Read Kpelle Kɔlɔnikɔ Veerɛi 25 Bible Online

Kɔlɔnikɔ Veerɛi 25 - Kpelle bible

Kɔlɔnikɔ Veerɛi 25

¹Amazia è wɔ́lɔ kɛ̀ a kâloŋ Zuda lɔii su a tãi è wɔ́lɔ kɛ̀ a kóraŋ buu feerɛ káo-lɔ́ɔlui. Zèɛɛ è kɛ̀ Zerusâlɛŋ gâloŋ-laai su a kóraŋ buu-feerɛ káo-lɔ́ɔlu mɛi-naaŋ. Ǹee láa ƃé wɔ́lɔ kɛ̀ a Zeoiadaiŋ. È wɔ́lɔ kɛ̀ a Zerusâlɛŋ-nuu.

²Berei máŋ ǹíi fé kɛ́ ní a gulaa lá Yâwɛɛ ŋɔtíi kɛ́ mɛni mai, è wɔ́lɔ tùa a ǹɛ́lɛɛ Yâwɛɛ ŋɛ́i.

³Tãi è nâa sèe la gâloŋ-laa mɛi a ǹɛ́lɛɛi, è díi kɛ́-ƃela kpaya-kpayai pâa nyii-ŋai wɔ́lɔ ǹâŋ pàai.

⁴Vé wɔ́lɔ dílônii paa ní yɛ̂ɛ berei Yâwɛɛ è wɔ́lɔ mò la Mose ŋɔtɔ̂ŋ su ǹyɛɛi, “Káfe ǹâŋ-nuu pàa a ŋɔlôloŋ sɔŋ, kpaa máŋ ká ǹîa-pɛlɛɛ-ŋai páa a dínâŋ-ni sɔŋ. Kɛ́lɛ núu kélee é sáa gbîŋ sɔnyɔŋ mɛni mai,” ŋàa see é kɛ́

⁵Nya ƃe Amazia è Zuda-ƃelai kélee ŋáa tɛ̀ díkîe ma yɛ̂ɛ berei dísuui è kɛ̀ lai. É díta-ni see núu wála tɔnɔ (1,000) tɛi-tɛi mɛi. É da-ŋa see núu ŋuŋ tɛi-tɛi mɛi Zuda da Bɛŋsima dílɔii kpiniŋ su. Gɛ́ɛ tí, è ǹûai kélee lòno é síɣe kóraŋ buu-feerɛ ma é tɛ́. Diai kélee è díkaa nyii-ŋai kɛ̀ a kɔ́kɔ-ƃelai díkɛ̀ a núu wála ŋuŋ saaƃa (300,000). Ǹûai ŋí da kâa pɔri kɔ̂i a kpála da kɔkuluƃa ŋɔkpála ŋá-ɣale kɔli-kalaŋ.

⁶È ŋɔ́nɔ kɔ́kɔ-ƃela wála ŋuŋ tɔ̂nɔ (100,000) nyii-ŋai kùla Eezuɛi fela-fe a káne pãŋ wála lɔ́ɔlu mɛi feerɛ, ŋuŋ náaŋ pôlu buu lɔ́ɔlu mɛi saaƃa (7,480).

⁷Naa kɛ́ɛ tíi, Ɣâla ŋɔlóno kɛ́-nuu tɔnɔ è pà é mó mà ǹyɛɛi, “Tɔɔ-nuu, gɔ-kuluƃa-ŋai ŋí kùla Eezuɛi dífe lɛɛ ká pôlu ká lí gɔ́i ma. Kpɛ́ni fêi Yâwɛɛ fé Eezuɛ da Ifiraŋ-ƃelai pôlu.

⁸Ka dîa-ni kà lì, ímaŋ kpîŋ kɔ́ a lii-kpele-pere, Ɣâla a pâi káyee mɛi ɣâlei kákpɔara-ƃelai ŋɛ́i, kpɛ́ni fêi, pɔri káa Ɣâla mì a gɛ́ɛ é kpɔŋ ǹûai dîa kpaa máŋ é ǹûai yée mɛi ɣále.”

⁹Nya ƃe Amazia è Ɣâla ŋɔlóno kɛ́-nuui marê kɛ̀ ǹyɛɛi, “Gɛ̀ ní ganei ŋá dɛ̀ɛ dípɔi dɔɔ̂i ƃa mí?” Ɣâla ŋɔlóno kɛ́-nuui è ŋ̀óo su tòo ǹyɛɛi, “Yâwɛɛ a pɔri dámaa tɛɛ̂i ípɔ.”

¹⁰Gɛɛ tíi, Amazia è gɛ̀ gɔ-kuluƃa-ŋai kùla Ifiraŋ lɔii-kpiniŋ sui dí lene pôlu díli dípɔ-taai. Kɛ́lɛ dí dílii ŋwàna kpɔ́ a ŋánaa Zuda-ŋai dîa dí lene pôlu dípɔ-taai.

¹¹Nyíŋi pôlu ma, Amazia è mù-siɣe a wála-wala-laa é ŋɔkɔ-kuluƃa-ŋai síɣe da dîa-ni dí lí gbòlo-tiŋ-tiŋ su, dí núu wála puu (10,000) nyíi kùla Siɛi paa naa.

¹²Zuda-ƃelai dí ŋɔ́nɔ Siɛ-ƃelai ŋɔwála puu (10,000) sòŋ a dífulu. Kɛ́lɛ dí tɛ̀ a dia ǹyéei tôŋ su dí dí tóo ǹyéei kwára. Dí tòo kpɔ́ dísu é tée-tee a kpua-kpua.

¹³Kɛ́lɛ gɔ-kuluƃa-ŋai tí Amazia è dí tɛ̀ɛ pôlui, dí tòo Zuda taa-ŋai da-ni su díkɛɛ lenêi pôlu dípɔ-naai. Daa-ŋai ŋí díkɛ̀ é síɣe Bɛorɔŋ é tóo Sameria. Dí Zuda-ƃela ŋɔwál saaƃa (3,000) pàa dí lí a díkɔ̃liŋ kélee.

¹⁴Tãi Amazia è Idɔŋ-ŋai pàa lai, gɛɛ lenêi pôlui, è Siɛ-ŋai díɣâla-ŋai sìɣe. È lì a dia é dí síɣe a gbîŋ ɣala-ŋa é pɛ́lɛ dífɛliɛɛ ma. A kâa kɛ̀ kéreŋ-sala kulâi dîa.

¹⁵Nya ƃe Yâwɛɛ è ǹíi ŋwàna kpɔ́ Amazia ma a ŋánaa. Yâwɛɛ è ŋɔlóno kɛ́-nuu tɔnɔ tɛ̀ɛ nyíi mò Amazia ma ǹyɛɛi, “Lé mɛni ƃé ya ǹûai ŋí díɣâla-ŋai fɛliî mɛni mai, à kɛ̀ vé pɔri ní gbɔ́ɔi-ƃelai kulâi íyêei?”

¹⁶Kɛ́lɛ tãi Yâwɛɛ ŋɔlóno kɛ́-nuui è kɛ̀ lônoi lai, Amazia è mò mà ǹyɛɛi, “Kú í lɛ̀ a gâloŋ lia-woo ƃó-nuui da? Í mɛi sáa! Lé mɛni ƃe ŋí ya pâi zaa kɛ̂i?” Yâwɛɛ ŋɔlóno kɛ́-nuui é mɛi sâa kɛ́lɛ è mò ǹyɛɛi, “Ŋá gɔ́lɔŋ a gɛ́ɛ Ɣâla aâ gbɛ̀tɛ a gɛ́ɛ é íŋuŋ-la píli, kpɛ́ni fêi ya dûa sii ŋí kɛ́ ǹyaŋ ífe íwoli tɔɔ-ni ŋália-wooi ma.”

¹⁷Nyíŋi pôlu ma, Zuda kaloŋ Amazia è ŋuŋ pîlaŋ a ŋɔlia-woo ƃó-ƃelai. Nya ƃe è maa-foo kɔlɔi ŋí tɛ̀ɛ Zɛoasi nyíi kɛ̀ a Zɛoazi ǹóŋ pɔ́-naa. Zɛoazi ǹyaŋ è wɔ́lɔ kɛ̀ a Zeu ǹóŋ. Zɛoasi è wɔ́lɔ kɛ̀ a kâloŋ Eezuɛ lɔii mɛi a tãi tí. Amazia è mò ǹyɛɛi, “Pá kwa yá kú kúsĩi lá sée gîe ma.”

¹⁸Kɛ́lɛ Eezuɛ kaloŋ Zɛoasi è Amazia wóo su tòo ǹyɛɛi, “Lɛƃanɔŋ ɣaleŋ-wuru loŋ è wɔ́lɔ worɛ̂ tɛ̀ɛ Lɛƃanɔŋ sîda wurii pɔ́ ǹyɛɛi, ‘Íloŋ-nɛnii fé ḿî da ńoŋ-surɔŋ dí tûa.’ Nya ƃe Lɛƃanɔŋ lɔii su fɛnɛ-sɛŋ è pà é ƃɔ́rɔŋ ŋaleŋ-wurii ma é dáŋ.

¹⁹Ya môi a gɛ́ɛ yaâ Idɔŋ yée mɛi ɣále mɛni ma íkaa maa yoka têei a ƃoo-pere. Ye see ípɛrɛi lá. Lé mɛni ƃé ƃa mɛni kpɔlu kɔ̂ri la ka ílɔii Zuda kámɛni mai?”

²⁰Kɛ́lɛ Amazia fé ŋ̀óli tɔɔ-ni a dɔnɔ kpîŋ. Kpɛ́ni fêi, Ɣâla è gbɛ̀tɛ a gɛ́ɛ é dɛɛ Zɛoasi pɔ́ Idɔŋ-ŋai díɣâla-ŋai è kɛ̀ dífɛlii mɛ̂ni ma.

²¹Nya ƃe Zɛoasi nyíi kɛ̀ a Eezuɛ kaloŋ è pà é pɛ́lɛ mà. Da Zuda kaloŋ Amazia dí dísĩi sèe gîe ma Bɛɛ Simɛsi Zuda lɔii su.

²²Eezuɛ è Zuda ƃùleŋ. Nya Zuda ƃelai kélee kpɔ́ dí pú díli dítaa-ŋai su.

²³Gɛɛ tíi, Eezuɛ kaloŋ Zɛoasi è Zuda kaloŋ Amazia nyíi kɛ̀ a Zoasi ǹóŋ sòŋ gɔ́i su Bɛɛ Simɛsi. Amazia ǹâŋ ŋɔnàŋ ƃé kɛ̀ a Aɣazia. Nya ƃe Zɛoasi è pà a Amazia Zerusâlɛŋ é ziɣãŋ wóloɔɔ síɣe Ifiraŋ siɣãŋ lá-ƃerei é seri la zôŋ-wo su siɣãŋ lá-ƃerei. Gwaai ŋí ma ŋɔkôya è kɛ̀ a núu kɔ́ɔ ƃɔ̂rɔnii ŋuŋ lɔ́ɔlu mɛi-da (600).

²⁴Zɛoasi è gôo da gáne é pɛ́lɛ zãai kɛ̀ Ŋ̀âla-pɛrɛ Kɛ́tɛi mui kélee sìɣe nyii-ŋai Obɛɛ Idɔŋ è kɛ̀ mɛi kâai, da nyii-ŋai kɛ̀ gâloŋ pɛrɛ ŋɔsɛŋ-káo lâai kɛ́ kwaai ma, é ǹûai síɣe é lí a dia Sameria.

²⁵Zɛoasi Eezuɛ kaloŋ nyíi kɛ̀ a Zioazi ǹóŋ-surɔŋ è sàa kóraŋ puu káo-lɔ́ɔlu é tɛ́ɛ Zuda kaloŋ Zoasi ǹóŋ Amazia é lɛ́ɛ pâi saâi.

²⁶Mɛni-ŋai nyíi Amazia è gɛ̀ ŋɔkâloŋ-laai sui, gélee káa Zuda da Eezuɛ kaloŋ-ŋai dímɛni pɔlɔ-kɔlɔi su.

²⁷Amazia kɛ́ɛ a bôlu tɔɔ Yâwɛɛ mai, ǹûai dí tɔ̀ɔ ma é pú é kúla Zerusâlɛŋ é lí Lakee. Kɛ́lɛ dí lɛ̀ɛ bôlu dí lí Lakee dí baa naa.

²⁸Nya ƃe dí dɛ̀ soo-mɛi dí pá la pôlu dí nòo ǹâŋ-ni kɔlɛ Zuda taa-lêei su.