liî tíi kɛ̂i a Vii-tɔɔ-ɣelei a pâi kɛ̂i gbôŋ lá-ƃerei mɛi kâai.

⁵Gbului zaaƃai kɛ́ ƃò gâloŋ-pɛrɛi lá, zaaƃai kɛ́ ǹyái-la siɣãŋ la-ƃerei mɛi kâa, naa pôlu ma, gbakolo-ŋai gbéli-ŋai da pâi kɛ̂i Yâwɛɛ ŋɔpɛ́rɛ kɛ́tɛi maa kpɛ̂i.

⁶Núu da kélee fé lɔ̀ Yâwɛɛ ŋɔpɛ́rɛ kɛ́tɛi mu, fɛ̂ɛ nɔ́ zâla láa-soŋ-ƃelai da Liiva-ŋai nyii-ŋai díkaa tíi kɛ̂i naai, kpɛ́ni fêi dia ƃé dí maa wâai. Kɛ́lɛ ǹûai gbéli-ŋai da pâi kɛ̂i gwaa-ŋai mɛi kâai ƃɛ́i Yâwɛɛ è naa tɛ̀ɛ dípɔi.

⁷Liiva-ŋai da pâi kɛ̂i a dítinaŋɔɔ gâloŋ ma dí kɔ́kɔ-sãai kɛ́ ƃò díyêei tɛi-tɛi. Núu nyíi kélee pâi lɔ̂i Ŋ̀âla-pɛrɛ Kɛ́tɛi mui ka baa. Ƃɛ́i kélee gâloŋ a lì naai, ka kɛ́ nɔ́ bôlu.”

⁸Nya ƃe Liiva-ŋai da Zuda sinaai kélee kpɔ́ dí mɛnii kɛ̀ nyíi Zâla láa-soŋ-nuui Zeoiada è mò diai. Diai kélee kɛ̀ liî tíi kɛ̂i da diai dífe kɛ́-ni liî tíi kɛ̂i díkelee dí lì kpɛ́ni fêi Zeoiada nyíi kɛ̀ a zâla láa-soŋ-nuui fé ŋ̀óo tée-ni kɛ̀ dîa.

⁹Gɛ́ɛ tí, è gbála-ŋai da gɔ-kuluƃa-ŋai díkpala ŋá-ɣale kɔli-kalaŋ-ŋai tɛ̀ɛ gɔ-kuluƃa-ŋai mɛi-ƃelai pɔ́-naa. Gɔ́-kɔ-sãai ŋí díwɔ́lɔ kɛ a Gâloŋ Deeƃé pɔɔ. Díwɔlɔ kɛ̀ laai-kɛ pere su Ŋ̀âla-pɛrɛ Kɛ́tɛi mu.

¹⁰È ǹûai ŋí-ni tɔ̀ɔ gâloŋ kɔlɛ ŋ̀âla-teƃelei kɔlɛ díkɔkɔ-sãai kɛ́ ƃò díyêei. Dí tɔ̀ɔ é síɣe séɣai-pere é lí yá-ŋua-pere Ŋ̀âla-pɛrɛ Kɛ́tɛi mu.

¹¹Zeoiada da ǹônii-sinaai díkùla a gâloŋ ǹóŋ-surɔŋ dí gâloŋ-ƃɔrɔi sée ŋ̀ûa. Nya ƃe dí gbanaŋ-woo kɛ́ɛ maa kɔlɔi dɔnɔ tɛ̀ɛ bɔ́ dí nâa ǹɛ́ a gâloŋ. Dí nâa wúlɔ pù ŋ̀ûa dílaɣi dîyɛɛi, “Gâloŋ é lɛ́ɛ kú mɛi wɔ́lɔ-wɔlɔ!”

¹²Atalia kɛ́ɛ a ǹûai kîrɛ-siɣe da díyee-ŋa lókwa tiŋ mɛnii, gâloŋ mɛni mai, è nâa lì dípɔnaa Yâwɛɛ ŋɔpɛ́rɛi la.

¹³È nàa kàa é gâloŋ káa tɔɔ̂ŋ-ni ŋɔpɛ́rɛ yée-mu-wurii kɔlɛ Ŋ̀âla-pɛrɛ Kɛ́tɛi ŋɛ́i-tuɛ. Ŋɔtíi kɛ́-ƃelai da dúru fɛ́ɛ-ƃelai kélee dí kɛ́ ƃò tɔɔ̂i-ni gɔlɛ ma, ǹyaŋ ǹɔii su-ƃelai kélee dí kɛ̀ tɔɔ̂-ni naa díkɛ lii-nɛ̃ɛ kùla díkɛ túru fɛ̀ɛ, díkɛ laa-maa tɛ̂ wule tòo a wule-too sãa. Atalia kɛ́ɛ a m̀ɛnii ŋí naa káai, è làɣi ǹyɛɛi, “Kâloŋ yée mɛ-ɣale tua ká ŋí!”

¹⁴Nya ƃe Zeoiada è gɔ-kuluƃa-ŋai mɛi-ƃelai nyii-ŋai kɛ̀ gɔ-kuluƃa-ŋai mɛi tɛ̂ɛ ǹyɛɛ dîai, “Ka pá la gɔ-kuluƃa-ŋai mɛi-ƃelai loai. Ǹúui nyíi pâi lɛɛ̂i bôlui, ka baa.” Kpɛ́ni fêi zâla láa-soŋ-nuui è mò ǹyɛɛi, “Káfe bàa Yâwɛɛ ŋɔpɛ́rɛ kɛ́tɛi lá.”

¹⁵Dí nâa zòŋ tãi è kɛ̀ pâi serîi la zoo-siɣãŋ lá-ƃerei dí baa a m̀óa-sɔ̂kpɔi gâloŋ-pɛrɛi kɔlɛ ma.

¹⁶Zeoiada è nâa kpanaŋ-woo kɛ̀ a gɛ́ɛ da gâloŋ é pɛ́lɛ ǹûai kélee dîa da pâi kɛ̂i a Yâwɛɛ ŋɔnûa.

¹⁷Ǹûai kélee dí lì Bêe ŋɔpɛ́rɛ kɛ́tɛi lá dí ŋ̀wolo. Dí ŋɔɣâla-teƃelei wòlo-wolo da bɔɔkɔŋ dí tela ŋɔsâla láa-soŋ-nuui Mataŋ pàa ŋɔɣâla-teƃele-ŋai ŋɛ́i-tuɛ.

¹⁸Naa pôlu ma, Zeoiada è Yâwɛɛ ŋɔpɛ́rɛ kɛ́tɛi mɛi káa mɛni lɛ̀ɛ zâla láa-soŋ-ƃelai nyii-ŋai kɛ̀ a Liiva-ŋai yêei, nyii-ŋai Deeƃé è wɔ́lɔ dí lɛ̀ Ŋ̀âla-pɛrɛ Kɛ́tɛi mu a gɛ́ɛ díkɛ kéreŋ sala kula Yâwɛɛ mɛni ma yɛ̂ɛ berei bɔ̃yɛɛi la Mose ŋɔtɔ̂ŋ kɔlɔi sui a gɛ́ɛ da kɛ̀ sâla kulâi díkɛ lii-nɛ̃ɛ kùla díkɛ wule tòo yɛ̂ɛ berei Deeƃé è wɔ́lɔ mò lai.

¹⁹È ŋɔ́nɔ nûa tɔ̀ɔ Yâwɛɛ ŋɔpɛ́rɛ kɛ́tɛi ŋɔsiɣãŋ lá-ƃerei a gɛ́ɛ dífe fàa ma ǹúui nyíi maa fé waa nii é lɔ́ naa.

²⁰Zeoiada è gɔ-kuluƃa-ŋai mɛi-ƃelai, ǹûa-kpaya-kpayai da ǹûai láa túɛ-ƃelai kélee kɛ̀ ǹɔii sui sìɣe da dîa-ni dí gâloŋ síɣe dí kúla la Yâwɛɛ ŋɔpɛ́rɛ kɛ́tɛi lá dí tɛ́ɛ a ziɣãŋ lá-ƃerei nyíi kɛ̀ ziɣãŋ m̀élai kɛ̀ ŋ̀elei su perei lá dí lí gâloŋ-pɛrɛi lá dí zée gâloŋ-see-sɛŋ ŋá.

²¹Nya ƃe ǹûai kélee dílii-nɛ̃ɛ kùla a zu kɛ́tɛ. Kɛ́lɛ núu da fé láa-saa tée-ni daai su, kpɛ́ni fêi, dí Atalia pàa a ƃóa-sɔ̂kpɔ.