Read Kpelle Kɔlɔnikɔ Veerɛi 24 Bible Online

Kɔlɔnikɔ Veerɛi 24 - Kpelle bible

Kɔlɔnikɔ Veerɛi 24

¹Zoasi è wɔ́lɔ kɛ̀ a kóraŋ lɔ́ɔlu mɛi-feerɛ díkɛ gɛ̀ a kâloŋ. È kɔ́lɔ kɛ̀ gâloŋ-laai su a kóraŋ buu-naaŋ. Zeɛɛ è wɔ́lɔ kɛ̀ Zerusâlɛŋ. Ǹee láa ƃé wɔ́lɔ kɛ̀ a Zibia. Ǹee è wɔ́lɔ kùla Bɛɛsiba taai su.

²Zoasi è wɔ́lɔ tùa a zãa Yâwɛɛ ŋɛ́i tãi zâla láa-soŋ-nuui Zeoiada è wɔ́lɔ kɛ̀ la ɣele mai.

³Zeoiada è wɔ́lɔ nɛnî feerɛ kɔ̀ri Zoasi mɛni ma. Nya ƃe da dîa-ni dí lônii-nɛyaa da zinaa sɔlɔ ƃô.

⁴Naa loŋ kɛ́ɛ tíi, Zoasi è gbɛ̀tɛ gíli-ŋa a gɛ́ɛ é Yâwɛɛ ŋɔpɛ́rɛ kɛ́tɛi kpɛtɛ pôlu.

⁵Nya ƃe è zâla láa-soŋ-ƃelai da Liiva-ŋai tòli é mó dîa ǹyɛɛi, “Ka lí Zuda taa-ŋai kélee su ká góraŋ kélee ŋuŋ-fela fêi kúla ǹûai kélee dîa a gɛ́ɛ kú Káɣâlai ŋɔpɛ́rɛ kɛ́tɛi pɛ́ŋ-pɛlɛ la. Ka gɛ́ tí a maa félaa.” Kɛ́lɛ Liiva-ŋai dífe m̀ɛnii ŋí ŋaa-see kɛ́-ni ŋá ma.

⁶Gɛɛ tíi, gâloŋ è zâla láa-soŋ nuu-kɛtɛi Zeoiada tòli ǹyɛɛ mai, “Lé mɛni ƃé tí ífe niî gɛ́ ní Liiva-ŋai dí pá a ŋuŋ-fela fêi gáa ǹûai dîa Zuda da Zerusâlɛŋ nyíi Yâwɛɛ ŋɔyée mu-nuui Mose è wɔ́lɔ mò a gɛ́ɛ dí gɔlɛ Zua-kɔlɔ-seɣe ɣala-pɛrɛi tɔɔ mɛni mai?”

⁷Ǹɛnî sɔŋ nyɔ́mɔɔi tí da kâa dòli a Atalia ǹônii-sinaai dí lɔ̀ Ɣâla ŋɔpɛ́rɛ kɛ́tɛi mu dí zãa maa-waa-ŋai síɣe a gɛ̀ɛ díkɛ tíi kɛ̀ a dîa Bêe mɛni ma.

⁸Gâloŋ kɛ́ɛ a dɔ̂ŋ tɛ́ɛi, dí sɛŋ-kao kùla gãla kpɛ̀tɛ dí zee banâŋ ma Yâwɛɛ ŋɔpɛ́rɛ kɛ́tɛi ŋɔsiɣãŋ lá-ƃerei.

⁹Nya ƃe dítɔ̂ŋ tɛ̀ɛ Zuda da Zerusâlɛŋ gwaa kélee ma a gɛ́ɛ ǹûai kélee dí pá a ŋuŋ-fela fei Yâwɛɛ mɛni ma yɛ̂ɛ berei Ɣâla ŋɔtíi kɛ́-nuui Mose è wɔ́lɔ mò la vɛ̃ɛ-kpâlaŋ sui.

¹⁰Ǹúu láa túɛ-ƃelai da ǹûai kélee dí pà a díŋuŋ fela-fei a koi-nɛ̃ɛ pere díkɛ dòo zɛŋ-káo kula Gãlai su. Dílɛ̀ɛ gɛ̂i ti é lɛ́ɛ la zu ǹáa é fɛ́ɛ.

¹¹Tãi zɛŋ-káo kula Gãlai láa a kâa fɛ̀ɛ lai, Liiva-ŋai da kâa pà la gâloŋ ŋɔtíi kɛ́-ƃela kpaya-kpayai pɔ́-naa. Tãi ǹúu kpaya-kpayai da kâa sɛŋ-kao támaa kàa la Gãlai sui, gâloŋ kɔlɔ-pɔ̃yɛ-ƃelai da díi kɛ́-ƃelai kɛ̀ zâla láa-soŋ-nuui yée mui, da kâa pà dí Gãlai su ƃó dí ŋɔ́nɔ lí la dí zee pôlu zeêi. Da kâa nyíŋi kɛ̀ a tãi kélee é lɛ́ɛ la zu dí sɛŋ-kao támaa sɔlɔ ƃó.

¹²Gâloŋ da Zeoiada dí naa zɛŋ-káoi ŋí sìɣe dí dɛ́ɛ ǹûai pɔ́ a gɛ́ɛ dí díi kɛ́ la nyíi maa nɛɛ̂i dí gɛ́ Yâwɛɛ ŋɔpɛ́rɛ kɛ́tɛi mai. Dí pɛ́rɛ-kâŋ tɔɔ-ƃela da pɛ́rɛ pili ɣelêi-ƃela sìɣe a gɛ́ɛ dí Yâwɛɛ ŋɔpɛ́rɛ kɛ́tɛi kpɛtɛ. Dí ŋɔ́nɔ nûa sìɣe nyii-ŋai da kâa tíi kɛ̀ a kɔli da ƃara a gɛ́ɛ dí Ŋ̀âla-pɛrɛ Kɛ́tɛi pɛ́ŋ-pɛlɛ.

¹³Ǹûai kɛ̀ bɛ́rɛ tɔɔ mɛnii láa túɛi, díkɛ̀ a tíi kɛ́-ƃela kpanaŋɔɔ-ŋa. Bɛ́rɛ pɛ́ŋ-pɛlɛ mɛnii è lì tuɛ-pere a ǹɛ́lɛɛ díyee mu. Dí Ɣâla ŋɔpɛ́rɛ kɛ́tɛi pɛ́ŋ-pɛlɛ nɔ́ yɛ̂ɛ berei duɛ-tuɛi è wɔ́lɔ kɛ̀ lai. Dí ǹyée mu wuru-ŋa tɔ̀ɔ nyíi zoŋ kpɔ́ a gbanaŋɔɔi.

¹⁴Tãi díkpɛ̀ɛ la a díi kélee kɛ́ɛi, dí ŋɔ́nɔ pà pôlu a zɛŋ-káoi nyíi lɛ̀ɛi dí dɛɛ gâloŋ da Zeoiada dípɔ́-naa. Dí zɛŋ-káoi sìɣe dí Yâwɛɛ ŋɔpɛ́rɛ kɛ́tɛi mu-sãa da-ni kpɛtɛ la. Dí tíi kɛ́-sãa kpɛ̀tɛ, dí kéreŋ sala-kula sãa kpɛtɛ, dí pâne-ŋa kpɛtɛ, dí gôo da káne sãa kpɛtɛ la. Tãi Zeoiada è kɛ̀ la ɣele mai, da kâa kéreŋ-sala kùla Yâwɛɛ ŋɔpɛ́rɛ kɛ́tɛi lá a tãi kélee.

¹⁵Nya ƃe Zeoiada è nâa pɔlɔ kpɔ́ a ŋánaa. È kɛ̀ ɣele ma a kóraŋ ŋuŋ tɔ̂nɔ pôlu buu saaƃa (130).

¹⁶È sàa dínoo gâloŋ-ŋai loôi Deeƃé ŋɔtaa-lêei su. Dí ǹoo gwaai ŋí ma kpɛ́ni fêi è wɔ́lɔ mɛni lɛ́lɛɛ támaa kɛ̀ Eezuɛ lɔii su Ɣâla da Ŋ̀âla-pɛrɛ Kɛ́tɛi mɛni ma.

¹⁷Tãi Zeoiada è sàa lai, Zuda nua-kpaya-kpayai dí pà dí dílaa tí gâloŋ ma. Nya ƃe è ŋ̀óli tɔ̀ɔ díwoo ma.

¹⁸Gɛ́ɛ tí, dí nâa dípôlu tɔ̀ɔ Yâwɛɛ ŋɔpɛ́rɛ kɛ́tɛi ma da Ɣâla nyíi gáa a dínâŋ-ni Díɣâlai díkɛ nâa pɛ̀lɛ Asira fɛlîi Asira fɛli wurui mu da ɣâla da kpɛ́ni-ŋa. Tãi dí mɛnii ŋí kɛ̀ lai, Ɣâla è ǹíi ŋwàna dîa Zuda da Zerusâlɛŋ.

¹⁹Berei máŋ Yâwɛɛ è ŋɔlóno kɛ́-ƃelai dí ǹûai dísɔnyɔ̂ŋ lɛ̀ la diai, dífe wɔ́lɔ díwoli tɔɔ ní a dɔnɔ kpîŋ.

²⁰Nya ƃe Ɣâla ŋɔmɔ̂leŋ è pà zâla láa-soŋ-nuui Zeoiada ǹóŋ Zɛkɛrɔya mɛi é tɔ́ɔ ǹûai ŋɛ́i ǹyɛɛ dîai, “Ɣâla ǹyɛɛi, ‘Lé mɛni ƃé ka Yâwɛɛ ŋɔtɔ̂ŋ karâi lai.’ Káfé pâi ƃûu-ƃoi. Kpɛ́ni fêi ka kápôlu tɔɔ Yâwɛɛ ma, ǹyaŋ aâ bôlu tɔɔ kâa.”

²¹Gɛ́ɛ a kpɛɛ a lónoɔɔi, dí gbɛ̀tɛ a gɛ́ɛ dí baa. Nya ƃe gâloŋ è tɔ̂ŋ tɛ̀ɛ a gɛ́ɛ dí baa. Dí zɔ̀ɔ a kɔni dí baa Yâwɛɛ ŋɔpɛ́rɛ kɛ́tɛi kɔlɛ.

²²Mɛni lɛ́lɛɛi nyíi kélee Zɛkɛrɔya ǹâŋ è wɔ́lɔ gɛ̀ a gâloŋ Zoasi, gíli fé wɔ́lɔ lɛɛ ní ŋ̀á. Kɛ́lɛ m̀ɛnii é wɔ́lɔ gɛ̀i nya ƃé kɛ̀ é ǹóŋ páa. Tãi Zɛkɛrɔya è kɛ̀ sàai lai, è mò ǹyɛɛi, “Tɔɔ Yâwɛɛ é mɛnii ŋí káa nyíi ya gɛi, tɔɔ é ítoli í pá í ǹaa lɛ́ m̀a.”

²³Tãi góraŋ è kpɛ̀ɛ lai, kɔkuluƃa-ŋa dí kùla Siria lɔii su dí pá díkɔ pɛ́lɛ Zoasi ma dí Zuda da Zerusâlɛŋ nua-kpaya-kpayai kélee páa. Nya ƃe dí díkɔ̃liŋ kélee sìɣe dí dɛɛ díkâloŋ pɔnaa Dɛmɛika.

²⁴Berei máŋ Siria-ŋai dífe pá ní la a kɔkuluƃa támaai, kɛ́lɛ Yâwɛɛ è gɛ̀ dí kɔkuluƃa kpulu kɛ́tɛi yée mɛi ɣále. Kpɛ́ni fêi Zuda-ƃelai dí díyee kùla Yâwɛɛ mu nyíi gáa a dínâŋ-ni Díɣâlai. Mɛni-ŋa-teeɛ è nâa kɛ̀ Zoasi ma.

²⁵Tãi Siria kɔkuluƃa-ŋai díkɛ̀ lenêi la pôlui, dí Zoasi ŋwàna kpɔ́ a ŋánaa. Nya ƃe ŋɔtíi kɛ́-ƃelai dítɔ̀ɔ ma zâla láa-soŋ nuui Zeoiada ǹóŋ paa mɛni ma dí baa ŋɔgbìŋ ŋa. Gɛ̀ ní è sàa dí noo Deeƃé ŋɔtaa-lêei su. Kɛ́lɛ dífe ǹoo ní gâloŋ-ŋai loôi.

²⁶Diai ŋí ƃé tɔ̀ɔ Zoasi ma: Zaba nyíi kɛ̀ a Simie ǹóŋ-surɔŋ. Simie è kɛ̀ a Amɔŋ-nɛnii ǹóŋ-surɔŋ, Ziozaba nyíi kɛ̀ a Siŋri ǹóŋ-surɔŋ. Siŋri è kɛ̀ a Môa-nɛnî ǹóŋ-surɔŋ.

²⁷Ǹônii-sinaai maa mɛni-pɔlɔi da ǹônoi Ɣâla è wɔ́lɔ gɛ̀ é pîlaŋ Ŋ̀âla-pɛrɛ Kɛ́tɛi tɔɔ mɛni mai, é pɛlɛ m̀ɛni-ŋai mâ Ɣâla è mò é pîlaŋ m̀ai gélee pɔ̃yɛɛi gâloŋ-ŋai dímɛni-pɔlɔ kɔlɔi su. Ǹóŋ Amazia ƃé wɔ́lɔ lɛ̀ɛ bɔ́ɔ-ŋa a kâloŋ.